July

Tupona “kumazuba aamamanino” alo ‘aakatazya ncobeni,’ alimwi buumi bulangilwa kuyumina limwi buya Jehova katananyonyoona nyika eeyi mbyaabi akuleta luumuno lwini-lwini anyika. (2Tim. 3:1) Aboobo cilayandika kapati kulibuzya kuti, ‘Ino nkuuli ni nkondilomba lugwasyo alimwi abusolozi?’ Myaka minji yainda, sintembauzyo wakabona mbociyandika kulindiswe kulanga kuli Jehova kutegwa atugwasye muziindi zyamapenzi. (Int. 123:1-4) Kulanga kwesu kuli Jehova wakakukozyanisya kumubelesi uulanga kuli simalelo wakwe. Ino sintembauzyo wakali kupandulula nzi kwiinda mukwaamba boobo? Mubwini, mubelesi talangili buyo kupegwa zyakulya alimwi akukwabililwa kuli simalelo wakwe, pele weelede kubikkila maano kuli nzyayanda simalelo wakwe akuzicita. Mubwenya buyo, tweelede kuvwuntauzya mu Jwi lya Leza kutegwa tuzyibe ncayanda Jehova kulindiswe kutugama alimwi akutobela busolozi bwakwe. Kuti twacita oobo, ndendilyo notukonzya kuba masimpe kuti Jehova uyootugwasya muziindi zyamapenzi. w18.07 12 ¶1-2

Jesu wakali kwaamba kujatikizya kwaanguluka kuzwa kubuzike alimwi akudyaamininwa kwalo bantu nkobataningamvwide, nkokuti kuba “muzike wacibi.” (Joh. 8:34) Cibi tacitusololeli buyo kukucita cintu citaluzi pele alimwi cilatulesya kucita cintu ncotuzyi kuti cililuzi naa kutulesya kupona kweelana ambotuzyi kuti tulakonzya kupona. Munzila eeyi tuli bazike bacibi, alimwi citobela nkutyompwa, kucisa, kupenga alimwi akufwa. (Rom. 6:23) Tulakonzya kulangila kuba alwaanguluko lwini-lwini ndobakajisi bazyali besu bakusaanguna lilikke buyo ciindi mapenzi aaboola akaambo kacibi aakugusyigwa. Majwi aa Jesu aakuti “ikuti mwazumanana kuba mujwi lyangu” atondezya kuti kuli zyeelelo zimwi iziyandika naa minyinza kutegwa twaangululwe anguwe. (Joh. 8:31) Mbotuli Banakristo balyaabide, twakaliimya akusala kupona kakunyina kusotoka minyinza yanjiisyo zya Kristo katuli basikwiiya bakwe. (Mt. 16:24) Mbubwenya Jesu mbwaakasyomezya, tuyakwaanguluka ncobeni ciindi zilongezyo zyacipaizyo cacinunuzyo cakwe zyaakubeleka cakumaninina kulindiswe. w18.04 7 ¶14-16

Jehova ulabikkila maano kujatikizya mbobalimvwa bantu bakwe, noliba leelyo kuyeeya kwabo nokutaluzi. Amubone cikozyanyo ca Jona. Leza wakatuma musinsimi ooyu kuyookambauka mulumbe walubeta kubana Nineve. Ciindi nobakeempwa, Leza wakasala kutabanyonyoona. Nokuba boobo, Jona tanaakakkomana kujatikizya kusala ooku. “Wakanyema kapati” akaambo kakuti businsimi bwakwe bwakunyonyoonwa kwa Nineve tiibwakazuzikizyigwa. Pele Jehova wakamukkazikila moyo Jona alimwi akumugwasya kucinca mbwaakali kuyeeya. (Jon. 3:10–4:11) Mukuya kwaciindi, Jona wakakabona kaambo, mane buya wakabelesyegwa a Jehova kulemba makani aaya kutegwa tugwasyigwe. (Rom. 15:4) Mbwabeendelezya bantu bakwe Jehova citupa lusyomo lwakuti ulijisi lweetelelo kubabelesi bakwe. Ulikuzyi kucisa alimwi akupenga kwaumwi aumwi wesu. Ulizyi nzyotuyeeya, mbotulimvwa alimwi akulezya kwesu. Alimwi ‘takatulekeli kuti tusunkwe kwiinda nguzu zyesu pe.’ (1Kor. 10:13) Eelo kaka cilaumbulizya kapati cisyomezyo eeci! w19.03 16 ¶6-7

Mu Mulawo wa Musa, baalu ibakasalidwe bakajisi mukuli wakubeteka makani aajatikizya kukomba Jehova, alimwi akulanganya mazwanga amilandu iyakali kucitika akati kabantu. Amubone zikozyanyo zitobela. Ikuti muna Israyeli wajaya muntu, tanaakali kujaigwa mpoonya-mpoonya. Baalu bamumunzi mwaakali kukkala bakali kwaavwuntauzya makani aayo kabatana kosola naa muntu ooyo weelede kujaigwa naa pe. (Dt. 19:2-7, 11-13) Baalu alimwi bakali kubeteka twaambo tunji itwakali kucitika mubuumi bwabuzuba abuzuba, nkokuti kutalikila kutwaambo tujatikizya zivwubwa kusikila kumazwanga aamulukwatano. (Kul. 21:35; Dt. 22:13-19) Ciindi baalu nobakali kubeteka cabululami alimwi abana Israyeli nobakali kutobela Mulawo, bantu boonse bakali kugwasyigwa, alimwi cisi cakali kupa bulemu kuli Jehova. (Lev. 20:7, 8; Is. 48:17, 18) Aboobo, inga twabona kuti cibeela cili coonse cabuumi bwesu cilayandika kapati kuli Jehova. Uyanda kuti katucita cabululami alimwi acaluyando notweendelezya bamwi. Alimwi ulabikkila maano kujatikizya nzyotwaamba alimwi anzyotucita, nociba ciindi notuli tolikke. w19.02 23 ¶16-18

