Mwana Mulombe Wamukamufu Wakabusigwa

Chiindi chanzala, Jehova wakabuzya Eliya kuti: ‘Yinka kuZarefati. Mukamufu wankukooko uyookupa chakulya.’ Naakasika kumulyango wamuunzi, Eliya wakabona mukamufu muchete kali kutebba nkuni. Wakakumbila maanzi aakunywa. Naakayinka kuyoomweetela maanzi, Eliya wakamwiita kati: ‘Undeetele achinkwa.’ Pesi mukamufu wakati: ‘Tandikwe chinkwa. Ndilaatufulawa atufuta twakuti tujike amwanaangu.’ Eliya wakamubuzya kuti: ‘Jehova wati sanguna kundijikila chinkwa mpawo fulawa amafuta tazikamani kusikila mvula ikawe.’

Mukamufu wakayinka kung’anda kuyoojikila musinsimi waJehova chinkwa. Muchiindi chanzala, mukamufu amwaakwe bakakkala kabali achakulya mbuli mbaakabasyomezya Jehova. Nongo yakwe yafulawa ayamafuta taakwe nizyakamana.

Kuzwa waawo, kwakachitika chintu chuusisya. Mwana wamukamufu wakachiswa alimwi wakafwa. Mukamufu wakakumbila kuti Eliya amugwasye. Eliya wakabweza mwana wamukamufu akwiinkawe kung’anda yamujulu. Wakamulazika abulo akukomba kati: ‘Jehova ndikumbila kuti uchite kuti mwana ooyu apone lubo.’ Ulizi na kuti nkamboonzi nichakali kuyooba chintu chigambya chakali kuyoochitwa aJehova? Nkaambo taakwe muntu wakali wabusigwa kuzwa chiindi. Alimwi mukamufu ooyu amwanaakwe teebakali maIsrayeli pe.

Pesi mwana ooyo wakaba muumi akutalisya kuyoya! Eliya wakabuzya mukamufu kuti: ‘Bona! Mwanaako wabuka!’ Mukamufu wakabotelwa loko alimwi wakabuzya Eliya kuti: ‘Lino ndaziba kuti uli muntu waLeza. Alubo ndaziba kuti wambuula majwi azwa kuli Jehova akuti alazuzikizigwa.’