JOELI
1 Ndeeli jwi lya Jehova ilyakamusikila Joeli* mwana wa Petueli:
Sena cintu cili boobu kuli nocakacitikide kale mumazuba aanu
Naa mumazuba aabamauso?+
3 Amucilwiide bana banu,
Abalo bana banu bakalwiide bana babo,
Eelyo bana babo bakalwiide zyalani litobela.
4 Eeco cakasiigwa acisozi cinyonyoona, caligwa acikwikwi;+
Eeco cakasiigwa acikwikwi, caligwa acisozi citakwe mababa;
Mpoonya eeco casiigwa acisozi citakwe mababa, caligwa acisozi cilya kapati.+
5 Amubuke, nywebo nobacakolwa,+ mulile!
Amulile, nywebo nyoonse nobasikunywa waini,
Nkaambo waini uulweela wagusyigwa kumilomo yanu.+
6 Nkaambo kwanjila cisi munyika yangu; cilaanguzu alimwi bantu bancico tabakonzyi kubalwa.+
Meno aancico ali mbuli meno aasyuumbwa,+ ayalo myeebo yancico ili mbuli yasyuumbwa.
7 Canyonyoona musaansa wangu akupa kuti mukuyu wangu usyaale kuuli cisiko buyo,
Cazipulula akuziyupa zyoonse mpoonya cazisowa,
Capa kuti itutabi twanzizyo tutube buu.
8 Amulile mbubonya mbwalila nakalindu uusamide cisani camasaka
Sibwiinga* wakubukubusi bwakwe.
9 Zituuzyo zyamaila+ azituuzyo zinyugwa+ zyamana muŋanda ya Jehova;
Bapaizi, babelesi ba Jehova balalila.
10 Muunda wanyonyoonwa, nyika ilalila;+
Nkaambo maila anyonyoonwa, waini mupya wayuminina, aalo mafwuta amana.+
11 Balimi baluuside, basikulanganya myuunda yamisaansa balalila,
Akaambo kawiiti alimwi abbaale;
Nkaambo zitebulwa mumuunda zyanyonyoonwa.
12 Musaansa wayuma,
Mukuyu waneta.
Cisamu camapomegranite, kakunka alimwi acisamu camaapele,
Zisamu zyoonse zyamusyokwe zyayuma;+
Nkaambo lukkomano lwasanduka kuba kuusa akati kabantu.
Amunjile, moone kamusamide zisani zyamasaka nywebo nobabelesi ba Leza wangu;
Nkaambo zituuzyo zyamaila+ azituuzyo zinyugwa+ zyalesyegwa kuŋanda ya Leza wanu.
14 Amwaambilizye ciindi cakuliimya kulya;+ amwiite bantu kumuswaangano uusetekene.
Amubunganye bapati, antoomwe abantu boonse bamucisi
Kuŋanda ya Jehova Leza wanu,+ mukwiilile lugwasyo kuli Jehova.
15 Maawe akaambo kabuzuba buboola!
Nkaambo buzuba bwa Jehova buli afwaafwi,+
Bulaboola mbuli lunyonyooko luzwa kuli Singuzuzyoonse!
16 Sena cakulya tiicagusyigwa katulangilila ameso eesu,
Sena kusekelela alimwi alukkomano tiizyamana kuŋanda ya Leza wesu?
17 Inseke* zyanyana kunsi aamafosyolo aabo.
Ziyobwedo zyanyonyoonwa.
Matala amwaigwa, nkaambo maila ayuma kaatanazyala.
18 Nobaba banyama bavwubwa balatongela!
Matanga aaŋombe aile kwiingaila kaanyongene, nkaambo taajisi macelelo!
Aalo matanga aambelele apengelaamwi.
Nkaambo mulilo waumpa macelelo aamunkanda,
Alimwi mabangabanga aamulilo azyuumpa cakumaninina zisamu zyoonse zyamusyokwe.
20 Nobaba banyama bamusyokwe balakuyandisisya yebo,
Nkaambo tulonga twamaanzi twayuminina
Awalo mulilo waaumpa cakumaninina macelelo aamunkanda.”
2 “Amulizye mweembo mu Ziyoni!+
Amoongolole loongololo lwankondo mucilundu cangu cisalala.
Mbuzuba bwamakumbi amudima uusiya mbi,+
Mbuli mumuni wakubucedo uuyaabungwengwemuka amalundu.