Ciindi notukopene mumizeezo, cilakatazya kubomba moyo. Tulakonzya kutalika kwaamba zintu zibi alimwi akweendelezya bamwi munzila iitali kabotu. Kuti naa kuli nomwakakopene kale mumizeezo, amulange cikozyanyo ca Jesu. Mumyezi yamamanino yabuumi bwakwe anyika, Jesu wakalikopene kapati mumizeezo. Wakalizyi kuti wakali kuyoojaigwa alimwi akupenga kapati. (Joh. 3:14, 15; Gal. 3:13) Myezi iili mbwiibede katanafwa, wakaamba kuti wakalikatazyidwe kapati mumoyo. (Lk. 12:50) Alimwi kakuceede buyo mazuba masyoonto kuti afwe, Jesu wakaamba kuti: “Moyo wangu wapenga kapati.” Tulakonzya kubona kulicesya kwakwe alimwi akulibombya kuli Leza ciindi naakamwaambila mbwaakali kulimvwa mumupailo. (Joh. 12:27, 28) Nocakasika ciindi, cabusicamba Jesu wakalipa kuli basinkondonyina ba Leza, balo ibakamujaya munzila iicisa kapati alimwi iijazya nsoni. Nokuba kuti wakalikopene mumizeezo alimwi akupenga kapati, cakubomba moyo Jesu wakacita kuyanda kwa Leza. Cakutadooneka, tulakonzya kwaamba kuti Jesu ncikozyanyo cilibedelede camuntu uutondezya kubomba moyo ciindi nakopene mumizeezo!—Is. 53:10. w19.02 11 ¶14-15

Kutegwa katujanika kumiswaangano lyoonse, tuyandika kutondezya busicamba ciindi notulijana mubukkale bukatazya. Bakwesu abacizyi bamwi balajanika kumiswaangano nokuba kuti bali mubuumba, balatyompwa naa kuciswa-ciswa. Bamwi cabusicamba balajanika kumiswaangano nociba ciindi nobakazyigwa kapati abanamukwasyi naa beendelezi bamfwulumende. Amuzinzibale kuyeeya kwaciindi cisyoonto kujatikizya cikozyanyo cesu mbocibajatikizya bakwesu ibali muntolongo akaambo kakwiiminina lusyomo lwabo. (Heb. 13:3) Ciindi nobamvwa kuti tulazumanana kubelekela Jehova nokuba kuti tulasunkwa, balakulwaizyigwa kuzumanana kusyomeka alimwi akuba basicamba. Ciindi Paulo naakali muntolongo yaku Roma, wakali kukkomana kapati kumvwa kuti bakwesu bakali kubelekela Leza cakusyomeka. (Flp. 1:3-5, 12-14) Kakusyeede ciindi cisyoonto kuti aangununwe naa naakaangununwa, Paulo wakalembela bana Hebrayo lugwalo. Mulugwalo oolu wakakulwaizya Banakristo basyomeka aabo kuti batanooleki kuswaangana antoomwe.—Heb. 10:25. w19.01 28 ¶9

Saatani uyanda kuti tube mbuli nguwe, muzangi uutatobeli zyeelelo zya Jehova alimwi weendelezyegwa akuliyanda. Ulatubikka akati kabantu mbaakanyonganya kale alimwi ulangila kuti tuyoosala kuyanzana abantu babyaabi kutegwa ‘banyonganye’ mizeezo yesu alimwi ambotucita zintu. (1Kor. 15:33; bupanduluzi buyungizyidwe.) Saatani alimwi ulasoleka kunyonganya moyo wesu kwiinda mukutupa kusyoma busongo bwabantu muciindi cakusyoma mizeezo ya Jehova. (Kol. 2:8) Amulange buyo nzila yomwe iisumpulwa a Saatani, yakuti kuvwuba yeelede kuba mbaakani iiyandika kapati mubuumi. Aabo ibayeeya boobu balakonzya kuvwuba, ambweni tabakonzyi. Kufwumbwa mbocikonzya kuba, bali muntenda. Nkaambo nzi? Akaambo kakuti balakonzya kubikkila kapati maano kukujana mali cakuti balaleka kubikkila maano kubuponi bwabo, mukwasyi wabo alimwi nociba cilongwe cabo a Leza kutegwa bazuzikizye mbaakani yabo. (1Tim. 6:10) Tulakonzya kulumba kuti Taateesu wakujulu ulatugwasya kwaalanga munzila yeelede mali.—Muk. 7:12; Lk. 12:15. w19.01 15 ¶6; 17 ¶9

Noliba leelyo Mwana wa Jehova katanasika anyika akupa cikozyanyo cilondokede cambokucitwa kuyumya-yumya, babelesi ba Jehova basyomeka bakalizyi mbociyandika kuyumya-yumya. Ciindi Hezekiya naakakongwa abana Asuri, wakabunganya basilutwe babasikalumamba alimwi abantu ba Juda kuti abayumye-yumye. ‘Aboobo bantu bakayumizyigwa amajwi aakwe.’ (2Mak. 32:6-8) Nokuba kuti walo kumugama wakali kuyandika luumbulizyo, Jobu wakapa “basikuumbulizya bakatazya” botatwe iciiyo kujatikizya kuyumya-yumya. Wakabaambila kuti naakali nguwe, ‘naakabayumya amajwi aazwa kumulomo wakwe, alimwi naakabakatalusya amajwi aaumbulizya aazwa kumilomo yakwe.’ (Job. 16:1-5) Kumamanino, Jobu wakaumbulizyigwa a Elihu alimwi a Jehova kumugama.—Job. 33:24, 25; 36:1, 11; 42:7, 10. w18.04 16 ¶6; 17 ¶8-9

