November

Akaambo kakuti tatwaazyi makani oonse aajatikizya Jona, tulakonzya kumubona kuti tanaakali kusyomeka. Jehova wakamupa mulawo uulimvwisya wakuti, akakambauke mulumbe walubeta ku Nineve. Muciindi cakumvwida, Jona wakatanta bwato akuunka kubusena bumbi, “kuzwa kumbele lya Jehova.” (Jon. 1:1-3) Ikuti nomwakali ndinywe, sena nomwakamupa coolwe cimbi Jona cakucita mulimo? Ambweni nomwatakacita oobo. Pele, Jehova walo wakabona kuti Jona wakali kuyandika kupegwa coolwe acimbi. (Jon. 3:1, 2) Jona wakaliyubununa kujatikizya bwini mbwaakabede mumupailo wakwe. (Jon. 2:1, 2, 9) Cakutadooneka, Jona wakapaila mipailo minji kuli Jehova. Umwi akati kamipailo eeyo, nkokuti ooyo ngwaakapaila ciindi naakali mwida lyanswi, utugwasya kumubona kuti tanaakali buyo muntu iwakatija mulimo. Majwi aakwe atondezya kuti wakali muntu uulicesya, uulumba alimwi iwakakanzide kumvwida Jehova. Aboobo tacigambyi kuti Jehova kunyina naakabikkila maano kukulubizya kwa Jona. Muciindi caboobo, wakawiingula mupailo wakwe alimwi wakazumanana kumubelesya kali musinsimi! Eelo kaka cilayandika kapati kumwaalu umwi aumwi kusaanguna ‘kumvwisya kabotu makani’ katanapa lulayo! w20.04 15 ¶4-6

Basikwiiya bamumwaanda wamyaka wakusaanguna bakazizumina njiisyo zya Bunakristo alimwi akusyoma muuya uusalala kutegwa ubagwasye kulimvwisya Jwi lya Leza. Bakavwuntauzya kutegwa basinizye kuti njiisyo eezyi zyakayeeme a Magwalo. (Mil. 17:11, 12; Heb. 5:14) Lusyomo lwabo tiilwakayeeme buyo ambobakali kulimvwa, alimwi tiibakali kubelekela Jehova akaambo buyo kakuti bakali kukkomana kuyanzana abasyominyina. Muciindi caboobo, lusyomo lwabo lwakayeeme ‘aluzyibo lwini-lwini lwa Leza.’ (Kol. 1:9, 10) Kasimpe ikali mu Jwi lya Leza takacinci pe. (Int. 119:160) Mucikozyanyo, takacinci ikuti musyomima watunyemya naa kuti wacita cibi cipati. Alimwi kasimpe takacinci ciindi notucitikilwa mapenzi. Aboobo tweelede kuzizyiba kabotu njiisyo zyamu Bbaibbele alimwi akusinizya kuti nzyamasimpe. Lusyomo lwesu luyumu iluyeeme aakasimpe kamu Bbaibbele luyootuyumya ciindi camapenzi, mbubonya mbuli ngobyo mboipa kuti bwato butalobi ciindi caguwo pati. w20.07 9 ¶6-7

Milimo njotucitila banabokwabo bananike, Jesu wiibona mbuli kuti tucitila nguwe. (Mt. 25:34-40) Nzila iyandika kapati mbotukonzya kugwasyilizya bananike nkwiinda mukutola lubazu cakumaninina mumulimo wakugwasya bantu kuba basikwiiya kweelana ambwaakatulailila Jesu. (Mt. 28:19, 20) Banabokwabo Kristo balakonzya kuuzuzikizya mulimo wakukambauka uuli mukucitwa nyika yoonse lino, lilikke buyo kuti bagwasyigwa ‘abambelele zimbi.’ (Joh. 10:16) Ikuti naa muli bambelele zimbi, lyoonse nomutola lubazu mumulimo ooyu, mutondezya kuti mulabayanda bananike alimwi a Jesu. Kuyungizya waawo, tulakonzya kuba balongwe ba Jehova alimwi a Jesu kwiinda mukubelesya lubono lwesu kutegwa tugwasyilizye mulimo ooyo ngobasololela. (Lk. 16:9) Mucikozyanyo, tulakonzya kusanga kumulimo wanyika yoonse, calo cibikkilizya kugwasyilizya baabo ibayandika lugwasyo akaambo kantenda zilicitikila naa mapenzi aamwi buyo. Alimwi tulakonzya kusanga mali aabelesyegwa kuzintu ziyandika mumbungano yesu alimwi akugwasya baabo mbotuzyi kuti bayandika lugwasyo.—Tus. 19:17. w20.04 24 ¶12-13

