August

Kumiswaangano yesu tulayeezyegwa lyoonse Jehova alimwi a Jesu nzyobakatucitila. Akaambo kakulumba kapati, tulasola kumwiiya Jesu kweelana ambotupona buzuba abuzuba. (2Kor. 5:14, 15) Kuyungizya waawo, moyo wesu ulatukulwaizya kumutembaula Jehova akaambo kakutupa cinunuzyo. Imwi nzila mbotukonzya kumutembaula Leza nkwiinda mukupa bwiinguzi buzwa ansi amoyo ciindi camiswaangano. Tulakonzya kutondezya mbolubede luyando ndotujisi kuli Jehova alimwi aku Mwanaakwe kwiinda mukulyaaba kubacitila cili coonse. Kanji-kanji, tweelede kwaaba zintu ziindene-indene kutegwa tujanike kumiswaangano yesu. Mbungano zinji zilacita muswaangano umwi kumazuba mukati kansondo ciindi kanji-kanji notukatede kapati akaambo kamilimo yacitwa mubuzuba oobo. Mpoonya muswaangano uumbi ulacitwa kumamanino aansondo ciindi bantu bamwi nobalyookezya. Sena Jehova ulabona kuti tulajanika kumiswaangano nokuba kuti tulikatede? Masimpe ulabona! Mubwini, ciindi notusolekesya kujanika kumiswaangano, Jehova ulalumba kapati akaambo kaluyando ndotutondezya kulinguwe.—Mk. 12:41-44. w19.01 29 ¶12-13

Jesu lwakwe kumugama wakapenga mbubwenya mbobakali kupenga bantu bamwi. Mucikozyanyo, kweelede kuti wakakomenena mumukwasyi mobakali bacete. Akaambo kakuti wakali kubeleka abausyi ibakamukomezya ba Josefa, Jesu wakaiya kubeleka mulimo wakumubili muyumu. (Mt. 13:55; Mk. 6:3) Alimwi kulibonya kuti Josefa wakalifwide kale Jesu katanamanizya mulimo wakwe. Aboobo kweelede kuti Jesu wakacimvwa mbocicisa kufwidwa muyandwa. Alimwi wakalizyi mbocibede kuba abanamukwasyi ibatakali kusyoma nzyasyoma. (Joh. 7:5) Zintu zili boobu alimwi azimwi zyakamugwasya Jesu kumvwisya buyumuyumu alimwi ambobakali kulimvwa bantu ibatakali kubikkilwa maano. Kubikkila maano kwa Jesu kubantu kwakalibonya ikapati ciindi naakacita maleele. Jesu tanaakacita maleele cakwiinzya buyo mulawo. ‘Wakeetezyegwa’ akaambo kabaabo ibakali mumapenzi. (Mt. 20:29-34; Mk. 1:40-42) Jesu wakabeetelela bantu aabo alimwi wakaliyandide kubagwasya.—Mk. 7:32-35; Lk. 7:12-15. w19.03 16 ¶10-11

Bwakali busiku bwamamanino bwabuumi bwa Jesu aanyika. Amweezyeezye buyo mbwaakakopene kapati mumizeezo Jesu masiku aayo. Sena wakali kuyoosyomeka cakumaninina kusikila kulufwu? Buumi bwamabbiliyoni aabantu bwakayeeme aalinguwe. (Rom. 5:18, 19) Alimwi cipati kwiinda zyoonse ncakuti, impuwo ya Bausyi yakalijatikizyidwe. (Job. 2:4) Mpoonya, kucilalilo cakwe camamanino abalongwe bakwe beni-beni, nkokuti ibaapostolo, kwakaba “kuzwangana kapati akati kabo kujatikizya wakali kubonwa kuti ngomupati kwiinda boonse.” Cikkomanisya ncakuti, Jesu kunyina naakakalala. Muciindi caboobo, wakabaambila cakubomba moyo. Munzila yaluzyalo pele kasinizyide, Jesu wakapandulula muuya ngobakeelede kuba anguwo. Mpoonya wakabalumbaizya balongwe bakwe akaambo kakukakatila cakusyomeka kulinguwe. (Lk. 22:24-28; Joh. 13:1-5, 12-15) Tulakonzya kumwiiya Jesu alimwi akuzumanana kubomba moyo noliba leelyo notukopene mumizeezo ikuti katuyeeya lyoonse kuti toonse tulaamba akucita zintu izibanyemya bamwi. (Tus. 12:18; Jak. 3:2, 5) Alimwi amusoleke kwaamba zintu zibotu nzyomubona muli bamwi.—Ef. 4:29. w19.02 11-12 ¶16-17

Mulawo wakapangwa munzila yakuti kacitakonzyeki kubejelezya muntu uumwi kuti wapanga mulandu. Ooyo wabejelezyegwa wakalijisi nguzu zyakuzyiba iwamubejelezya. (Dt. 19:16-19; 25:1) Alimwi katanapegwa mulandu, inga kwayandika kuti bakamboni bobilo bape bumboni. (Dt. 17:6; 19:15) Ino mbuti kujatikizya muna Israyeli iwakali kupanga mulandu akubonwa buyo akamboni omwe? Muna Israyeli ooyo tanaakeelede kuyeeya kuti kunyina nakonzya kusubulwa akaambo kacibi eeco. Jehova wakacibona ncaakacita. Jehova ulapa cikozyanyo cibotu; kunyina ncacita cakutalulama. Ulabalumbula aabo ibatobela zyeelelo zyakwe cakusyomeka, pele ulabasubula aabo ibabelesya nguzu zyabo munzila iitaluzi. (2Sam. 22:21-23; Ezk. 9:9, 10) Bamwi balakonzya kucita zintu zibyaabi alimwi akusola kutija cisubulo, pele Jehova uyoobona kuti babetekwa aciindi ceelede. (Tus. 28:13) Alimwi ikuti kabateempwi, lino-lino bayoozyiba kuti “cilayoosya kuwida mumaanza aa Leza uupona.”—Heb. 10:30, 31. w19.02 23-24 ¶20-21