Isaya wakalaambide kale Jehova mbwaakali kuyoobayumya bantu bakwe naakaamba kuti: “Jehova uyooboola anguzu, alimwi janza lyakwe liyoomweendelezyela.” (Is. 40:10) Ibbaibbele kanji-kanji libelesya bbala lyakuti “janza” munzila yamaambilambali ikwaamba nguzu. Aboobo kaambo kakuti ‘janza lyakwe liyoomweendelezya,’ nkokuti lya Jehova, katuyeezya kuti Jehova Mwami singuzu. Wakabelesya nguzu zyakwe izitakonzyi kuzundwa kutegwa abagwasye akubakwabilila babelesi bakwe kaindi, alimwi wazumanana kubayumya akubakwabilila aabo ibamusyoma mazuba aano. (Dt. 1:30, 31; Is. 43:10) Kwaambisya ciindi basinkondoma nobatupenzya, Jehova tacilubi cisyomezyo cakwe cakuti: “Ndilakuyumya.” Mumasena aambi aamunyika mazuba aano, basinkondoma balasolekesya kulesya mulimo wesu wakukambauka naa kulesya mbunga yesu. Nokuba boobo, tatulibiliki kapati akaambo kakulwanwa kuli boobu. Jehova watupa cisyomezyo icituyumya alimwi akutupa lusyomo. Utusyomezya kuti: “Kunyina cilwanyo cipangilwa kulwana nduwe iciyoozwidilila.”—Is. 54:17. w19.01 5-6 ¶12-13

Mukwiimpana abanyama, muyandika lugwasyo lwakumuuya, oolo lwalo lukonzya kupegwa buyo a Mulengi wanu. (Mt. 4:4) Ciindi nomumuswiilila, mulaba amaano, busongo alimwi alukkomano. Leza ulamugwasya kumuuya kwiinda mu Jwi lyakwe alimwi ulamupa cakulya cakumuuya cinji kwiinda ‘mumuzike uusyomeka alimwi uucenjede.’ (Mt. 24:45) Eelo kaka tulakkomana kapati acakulya cakumuuya cinji icijisi busani! (Is. 65:13, 14) Cakulya cakumuuya ciyoomupa kuba basongo alimwi akuyeeya kabotu, calo icikonzya kumukwabilila munzila zinji. (Tus. 2:10-14) Mucikozyanyo, bube oobu buyoomugwasya kuzyiba njiisyo zyakubeja, mbuli yakuti kunyina Mulengi. Buyoomukwabilila kububeji bwakuti kuba amali manji alimwi azintu zinji zyakumubili nzezikonzya kumuletela lukkomano. Alimwi buyoomugwasya kuzyiba alimwi akukaka kulombozya kubyaabi ikukonzya kumuletela mapenzi. Aboobo amuzumanane kuyandaula busongo bwa Leza akuyeeya kabotu alimwi akububona kuti mbube buyandika kapati! w18.12 20 ¶6-7

Sena ciyoosika ciindi mazuba eesu ‘nayooba mbuli mazuba aacisamu’? Zisamu zimwi zilapona kwamyaka minji kapati. Bantu bakeelede kuti kabajisi buumi bubotu kutegwa bapone kwaciindi cilamfwu boobo. Ikuti nobakacikonzya kukkala mubukkale Isaya mbwaakasinsima, nocakazuzikizyigwa ncobakali kulombozya, nkokuti paradaiso! Pele businsimi oobo buyoozuzikizyigwa! Amuyeeye kujatikizya businsimi bwabandikwa mbobwaamba zyaparadaiso yakumbele: Bantu bamunyika yoonse bayoolongezyegwa a Leza. Kunyina muntu uyoolwanwa abanyama naa bantu ibali mbuli banyama. Boofwu, basinke matwi alimwi abalema bayooponesyegwa. Bantu bayooyaka maanda aabo alimwi bayookkomana kulima zyakulya zibotu. Bayoopona kwaciindi cilamfwu kwiinda zisamu. Masimpe, tulajana zitondezyo mu Bbaibbele zyakuti buumi buli boobu nkobuli kumbele. Nokuba boobo, bamwi balakonzya kwaamba kuti businsimi oobu tabwaambi kuti kuyooba paradaiso anyika. Ino nkaambo nzi kalimvwisya ikamupa kulangila kuparadaiso iini-ini anyika? Muntu mupati kwiinda iwakaponede wakapa kaambo kalimvwisya.—Lk. 23:43. w18.12 5 ¶13-15