Kuli bantu banji kapati alimwi basinguzu;+
Takunabede bantu bali boobu kuzwa lili alili,
Alimwi takukabi limbi ibambi bali mbuli mbabo
Mumyaka yamazyalani oonse.
3 Kumbele lyabo mulilo uyaabuumpa,
Alimwi kusyule lyabo mabangabanga aamulilo alaumpa cakumaninina.+
Nyika iili kumbele lyabo ili mbuli muunda wa Edeni,+
Pele kusyule lyabo kuli nkanda iinyonyookede,
Alimwi kunyina cintu cikonzya kufwutuka.
4 Balibonya mbuli mabbiza,
Alimwi babalika mbuli mabbiza aankondo.+
5 Mijinci yabo ilimvwisya mbuli nkalaki nibasotauka atala aamalundu,+
Mbuli kupasauka kwamulilo uuvwilima uumpa makuba.
Bali mbuli nkamu yabantu basinguzu, ibaimvwi mumindando kabalibambilide kulwana nkondo.+
6 Bantu bayoopenga kapati akaambo kambabo.
Boonse bayoolibonya kulibilika kumeso.
7 Balabalika mbuli basinguzu,
Batanta bwaanda mbuli basikalumamba,
Umwi aumwi ulazumanana kweenda munzila yakwe,
Tabaleyi kuzwa munzila zyabo pe.
8 Tabatonkani pe akati kabo;
Umwi aumwi uluujisi kuya kumbele munzila yakwe.
Ikuti bamwi bawisyigwa azilwanyo,*
Aaba bamwi tabamwaiki pe kuzwa mumindando yabo.
9 Balawuumuka kunjila mumunzi, balabalika abwaanda.
Balatanta aamaanda, balainda mumawindo mbuli mubbi.
10 Nyika yazungaana kumbele lyabo, aalo majulu ayuuntana.
Zuba amwezi zyasiya,+
Azyalo nyenyeezi zyaleka kumweka.
11 Jehova uyakoompolola ajwi lipati kumbele lyampi yakwe,+ nkaambo nkamu yakwe nimpati kapati.+
Nkaambo ooyo uuzuzikizya jwi lyakwe ngusinguzu;
Nkaambo buzuba bwa Jehova mbupati alimwi bulayoosya kapati.+
Ino nguni uukonzya kuliyumya kulimbubo?”+
12 “Pele noliba lino,” mbwaamba Jehova, “amujokele kulindime amyoyo yanu yoonse,+
Cakuliimya kulya,+ cakulila alimwi acakoomoka.
13 Amuzapaule myoyo yanu,+ ikutali zisani zyanu pe,+
Mujokele kuli Jehova Leza wanu
Nkaambo ngusilweetelelo* alimwi ngusiluse, tafwambaani kukalala+ alimwi ulizwide luyando lutamani,+
Eelyo ulacinca mizeezo* akutaleta mapenzi.
14 Ino nguni uuzyi ambweni ulajokoloka akucinca mizeezo*+
Akumusiila cileleko,
Cituuzyo camaila alimwi acituuzyo cinyugwa izyakutuulila Jehova Leza wanu?
15 Amulizye mweembo mu Ziyoni!
Amwaambilizye* ciindi cakuliimya kulya; amwiite bantu kumuswaangano uusetekene.+
16 Amubunganye bantu; amusalazye mbungano.+
Amubabunganye bapati;* amubunganye bana alimwi abavwanda.+
Sibwiinga azwe muŋanda yakwe yamukati, awalo nabwiinga azwe muŋanda mwaalede.
17 Akati kakkoce acipaililo+
Bapaizi, ibabelesi ba Jehova abalile akwaamba kuti:
‘O Jehova, kobeetelela bantu bako;
Lukono lwako utalupi kuba cintu cisampaulwa,
Kuti masi abeendelezye.
Nkaambo nzi bantu bamasi ncobeelede kwaamba kuti, “Ino uli kuli Leza wabo?”’+
19 Jehova uyoobavwiila bantu bakwe kuti:
‘Amubone, ndilamutumina maila, waini mupya alimwi amafwuta,
Eelyo ncobeni muyookkuta;+
Tandikamupi limbi kuba cintu cisampaulwa akati kamasi.+
20 Muntu wakunyika ndiyoomutandila kulamfwu andinywe;
Ndiyoomumwaila kunyika njumu iilunda kasuko alimwi iinyonyookede,
Basikalumamba bakwe bakumbele bayoogama kulwizi lwakujwe*
Mpoonya basikalumamba bakwe bamusyule bayoogama kulwizi lwakumbo.*
Lino kununka kwakwe kuyoogwitila,
Alimwi keema kakwe kabyaabi kanakuujisi kugwitila;+
Nkaambo Leza uyoocita zintu zipati.’