Cakutadooneka, Musa wakali kulanga kuli Jehova kutegwa amupe busolozi alimwi amalailile. Inzya, “wakazumanana kuzyandamana mbuli kuti wakalimubwene ooyo uutalibonyi.” (Heb. 11:24-27) Kaitanakkwana myezi yobilo kuzwa ciindi bana Israyeli nobakazwa mu Egepita, kwakabuka penzi lipati, kabatanasika a Cilundu ca Sinai. Bantu bakatalika kutongooka kujatikizya kubula maanzi. Bakatalika kutongaukila Musa, alimwi zintu zyakabija kapati cakuti Musa wakalilila Jehova kati: “Ino ndilabacita buti bantu aaba? Ino-ino buyo balandipwaya mabwe!” (Kul. 17:4) Jehova wakaingula kwiinda mukupa Musa malailile aasalede. Wakeelede kubweza musako wakwe akuuma bbwe ku Horebu, mpoonya maanzi akali kunoopoomoka. Tubala kuti: “Musa wakacita mbubonya oobo kabalangilila baalu bamu Israyeli.” Bana Israyeli bakanywa maanzi alimwi nyota yakamana, aboobo penzi eeli lyakamana.—Kul. 17:5, 6. w18.07 13 ¶4-5

Nzila imwi Jehova mwatuyaka caluyando nkwiinda mumbungano ya Bunakristo. Umwi aumwi, ulakonzya kutondezya luyando lwa Jehova kwiinda mukubayanda alimwi akubayaka bakwesu abacizyi kumuuya akubakulwaizya ciindi nobatyompedwe. (1Joh. 4:19-21) Mwaapostolo Paulo wakakulwaizya Banakristo kuti: “Amuzumanane kukulwaizyanya akuyakana umwi amweenzinyina, mbubonya mbomucita lino.” (1Tes. 5:11) Inzya, boonse mumbungano, ikutali buyo baalu, balakonzya kumwiiya Jehova alimwi a Jesu kwiinda mukubaumbulizya alimwi akubakulwaizya bakwesu abacizyi. (Rom. 15:1, 2) Ibamwi mumbungano ibajisi malwazi aamumizeezo ambweni inga bayandika lugwasyo kuzwa kuli basyaazibwene mukusilika alimwi amisamu. (Lk. 5:31) Baalu alimwi abamwi mumbungano cakulicesya balizyi kuti tabali basyaazibwene mukupa lugwasyo kubantu bajisi malwazi aamumizeezo. Nokuba boobo, balo alimwi abamwi mumbungano balizyi kuti balijisi lubazu lupati ndobeelede kucita, nkokuti ‘kuumbulizya aabo ibatyompedwe mumoyo, kugwasya aabo ibatajisi nguzu, akubakkazikila moyo bantu boonse.’—1Tes. 5:14. w18.09 14 ¶10-11

Tulaluyumya lusyomo lwesu muli Jehova kwiinda mukumuzyiba kabotu. Nzila ilikke mbotukonzya kumuzyiba kabotu Leza nkwiinda mukulibala Bbaibbele cakulomya akuzinzibala kuyeeya nzyotubala. Alimwi Bbaibbele lilijisi makani aasyomeka aajatikizya mbwaakabakwabilila bantu bakwe Jehova kaindi. Makani aayo atupa kuba alusyomo lwakuti unootulanganya noliba lino. Amubone cikozyanyo cibotu ncaakabelesya Isaya ikupandulula mbwatukwabilila Jehova. Isaya wakaamba Jehova kuti mweembezi alimwi babelesi ba Leza wakabaamba kuti ntwana twambelele. Mboobu mbwaakaamba Isaya kujatikizya Jehova: “Ajanza lyakwe uyoobunganya twana twambelele antoomwe, alimwi uyootunyamuna acamba cakwe.” (Is. 40:11) Ciindi notubala majwi aaya aatondezya kuti Jehova ulatubukata mumaanza aakwe aanguzu, tulimvwa kukwabililwa alimwi akuliiba. Kutegwa mugwasyigwe kuzumanana kuliiba nokuba kuti mujisi mapenzi manji, amuzinzibale kwaayeeya majwi aaya aawumbulizya aali mulugwalo lwabuzuba bwasunu. Ayoomuyumya ciindi nomulwana buyumuyumu ibuli kumbele. w19.01 7 ¶17-18

Sena mulijisi mbaakani yakumuuya yomwe naa kwiinda waawo njomuli mukubelekela mpawo? Ambweni musola kubala zibeela zyamu Bbaibbele buzuba abuzuba. Naa ambweni musola kuyungizya luzyibo lwanu mukwaambaula alimwi amukuyiisya. Kufwumbwa mbocibede, ciindi nomuzwidilila, naa ciindi bamwi nobabona kuyaambele kwanu alimwi akumulumbaizya, ino mulimvwa buti? Cakutadooneka mulimvwa kuzwidilila alimwi akukkomana kapati. Alimwi muleelede kulimvwa boobo nkaambo mubikka kuyanda kwa Leza mubusena bwakusaanguna, ikwiiya Jesu. (Tus. 27:11) Kwiinda mukubikkila maano kumbaakani zyakumuuya, mucita mulimo uukatalusya kapati akaambo kakuti tauli wabuyo pe. Mwaapostolo Paulo wakati: “Amukakatile, mutazungaani pe, lyoonse amube azintu zinji zyakucita mumulimo wa Mwami, mbokunga mulizyi kuti kubeleka kwanu nkomubelekela Mwami takuli kwabuyo pe.” (1Kor. 15:58) Mukwiimpana, kupona buumi bwakubikkila maano kumbaakani zyakumubili, nokuba kuti mbaakani eezyi zilakonzya kuzwidilila, kanji-kanji buumi oobo bunyina mpindu.—Lk. 9:25. w18.12 22 ¶12-13