Mizeezo tayikatazyi alimwi ilakonzya kuzumanana kucinca. Kucinca kuli boobu kuyoolibonya kwiinda muzintu nzyotuzumizya mumizeezo yesu alimwi akuzinzibala kuyeeya alinzizyo. Kwiinda mukuzinzibala kuyeeya kujatikizya mbwazibona zintu Jehova, tutondezya kuti mizeezo yakwe ililuzi. Mpoonya tunooyanda kubona zintu mbuli mbwazibona walo. Nokuba boobo, amubone kuti, kutegwa tucince mizeezo yesu akuyeeya mbwayeeya Jehova, tweelede ‘kuleka kutobela ziyanza zyabweende bwazintu obuno.’ Eeci caamba kuti tweelede kuleka kweebelela, kubala alimwi akuswiilila cintu cili coonse icisumpula mizeezo iiteendelani akuyeeya kwa Leza. Kucinca ooku ikuyandika kapati kulakonzya kukozyanisyigwa acakulya. Muntu ulakonzya kuba abusani mumubili kwiinda mukulya zyakulya izijisi busani. Pele ino inga camugwasya buti ikuti ciindi aciindi kalya zyakulya zibolede? Mbubwenya buyo, kusoleka kwesu kwiiya mizeezo ya Jehova kuyooba kwabuyo ikuti twazumizya mizeezo yanyika kutweendelezya. w18.11 21 ¶14-15

Tweelede kuba amakanze aakupona kweelana akasimpe buzuba abuzuba. Amulyaangilile kasimpe mucibuno mbuli lutambo. Kaindi, lutambo ndwaakali kusama sikalumamba lwakali kumugwasya akukwabilila cibuno cakwe azizo zimwi zyamukati. Pele kutegwa lutambo lumukwabilile, wakeelede kulwaangisya. Lutambo lwatakaangidwe kabotu tiilwakali kukwabilila. Ino lutambo lwesu lwakumuuya lwakasimpe lutukwabilila buti? Ikuti twakaangilila mbuli lutambo, kasimpe kayootukwabilila kukuyeeya kutaluzi alimwi kayootugwasya kusala camaano. Ciindi notwasunkwa, kasimpe kamu Bbaibbele kayootugwasya kuyumya makanze eesu aakucita ciluzi. Mbubwenya sikalumamba mbwaatakali kukonzya kuunka kunkondo kanyina lutambo, tweelede kuba amakanze aakutakasamununa kasimpe. Muciindi caboobo, tulasolekesya kukasama lyoonse kwiinda mukupona kweelana ankako. w18.11 12 ¶15

Tatukonzyi kukajana kasimpe kali mu Jwi lya Leza kakunyina kubeleka canguzu. Tweelede kulisungula kwaaba zintu zimwi kutegwa tukajane. Mbubwenya mbuli mulembi musongo wabbuku lya Tusimpi mbwaakaamba, kuti naa ‘twakakaula kale,’ naa kukajana, “kasimpe” tweelede kukajatisya kutegwa ‘tutakasambali’ naa kusweekelwa nkako. Nociba cintu citabbadelwi cilakonzya kuulwa. Ibbala lya Chihebrayo ilyakasandululwa kuti ‘koula’ kulugwalo lwa Tusimpi 23:23 alimwi lilakonzya kwaamba ‘kulijanina.’ Mabala oonse aaya aamba kubeleka canguzu naa kupa cintu cimwi kutegwa tube aacintu eeco cilaampindu. Aboobo kuula kasimpe inga twakwaamba munzila eeyi. Atwaambe kuti kwaambilizyigwa kuti kumusika kunooli kupegwa mabbanana kakunyina “kubbadela”. Sena kuti katukkede inga aboola mabbanana aayo kulindiswe munzila yamaleele? Peepe. Tweelede kusolekesya kutegwa tuunke kuyakwaabweza. Sena mubwini mabbanana aaya twapegwa buyo kakunyina kubbadela? Inzya, pele tweelede kujana ciindi alimwi akusolekesya kuunka kumusika. Mbubwenya buyo tatuyandiki mali buya kutegwa tuule kasimpe. Nokuba boobo, tweelede kubeleka canguzu kutegwa tukajane. w18.11 4 ¶4-5

Jesu wakatamba Petro, Jakobo alimwi a Johane kuti bamusangane kuunka atala aacilundu cilamfwu. Nobakali kooko, bakabona cilengaano cilibedelede. Busyu bwa Jesu bwakabala alimwi zisani zyakwe zyakamweka. Mpoonya bantu bobilo, ibaimininwa a Musa alimwi a Elija, bakatalika kubandika a Jesu kujatikizya lufwu lwakwe ilwakali kumbele alimwi abubuke. (Lk. 9:29-32) Mpoonya kkumbi limweka lyakabavwumbilila alimwi bakamvwa jwi kuzwa mukkumbi, nkokuti ijwi lya Leza! Cilengaano cakatondezya bulemu alimwi anguzu Jesu nzyaakali kuyooba anzizyo kumbele kali Mwami wa Bwami bwa Leza. Cakutadooneka, Kristo wakakulwaizyigwa alimwi akuyumizyigwa kumapenzi alimwi alufwu lucisa kapati ilwakali kuyoomucitikila. Cilengaano alimwi cakayumya lusyomo lwabasikwiiya. Eeci cakabagwasya kulibambila masunko ngobakali kuyooyaanya alimwi amulimo mupati ngobakeelede kuyoocita kumbele. Myaka iitandila ku 30 yakatobela, mwaapostolo Petro wakacaamba cilengaano cakusanduka, kutondezya kuti wakacili kuciyeeya.—2Pet. 1:16-18. w19.03 10 ¶7-8

