Ajanika Makani aKabbuku Kamuswaangano waBuumi Amulimu Wesu

MARCH 5-11

LUBONO LUZWA MUJWI LYALEZA | MATAYO 20-21

“Uuyanda Kuba Mupati Akati Kanu Uzooba Mulanda Wanu”

nwtsty chifanikisyo

Musika

Misika imwi mbuuli uuli muchifanikisyo eechi yakali kumbali amigwagwa. Basikuuzya bakali azintu zyiingi nzibakali kuuzya zyakuti bakali kusinkila bantu. Bantu bakali kusika kuzoowula zintu zyakubelesya mumaanda mbuuli nongo, zilongo zyamagilazi azisyu. Buzuba abuzuba bantu bakali kusika kuzoowula zyakulya nkaambo teekwakali mafiliji. Kumisika eeyi, bantu bakali kumvwa milumbe yakali kweetwa abasikuuzya, bana bakali kusaana alubo nkubakali kujanika bantu bakali kuyanduula milimu. Jesu wakaponia bakali kuchiswa kumisika alubo chimwi chiindi Pawulu nkwaakali kukambawukila. (Inc 17:17) Balembi abaFarisi bakali kulisumpula, bakali kuyanda kujuzigwa kumisika eeyi.

nwtsty makani aakwiiya ajanika muli Mt 20:20, 21

banyina babana baZebbedayo: Bakali banyina bamwaapostolo Jakkobo aJohane. Kweendelana ambukulembedwe mubbuku lyaMarkko, Jakkobo aJohane mbabo bakaambuula aJesu. Zili antanganana kuti mbabo bakabelesya banyina kuti bakabakumbilile kuli Jesu alubo kulakonzeka kuti banyina baJakkobo aJohane bakali kuzyalwaamwi abanyina baJesu.—Mt 27:55, 56; Mk 15:40, 41; Joh 19:25.

umwi kujaanza lyako lyalulyo uumwi kujaanza lyako lyalumwensi: Kukkala kujaanza lyachilisyo naakuti lyachimweensi kwiiminina kupegwa chuuno chili ajulu abweendelezi pesi kukkala kuchilisyo kutondeezya kupegwa chuuno chisumpukide loko.—Int 110:1; Inc 7:55, 56; Rom 8:34.

nwtsty makani aakwiiya ajanika muli Mt 20:26, 28

mubelesi: Naakuti “mulanda.” Chiindi chiingi muBbayibbele kubelesegwa bbala lyachiGrikki liti di·aʹko·nos kwaamba muntu uulibombya kwiinda mukuchitila bamwi milimu. Alubo bbala eeli lilabelesegwa kwaamba Kristu (Rom 15:8), babelesi naakuti balanda baKristu (1Kor 3:5-7; Kol 1:23), babelesi babelekela (Flp 1:1; 1Tim 3:8), babelesi bamumaanda (Joh 2:5, 9) abalupati-pati bamfulumende (Rom 13:4).

kutali kuzoobelekelwa, pele kuzoobeleka: Naakuti ‘kutali kuyanda kuchitilwa milimu pesi kuyanda kuchitila bamwi milimu.’

Kuyanduula Lubono muJwi lyaLeza

nwtsty makani aakwiiya ajanika muli Mt 21:9

Amumufutule: Bbala lyachiGrikki liti “Hosana” lizwa mubbala lyachiHebbrayo lyaamba kuti ‘amumufutule’ naakuti ‘amumuvune.’ Mulugwalo oolu lyakabelesegwa kukumbila kufutulwa kuli Leza naakuti kuvunwa. Lilakonzya kusandululwa kuti “inchekaka mumuvune.” Mukuya kwachiindi lyakali kubelesegwa mukukomba amunyimbo. Lilajanika mulugwalo lwaInt 118:25 ilaaNyimbo Zyakulumbayizya zyakali kwiimbwa chiindi nikwakali kusekelelwa pobwe lyaPasika. Aboobo bakaayeeya majwi aaya muchiindi eechi chaPasika. Leza wakasandula nkombyo eeyi kwiinda mukubusya Mwana aDavida. Kulugwalo lwaMt 21:42, Jesu wakazubulula majwi ajanika muli Int 118:22, 23 katondeezya kuti akali kuyoozuzikizigwa kuli Mesiya.