21 Utayoowi, onyika.
Kokondwa akusekelela, nkaambo Jehova uyoocita zintu zipati.
22 Mutayoowi pe, nywebo nobanyama bamusyokwe,
Nkaambo macelelo aamunkanda ayoofwefwema,+
Azyalo zisamu ziyoozyala micelo;+
Mukuyu alimwi amusaansa ziyoozyala kapati.+
23 Nywebo nobana bamu Ziyoni, amukondwe akusekelela muli Jehova Leza wanu;+
Nkaambo uyoomupa mvwula yakusaanguna yeelede,
Alimwi uyoomuwisyila mvwula yamucobocobo,
Imvwula yakusaanguna amvwula yakumamanino, mbubonya mbuli kaindi.+
24 Mabuwa aakuumina maila ayoozula maila aapupuludwe,
Azyalo zikandilo zyamisaansa ziyoozula waini mupya alimwi amafwuta.+
25 Ndiyoomujolela zintu nzimwakasweekelwa mumyaka iilya
Nocakalya cikwikwi, cisozi citakwe mababa, cisozi cilya kapati, alimwi acikwikwi cinyonyoona,
Impi yangu mpati njindakatuma akati kanu.+
26 Ncobeni muyoolya mane mukakkute,+
Eelyo muyootembaula zina lya Jehova Leza wanu,+
Ooyo wamucitila zintu zigambya;
Bantu bangu tabakausyigwi limbi nsoni pe.+
27 Eelyo nywebo muyoozyiba kuti ndili akati ka Israyeli+
Akuti ndime Jehova Leza wanu,+ kunyina uumbi pe!
Bantu bangu tabakausyigwi limbi nsoni pe.
28 Kuzwa waawo ndiyootila muuya wangu+ amuntu uuli woonse,
Eelyo bana banu basankwa abasimbi bayoosinsima,
Bamadaala banu bayoolota ziloto,
Abalo balombwana banu bayoobona zilengaano.+
29 Alimwi naaba abazike bangu basankwa abasimbi
Ndiyootila muuya wangu mumazuba aayo.
30 Alimwi ndiyoocita zintu zigambya* kujulu alimwi aanyika,
Bulowa, mulilo alimwi amisumpuululu yabusi.+
31 Izuba liyoosandulwa kuba mudima, awalo mwezi uyooba bulowa+
Kabutanasika buzuba bwa Jehova bupati alimwi ibuyoosya.+
32 Lino muntu woonse wiita zina lya Jehova uyoofwutulwa;+
Nkaambo mu Cilundu ca Ziyoni alimwi amu Jerusalemu kunooli bantu ibayoofwutuka,+ mbubonya mbwaamba Jehova,
Kunooli basikufwutuka aabo Jehova mbaita.”
3 “Nkaambo amubone! Mumazuba aayo alimwi akuciindi eeco,
Eelyo ndaakupilusya baange bana Juda abana Jerusalemu,+
2 Ndiyoobunganya bantu bamasi oonse
Akubatola mu Kkuti* lya Jehosafati.*
Ndiyoobabeteka ooko+
Akaambo kabantu bangu alimwi alukono lwangu, nkokuti bana Israyeli,
Nkaambo bakabamwaila akati kamasi,
Alimwi bakaapaula akwaabana nyika yangu.+
3 Nkaambo bakabaumina cisolo bantu bangu;+
Bakali kusambala mwana musankwa kutegwa babbadele muvwuule
Awalo mwana musimbi bakali kumusambala kutegwa bajane waini wakunywa.
4 Alimwi ino mujisi kaambo nzi kulindime,
Nywebo nominzi ya Turo, Sidoni alimwi anozyooko zyoonse zya Filisitiya?
Sena kuli cibi ncomuyanda kundijolela?