Ino ninzila nzi imwi Banakristo bakasimpe mobalyaandaanya abantu bamuzikombelo zyakubeja? ‘Twaamba zyamasimpe.’ (Zek. 8:16, 17) Tweelede kwaamba zyamasimpe muzintu zipati alimwi aziniini kubantu mbotutazyi, kubabelesima, kubalongwe, alimwi akubayandwa besu. Ino mbuti kuti kamuli mukubusi uuyanda kukkomaninwa abeenzinyoko? Amube masimpe kuti tamuciti zintu nzyobacita bamwi kakuli muli Banakristo, ibalibonya kuba bantu bali kabotu ciindi nomuli antoomwe abanamukwasyi alimwi ambungano pele mucita zintu ziindene kapati ciindi nomuli abakubusinyoko batakombi alimwi anomubelesya intaneti. Nkokuti, nkubeja, kucenga bazyali banu, bakombinyoko, alimwi buya a Leza. (Int. 26:4, 5) Jehova ulizyi ciindi ‘notumulemeka buyo amilomo yesu, pele myoyo yesu kaili kule kulinguwe.’ (Mk. 7:6) Alimwi cilayandika kapati kucita ncokaamba kasimpi aaka kakuti: “Moyo wako utanyonokeli basizibi, pele buzuba boonse koyoowa Jehova.”—Tus. 23:17. w18.10 9 ¶14-15

Bantu ba Leza mukwasyi wakumuuya, walo uujisi luyando. (1Joh. 4:21) Luyando oolo talutondezyegwi buyo muzintu zipati-pati, pele lulatondezyegwa amutuntu tunji tusyoonto-syoonto, mbuli kwaamba majwi mabotu alimwi akucita zintu caluzyalo. Ciindi notubabikkila maano alimwi akubeendelezya caluzyalo bamwi, ‘twiiya Leza, mbotuli bana bayandwa. (Ef. 5:1) Cakulondoka, Jesu wakabaiya bausyi. Wakaamba kuti: “Amuboole kulindime nyoonse nomukatede akulemenwa, eelyo ndilamukatalusya . . . , nkaambo ndili mubombe moyo.” (Mt. 11:28, 29) Ikuti twaiya cikozyanyo ca Kristo kwiinda “[mukubikkila] maano muntu uupengede,” tuyoomukkomanisya Taateesu wakujulu alimwi andiswe tuyookkomana. (Int. 41:1) Aboobo, atubatondezye luyando kwiinda mukuzumanana kubabikkila maano banamukwasyi, bakwesu abacizyi mumbungano, alimwi abaabo mbotujana mumulimo wamumuunda. w18.09 28 ¶1-2

Ciindi nokwacitika ntenda, bantu ba Leza balijisi zyoolwe zyakubeleka a Leza kwiinda mukugwasya bakwesu kumubili. Mucikozyanyo, balabapa mali aabo bajatikizyidwe. (Joh. 13:34, 35; Mil. 11:27-30) Nzila iimbi mbotukonzya kubagwasya nkwiinda mukusalazya naa kuyakulula maanda aabo. Ba Gabriela, mucizyi waku Poland walo uuli aaŋanda yakanyonyooka amaanzi, wakakkomana kapati ciindi bakwesu ibazwa kumbungano zili aafwaafwi ankwakkala nobakaboola kumugwasya. Wakaamba kuti, “Tandiyandi kwaamba kujatikizya nzyondakasweekelwa, eezyo nzintu buyo zyakumubili. Muciindi caboobo, ndiyanda kumwaambila nzyondakajana. Eeci icakacitika cindipa kusinizya kuti kuba cibeela cambungano ya Bunakristo ncoolwe cilibedelede alimwi cilakkomanisya kapati.” Banji ibagwasyigwa noyamana kucitika ntenda abalo mbobalimvwa oobo. Alimwi aabo ibabeleka a Jehova kupa lugwasyo luli boobu balakkomana kapati alimwi akukkutila.—Mil. 20:35; 2Kor. 9:6, 7. w18.08 26 ¶12

Kutegwa tuzwidilile kukwabilila moyo wesu, tweelede kuti katucikonzya kuzyiba ntenda iiliko alimwi akubweza ntaamu cakufwambaana kutegwa tulikwabilile. Ibbala lyakasandululwa kuti “kokwabilila” lituyeezya mulimo ngwacita mulindizi. Mumazuba aa Mwami Solomoni, balindizi bakali kwiimikila atala abwaanda bwamunzi kutegwa baukwabilile alimwi akulizya mweembo ikuti naa babona basinkondo. Kuciyeeya eeci mumizeezo yesu kulatugwasya kumvwisya ncotweelede kucita kutegwa tumulesye Saatani kunyonganya kuyeeya kwesu. Kaindi, balindizi bakali kubelekela antoomwe abalindizi baamulyango bamumunzi. (2Sam. 18:24-26) Antoomwe, bakali kugwasya kukwabilila munzi kwiinda mukubona masimpe kuti milyango yakali kujalwa kufwumbwa ciindi sinkondo asika afwaafwi. (Neh. 7:1-3) Manjezyeezya eesu aayiisyidwe a Bbaibbele alakonzya kubeleka mbuli mulindizi alimwi akutucenjezya ciindi Saatani nasola kulwana moyo wesu, munzila imwi, ciindi nasola kunyonganya mizeezo yesu, mbotulimvwa, makanze naa nzyotulombozya. Kufwumbwa ciindi manjezyeezya eesu naatucenjezya kujatikizya ntenda, tweelede kwaamvwida alimwi akujala mulyango, munzila imwi. w19.01 17 ¶10-11