Davida wakali kwaamba ciindi bantu anyika nobayookkala kweelana anzila zya Leza ziluleme. (2Pet. 3:13) Businsimi ibuli kuli Isaya 65:22 bwaamba kuti: “Mazuba aabantu bangu ayooba mbuli mazuba aacisamu.” Eeci caamba kuti bantu bayoopona myaka minji kapati. Kweelana alugwalo lwa Ciyubunuzyo 21:1-4, Leza uyoobalongezya bantu alimwi cimwi cazilongezyo ncakuti “lufwu talukabi limbi.” Ba Adamu a Eva bakacisowa coolwe cakupona kukabe kutamani mu Paradaiso, pele nyika iyooba Paradaiso alimwi. Kweelana ambwaakasyomezya Leza, bantu bali munyika bayoolongezyegwa. Kwiinda mukusololelwa amuuya, Davida wakaamba kuti babombe myoyo alimwi abalulami bayookona nyika alimwi akukkala mulinjiyo lyoonse mane kukabe kutamani. (Int. 37:11) Businsimi ibuli mubbuku lya Isaya butupa kulangila ciindi notuyookkomana abuumi buli kabotu mu Paradaiso yeebeka anyika. (Is. 11:6-9; 35:5-10; 65:21-23) Ino ndilili nociyoocitika eeco? Ciindi cisyomezyo ca Jesu kucigwebenga nociyoozuzikizyigwa. (Lk. 23:43) Mulakonzya kuyoojanika mu Paradaiso eeyo. w18.12 7 ¶22-23

Sena cilakonzyeka kutantamuka mizeezo yoonse yamunyika? Peepe, nkaambo tatukonzyi kuzwa munyika eeyi cacigaminina. Kuli zintu zimwi zyamunyika nzyotutakonzyi kutantamuka. (1Kor. 5:9, 10) Mulimo wakukambauka utupa kuswaangana abantu bajisi mizeezo iilubide alimwi ibasyoma zintu zyakubeja. Pele nokuba kuti tacikonzyeki kwiitantamukila limwi mizeezo iitaluzi, tatweelede kuzumanana kwiiyeeya naa kwiizumina. Mbubwenya mbuli Jesu, cakufwambaana tweelede kwiikaka mizeezo ya Saatani. Kuyungizya waawo, tulakonzya kulikwabilila kumizeezo mibyaabi yamunyika. Mucikozyanyo, tweelede kucenjela ciindi notusala balongwe. Ibbaibbele licenjezya kuti, ikuti katuyanzana abantu batakombi Jehova, tuyootalika kuyeeya mbuli mbobayeeya. (Tus. 13:20; 1Kor. 15:12, 32, 33) Alimwi, kwiinda mukukaka zyakulikondelezya izisumpula njiisyo yakusanduka, nkondo naa kutalilemeka, tukwabilila kunyonganya mizeezo yesu kuzintu ‘zikazyanya aluzyibo lwa Leza.’—2Kor. 10:5. w18.11 21 ¶16-17

Ino ncinzi cikonzya kutugwasya kuyumya makanze eesu aakweenda mukasimpe? Nzila imwi nkwiinda mukutola lubazu mukuyiisya kasimpe kamu Bbaibbele kusikila mpomugolela. Kwiinda mukucita boobu, muyoolijatisya panga lyakumuuya, nkokuti “jwi lya Leza.” (Ef. 6:17) Toonse tulakonzya kuba bamayi bacibwene, ‘ibapandulula jwi lyakasimpe bweelede.’ (2Tim. 2:15) Ciindi notubelesya Bbaibbele kugwasya bamwi kuti baule kasimpe akukaka bubeji, majwi aa Leza alakkalilila mumyoyo amumizeezo yesu. Kwiinda mukucita oobu, tuyumya makanze eesu aakuzumanana kweenda mukasimpe. Kasimpe ncipego citaliboteli kuzwa kuli Jehova. Kwiinda mucipego eeci, tuba acilongwe cibotu kapati a Taateesu wakujulu. Nzyaakatuyiisya kusikila lino matalikilo buyo! Leza watusyomezya buumi butamani kutegwa tukazumanane kwiiya kasimpe nkotwakaula. Aboobo, amukayandisye kasimpe mbuli ngale mbotu. Amuzumanane ‘kuula kasimpe akutakasambala.’—Tus. 23:23. w18.11 8 ¶2; 12 ¶15-17

