Baroma
12 Aboobo ndamulomba kwiinda mulubomba lwa Leza, bakwesu, kuti mutuule mibili yanu kiili cipaizyo cuumi, cisalala, cizuminwa a Leza, nkokuti imulimo uusetekene ngomubeleka kwiinda mukubelesya maano. 2 Alimwi amuleke kutobela ziyanza zyabweende bwazyintu obuno, pele amusandulwe kwiinda mukucinca mizeezo yanu, kutegwa muzyibe kuyanda kwa Leza, ikubotu, kutambulika alimwi kulondokede.
3 Nkaambo kwiinda muluzyalo lwa Leza ndondakapegwa, ndaambila nyoonse ooko kuti mutanooliyeeyi cakulisumpula kwiinda mbokweelede; pele kamuyeeya cakulibatamika, kweelana alusyomo umwi aumwi wanu ndwaakamupa Leza. 4 Nkaambo mbubonya mumubili omwe mbotujisi zizyo zinji, pele zizyo zyoonse eezyi tazibeleki mulimo omwe, 5 mbubonya buyo aswebo, nokuba kuti tuli banji, tuli mubili omwe muli Kilisito, pele tuli zizyonyina kuli umwi aumwi. 6 Aboobo mbwaanga tujisi zipego zyaandeene-andeene kweelana aluzyalo lwa Leza ndotwakapegwa, ikuti naa tupedwe businsimi, atuzumanane kusinsima kweelana alusyomo ndotwakapegwa; 7 ikuti naa mulimo, atuzumanane mumulimo ooyu; ooyo uuyiisya, azumanane akuyiisya kwakwe; 8 ooyo uulaya, azumanane akulaya kwakwe; ooyo waabanya, azumanane kwaabanya cabuuya; ooyo weendelezya, acite boobo cabunkutwe; ooyo uufwida bamwi luse, acite boobo calumwemwe.
9 Luyando lwanu lutabi lwakuupaupa ameso. Amusesemwe acintu cibi, amukakatile kucibotu. 10 Muluyando lwabunyina amuyandane kapati. Amube ndinywe nomuli kumbele mukulemekana. 11 Amube basungu, mutabi batolo pe.* Amupye moyo akaambo kamuuya. Amubelekele Jehova cakulitakata mbuli bazike. 12 Amukondwe akaambo kabulangizi. Amuliyumye mumapenzi. Amujatisye kupaila. 13 Amupe basalali kweelana anzyobabulide. Amube acilengwa cakusamausya beenzu. 14 Amuzumanane kubalongezya aabo bamupenzya; kamulongezya, mutanoosinganyi pe. 15 Amukondwe abaabo bakondwa; amulile abaabo balila. 16 Amubone bamwi mbubonya mbomulibona nobeni; mutanoolisumpuli pe, pele lyoonse kamweendelezyegwa azyintu zibombe. Mutacenjeli mumeso aanu nobeni.
17 Mutapilusizyi muntu uuli woonse bubi. Amusole kucita zyintu zibonwa kuti nzibotu abantu boonse. 18 Kamusoleka kusikila mpomugolela kukkala muluumuno abantu boonse. 19 Nobayandwa, mutapilusizyi muntu cibi, pele amusiile bukali bwa Leza busena; nkaambo kulembedwe kuti: “Cisubulo ncicangu; ndime nendiyoopilusya cibi, mbwaamba Jehova.” 20 Pele “ikuti sinkondonyoko kafwide nzala, komupa cakulya; ikuti kafwide nyota, komupa cakunywa; nkaambo kwiinda mukucita boobo, ulalundika makala amulilo amutwe wakwe.” 21 Utalilekeli kuzundwa abubi, pele kozumanana kuzunda bubi kwiinda mukucita zibotu.