Mwana waDavida: Majwi aaya atondeezya kuti Jesu wakazwa kuluzubo lwaDavida akuti wakali Mesiya wakasyomezegwa.

jy 244 ¶4-6

Mukuyu Wakabelesegwa Kuyiisya Atala Alusyomo

Nkamboonzi Jesu naakapa kuti mukuyu uyume? Tujana nsandulo mumajwi ngaakaamba ati: “Ncobeni ndamwaambila kuti, mwaba alusyomo lwakutadoneeka, teensi eci camukuyu luzutu ncimuyookonzya, pele nikuba kuti mwaambila cilundu eci kuti, Zyuka awa akuwaalwa mulwizi ciyoocitwa mbubonya. Alimwi zintu zyoonse nzimukumbila mukukomba kwanu, nimwasyoma muyoozipegwa.” (Matayo 21:21, 22) Wakali kwiinduluka nzyakaambide chiindi naakali kwaambuula atala alusyomo lukonzya kupa kuti chilundu chinyukuke.—Matayo 17:20.

Jesu naakapa kuti mukuyu uyume wakali kuyanda kubayiisya mbukuyandikana kusyoma Leza. Wakati: “Coonse ncimukomba akukumbila, amusyome kuti mulatambula nciconya, elyo mulacipegwa ncobeni.” (Marko 11:24) Nzyakaamba Jesu zilabagwasya batobeli bakwe boonse. Zyakali kuyandikana kapati kubaapostolo nkaambo bakali kuyooswaana mapenzi kunembo. Alubo kuli zimwi zintu nzitukonzya kwiiya kukuyumisigwa kwamukuyu ambukuyandikana kuba alusyomo.

Mbuuli mukuyu ooyu chisi chamaIsrayeli teechakali kusyomeka pe. MaIsrayeli bakatangene chizuminano aLeza alubo bakali kuchitaanga balayiswiilila Milawu yaLeza. Nikuba boobo, bakakachilwa kutondeezya lusyomo alubo teebakali kuzyala michelo iilikabotu. Alubo bakakaka Mwana aLeza. Nkinkaako chiindi Jesu naakapa kuti mukuyu ooyu uyume wakali kutondeezya kuti maIsrayeli bakatali kusyomeka bakali kuyoonyonyoonwa.

MARCH 12-18

LUBONO LUZWA MUJWI LYALEZA | MATAYO 22-23

“Swiilila Milawu Iibili Mipati”

nwtsty makani aakwiiya ajanika muli Mt 22:37

moyo: Kuti kalibelesegwa munzila yakukozyanisya, bbala eeli liiminina buntu bwamukati. Pesi kuti lyabelesegwa antoomwe aliti “buumi” aliti “mizeezo,” lyaamba zyiingi kuswaanizya mbalimvwa muntu anzyayanda. Moyo, buumi amizeezo, tazyaambi chintu chomwe pesi zisimya kaambo kakuti tweelede kumuyanda Leza chakumaninina.

buumi: Naakuti “muntu uupona.”