Mulimo wakukambauka ngwaakacita Nowa kalitanasika Zambangulwe, cakutadooneka wakali kubikkilizya akucenjezya kujatikizya lunyonyooko ilwakali kuboola. Amubone ncaakaamba Jesu naakati: “Nkaambo mbubonya mbuli kumazuba aayo Zambangulwe kalitanaboola, bakali kulya akunywa, basankwa bakali kukwata abalo basimbi bakali kukwasyigwa kusikila buzuba Nowa mbwaakanjila mubwato, pele tiibakabikkila maano kusikila mane Zambangulwe lyakaboola akubatola boonse, mbubonya buyo akwalo kubako kwa Mwanaamuntu mbokuyooba.” (Mt. 24:38, 39) Nokuba kuti bantu tiibakali kubikkila maano, Nowa wakawaambilizya cakusyomeka mulumbe wakucenjezya ngwaakapegwa. Mazuba aano, tulakambauka mulumbe wa Bwami kutegwa tupe bantu coolwe cakwiiya kujatikizya makanze ngajisi Leza kubantu. Mbubwenya mbuli Jehova, tulaalusyomo lwakuti bantu balakonzya kuutambula mulumbe alimwi “akuzumanana kupona.” (Ezk. 18:23) Alimwi, ciindi notukambauka kuŋanda aŋanda amumasena aakubuleya, tulabacenjezya bantu banji kuti Bwami bwa Leza buyooboola akunyonyoona nyika ya Saatani eeyi.—Ezk. 3:18, 19; Dan. 2:44; Ciy. 14:6, 7. w18.05 19 ¶8-9

Ino ncinzi ncomweelede kucita ikuti beendelezi baukasya mulimo wa Bwami mucisi canu, mpoonya mwaitwa kutegwa bamubuzye kujatikizya bakwesu? Sena mweelede kubaambila zyoonse nzyomuzyi? Ino ncinzi Jesu ncaakacita ciindi naakabuzyigwa amweendelezi muna Roma? Kweelana anjiisyo yamu Magwalo yaamba kuti kuli “ciindi cakuumuna aciindi cakwaambaula,” zimwi ziindi Jesu wakali kuumuna buyo! (Muk. 3:1, 7; Mt. 27:11-14) Mubukkale buli boobu, bupampu bulayandika kutegwa tutabikki buumi bwabakwesu muntenda. (Tus. 10:19; 11:12) Ino ncinzi ncomukonzya kucita ikuti mulongwe wanu naa mubbululu wanu wacita cibi cipati mpoonya kamucizyi cakacitika? ‘Kamwaamba masimpe.’ Mweelede kubaambila zyoonse baalu, alimwi mweelede kwaamba mbweenya mbwaabede. Baalu balijisi nguzu zyakuzyiba makani aamasimpe kutegwa babone mbobakonzya kumugwasya sikubisya kubambulula cilongwe cakwe a Jehova.—Jak. 5:14, 15. w18.10 10 ¶17-18

Mbuti mbotukonzya kubayumya bamwi caluyando? Nzila imwi nkwiinda mukuba muswiilizi mubotu. (Jak. 1:19) Kuswiilila calweetelelo ncitondezyo caluyando. Mulakonzya kubuzya mibuzyo cabupampu alimwi cabubombe kamujisi makanze aakumvwisya mbwalimvwide muntu ooyo uupengede. Kwiinda mukucita boobo, muyoocikonzya kutondezya lweetelelo alimwi akumuyumya mubelesinyoko. Mbomulibonya kubusyu kweelede kutondezya kuti mulibikkilide maano. Ikuti Munakristo umwi kayanda kumupandulwida zintu kabotu-kabotu, amukkazike moyo alimwi mutamunjili mukanwa pe. Kwiinda mukuswiilila cakukkazika moyo, ciyoomugwasya kumvwisya mbwalimvwa. Eeci ciyoopa kuti mukwesu naa mucizyi uupengede amusyome alimwi awalo uyooba aluyandisyo lwakuziswiilila nzyomumwaambila nomusola kumugwasya. Ikuti bamwi babona kuti mulababikkila maano, muyoobayumya kapati. w18.09 14 ¶10; 15 ¶13

Muntu weelede kubbadela naa kubelesya ciindi cakwe ikuti naa uyanda kuula kasimpe. Kuyandika ciindi kutegwa tuswiilile kumulumbe wa Bwami, kubala Bbaibbele alimwi amabbuku aamba zyamu Bbaibbele, kucita ciiyo cesu ca Bbaibbele, kulibambila alimwi akujanika kumiswangano yambungano. Tweelede ‘kulyuulila ciindi,’ naa kucesya ciindi cali kubelesyegwa muzintu zimwi zitayandiki kapati. (Ef. 5:15, 16, bupanduluzi buyungizyidwe) Ino inga catola ciindi cilamfwu buti kutegwa tukonzye kuba aluzyibo lwini-lwini? Ciya buyo abukkale bwesu. Kwiiya busongo bwa Jehova, nzila alimwi amilimo yakwe takugoli. (Rom. 11:33) Ngazi Yamulindizi yakusaanguna yakakozyanisya kasimpe “kukaluba kaniini” alimwi yakati: “Mutakkutili akaluba komwe buyo kakasimpe. Kuti kaluba komwe kakasimpe nokali kupa kukkutila, Leza naatakapa kasimpe kanji. Kamuujisi kubwezelela, kamuciyandaula.” Nokuba kuti twapona mane kukabe kutamani, lyoonse tunoojisi zinji zyakwiiya kujatikizya Jehova. Mazuba aano, cintu ciyandika kapati nkucibelesya munzila yabusongo ciindi kutegwa tuule kasimpe kweelana abukkale motubede. w18.11 5 ¶7