Baalumi bacili bana beelede kulangwa-langwa ikutali kweelana ambotuzibona zintu naa kweelana azilengwa, pele beelede kulangwa-langwa kwiinda mukubelesya Jwi lya Leza. (2Tim. 3:16, 17) Zilengwa eezyo izitayeeme amagwalo zilakonzya kupa kuti bakwesu beelela bataunki ambele. Mucisi cimwi, mukutausi uucita kabotu kapati wakapegwa mikuli mipati. Nokuba kuti baalu mumbungano yakwe bakazumina kuti mukwesu ooyu uucili mwana ulasika azyeelelo zyamu Magwalo zyakuba mwaalu, tanaakalumbaizyigwa kuti abe mwaalu. Baalu bacembeede bamwi bakazumanana kwaamba kuti mukwesu ooyu ulibonya kuti ucili mwana kuba mwaalu. Cuusisya ncakuti, mukwesu ooyu tanaakasalwa kuba mwaalu akaambo kambwaakali kulibonya. Malipooti atondezya kuti kuyeeya kuli boobu kulabajatikizya banji mumasena aayindene-indene. Eelo kaka cilayandika kapati kusyoma Magwalo kwiinda kusyoma mbotuzibona swebo zintu! Eeyi nenzila ilikke motumumvwida Jesu alimwi akuleka kubeteka bamwi kweelana ambobalibonya.—Joh. 7:24. w18.08 12 ¶16-17

Kuli ntenda iiliko kwiinda mukufwambaana kutuma ma e-mail alimwi amameseji. Mumasi aamwi, mulimo wesu ulacitwa cakusisikizya naa kuti ulikasyidwe. Basikutukazya mumasi aali boobo acaali balakonzya kumwaya malipooti aalembedwe munzila yakukonga naa kutupa kutasyomana. Amubone cakacitika ku Soviet Union yakaindi. Bamapulisa baitwa kuti KGB, bakamwaya makani aakubeja aakuti bakwesu basyomeka bakaaba bantu ba Jehova. Bantu banji bakaasyoma makani aaya aakubeja, aboobo bakalizandula kumbunga ya Jehova. Eeco cilausisya kapati! Cikkomanisya ncakuti, mukuya kwaciindi banji bakajokela, pele bamwi bakaunkila limwi. Lusyomo lwabo lwakanyonyooka mbuli bwato bwaloba mulwizi. (1Tim. 1:19) Mbuti mbotukonzya kweeleba ntenda iili boobo? Kwiinda mukutamwaya makani aakubeja naa ngotutazyi kuti ngamasimpe naa pe. Mutabi bafwubafwuba. Amusinizye kuti mulijisi twaambo twamasimpe. w18.08 4 ¶8

Mumalembe aa Chigiliki aakusaanguna aaliko, kanji-kanji twaandaanyo tiitwakali kubelesyegwa. Aboobo kulakonzya kuba mubuzyo wakuti: Sena Jesu wakali kwaamba kuti, “Ndakwaambila, sunu uyooba andime mu Paradaiso”? Naa wakali kwaamba kuti, “Ndakwaambila sunu, uyooba andime mu Paradaiso”? Amuyeeye kuti Jesu wakaambilide basikumutobela kuti: “Mwanaamuntu uyooba mukati kanyika kwamazuba otatwe isyikati amasiku.” (Mt. 12:40; 16:21; 17:22, 23; Mk. 10:34; Mil. 10:39, 40) Aboobo Jesu kunyina naakaunka mu Paradaiso iili yoonse mubuzuba walo alimwi acigwebenga mbobakafwa. Jesu wakali “mu Cuumbwe [naa “Cikkalilo Cabafwu”]” kwamazuba aali mbwaabede, kusikila Leza naakamubusya. (Mil. 2:31, 32; bupanduluzi buyungizyidwe) Cigwebenga icakali afwaafwi kufwa tiicakazyi kuti Jesu wakapangide cizuminano abaapostolo bakwe basyomeka kuti bayooba anguwe mu Bwami bwakujulu. (Lk. 22:29) Kuyungizya waawo, cigwebenga eeco kunyina nocakabbapatizyidwe. (Joh. 3:3-6, 12) Aboobo tulakonzya kwaamba kuti cisyomezyo ca Jesu ni Paradaiso anyika yalo iyakali kuyooba kumbele. w18.12 6 ¶17-18, 20-21

Muciindi buyo cisyoonto, bana Israyeli bakatalika kukomba moombe wangolida! Nokuba kuti bakatyola mulawo wa Jehova acaali, munzila imwi, bana Israyeli bakalyeena kwiinda mukuyeeya kuti bakacili kulubazu lwa Jehova. Amuciyeeyele buyo, Aroni wakaamba bukombi bwabo bwamoombe kuti “pobwe lya Jehova”! Ino Jehova wakalimvwa buti? Wakausa kapati. Jehova wakaambila Musa kuti bantu ‘bakalisofwaazya’ alimwi ‘bakasiya nzila njaakabalailila kuti batobele.’ Kwiinda ‘mubukali bwakwe buyaka mbuli mulilo,’ Jehova mane wakayeeya kuunyonyoona musyobo mupya wa Israyeli. (Kul. 32:5-10) Nokuba boobo, Jehova wakasala kutabanyonyoona bana Israyeli. (Kul. 32:14) Nokuba kuti kumatalikilo Aroni wakatola lubazu mukupanga mutuni ooyo, wakeempwa akubasangana ba Levi boonse ibakalyaambilila kuba kulubazu lwa Jehova. Nokuba kuti buzuba oobo bantu banji bakafwa akaambo kakukomba mituni, aabo ibakali kulubazu lwa Jehova bakapegwa cisyomezyo cakulongezyegwa.—Kul. 32:26-29. w18.07 20 ¶13-16

