Baroma

13 Muntu uuli woonse kalibombya kubeendelezi, nkaambo kunyina bweendelezi bukonzya kuba ccita kuti bwazumizyigwa a Leza; ibeendelezi bali muzyuuno zyaandeene-andeene balizumizyidwe a Leza. 2 Aboobo ooyo uukazya bweendelezi ukazya bubambe bwa Leza; aabo ibakazya bubambe bwakwe bayootambula lubeta lubeelede. 3 Nkaambo aabo beendelezya balayoosya. Tabayoosyi kuli baabo bacita zibotu, pele balayoosya kuli baabo bacita zibi. Sena uyanda kuti kabutakuyoosyi bweendelezi? Kozumanana kucita zibotu eelyo uyootembaulwa abeendelezi; 4 mbwaanga mbabelesi ba Leza ibabelekela kugwasya nduwe. Pele ikuti kocita zibi, kolibilika: nkaambo tabanyamuni panga cabuyo. Mbabelesi ba Leza, basikusubula uucita zibi kutondezya bukali bwakwe.

5 Aboobo, kulayandika kuti nywebo nobantu kamulibombya, ikutali buyo akaambo kabukali oobo, pele alimwi akaambo kamanjezyeezya aanu. 6 Nkakaambo kaako mulatela mitelo; nkaambo mbabelesi ba Leza bagwasya buleya, ibabelekela kuzuzikizya makanze ngoonya aaya lyoonse. 7 Amubape boonse zibeelede, ooyo uuyanda mutelo, amumupe mutelo; ooyo uuyanda kubbadelwa, amumubbadele; ooyo uuyanda kuyoowegwa, amumuyoowe; ooyo uuyanda kulemekwa, amumulemeke.

8 Mutabi acikwelete cili coonse kumuntu uuli woonse, pele buyo cakuyandana; nkaambo ooyo uuyanda mweenzinyina wazuzikizya mulawo. 9 Nkaambo milawo yakuti, “Utaciti bumambe, Utajayi muntu, Utabbi, Utalikumbuzyi,” alimwi amilawo imbi iili yoonse iiliko, ilaambwa mumajwi masyoonto aaya aakuti: “Weelede kuyanda simukobonyoko mbubonya mbuli mboliyanda omwini.” 10 Uuyanda simukobonyina takonzyi kumubisizya; aboobo luyando ndoluzuzikizya mulawo.

11 Amucite oobo nkaambo mulicizyi mbocibede ciindi ncotupona. Mulizyi kuti nciindi cakuti musinsimuke kuŋonzi, mbwaanga lufwutuko lwesu lino luli afwaafwi kapati kwiinda leelyo notwakaba basyomi. 12 Busiku bwaumbuluka; buyanda kuca. Aboobo atusamunune milimo yamudima akusama zilwanyo zyamumuni. 13 Atweende bweelede mbuli bantu beenda syikati, ikutali mumapobwe aateendelezyegwi amubukolwi, ikutali mukoonana kutondwa amubukkale busesemya, ikutali mukuzwangana amubbivwe. 14 Pele atulisamike Mwami Jesu Kilisito, alimwi tutani kukanzi kuzuzikizya zisusi zyanyama.