mizeezo: Eezi zyaamba nzyayeeya muntu. Muntu weelede kubelesya maanu kuti azibe Leza akuti amuyande. (Joh 17:3, Rom 12:1) Majwi aaya akazubululwa mulugwalo lwaDt 6:5 alubo kwakabelesegwa mabala achiHebbrayo atii ‘moyo, buumi amanguzu.’ Pesi mubbuku lyaMatayo kwakabelesegwa bbala lyakuti “mizeezo” kutali lyakuti “manguzu.” Kuli twaambo twiingi twakapa kuti bbala eeli libelesegwe munzila isiyene. Kaambo kakusaanguna nkakuti muchiHebbrayo taakwe bbala lyakali kweendelana alyakuti “mizeezo” nkinkaako zyakapa kuti kubelesegwe lyakuti “moyo.” Bbala eeli lilakonzya kwaamba buntu bwamukati kuswaanizya zintu nzyayeeya, mbalimvwa azimupa kuchita zimwi zintu. (Dt 29:4; Int 26:2; 64:6 langa makani akwiiya ajanika muvesi eeyi mubbala liti moyo.) Kufumbwa mpukubelesedwe bbala lyachiHebbrayo liti “moyo,” muSeptuagint yachiGrikki bakabelesya bbala liti “mizeezo.” (Matl 8:21; 17:17; Tus 2:10; Is 14:13) Kamwi kaambo kakapa kuti Matayo abelesye bbala lyachiGrikki liti “mizeezo”kutali lyakuti “manguzu” naakali kuzubulula majwi aali muli Dt 6:5 nkakuti bbala lyachiHebbrayo liti “manguzu” liswaanizya manguzu akuchita milimu naakuti kuyeeya aluzibo muntu ndwalaalo. Kufumbwa zyakachitika eezi zitugwasya kumvwisisisya kuti nkamboonzi basanduluzi bachiHebbrayo achiGrikki nibakabelesya mabala asiyene nibakali kusandulula majwi akazubululwa mulugwalo lwaDeuteronomo mumabbuku aMatayo, Marko, Luka aJohane.

nwtsty makani aakwiiya ajanika muli Mt 22:39

wabili: Nsandulo Jesu njaakapa baFarisi iijanika muli Mt 22:37 pesi Jesu wakazubulula majwi amulawu wabili nikuba kuti teenzizyo pe nzibakamubuzya. (Lev 19:18) Nkinkaako, wakali kuyiisya kuti milawu eeyi ilijisini akuti mpaayeeme Mulawu abaSinsimi.—Mt 22:40.

simukobonyoko: Bbala lyachiGrikki liti “simukobonyoko” lyaamba zintu zyiingi kutali simayakilane luzutu. Lyaamba kufumbwa muntu ngutuswaana.—Lk 10:29-37; Rom 13:8-10.

nwtsty makani aakwiiya ajanika muli Mt 22:40

Mulawu . . . aBasinsimi: “Mulawu” chaamba mabbuku aamuBbayibbele kuzwa muli Matalikilo kusika muli Deuteronomo. “Basinsimi” chaamba mabbuku alaabusinsimi aali muMagwalo aachiHebbrayo. Nikuba boobo kuti mabala aaya abelesegwa antoomwe aamba Magwalo aachiHebbrayo oonse.—Mt 7:12; 22:40; Lk 16:16.

mpaayeeme: Bbala lyachiGrikki liti “kuyaama” libelesedwe munzila yakukozyanisya kwaamba “kutakonzya kulyiimikilila.” Jesu wakatondeezya kuti mulawu amagwalo oonse aachiHebbrayo akayeeme aluyando.—Rom 13:9.

Kuyanduula Lubono muJwi lyaLeza

nwtsty makani aakwiiya ajanika muli Mt 22:21

zintu zyaKayisara kuli Kayisara: Nsandulo yaJesu iijanika mulugwalo lwaMk 12:17 alwaLk 20:25 njiyo ayilikke yaamba zyabweendelezi bwakuRoma. “Zintu zyaKayisara” ziswaanizya kubbadala mitelo kumfulumende akutondeezya kuti tulabalemeka.—Rom 13:1-7.

zintu zyaLeza kuli Leza: Eezi ziswaanizya kukomba Leza amoyo woonse abuumi bwesu boonse akumuswiilila chakumaninina.—Mt 4:10; 22:37, 38; Inc 5:29; Rom 14:8.

nwtsty makani aakwiiya ajanika muli Mt 23:24

nomuminununa kansenya pele nkamele mulayimena: Nsenya ankamele zyakali kwaambwa kuti zilisofweede kumaIsrayeli. (Lev 11:4, 21-24) Jesu wakabelesya maambila mbali naakali kwaamba beendelezi bazikombelo bakali kuminununa tunsenya muwayini, kakuli zintu zyaambwa muMulawu bakali kuzikazya, eezi zyakapa kuti michito yabo ikozyanisigwe akumena nkamele.