Balumi baambilwa kuzumanana kukkala abakaintu babo “kweelana aluzyibo,” munzila imwi inga twaamba kuti “kubabikkila maano; kubamvwisya.” (1Pet. 3:7; bupanduluzi buyungizidwe.) Kumvwisya alimwi akubikkila maano ziliswaangene. Mucikozyanyo, mulumi uumvwisya ulizyi kuti mukaintu wakwe, mbwali mweenzinyina uumweelede, uliindene anguwe mumbazu zinji, pele eeci tacaambi kuti ngwaansi kapati. (Matl. 2:18) Aboobo mulumi ulabikkila maano kujatikizya mbwalimvwa mukaintu wakwe, akumweendelezya cabulemu. Mulumi uuli kabotu ulabikkila maano kujatikizya mbwalimvwa mukaintu wakwe ciindi nayanzana abamakaintu bambi. Taciindizyi kusobana ambabo naa kupa muzeezo wakuti ulabayanda; alimwi kunyina natondezya bukkale buli boobo ciindi nabelesya Intaneti. (Job. 31:1) Kwiinda mukucita boobo, ulazumanana kusyomeka kumukaintu wakwe, ikutali buyo akaambo kaluyando ndwajisi kulinguwe, pele akaambo kaluyando ndwajisi kuli Leza alimwi akuti ulacisulaika cibi.—Int. 19:14; 97:10. w18.09 29 ¶3-4

Nkaambo nzi ncocili ciyumu kuzibelesya nzyotwiiya mu Jwi lya Leza? Kaambo kamwi nkakuti kulicesya kulayandika kutegwa tucite cintu ciluzi, alimwi kuzumanana kulicesya kuli muntenda. “Kumazuba aamamanino” aano, tuzingulukidwe abantu “basikuliyanda, bayandisya mali, basikulidunda, basikulisumpula, basikusampaula,” alimwi “batalilesyi.” (2Tim. 3:1-3) Ciindi bukkale bwakuliyanda nobwaambwa alimwi anobukkomaninwa abamwi, mubelesi wa Leza ambweni ulakonzya kubunyonokela, pele zikonzya kutobela nzibi. (Int. 37:1; 73:3) Umwi ulakonzya kulibuzya kuti: ‘Sena kuli bubotu buli boonse buliko ciindi nondibikka nzyobayandika bamwi mubusena bwakusaanguna? Ikuti naa kandicita zintu “mbuli muniini,” sena bantu bayooleka kundilemeka?’ Kuzumizya muuya wakuliyanda uuli munyika ikutuyunga kulakonzya kunyonganya luyando ndotujisi mumbungano alimwi a Bunakristo bwesu. Pele tulajana bubotu ciindi notwiiya kuzikozyanyo zibotu izyaambidwe mu Bbaibbele alimwi akuzitobela. w18.09 3 ¶1

Nokuba kuti Jehova wakali alikke katanatalika kulenga zintu, tanaakali kuyeeya buyo kujatikizya lwakwe mwini. Mukwiimpana, wakapa cipego cabuumi kuzilenge zili aamaano, nkokuti bantu alimwi azilenge zyamuuya. “Leza uukkomene,” Jehova, ulayanda kupa zintu zibotu. (1Tim. 1:11; Jak. 1:17) Alimwi mbwaanga uyanda kuti andiswe katukkomana, ulatuyiisya kuba bantu baabi. (Rom. 1:20) Leza wakalenga muntu mucinkozya cakwe. (Matl. 1:27) Nkokuti, twakalengwa munzila yakuti katutondezya bube bwakwe. Aboobo kutegwa katukkomene alimwi akukkutila, tweelede kutobela cikozyanyo ca Jehova kwiinda mukubabikkila maano bamwi alimwi akuba baabi. (Flp. 2:3, 4; Jak. 1:5) Nkaambo nzi? Cili boobo akaambo kakuti caluyando Jehova wakatulenga munzila eeyo. Nokuba kuti tatulondokede, tulakonzya kuzwidilila kwiinda mukwiiya bwaabi bwa Jehova. Jehova uyanda kuti bantu bakwe bamwiiye, aboobo ulakkomana ciindi notuba baabi.—Ef. 5:1. w18.08 18 ¶1-2; 19 ¶4

Basikutobela ba Kristo balatondezya kuti balamuswiilila Jesu kwiinda mukutaswiilila buyo kujwi lyakwe, pele alimwi akucita ncolyaamba. Tabanyonganizyigwi ‘azyakulibilika zyamubuumi.’ (Lk. 21:34) Muciindi caboobo, kumvwida malailile a Jesu bakubikka mubusena bwakusaanguna mubuumi, nociba ciindi nobali mubukkale bukatazya. Nokuba boobo, bakwesu bazumanana kusyomeka kuli Jehova, tacikwe makani ambobakonzya kupenga. Nzila imbi mbotukonzya kutondezya kuti tulamuswiilila Jesu nkwiinda mukubamvwida aabo mbasalide kuti kabasololela akati kesu. (Heb. 13:7, 17) Mumyaka yaino-ino, kwaba kucinca kunji mumbunga ya Leza ikubikkilizya akubelesyegwa kwazibelesyo zipya alimwi anzila zipya zyakukambauka, mboicitwa miswaangano yesu yamukati kamvwiki, mbotuyaka, kubambulula alimwi akubamba Maanda aa Bwami. Eelo kaka tulalumba kapati kubusolozi bwaluyando alimwi ibutondezya kubikkila maano! Tulakonzya kuba masimpe kuti Jehova uyookulongezya kusolekesya kwesu kutegwa tutobele malailile aaciindi ceelede ngotupegwa ambunga yakwe. w19.03 10-11 ¶11-12