Ino nkulemekwa kuli buti ikwiinda kubota nkotweelede kuyandisisya kuba ankuko? Takuli kulemekwa bantu nkobayandaula mulwiiyo, mumakwebo alimwi amuzyakulikondelezya zili munyika iino. Muciindi caboobo, nkulemekwa nkwaakatupandulwida Paulo mumajwi aaya aakuti: “Lino mbwaanga mulimuzyi Leza, naa andaambe kuti lino mbwaanga mulizyibidwe a Leza, ino kayi mupilukila nzi kuzintu zyantalisyo izitagwasyi alimwi zinyina mpindu akuyanda kuzibelekela alimwi?” (Gal. 4:9) Eelo kaka eeci ncoolwe citaliboteli ‘kuzyibwa a Leza,’ Mweendelezi Mupati wabubumbo boonse! Ulilibambilide kuba acilongwe ciyumu andiswe. Syaazibwene umwi wakaamba kuti, “tulaba bantu bayandika kapati kulinguwe.” Ciindi Jehova natubona kuba balongwe bakwe, tulapona buumi bulaampindu.—Muk. 12:13, 14. w18.07 8 ¶3-4

Kutegwa tugwasyigwe amilawo ya Leza, tweelede kwiiyanda alimwi akwiilemeka. (Am. 5:15) Pele ino mbuti mbotukonzya kucita oobo? Iciyandika kapati, nkwiiya kubona zintu mbuli mbwazibona Jehova. Mucikozyanyo, amweezyeezye kuti mujisi penzi lyakubula ŋonzi. Mpoonya dokotela wanu wamupangila pulogilamu yazyakulya nzyomweelede kulya, kunyanyaansya mubili, alimwi ambomweelede kupona. Nomwamana kwiisola pulogilamu eeyo, mwajana kuti ilabeleka kabotu. Tacidoonekwi buya kuti inga mwamulumba kapati dokotela wanu akaambo kakumugwasya kuba abuumi buli kabotu. Mbubwenya buyo, Mulengi wesu ulatupa milawo iikonzya kutukwabilila kuzwa kuzintu zikonzya kutucitikila akaambo kakucita cibi, calo icipa kuti katupona kabotu. Amubone mbotugwasyigwa kwiinda mukutobela milawo yamu Bbaibbele iijatikizya kubeja, kukanza kucita zintu zibi, kubba, bwaamu, nkondo alimwi akusyoma mizimo. (Tus. 6:16-19; Ciy. 21:8) Ciindi notujana zilongezyo iziboola akaambo kakucita zintu munzila njayanda Jehova, luyando lwesu kulinguwe alimwi akumilawo yakwe luyookomena. w18.06 17 ¶5-6

Ambweni mweendelezi wakali kulibilika kuti Jesu wakali kuyooleta manyongwe, cintu ncaakali kuyoowa kapati Pilato mubweendelezi bwakwe. Jesu wakaingula kuti: “Bwami bwangu tabuli bwanyika eeyi.” (Joh. 18:36) Tanaakali kutola lubazu mutwaambo twamapolitikisi nkaambo Bwami bwakwe bwakali kuyooba bwakujulu. Wakaambila Pilato kuti mulimo ngwaakaboolela anyika wakali ‘wakupa bumboni kujatikizya kasimpe.’ (Joh. 18:37) Kuti twaumvwisya kabotu-kabotu mulimo wesu mbubwenya Jesu mbwaakaumvwisya, tatukabi kulubazu lwacipani camapolitikisi cili coonse nomuba mumyoyo yesu. Kucita boobo tacili cuuba-uba pe. Mulangizi weendeenda umwi wakaamba kuti: “Bantu mucilawo cesu bayaabuyaambele kutalisya mazwanga, muuya wakuyandisya cisi uyaabwiindila buya, alimwi banji bayeeya kuti kulwanina lwaanguluko kulakonzya kucinca buumi bwabo kuti bubote. Pele cikkomanisya ncakuti, bakwesu balukwabilila luumuno lwabo lwa Bunakristo kwiinda mukubikkila maano kumulimo wakukambauka makani mabotu aa Bwami. Balangila kuti Leza nguuyoomana kutalulama alimwi amapenzi aambi ngotujana.” w18.06 4-5 ¶6-7

Kuli buyo mabbuku otatwe mu Magwalo aa Chihebrayo, 1 Makani, Jobu, alimwi a Zekariya, aamba zina lyakuti Saatani, lyalo ilyaamba “Sikukazya.” Nkaambo nzi ncokuli buyo makani masyoonto aakaambwa kujatikizya sinkondoma mane kuzikusika ciindi Mesiya naakaboola? Cilasalala kuti Jehova tanaakayanda kuti Saatani abe abulemu butamweelede kwiinda mukupa kuti zibeela zinji zya Magwalo aa Chihebrayo zyaambe kujatikizya nguwe amicito yakwe. Kaambo kapati ikakapa kuti Jehova asololele cibeela ca Magwalo aaya kuti cilembwe kakali kakuzyibya Mesiya alimwi akusololela bantu ba Leza kulinguwe. (Lk. 24:44; Gal. 3:24) Eeco nocakazuzikizyigwa alimwi a Mesiya naakaboola, Jehova wakamubelesya walo alimwi abasikwiiya bakwe kuyubununa zintu zinji nzyotuzyi kujatikizya Saatani alimwi abangelo ibakamusangana. Eeci cileelela, mbwaanga Jehova uyoobelesya Jesu alimwi abalelinyina bananike kunyonyoona Saatani abasikumutobela. (Rom. 16:20; Ciy. 17:14; 20:10) Mutalubi kuti nguzu zya Diabolosi zilaampozigolela. Tulakwabililwa a Jehova, Jesu, alimwi abangelo basyomeka. Kwiinda mukugwasyigwa ambabo, tulakonzya kumukazya sinkondoma. w18.05 22-23 ¶2-4