Ikuti naa muyanda kundijolela,
Nkokuti ambebo cakutasowa ciindi, inzya cakufwambaana ndilamujolela cibi canu amitwe yanu.+
5 Nkaambo nywebo mwabweza nsiliva angolida yangu,+
Alimwi lubono lwangu lwiinda kubota mwalutola mumatempele aanu;
6 Abalo bana Juda abana Jerusalemu mwabasambala kuba Giriki,+
Ikutegwa mubatole kulamfwu acilawo cabo;
7 Amubone, ndilababusya kuti baboole kuzwa kubusena nkomwakabasambala,+
Eelyo ndiyoomujolela cibi canu amitwe yanu.
8 Ndiyoosambala bana banu basankwa abasimbi mumaanza aabantu baku Juda,+
Eelyo balo bayoobasambala kubaalumi baku Sheba, kucisi cakulamfwu kapati;
Nkaambo Jehova lwakwe nguwaamba.
9 Amwaambilizye makani aaya akati kamasi+ kuti:
‘Amulibambile nkondo! Amubusye baalumi basinguzu!
Basikalumamba boonse abaswene afwaafwi, abaunke!+
10 Amufwule maamba aanu abe mapanga, azyakukwezuzya zyanu zibe masumo.*
Ooyo uutakwe nguzu, aambe kuti: “Ndili singuzu.”
11 Amuboole muzoogwasye, nywebo nomasi nyoonse nomuzingulukide, amubungane antoomwe!’”+
O Jehova, koleta basinguzu bako* kubusena oobo.
12 “Aabuke masi akuboola mu Kkuti* lya Jehosafati;
Nkaambo ooko ndiyookkala ansi kutegwa ndibeteke masi oonse aazingulukide.+
13 Amucese asikela, nkaambo zisyango zyabizwa.
Amuboole muzoolyatauke, nkaambo cikandilo camisaansa cazula pamu.+
Zibikkilo zyamusinza wamisaansa zyafwasuka, nkaambo bubi bwabo bwavwula kapati.
14 Makamu-makamu ali mukkuti lyakukosweda* makani,
Nkaambo buzuba bwa Jehova buli afwaafwi mukkuti lyakukosweda* makani.+
15 Izuba alimwi amwezi ziyoosiya,
Azyalo nyenyeezi ziyooleka kumweka.
16 Jehova uyoovwuluma mu Ziyoni,
Uyakoompolola ajwi lyakwe mu Jerusalemu.
Eelyo julu anyika ziyoozungaana;
Pele Jehova uyooba mayubilo aabantu bakwe,+
Imampangala aabana Israyeli.
17 Eelyo nywebo muyoozyiba kuti ndime Jehova Leza wanu, uukkala mu Ziyoni, icilundu cangu cisalala.+
18 Mubuzuba oobo, malundu ayookunka waini uulweela,+
Tulundu tuyookunka mukupa,
Atwalo tulonga toonse twa Juda tuyookunka maanzi.
19 Pele Egepita uyooba matongo,+
Awalo Edomu, uyooba nkanda iitakwe cintu,+
Akaambo kalunya ndobakacitila bana Juda,+
Aabo ibalaacisi eeco mobakatila bulowa bwabantu batakwe mulandu.+
20 Pele Juda unookkalwa bantu lyoonse,
Awalo Jerusalemu uyookkalwa bantu kuzyalani azyalani.+
21 Bulowa bwabo mbondakabona kuti bulaamulandu, ndiyoobubona kuti tabukwe mulandu;+
Alimwi Jehova unookkala mu Ziyoni.”+
Nkokwaamba kuti “Jehova Ngu Leza.”
Naa “munyika eeyi.”
Naa “Mulumaakwe.”
Mu Chihebrayo, “Amulyaange.”
Naa “mulyuume acamba.”
Naa ambweni, “Inkuyu ziyumu.”
Naa “munyika.”
Naa “azilwanyo zyakufwusa.”
Naa “ngusilubomba.”
Naa “uleetezyegwa.”
Naa “akweetezyegwa.”
Mu Chihebrayo, “Amusalazye.”
Naa “baalu.”
Nkokuti, Lwizi Lutajisi Buumi.
Nkokuti, Lwizi lwa Mediterranean.
Naa “zitondezyo.”
Naa “Cibanda.”
Nkokwaamba kuti “Jehova Mubetesi.”
Naa “myuumba.”
Naa “basikalumamba bako.”
Naa “Cibanda.”
Naa “mucibanda cakukosweda.”
Naa “mucibanda cakukosweda.”
Naa “bamuzwakule.”
Naa “Kalonga.”