Malipooti aatakwe bumboni bukkwene aalo alakatazya kuzyiba naa ngamasimpe. Makani aali boobo alakonzya kubanyonganya bantu banji. Atulange-lange cakacitika kubana Israyeli ibakali kukkala mutala lya Mulonga wa Jordano nkouli kumbo mumazuba aa Joshua. (Jos. 22:9-34) Bakatambula lipooti yakuti bana Israyeli ibakali kukkala kucooko cakujwe bakayaka cipaililo cipati alimwi ceebeka. Cibeela cimwi camakani aaya cakaliluzi. Akaambo kakuti tiibakaazyi makani oonse aakajatikizyidwe, aabo ibakali kulubazu lwakumbo bakayeeya kuti banyina bakazangila Jehova. (Jos. 22:9-12) Mucoolwe, kabatanaunka kuyoobalwana, bakatuma baalumi basyomeka kuti bakasinizye naa makani aayo akali aamasimpe. Ino ncinzi ncobakajana baalumi aabo? Bakajana kuti cipaililo cakayakwa, kutali cakuumpila zituuzyo, pele kacili ciibalusyo, kutegwa kumbele boonse bakazyibe kuti abalo bakali babelesi ba Jehova basyomeka. Eelo kaka kweelede kuti bana Israyeli aabo bakalumba kapati kuti tiibakabanyonyoona banyina akaambo kamakani aakubeja, pele bakalindila kutegwa bazyibe naa makani aayo akali aamasimpe! w18.08 5 ¶9-10

Kweelana ambwaakaamba Paulo, nobaba bakombi bakasimpe balakonzya kujatikizyigwa muzilengwa zibyaabi. Aabo ibazundwa asunko balakonzya kuyeeya kuti bacijisi cilongwe cibotu a Jehova. Pele kuyanda kuba mulongwe wa Jehova naa kulitaminina kusyomeka kulinguwe tacaambi kuti umwi ulakkomaninwa a Jehova. (1Kor. 10:1-5) Mbubwenya mbuli bana Israyeli mbobakalibilika ciindi Musa naakamuka kuseluka kuzwa a Cilundu ca Sinai, Banakristo mazuba aano balakonzya kulibilika kujatikizya kumuka kwabuzuba bwa Jehova bwalubeta alimwi akuboola kwanyika mpya. Kuzuzikizyigwa kwazisyomezyo eezyi inga kwalibonya mbuli kuti kucili kule naa kuti zisyomezyo eezyo tazikazuzikizyigwi. Kuti tiitwacenjela, kuyeeya kuli boobo kulakonzya kutupa kuti katubikka zintu zyakumubili mubusena bwakusaanguna muciindi cakucita kuyanda kwa Jehova. Mukuya kwaciindi, tulakonzya kuleya kuzwa kuli Jehova alimwi akutalika kucita zintu nzyotwatakali kuyeeya kuti inga twazicita ciindi notwakali bayumu kumuuya. w18.07 21 ¶17-18

Tulakonzya kujana zilongezyo zibotu ciindi notuzyibwa cacigaminina a Jehova. Pele ino ncinzi ncotukonzya kucita kutegwa tuzyibwe a Jehova? Tweelede kumuyanda alimwi akwaaba buumi bwesu kulinguwe. (1Kor. 8:3) Nokuba boobo, tweelede kuzumanana acilongwe cesu cibotu a Taateesu wakujulu. Mbubwenya mbuli Banakristo bana Galatiya aabo Paulo mbaakalembela, andiswe tweelede kutantamuka “zintu zyantalisyo izitagwasyi alimwi zinyina mpindu,” izyamunyika eeyi kubikkilizya abulemu bwanzizyo. (Gal. 4:9) Banakristo bamumwaanda wamyaka wakusaanguna aabo Paulo mbaakalembela bakayaambele kusikila mane bakazyibwa a Leza. Nokuba boobo, Paulo wakaamba kuti bakwesu mbabonya aaba ‘bakapilukila’ alimwi kuzintu zinyina mpindu. Munzila imwi Paulo wakali kubaambila kuti: “Kulampa nkomwazwa, nkaambo nzi ncomupilukila alimwi kuzintu zyabufwubafwuba, zinyina mpindu nzyomwakasiya musyule?” w18.07 8 ¶5-6

Cikkomanisya ncakuti, tatuyandiki kupenga buya akaambo kakutyola milawo ya Leza kutegwa twiiye ziiyo ziyandika kapati. Tulakonzya kwiiya kukulubizya kwabamwi ikulembedwe mu Jwi lya Leza. Masimpe, tulatambula malailile aagwasya kapati kuzwa kuli Leza, mbuli ciindi notubala akuzinzibala kuyeeya zibalo zyamu Bbaibbele izyakacitika ncobeni. Mucikozyanyo, amuyeeye kujatikizya mbocakamucisa Mwami Davida ciindi naatakamvwida mulawo wa Jehova akucita bwaamu a Bati-seba. (2Sam. 12:7-14) Ciindi notubala akuzinzibala kuyeeya kujatikizya cibalo eeci, ambweni inga twalibuzya kuti: ‘Mbuti Davida mbwaakali kukonzya kweeleba bukkale oobu bucisizya moyo? Ikuti ndalijana musunko lili boobu, sena inga ndacikonzya kulikaka? Sena inga ndatija mbubwenya mbwaakacita Josefa, naa sena inga ndazundwa asunko mbuli Davida?’ (Matl. 39:11-15) Kwiinda mukuzinzibala kuyeeya zicitika akaambo kacibi, tuyoocikonzya ‘kusulaika bubi.’—Am. 5:15. w18.06 17 ¶5, 7

