Baroma
14 Amumutambule muntu ooyo uutanasima mulusyomo, pele mutabeteki nzyayeeya mumoyo. 2 Umwi muntu ulijisi lusyomo lumupa kulya zyintu zyoonse, pele uutanasima ulya buyo cisyumani. 3 Ooyo uulya atasampauli yooyo uutalyi, alimwi ooyo uutalyi atabeteki yooyo uulya, nkaambo Leza wamutambula awalo ooyo. 4 Ino nduwe ni yebo oobeteka mubelesi waaŋanda wamweenzinyoko? Mukuli wasimalelo wakwe mwini kumubeteka naa uli kabotu naa pe. Ncobeni, ulakonzya kukkomaninwa a Leza, nkaambo Jehova ulakonzya kumugwasya.
5 Muntu umwi ubona buzuba bumwi kuti bulayandika kwiinda bumbi; uumbi ubona buzuba bumwi kuti buleelene amazuba ambi oonse; muntu umwi aumwi asinizye cakumaninina mumizeezo yakwe mwini. 6 Ooyo uubona buzuba bumwi kuti bulayandika, ububona boobo mukulemeka Jehova. Alimwi ooyo uulya, ulalya mukulemeka Jehova nkaambo ulamulumba Leza; alimwi ooyo uutalyi, talyi mukulemeka Jehova, pele ulamulumba Leza. 7 Nkaambo mubwini, kunyina muntu akati kesu uuliponena lwakwe mwini, alimwi kunyina uulifwida lwakwe mwini; 8 nkaambo ikuti naa tulapona, tuponena Jehova, alimwi ikuti naa twafwa, tufwida Jehova. Aboobo kufwumbwa naa tulapona naa twafwa, tuli bantu ba Jehova. 9 Nkaambo Kilisito wakafwa akuba muumi alimwi, kutegwa abe Mwami wabafwide abaumi.
10 Pele ino nkaambo nzi yebo ncobeteka imunyoko? Naa ino nkaambo nzi alimwi ncomusampaula imunyoko? Nkaambo kayi toonse tuyoobetekwa kumbele lyacuuno calubeta ca Leza. 11 Nkaambo kulembedwe kuti: “‘Mbubonya mbondili muumi,’ mbwaamba Jehova, ‘mazwi oonse ayoondifwugamina, alimwi milaka yoonse iyoozumina caantangalala kuti ndime Leza.’” 12 Aboobo Leza uyoobeteka umwi aumwi wesu kweelana amilimo yakwe.
13 Aboobo atuleke kubetekana, pele muciindi caboobo amukanze kutabikkila munyoko cilebyo naa cisinkilizyo. 14 Ndilizyi alimwi ndilisinizyide mu Mwami Jesu kuti kunyina cintu cisofweede; ccita buyo cintu muntu ncabona kuti cilisofweede, ncecisofweede kulinguwe. 15 Nkaambo ikuti munyoko ulacimwa akaambo kacakulya, nkokuti toceendi caluyando. Utanyonyooni muntu ooyo Kilisito ngwaakafwida akaambo kacakulya cako. 16 Aboobo nywebo mutalekeli bantu kumusampaula akaambo kabubotu mbomucita. 17 Nkaambo Bwami bwa Leza tabwaambi kulya akunywa pe, pele bwaamba bululami, luumuno akukondwa antoomwe amuuya uusalala. 18 Nkaambo muntu ooyo uubelekela Kilisito munzila eeyi ulatambulika kuli Leza alimwi ulayandwa abantu.
19 Aboobo atusungwaalile kucita zyintu ziletela luumuno azyintu iziyaka umwi aumwi. 20 Amuleke kumwaya mulimo wamaanza a Leza akaambo buyo kacakulya. Masimpe, zyintu zyoonse zilasalala, pele ulabisya imuntu uulya cintu kazyi kuti kucita boobo inga caba cilebyo. 21 Cilainda kubota kutalya nyama, kutanywa waini nokuba kutacita cintu cili coonse icilebya munyoko. 22 Lusyomo oolo ndojisi, alube akati kanduwe a Leza. Ulikkomene muntu ooyo uutalibeteki akaambo kazyintu nzyasala kucita. 23 Pele imuntu uulya kumwi kadooneka, wabetekwa kale, nkaambo tanaalya kweelana alusyomo lwakwe. Ncobeni, icintu coonse cicitwa iciteendelani alusyomo ncibi.