Hosiya
13 “Efremu naakaambuula, kwakaba kuzazama.
Wakali aanguzu mu-Israyeli.
Pesi wakaba aamulandu akaambo kakukomba Bbaala mpawo wakafwa.
2 Lino baliyungizizya zibi zyabo
Alubo balikupanga baleza bansimbi* ansiliva yabo,
Bazipanga kabotu zibumbwa, nkukwaamba milimu yoonse yabasikupanga zintu bali aaluzibo.
Mpawo bazibuzya kuti, ‘Bantu bapa zipayizyo abamyonte bana bang’ombe.’
3 Nkinkaako, bazooba mbuli mayoba aakuseeni,
Mbuli lume* lufwambaana kumana,
Mbuli buungu bupupululwa aaguwo kuzwa kulubuwa lwakupolela,
Mbuli busi buzwida aabbanga lyakaluli.
4 Pesi ndime Jehova Leza wako kuzwa munyika ya-Ijipita,
Taakwe uumbi Leza ngwaakazi kunze kwangu.
Taakwe umwi mufutuli kunze kwangu.
5 Ndakakuziba munkanda, munyika iitakwe mvula.
6 Bakakkutisikana aamachezezyo aabo,
Bakakkutisikana alubo myoyo yabo yakalisumpula.
Nkinkaako, bakandiluba.
7 Ndizooba mbuli mulavu muniini kulimbabo,
Mbuli siluwe* uulikuyubilila munyama munzila.
8 Ndizoobazida mbuli munyama uutegwa bbeya wasowa bana bakwe,
Ndizookwamuna twaango twabo.
Ndizoobanyonyoona nkukooko mbuli mulavu,
Munyama wamusokwe uzoobazavuula.
9 Uzookunyonyoona iwe O Israyeli,
Nkaambo wakandipapila, wakapapila sikukugwasya.
10 Ulikuli mwaami wako, kuchitila kuti akufutule kumyuunzi yako yoonse,
Abeendelezi* bako, mbwaakaamba atala ambabo kuti,
‘Ndipe mwaami abasilutwe’?
11 Ndakakupa mwaami kandinyemede,
Ndizoomugwisya abukali.
12 Mulandu wa-Efremu waputilwa,*
Chibi chakwe chabambwa.
13 Uzoosikilwa machise aali mbuli aamwanakazi uuyanda kutumbuka.
Pesi we, mwana mufuba-fuba,
Tazoozwi pe chiindi chakutumbuka nichasika.
14 Ndizoobanuna kuzwa kunguzu zyaKabanda,*
Ndizoobaboozya kuzwa kulufu.
YooLufu, lulikuli lumoola lwako?
YooKabanda, kuli kuli kunyonyoona kwako?
Lweetelelo tandizooluboni pe ameso aangu.
15 Nikuba kuti we wafulula aakati kamatete,
Luuwo lwakubuzwezuba luzoosika, luuwo lwaJehova,
Luzoozwa kunkanda kuti luyuminizye chikala chakwe akasawu kakwe.
Umwi muntu uzoomunyanga bunoti bwazintu zyakwe zyoonse ziyandikana.
16 Samariya uzoopegwa mulandu, nkaambo wabukila Leza wakwe.
Bazoowa aapanga,
Bana babo bazoopwayigwa,
Banakazi babo bali aamala bazooyawulwa.”