MARCH 19-25

LUBONO LUZWA MUJWI LYALEZA | MATAYO 24

“Amusinsimuke Mubukombi Kumazubaano Aakumamanino”

it-2 279 ¶6

Luyando

Luyando Lwamuntu Lulakonzya Kumana. Jesu Kristu naakali kubuzya basikwiiya bakwe atala azintu zyakali kuyoochitika kunembo wakaamba kuti luyando lwa-a·gaʹpe lwabantu balyaamba kuti bakomba Leza lwakali kuyoomana. (Mt 24:3, 12) Mwaapostolo Pawulu wakaamba kuti kumazuba aakumamanino bantu bakali kuyooba “basimuyanda mali.” (2Tim 3:1, 2) Muntu wali kutobelezya malayilile aaLeza ulakonzya kuleka kwaatobelezya aluyando ndwaakali aalo lulakonzya kumana. Eezi zitugwasya kubona kuti kubala Bbayibbele akuyeeyesesya atala anzitubala kutugwasya kuzumanana kupona kweendelana amalayilile aaLeza.—Ef 4:15, 22-24.

w99 11/15 19 ¶5

Ulikubelekela Leza Chakumaninina Na?

⁵ Jesu Kristu wakaamba atala amazuba aakumamanino kuti: “Nkabela kuboola kwa-Mwana a-Muntu kuyooba mbuli kumazuba aa-Nowa. Nkaambo kumazuba ayo maanzi naatakalina kupaya bakali kulya akunywa, bakali kukwata akukwatizigwa, kusikila kubuzuba obo mbwaakanjila mubwaato Nowa, nkabela teebakezi mane kupaya kwamaanzi kwakasika akubatola. Mbubonya obo mbukuzooba kuboola kwa-Mwana a-Muntu.” (Matayo 24:37-39) Kulya akunywa bukande teekubi pe kuti twakuchita munzila iilikabotu alubo Leza nguwe wakatalisya mabambe aalukwatano. (Matalikilo 2:20-24) Pesi kuti zintu eezi kazitukachizya kukomba Leza tweelede kwaakombela makani aaya. Jehova uyootugwasya kuti tubikke Bwaami mubusena bwakusaanguna, tuchite zilikabotu akuti tuzumanane kumubelekela chakumaninina.—Matayo 6:33; BaRoma 12:12; 2 BaKorinto 13:7.

jy 259 ¶5

Baapostolo Bakali Kuyanda Kuziba Chitondeezyo

Jesu wakabuzya basikwiiya bakwe kuti bakeelede kukkala kabasinsimukide, kabalindide akuti kabalibambilide. Jesu wakaamba chimwi chikozyano chakubachenjezya naakati: “Mulasinizya kuti mwining’anda naakaakuzi ciindi ncatisike mubbi, naakali kulindila, naatakazumina kuti ing’anda yakwe itululwe. Mbubonya obo anywebo amulibambe, nkaambo kuciindi ncimutezi nciconya ncazoosika Mwana a-Muntu.”—Matayo 24:43, 44.

Kuyanduula Lubono muJwi lyaLeza

nwtsty makani aakwiiya ajanika muli Mt 24:8

mapenzi aali mbuuli kumyongwa kwamukayintu uuyanda kutumbuka: Ndibbala lyachiGrikki lipandulula machise ngamvwa mukayintu uuyanda kutumbuka. Nikuba kuti bbala eeli lyaamba kukataazikana, machise naakuti mapenzi pesi muvesi eeyi litondeezya kuti mapenzi aakambwa aJesu anooli mayumu loko muchiindi chamapenzi mapati aambwa muli Mt 24:21.

nwtsty makani aakwiiya ajanika muli Mt 24:20

muchiindi champeyo: Kuwa mvula mpati, milonga ilazula alubo nga kulimpeyo, zipa kuti kakuli kuyumu kuba mulweendo, kuyanduula chakulya abusena bwakukkala.—Ezr 10:9, 13.

mubuzuba bwaSabata: Mumasena aali mbuuli muJudaya kwakali kukasigwa kweenda nyendo ndamfu kunyampwide mabbudu alubo milyango yaanze teeyakali kujulwa mubuzuba bwaSabata.—Langa Inc 1:12 aMakani Aayungizyidwe B12.