Munzila iimwi, Jehova utubona kuti tuli babelesi bakwe lilikke kuti katuzyala micelo. (Mt. 13:23; 21:43) Aboobo, mucikozyanyo cijanika mulugwalo lwa Johane 15:1-5, imicelo Munakristo umwi aumwi njayelede kuzyala tayaambi basikwiiya bapya mbakonzya kujana. (Mt. 28:19) Nocali boobo, nkokuti Bakamboni basyomeka ibatajani basikwiiya akaambo kakuti bakambaukila mucilawo bantu mobatabikkili maano balakonzya kuba mbuli mitabi iitazyali yamucikozyanyo ca Jesu. Kuyeeya kuli boobo takuluzi pe! Nkaambo nzi? Nkaambo kakuti tatukonzyi kubasinikizya bantu kuba basikwiiya. Ikubona babelesi bakwe kuti tabeeleli akaambo kakwaalilwa kucita cintu ncobatakonzyi kucita munguzu zyabo, inga tiiceendelana anzila zya Jehova zyaluyando. Cili coonse Jehova ncatwaambila kuti tucite cilakonzyeka lyoonse. (Dt. 30:11-14) Ino micelo nzi njotweelede kuzyala? Cilisalede kuti, micelo kweelede kuti yaamba mulimo umwi aumwi wesu ngwakonzya kucita. Ino mulimo nzi? Mulimo wakukambauka makani mabotu aa Bwami bwa Leza.—Mt. 24:14. w18.05 14 ¶8-9

Kufwumbwa naa baitwa kuti mbafwundisi, bapaizi, bamayi, naa mazina aambi buyo, kuli basololi bazikombelo banji mazuba aano. Mbubwenya mbuli beenzinyina bamumwaanda wamyaka wakusaanguna, “basinkilila kasimpe” ikali mu Jwi lya Leza alimwi “bakaleka kasimpe ka Leza akutobela bubeji.” (Rom. 1:18, 25) Basumpula njiisyo zyakubeja mbuli yakuti, “Ikuti naa wafwutulwa ciindi comwe, nkokuti wafwutukila limwi,” kuli cintu cizumanana kupona muntu afwa, kuli kuzyalululwa, alimwi akuyeeya kubyaabi kapati kwakuti Leza ulakuzumizya kukwatana alimwi akoonana kwabantu bajisi zizyo zikozyenye. Basimapolitikisi baamba zyakubeja kutegwa beene bantu. Kubeja kumwi kupati ikulangilwa kuyoocitika kumbele nciindi bantu nobayakwaambilizya kuti lino kwaba “luumuno akuliiba!” “Mpoonya cakutayeeyela lunyonyooko luyoobasikila cakufwambaana.” Tutasoli kubasyoma ciindi nobasola kutweena kuti bweende oobu bwazintu tabuli muntenda! Bwini mbwakuti, swebo ‘tulizyi kabotu kuti buzuba bwa Jehova buyoosika mbubonya mbwasika mubbi imasiku.’—1Tes. 5:1-4. w18.10 7-8 ¶6-8

Jesu Kristo, kwiinda mubanabokwabo bananike alimwi ‘abasilutwe’ ibabagwasyilizya bambelele zimwi, ulabakulwaizya alimwi akubasololela aabo ibatyompedwe muciindi cino ncobayandika lugwasyo. Mboceelede kuba oobo, nkaambo baalu aaba tabali “basimalelo” balusyomo lwabamwi pele ‘mbaasimilimonyina’ mukupa kuti bakombinyina bakondwe. (Is. 32:1, 2; 2Kor. 1:24) Mwaapostolo Paulo wakasiya cikozyanyo iceelede kuyiigwa. Wakalembela Banakristo mu Tesalonika ibakali kupenzyegwa kuti: “Mbwaanga nywebo twakali kumuyanda kapati, twakali kuyandisya kumwaabila ikutali buyo makani mabotu aa Leza, pele abuumi bwesu, nkaambo mwakaba bayandwa besu. (1Tes. 2:8) Ikutondezya kuti majwi alikke aakukulwaizya talili lyoonse naazulila, Paulo wakaambila baalu baku Efeso majwi aali mulugwalo lwabuzuba bwasunu. w18.04 21-22 ¶6-8

Kutegwa tukkomane akujana mpindu kulwaanguluko oolo, tweelede ‘kusandukila kuli Jehova,’ nkokuti kuba acilongwe anguwe. (2Kor. 3:16) Bana Israyeli munkanda tiibakali kubona milimo ya Jehova kulimbabo munzila yakumuuya. Cakali mbuli kuti myoyo yabo amizeezo yakalivwumbidwe alimwi yakali miyumu, yakabikkilide buyo maano kukubelesya lwaanguluko lupya lwakuzwa mu Egepita munzila yakumubili. (Heb. 3:8-10) Nokuba boobo, lwaanguluko iluswaangene amuuya wa Jehova lulainda akwaanguluka kubuzike bwakumubili. Lulainda kapati akusolekesya kwabantu nkobakonzya kulangila kujana, muuya wa Jehova uleta lwaanguluko kubuzike bwacibi alufwu, alimwi akubuzike bwabukombi bwakubeja alimwi amicito yambubo. (Rom. 6:23; 8:2) Eelo kaka oolo ndwaanguluko lwabulemu! Muntu ulakonzya kukkomana ampindu zyalwaanguluko luli boobo noliba leelyo nali mubuzike.—Matl. 39:20-23. w18.04 9 ¶3-5