Zakkariya
11 “Jula milyango yako, iwe Lebbanoni,
Kuchitila kuti mulilo ulotye masamu aako aamukkedari.
2 Lila iwe yoomujunipa, nkaambo mukkedari wawa;
Masamu mapati anyonyoonwa!
Amulile inywe nimasamu mapati aakuBbashani,
Nkaambo lusaka lusyankene lwanyonyoonwa!
3 Amuswiilile! Beembeli balikulila,
Nkaambo bulemu bwabo bwanyonyoonwa.
Amuswiilile! Balavu bachili baniini* balikuvuluma,
Nkaambo lusaka lusyankene luli mumbali aaJodani lwanyonyoonwa.
4 “Nzezi nzyaamba Jehova Leza wangu, ‘Yembela tanga lyambelele zibambilidwe kujayigwa, 5 eelyo basikulyuula ndibajaya kabatapegwi mulandu pe. Abaabo balyuuzya baamba kuti, “Atembawulwe Jehova, nkaambo ndilanota.” Alubo beembeli balyo taakwe nibalifwida nsoni pe.’
6 “‘Nkaambo tandichizoobafwidi nsoni pe bantu bakkala munyika eeyi,’ mbaamba Jehova. ‘Nkinkaako, ndizoopa kuti umwi awumwi wabo adyaamininwe aasimayakilane wakwe amwaami wakwe; bazoonyonyoona nyika eeyo alubo ime tandizoobavuni pe kuzwa mukuboko kwabo.’”
7 Mpawo ndakasaanguna kweembela tanga lyambelele libambilidwe kujayigwa, inywe nibutanga bwambelele nimupenzegwa. Nkinkaako, ndakabweza nkoli zibili, imwi ndakayiwuzika kuti Bubotu mpawo imwi ndakayiwuzika kuti Kujatana, mpawo ndakasaanguna kweembela tanga lyambelele eezyo. 8 Ndakatanda beembeli batatu mumweezi uumwi, nkaambo bakandisulula alubo ambabo bakandinyanya. 9 Mpawo ndakati: “Tandikooyinkilila kunembo pe kumweembela. Ooyo ufwa afwe biyo, ayooyo uuloba alobe biyo. Mpawo aabo basyaala, umwi awumwi wabo alye nyama yamweenzinyina.” 10 Nkinkaako, ndakabweza nkoli yangu iitegwa Bubotu ndayityola, kutondeezya kuti ndamaninsya chizuminano changu nchindakapangene aabantu bangu boonse. 11 Nkinkaako chakamana mubuzuba oobo, mpawo mbelele zyamutanga eezyo zyakali kupenzegwa zyakali kundilangilizya zyakaziba kuti lyakali jwi lyaJehova.
12 Mpawo ndakababuzya kuti: “Kuti kazichita, amundipe mbadalo yangu; pesi kuti kazitachiti amuleke kundipa.” Mpawo bakandifozya* mali yangu, nsiliva zili 30.
13 Mpawo Jehova wakandibuzya kuti: “Iwaalile mundawu iibikkilwa zintu ziyandikana—nguumuulo mupati ngubakayeeyela kunduuzya aawo.” Nkinkaako, ndakabweza nsiliva eezyo zili 30 ndaziwaalila mundawu iibikkilwa zintu ziyandikana kung’anda yaJehova.
14 Mpawo ndakatyola nkoli yangu yachibili iitegwa Kujatana, kutondeezya kuti ndamaninsya bubbululu buli aakati kaJuda a-Israyeli.
15 Jehova wakandibuzya kuti: “Lino bweza zibelesyo zyamweembeli uutagwasyi. 16 Nkaambo ndilabusya mweembeli munyika. Takoozilangania pe mbelele zili kunyonyooka; takoobayanduula pe bana bazyo nikuba kusilika eezyo zilichiside nikuba kusanina eezyo zikonzya kwiimikila. Muchiindi chaboobo, ulalya nyama yayeeyo iineneede akuzavuula nsumba zyambelele.
17 Ulaapenzi mweembeli wangu uutagwasyi, ulikusiya tanga lyambelele!
Panga lizooyasa kuboko kwakwe aliso lyakwe lyakuchilisyo.
Kuboko kwakwe kuzoonyana chakumaninina,
Aliso lyakwe lyakuchilisyo lizoofwida limwi.”*