MARCH 26–APRIL 1

LUBONO LUZWA MUJWI LYALEZA | MATAYO 25

“Amulangile”

Kuyanduula Lubono muJwi lyaLeza

w15 3/15 27 ¶7

Kugwasilizya maKristu Bananikidwe

⁷ Mazubaano tulachimvwisisisya chikozyano chambelele ampongo. “Mwana a-muntu” naakuti Mwaami waambwa muchikozyano eechi nguJesu. Alubo bantu baambwa kuti ‘mbabunyina’ bayiminina maKristu bananikidwe bayooyendelezya aKristu kujulu. (Rom. 8:16, 17) ‘Mbelele’ ‘ampongo’ zyiiminina bantu bali munyika yoonse. Bantu aaba tabananikidwe amuuya uusalala pe. Ndiilili nibayoobetekwa? Chiindi chakubeteka chiyootalika mapenzi mapati kaali aba afwiifwi kumana. Niinzi ziyoopa kuti bamwi bantu bakaambwe kuti nimpongo naakuti mbelele? Ninzila njibabajataayo maKristu bananikidwe bachili anyika. Mbukunga mamanino abaafwiifwi, tulamulumba Jehova akutugwasya kumvwisisisya chikozyano eechi azimwi zikozyano zijanika muli Matayo 24 a25.

w09 10/15 16 ¶16-18

“Munooli beenzuma”

¹⁶ Bambelele zimwi kujana babagwasilizya biyeni maKristu bananikidwe? Atulange-lange nzila zitatu. Yakusaanguna, nkubeleka changuzu mumulimu wakukambawuka. Kristu wakalayilila maKristu bananikidwe kuti bakambawuke makani mabotu munyika yoonse. (Mt. 24:14) Nikuba boobo, maKristu bananikidwe bachili anyika bayandikana kugwasigwa abambelele zimwi kuzuzikizya mulimu ooyu. Chiindi bambelele zimwi nibachita mulimu wakukambawuka nga balikugwasya maKristu bananikidwe kuti bazuzikizye mulimu wabo uuyandikana. Muzike uusyomekede alimwi uuchenjede ulalumba akaambo kalugwasyo luzwa kumbelele zimwi alubo Kristu ulabotelwa.

¹⁷ Nzila yabili mutukonzya kugwasilizya maKristu bananikidwe nkusanga mali iisumpula mulimu wakukambawuka. Jesu wakasungwaazya basikwiiya bakwe babelesye ‘lubono lwakutalulama’ kuti balichitile beenzinyina. (Lk. 16:9) Eezi tazyaambi kuti tulakonzya kuula bweenzuma mbutulaabo aJesu aJehova. Pesi chiindi nitubelesya lubono lwesu kuti tusumpule Bwaami, tutondeezya kuti tuli aaluyando “lwamilimo alwalusinizyo” kutali lwamajwi luzutu. (1 Joh. 3:16-18) Tulakonzya kubagwasilizya kwiinda mukuchita mulimu wakukambawuka, nitusanga mali yakuyasya akubambulula maanda aakukombela akusanga mali yakugwasilizya mumulimu wakukambawuka uuchitwa munyika yoonse. Jehova aJesu balazitambula zipo nzitupa kabatalangi kuti nzyiingi naakuti nziche.—2 Kor. 9:7.

¹⁸ Nzila yatatu mutukonzya kutondeezya kuti tuli beenzinyina baKristu, nkuswiilila baalu bamumbungano. Kristu usala baalu bamumbungano kabelesya muuya uusalala. (Ef. 5:23) Mwaapostolo Pawulu wakalemba kuti: “Kamubaswiililisya baalu banu, mulitesye kulimbabo.” (Heb. 13:17) Chimwi chiindi kulakonzya kutuyumina kuswiilila malayilile aazwa muBbayibbele ngitupegwa abaalu. Kuziba mpubatachiti kabotu baalu kulakonzya kupa kuti tutaswiilili malayilile ngibatupa. Pesi Kristu, Mutwe wambungano ulababelesya baalu nikuba kuti tabamaninide pe. Nkinkaako, kubaswiilila kupa kuti tube beenzinyina baKristu. Alubo kutobelezya malayilile ngibatupa akutalanga mpubatachiti kabotu, zitondeezya kuti tulamuyanda Kristu.