Kanji-kanji kutalulama kupa bantu kunjila mutwaambo twamapolitikisi. Kupa mitelo akali makani mapati kuciindi ca Jesu. Balelwa babulelo bwabana Roma, kubikkilizya abaabo ibakali kumuswiilila Jesu, bakeelede kutela mitelo minji, mbuli kutelela nyika alimwi amaanda. Kuyungizya waawo, kutasyomeka kwabasimutelo kwakapa kuti kupa mitelo kwiindile kuminya. Basimitelo bakali kuula zyuuno zyabweendelezi kumfwulumende mpoonya akubelesya nguzu eezyo kujana mali manji. Zakeyo, mupati wabasimitelo mu Jeriko, wakavwuba kapati kwiinda mukubwezela bantu mali cabumpelenge. (Lk. 19:2, 8) Oobu mbobakali kucita abasimitelo bamwi. Basinkondonyina Jesu bakasola kuti bamunjizye mumakani aakupa mitelo. Bakamubuzya kujatikizya “mutelo,” mutelo wadinali lyomwe iwakali kupegwa kubeendelezi bana Roma. (Mt. 22:16-18) Ba Juda tiibakali kuukkomanina mutelo ooyu akaambo kakuti wakali kubayeezya kuti bali aansi abweendelezi bwabana Roma. w18.06 5-6 ¶8-10

Kusala kuba kulubazu lwa Saatani lyoonse takugwasyi alimwi kunyina mpindu iili yoonse pe. (Job. 21:7-17; Gal. 6:8) Mbubotu nzi mbotujana akaambo kakuzyiba mpozigolela nguzu zya Saatani? Cilatugwasya kuzumanana kubalanga munzila yeelede beendelezi bamfwulumende alimwi cilatukulwaizya mumulimo wesu wakukambauka. Tulizyi kuti Jehova uyanda kuti katubalemeka beendelezi bamfwulumende. (1Pet. 2:17) Alimwi uyanda kuti katumvwida milawo yamfwulumende zyabantu kufwumbwa buyo kuti milawo eeyo kayeendelana azyeelelo zyakwe. (Rom. 13:1-4) Pele tatweelede kutola lubazu mutwaambo twacisi, kuba kulubazu lwacipani cimwi camapolitikisi naa kuba kulubazu lwamweendelezi uuli woonse. (Joh. 17:15, 16; 18:36) Mbwaanga tulibwene Saatani ncasola kucita kuzina lya Jehova alimwi ampuwo yakwe, tulakulwaizyigwa kapati kuyiisya bantu kasimpe kajatikizya Leza wesu. Tulakkomana kwiitwa azina lyakwe alimwi akulibelesya, katuzyi kuti kuyanda nguwe kulaampindu kapati kwiinda kuyanda mali naa zintu.—Is. 43:10; 1Tim. 6:6-10. w18.05 24 ¶8-9

Kulakonzya kuba buyumuyumu mucikwati, sena kwaandaana nenzila iikonzya kumana mapenzi? Magwalo taambi twaambo tukonzya kupa banabukwetene kwaandaana. Paulo wakaamba kuti: “Ikuti mukaintu kajisi mulumi uutasyomi, pele kalisungwide kukkala anguwe, atamusiyi pe mulumaakwe.” (1Kor. 7:12, 13) Majwi aaya alabeleka amazuba aano. Nokuba boobo, kulaba ziindi zimwi “mulumi uutasyomi” natondezya kuti ‘talisungwide kukkala anguwe.’ Ambweni ulamuuma, cakuti ulimvwa kuti buumi bwakwe bwaba muntenda. Ambweni ulakaka kumulanganya alimwi amukwasyi naa kumukasya kucita zintu zyakumuuya. Mubukkale buli boobu, Banakristo bamwi basala kuti, tacikwe makani ancakonzya kwaamba ngobakwetene limwi, walo ‘talisungwide kukkala anguwe’ alimwi akuti cileelela kwaandaana. Pele Banakristo bamwi nokuba kuti bali mubukkale bukatazya kapati tiibacita oobo; baliyumya alimwi basolekesya kubeleka canguzu kubambulula zintu. w18.12 13 ¶14; 14 ¶16-17

Mucikozyanyo cijanika mulugwalo lwa Luka 8:5-8, 11-15, imbuto “ndijwi lya Leza,” naa mulumbe wa Bwami. Bulongo bwiiminina moyo wamuntu wacikozyanyo. Imbuto eezyo izyakawida mubulongo bubotu, zyakamena akukomena mpoonya zyakazyala “micelo iiyungizyidwe ziindi izili 100.” Mbubwenya mbuli bulongo bubotu bwamucikozyanyo ca Jesu mbobwakapa kuti mbuto zimene, andiswe twakautambula mulumbe akukakatila kulinguwo. Aboobo, mulumbe wa Bwami uuli mbuli mbuto wakamena akukomena kuba tukuba twamaila, twalo mukuya kwaciindi twakatalika kuzyala micelo. Alimwi mbubwenya mbuli tukuba twamaila mbotuzyala mbuto mpya, ikutali tukuba tupya, andiswe tulazyala micelo yambuto zya Bwami zipya, ikutali basikwiiya bapya. Ino mbuti mbotuzyala mbuto zya Bwami zipya? Ciindi notwaambilizya mulumbe wa Bwami, munzila imwi, cili mbuli kuti tumwaya mbuto iyakasyangwa mumyoyo yesu. (Lk. 6:45; 8:1) Aboobo, cikozyanyo eeci cituyiisya kuti kufwumbwa buyo kuti katuzumanana kwaambilizya mulumbe wa Bwami, nkokuti ‘tulazyala micelo cakuliyumya.’ w18.05 14 ¶10-11

