Milimo
1 Ooyandwa Teyofilo, mubbuku lyakusaanguna ndakalemba zyintu zyoonse Jesu nzyaakacita akuyiisya, 2 kusikila buzuba mbwaakatolwa kujulu, naakamana kupa malailile kwiinda mumuuya uusalala kubatumwa mbaakasala. 3 Naakamana kupenga, wakalitondezya kali muumi kuli baaba kwiinda mubumboni bunji busalede. Bakamubona mazuba oonse aali makumi one alimwi wakali kubapandulwida Bwami bwa Leza. 4 Alimwi naakabungene ambabo wakabapa malailile aaya: Mutazwi mu Jelusalemu pe, pele kamuzumanana kulindila ceeco Taata ncaakasyomezya, eeco ncomwakamvwa kulindime; 5 nkaambo ncobeni Johane wakali kubbapatizya amaanzi, pele nywebo muyoobbapatizyigwa amuuya uusalala kakutanainda mazuba manji kuzwa sunu.
6 Nobakabungana, bakamubuzya kuti: “O Mwami, sena ulapilusya Bwami ku Isilayeli aciindi cino?” 7 Wakati kuli mbabo: “Tacili kulindinywe kuzyiba ziindi naa mazuba ngabikkide Taata munguzu zyakwe mwini; 8 pele muyootambula nguzu waakusika alindinywe muuya uusalala, alimwi muyooba bakamboni bangu mu Jelusalemu, mu Judaya moonse amu Samaliya, alimwi mane akusikila kumagolelo aanyika.” 9 Naakamana kwaamba zyintu eezyi, kabalangilila wakatolwa kujulu eelyo kkumbi lyakamuvwumba tanaakacili kulibonya kuli mbabo. 10 Eelyo nobakali kulanga kujulu naakacili kuunka, mpoonya aawo ibaalumi bobilo ibakasamide zisani zituba bakaima munsi lyabo, 11 akwaamba kuti: “Nobaalumi bamu Galilaya, nkaambo nzi ncomwiimvwi kamulanga kujulu? Ooyu Jesu iwatambulwa kujulu kuzwa kulindinywe uyooboola mbubonya oobu mbomwamubona kaunka kujulu.”
12 Mpoonya bakapiluka ku Jelusalemu kuzwa kucilundu citegwa Cilundu ca Maolifa, ikweendwa buyo musinzo wamubuzuba bwa Sabata* kuzwa ku Jelusalemu. 13 Aboobo nobakasika, bakaunka muŋanda yamujulu oomo mobakali kukkala; kwakali Petulo, Johane, Jakobo, Anduleya, Filipo, Tomasi, Batolomayo, Matayo, Jakobo mwana wa Alifayo, Simoni musungu, alimwi a Judasi mwana wa Jakobo. 14 Kabajisi muzeezo omwe aaba boonse bakazumanana kupaila, antoomwe abamakaintu bamwi, a Maliya banyina Jesu abanabokwabo Jesu.
15 Mumazuba aayo Petulo wakanyamuka akati kababunyina (inkamu yabantu yoonse ibakali kutandila ku 120) akwaamba kuti: 16 “Nobaalumi, bakwesu, cakali kuyandika kuti lugwalo luzuzikizyigwe oolo muuya uusalala ngowakaamba mubusinsimi kwiinda muli Davida kujatikizya Judasi, ooyo wakaba musololi wabaabo bakajata Jesu, 17 nkaambo wakali kubalilwa akati kesu alimwi wakatambwide caabilo mumulimo ooyu. 18 (Aboobo muntu ngoonya ooyu wakaula muunda amali ngaakabbadelwa kucibi ncaakacita, alimwi naakaloka kalanzyide mutwe ansi wakabbosyoka da, eelyo mala aakwe oonse akafwasukila ansi. 19 Eeci cakazyibwa kubantu boonse bakkala mu Jelusalemu, cakuti muunda ooyo mumwaambo wabo wakaitwa kuti Akelidama, nkokuti Muunda wa Bulowa.) 20 Nkaambo kulilembedwe mubbuku lya Intembauzyo kuti, ‘Busena mbwakkala abube tongo alimwi kutabi muntu uukkala mpawo,’ akuti, ‘Imulimo wakwe wabulangizi aucitwe aumbi.’ 21 Aboobo kulayandika kuti akati kabaalumi ibakali kweenda andiswe ciindi coonse Mwami Jesu naakali akati kesu, 22 kuzwa naakabbapatizyigwa a Johane kusikila buzuba naakatambulwa kujulu kuzwa kulindiswe, umwi wabaalumi aaba weelede kuba kamboni wabubuke bwakwe antoomwe andiswe.”
23 Aboobo bakabanda bantu bobilo, Josefa uutegwa Basaba ooyo wakali kwiitwa kuti Jusito, alimwi a Matiya. 24 Mpoonya bakapaila akwaamba ku-ti: “Jehova, yebo oozyi myoyo yabantu boonse, kotutondezya ngoosala akati kabaalumi aaba bobilo, 25 kuti atambule mulimo ooyu alimwi abutumwa, nzyaakaleya Judasi akutobela nzila yakwe mwini.” 26 Aboobo bakawaala cisolo kujatikizya mbabo, mpoonya icisolo cakawida Matiya; eelyo wakabalilwa antoomwe abatumwa bali kkumi aumwi.