Baroma

15 Pele swebo tobayumu tweelede kubagwasya aabo batali bayumu ibalezya, ikutali kunoolikkomanisya tobeni. 2 Umwi aumwi wesu aakkomanisye simukobonyina muzyintu zibotu alimwi izimupa kuyakwa. 3 Nkaambo naba Kilisito tanaakalikkomanisya mwini pe; mbubonya mbuli mbokulembedwe kuti: “Masampu aabaabo ibakali kukusampaula aboola alindime.” 4 Nkaambo zyintu zyoonse zyakalembwa kaindi zyakalembelwa kutuyiisya, kutegwa kwiinda mukuliyumya kwesu alimwi akwiinda muluumbulizyo lwamu Magwalo tube abulangizi. 5 Lino Leza uutupa kuliyumya aluumbulizyo, nyoonse amupe kuba amizeezo njiyonya njaakajisi Kilisito Jesu, 6 kutegwa caantoomwe alimwi acamulomo omwe mulemeke ooyo uuli ngo Leza alimwi a Usyi wa Mwami wesu Jesu Kilisito.

7 Aboobo amutambulane mbubonya Kilisito mbwaakatutambula andiswe, kutegwa Leza alemekwe. 8 Nkaambo ndimwaambila kuti Kilisito mubwini wakaba mubelesi wabaabo bapalwidwe kutegwa ape bumboni bwakuti Leza ngwamasimpe akuti asinizye zisyomezyo Leza nzyaakaambilide bamausyi, 9 akuti masi alemeke Leza akaambo kaluse lwakwe. Mbubonya mbokulembedwe kuti: “Nkakaambo kaako ndiyookutembaula caantangalala akati kabamasi alimwi ndiyooimba ntembauzyo kuzyina lyako.” 10 Alimwi waamba kuti: “Amusekelele nobamasi, antoomwe abantu bakwe.” 11 Alimwi lugwalo lumbi lwaamba kuti: “Amutembaule Jehova nobamasi nyoonse, alimwi bantu boonse abamutembaule.” 12 Alimwi mulugwalo lumwi Izaya waamba kuti: “Kuyooba muyanda wa Jese, alimwi nkwali ooyo uuyoobuka kuti aendelezye masi; ibamasi boonse bayoolangila nguwe.” 13 Aboobo Leza uupa bulangizi amuzuzye kukondwa koonse alimwi aluumuno eelyo nomumusyoma, ikutegwa mwiindile kuba abulangizi munguzu zyamuuya uusalala.

14 Lino andime ndemwini ndili alusyomo mulindinywe bakwesu, kuti mulilibambilide kucita zyintu zibotu, mbwaanga mwakapegwa luzyibo loonse luyandika, eelyo mulakonzya kulayana mulicanu nobeni. 15 Pele ndamulembela cakutamwiinda mumbali kujatikizya twaambo tumwi, kuti ndimwiibalusye alimwi, akaambo kaluzyalo ndwaakandifwida Leza 16 kutegwa ndibe mubelesi wabuleya wa Kilisito Jesu kuli bamasi. Lino ndibeleka mulimo uusalala wamakani mabotu aa Leza, ikutegwa cituuzyo eeci, nkokuti bamasi aaba babe bantu batambulika, ibasalazyidwe amuuya uusalala.

17 Aboobo ndilijisi kaambo kakukkomana muli Kilisito Jesu caboola kuzyintu zijatikizya Leza. 18 Nkaambo tandikoosola kwaamba cintu cili coonse ccita buyo zyintu eezyo nzyaacita Kilisito kwiinda mulindime kutegwa bamasi baswiilile, kwiinda mumajwi alimwi amilimo yangu, 19 kwiinda munguzu zyazitondezyo azyintu zigambya, alimwi amunguzu zyamuuya uusalala; cakuti kuzwa ku Jelusalemu akuzinguluka mane kusikila ku Ililiko, ndaakambauka cakulomya makani mabotu aajatikizya Kilisito. 20 Mubwini, munzila eeyi ndakakanza kutaambilizya makani mabotu ooko Kilisito nkwaakakambaukwa kale, ikutegwa nditayaki antalisyo yamuntu umbi; 21 pele ndakakanza kucita mbubonya mbuli mbokulembedwe kuti: “Ibantu aabo batakasikilwa makani aamba zyanguwe bayoobona, alimwi aabo batakamvwa bayoomvwisya.”

22 Nkakaambo kaako iziindi zinji ndakaalilwa kusika kulindinywe. 23 Pele lino ndicinyina cilawo nkondatakakambaukila kale muzyooko eezyi, alimwi kwamyaka iili mbwiibede ndali kuyandisisya kuboola kulindinywe. 24 Aboobo ndilombozya kuti ndanooli mulweendo lwakuya ku Sipaniya, ndikamubone akusindikilwa andinywe musinzo uuli mbuubede ndaakumana kuyanzana andinywe kusikila mpoceela kwaciindi cili mbocibede. 25 Pele lino ndili afwaafwi kuunka ku Jelusalemu kuyookutaukila basalali. 26 Nkaambo aabo bali mu Makedoniya amu Akaya cakababotela kwaabila zyintu zyabo kwiinda mukusanga zyintu eezyo kubasalali bacete ibali mu Jelusalemu. 27 Masimpe, cakababotela kucita boobo, alimwi buya bakali basicikwelete kubasalali; nkaambo ikuti bamasi bakatola lubazu muzyintu zyakumuuya zyabasalali, ibamasi aaba abalo bajisi cikwelete cakubakutaukila basalali azyintu zyakumubili. 28 Aboobo ndaakumanizya mulimo ooyu alimwi akucisisya kabotu-kabotu cakusanga* eeci kuli mbabo, ndiyooinda kulindinywe mulweendo lwangu lwakuya ku Sipaniya. 29 Kunze lyaboobo, ndilizyi kuti ndaakuboola kulindinywe, ndiyooboola azilongezyo zinji kuzwa kuli Kilisito.

30 Lino ndamukulwaizya bakwesu, kwiinda mu Mwami wesu Jesu Kilisito akwiinda muluyando lwamuuya, kuti mulitakate antoomwe andime mumipailo kuli Leza kujatikizya ndime, 31 kutegwa ndikavwunwe kubantu batasyomi bamu Judaya akuti mulimo wangu wakukutaukila basalali ku Jelusalemu ukatambulike kuli mbabo, 32 ikutegwa kwiinda mukuyanda kwa Leza ndaakuboola kulindinywe ndikakondwe alimwi akukatalusyigwa antoomwe andinywe. 33 Leza uupa luumuno abe andinywe nyoonse. Ameni.