Baroma
1 Ndime Paulo, imuzike wa Jesu Kilisito nendakaitwa kuti ndibe mutumwa alimwi nendakasalwa kwaambilizya makani mabotu aa Leza. 2 Aaya makani mabotu Leza ngaakaambilizya musyule kwiinda mubasinsimi bakwe mu Magwalo aasalala. 3 Ajatikizya Mwanaakwe iwakazyalwa amubili wanyama mulunyungu* lwa Davida, 4 pele iwakaambilizyigwa canguzu kuti Mwana wa Leza ikweelana amuuya wabusalali kwiinda mububuke kuzwa kubafwu, inzya nkokuti Jesu Kilisito Mwami wesu. 5 Kwiinda mulinguwe twakatambula luzyalo lwa Leza alimwi akuba batumwa kutegwa bantu bamumasi oonse bamumvwide akaambo kalusyomo akulemeka zyina lyakwe. 6 Mumasi ngoonya aayo anywebo momwakazwa akwiitwa kuti mubalilwa kuli Jesu Kilisito— 7 inywebo nyoonse nomuli mu Loma aabo Leza mbayandisya, ibakaitwa kuba basalali:
Amube aluzyalo aluumuno ikuzwa kuli Leza Taateesu a Mwami wesu Jesu Kilisito.
8 Ikusaanguna, ndilumba Leza wangu kwiinda muli Jesu Kilisito kujatikizya ndinywe nyoonse, nkaambo lusyomo lwanu lulaambwa munyika yoonse. 9 Nkaambo Leza ooyo ngondibelekela mulimo uusetekene amoyo woonse kujatikizya makani mabotu aa Mwanaakwe, ngokamboni wangu kujatikizya mbondimubandauka lyoonse cakutaleka mumipailo yangu, 10 akulomba kuti ndicikonzye kuboola kulindinywe ikuti ooku kakuli kuyanda kwa Leza. 11 Nkaambo ndilayandisisya kumubona, kuti ndimupe cipego cakumuuya cimwi ikutegwa muyumizyigwe; 12 naa kutegwa kube kuyumizyanya akati kesu; kwiinda mulusyomo lwesu, nkokuti lwanu alwangu.
13 Pele tandiyandi kuti kamutazyi bakwesu, kuti ziindi zinji ndali kukanza kuboola kulindinywe, pele ndakakilwa kusikila lino. Ndiyanda kuti ndikajane micelo imwi akati kanu mbubonya mbondikanzide kujana akumasi aambi. 14 Ndili sicikwelete kuba Giliki akuli baabo batali ba Giliki, kubasongo akubafwubafwuba. 15 Aboobo ndiliyandide kapati kwaambilizya makani mabotu akulindinywe nomuli kooko ku Loma. 16 Nkaambo taanduusyi nsoni makani mabotu; kayi ninguzu zya Leza zyalufwutuko kubantu boonse bajisi lusyomo, kusaanguna kumu Juda mpoonya akumu Giliki; 17 nkaambo mulingawo bululami bwa Leza bulatondezyegwa kwiinda mulusyomo, eelyo lusyomo oolo lulayumizyigwa, mbubonya mbokulembedwe kuti: “Pele mululami uyoopona akaambo kalusyomo lwakwe.”
18 Nkaambo bukali bwa Leza bulatondezyegwa kuzwa kujulu kubantu boonse batayoowi Leza alimwi abataluleme ibasinkilila kasimpe munzila iitaluleme, 19 nkaambo izikonzya kuzyibwa kujatikizya Leza zilalibonya akati kabo, akaambo kakuti Leza wakazibikka atuba kuli mbabo. 20 Nkaambo bube bwakwe butalibonyi bulalibonya caantangalala kuzwa ciindi naakalenga nyika kuya kumbele, nkaambo bulabonwa muzyintu nzyalengede, noziba nguzu zyakwe zitamani akuti ngu Leza ncobeni, cakuti tabajisi cilitamizyo pe; 21 nkaambo nokuba kuti bakalimuzyi Leza, kunyina nobakamulemeka kuti ngu Leza nokuba kumulumba, pele bakali kuyeeya buyo zyabuyo alimwi myoyo yabo yabufwubafwuba yakasizyigwa. 22 Nokuba kuti bakali kulyaamba kuti mbasongo, bakaba bafwubafwuba 23 akusandula bulemu bwa Leza uutakonzyi kufwa kuba mbuli bwacikozyanyo camuntu uufwa, cabayuni, cazilenge zijisi maulu one alimwi acazyintu zikalaba.
24 Aboobo kweelana azisusi zyamyoyo yabo, Leza wakabalekela kuti bacite busofwaazi, ikutegwa mibili yabo isampaulwe akati kabo. 25 Bakaleka kasimpe ka Leza akutobela bubeji alimwi bakakomba akubelekela zilenge mulimo uusetekene muciindi ca Yooyo wakalenga zyintu, uutembaulwa kukabe kutamani. Ameni. 26 Nkakaambo kaako Leza ncaakabalekela kutobela zisusi zyakoonana zyuusya nsoni, nkaambo bamakaintu akati kabo bakaleka bukkale mbobakazyalwa abwalo bwakoonana abaalumi akutobela zitondwa kwiinda mukoonana mulicabo; 27 alimwi abalo baalumi mbubonya bakaleka koonana abamakaintu pele bakatalika kupya azisusi zyakoonana akati kabo beni, baalumi bakatalika koonana abaaluminyina, kabacita zisapi zisesemya, aboobo balalitambwida cisubulo ceelede iceelene akulubizya kwabo.
28 Alimwi mbwaanga tiibakayanda kuba aluzyibo lwini-lwini kujatikizya Leza, Leza wakabalekela kuba amizeezo mibi, kutegwa bacite ziteelede. 29 Bakazwide kutalulama kwamusyobo woonse, bubi, bulyato, bakali kucita zibi, bakazwide munyono, bujayi, bulwani, lweeno, lusulo, bakali basikuvwiya, 30 basikubejelezya, ibasulaika Leza, basikasampusampu, basikulisumpula, basikulilumbaizya, basikutalisya zyintu zibi, bataswiilili bazyali, 31 batamvwisyi, batabambi zizuminano, batajisi luyando lwakuzyalwa aandulo, alimwi batakwe luse. 32 Nokuba kuti aaba baluuzyi kabotu mulawo wa Leza uululeme wakuti aabo bacita zyintu zili boobu beelede kufwa, tabazumanani buyo kuzicita pele alimwi balabakkomanina aabo bazicita.