Paulo wakalilisungwide, ikutali buyo kukulwaizya basyominyina, pele alimwi “akulitakata cakumaninina” akaambo kabo. (2Kor. 12:15) Mbubwenya buyo, baalu tabeelede kugolela buyo aakukulwaizya alimwi akuumbulizya basyominyina amajwi buyo pe, pele alimwi beelede kubayumya-yumya kwiinda mukubabikkila maano. (1Kor. 14:3) Kuyumizyanya kulakonzya kubikkilizya akupa lulayo, pele aawa alimwi, baalu beelede kutobela cikozyanyo cipedwe mu Bbaibbele kujatikizya lulayo mbolupegwa munzila iikulwaizya. Cikozyanyo ciinda kubota mumakani aaya cakapegwa a Jesu kumugama naakafwa alimwi akubusyigwa. Wakalijisi lulayo lwakutainda mumbali ndwaakali kuyanda kupa mbungano zimwi mu Asia Minor, pele amubone mbwaakalupa lulayo oolo. Katanazipa lulayo, wakazilumbaizya mbungano izyakali mu Efeso, Pergamo alimwi a Tiyatira. (Ciy. 2:1-5, 12, 13, 18, 19) Baalu inga bacita kabotu kwiiya cikozyanyo ca Kristo ciindi nokuyandika kuti bape lulayo. w18.04 22 ¶8-9

Nobazyali, cakutadooneka mulacita kufwumbwa ncomukonzya kutegwa mukwabilile bana banu kumalwazi. Mulaisalazya ŋanda yanu alimwi mulasowa kufwumbwa cintu cikonzya kupa kuti nywebo naa bana banu baciswe. Mbubwenya buyo, mweelede kubakwabilila bana banu kuzwa kumafilimu, mapulogilamu aa TV, zisobano zyaakkompyuta alimwi amawebbusaiti alo aakonzya kubapa kunyonganizyigwa akuyeeya kwa Saatani. Jehova wamupa nguzu zyakugwasya bana banu kuba balongwe ba Leza. (Tus. 1:8) Aboobo tamweelede kuyoowa kubikka milawo yeelede kutobelwa mumukwasyi wanu iiyeeme azyeelelo zyamu Bbaibbele. Amubaambile bana banu nzyobeelede kweebelela alimwi anzyobateelede, alimwi amubagwasye kumvwisya twaambo tupa kuti musale kucita boobo. (Mt. 5:37) Mbobayaabukomena bana banu, amubayiisye kwaandaanya ciluzi acitaluzi kweelana azyeelelo zya Jehova. (Heb. 5:14) Alimwi amuyeeye kuti, bana banu bayooyiya zinji kapati kuzintu nzyomucita.—Dt. 6:6, 7; Rom. 2:21. w19.01 16 ¶8

Ikuti naa muli mukubusi Munakristo, mbuti kuti mwalibikkila mbaakani yakubabikkila maano aabo bacembeede? Cabulemu, mulakonzya kubalomba kuti bamwaambile icabagwasya kuzumanana mumulimo ooyu kwamyaka minji. Eeci ciyoomuyumya-yumya kapati, alimwi nyoonse muyookulwaizyigwa kuzumanana kupa kuti mumuni wakasimpe kaumunika. Alimwi toonse tulakonzya kubatambula aabo ibaboola kumiswaangano ku Ŋanda ya Bwami. Ikuti naa mupedwe mukuli wakusololela muswaangano wakuunka mumulimo wamumuunda, mweelede kubagwasya bacembeede kutola lubazu mumulimo. Sena balijisi zilawo zibeelede? Zimwi ziindi mulakonzya kubaaba kuti babeleke aumwi uucili mwana kutegwa abagwasyilizye. Alimwi mweelede kubabikkila maano aabo baciswa-ciswa alimwi ibajisi bukkale ibutabazumizyi kubeleka kwaciindi cilamfwu. Inzya, kubikkila maano alimwi akubelesya bupampu kulakonzya kugwasya bakubusi alimwi abapati, bajisi luzyibo lunji alimwi abatajisi luzyibo lunji, kukambauka makani mabotu cabusungu.—Lev. 19:32. w18.06 23-24 ¶10-12

Tatweelede kuubya-ubya lwaanguluko lwakuti Jehova watwaangulula kubuzike bwacibi alimwi alufwu. Kwiinda mucinunuzyo, tulakonzya kubelekela Leza wesu amanjezyeezya aasalala alimwi akujana lukkomano lwini-lwini mukucita boobo. (Int. 40:8) Nokuba boobo, kuyungizya aakutondezya kulumba, tweelede kubikkila maano kutegwa tutabi notulubelesya munzila iitali kabotu lwaanguluko lwesu lwakulisalila iluyandika kapati. Mwaapostolo Petro wakacenjezya kujatikizya kubelesya lwaanguluko lwesu kuba civwumbyo cakucita zisusi zyesu zyanyama. Sena kucenjezya ooku takumupi kuyeeya cakabacitikila bana Israyeli munkanda? Alimwi ntenda iciliko kulindiswe, ambweni akwiindila buya. Saatani anyika yakwe bazumanana kuleta zintu zyoongelezya mumakani aakusala zyakusama akulibamba, zyakulya azyakunywa, zyakulikondelezya alimwi azintu buyo zimbi. Basikusambala bacenjezu kanji-kanji babelesya bantu bajisi ziwa zibotu kutegwa basumpule muuya wakuyanda kujana zintu zinji nzyotutayandiki. Eelo kaka ncuuba-uba kucegwa mutukole ootu akubelesya lwaanguluko lwesu munzila iitali kabotu! w18.04 10 ¶7-8