Kuzuzikizya businsimi oobu, mwami wakunyika kunyina ‘naakamulemeka Leza wabamausyi.’ Munzila nzi? Bulelo bwa Soviet Union bwakali kuyanda kugwisya bukombi, aboobo bwakasola kubweza nguzu zyambubo. Mu 1918, bulelo bwa Soviet Union bwakabikka mulawo iwakapa kuti muzikolo kabayiisya kuti kunyina Leza. Mbuti mwami wakunyika ‘mbwaakalemeka leza wamayubilo?’ Wakacita oobo kwiinda mukubelesya mali manji kapati kuyumya mpi yakwe yabasikalumamba alimwi akupanga zilwanyo zyanyukkiliya kutegwa bulelo bwakwe bube aanguzu kapati. Mwami wakunyika alimwi amwami wakumusanza boonse bakaba azilwanyo zilaanguzu kapati zyakujaya mamiliyoni aabantu! Mwami wakunyika wakabelekela antoomwe amwami wakumusanza kutegwa bacite cintu cimwi iciyandika kapati; ‘Bakabikka cintu cisesemya cileta lunyonyooko,’ mbunga ya United Nations (Lukamantano Lwazisi).—Dan. 11:31. w20.05 6-7 ¶16-17

Ino mbaani ibeelede kutola lubazu mukuyandaula baabo batacisungweede? Toonse tuleelede, nkokuti baalu, bapainiya, banamukwasyi alimwi abasikumwaya mumbungano balakonzya kugwasya kujana baabo ibatacisungweede. Sena mulijisi mulongwe naa munamukwasyi uutacisungweede? Sena mwakaswaanganya kale muntu uutacisungweede mubukambausi bwakuŋanda aŋanda naa mubukambausi bwakubuleya? Amumupandulwide muntu ooyo kuti, ikuti kayanda kuswaigwa inga mwabapa baalu namba yakwe yafooni naa adilesi ya e-mail. Mwaalu uutegwa Thomas, wakati: “Cakusaanguna, ndilababuzya bakwesu abacizyi baindene-indene ibazyi nkobakkala bantu aabo lino. Naa kubuzya basikumwaya ikuti naa kuli ngobayeeyede iwakacileka kujanika kumiswaangano. Mpoonya ndabaswaya bakwesu naa bacizyi ibatacisungweede, ndilababuzya kujatikizya bana babo alimwi abanamukwasyi bambi. Bamwi bakali kubaletelezya bana babo kumiswaangano alimwi bana aaba ambweni bakali basikumwaya aciindi cimwi. Abalo balakonzya kugwasyigwa kuti bajokele kuli Jehova.” w20.06 24 ¶1; 25 ¶6-7

Akati kazilenge zyoonse izili anyika, balikke bantu mbobakonzya kwiiya makani aakulilemeka kwiinda mukuyeeya alimwi akulanga-langa zintu izyakacitika kaindi. Akaambo kaceeci, tulakonzya kwiiya zyeelelo izili kabotu akucinca mbotuyeeya alimwi abukkale bwesu. (1Kor. 6:9-11; Kol. 3:9, 10) Alimwi buya, tulakonzya kuyiisya manjezeezya eesu kutegwa kaacikonzya kwaandanya cintu ciluzi alimwi acitaluzi. (Heb. 5:14) Kuyungizya waawo, tulakonzya kwiiya kutondezya luyando, luzyalo alimwi aluse. Alimwi tulakonzya kwiiya bululami bwa Jehova. Nzila imwi mbotutondezya kuti tulalumba kucipego cakuyeeya, nkwiinda mukuyeeya ziindi zyoonse Jehova naakatugwasya alimwi akutuumbulizya. Kucita boobo kuyumya lusyomo lwesu lwakuti akumbele uyootugwasya. (Int. 77:12; 78:4, 7) Nzila aimbi, nkuyeeya zintu zibotu nzyobatucitila bamwi alimwi akutondezya kuti tulalumba. Basikuvwuntauzya bakajana kuti bantu ibalumba balalangilwa kuti inga kabakkomene kapati. w20.05 23 ¶12-13

Amuyeeye kujatikizya mbwaakalimvwa Musa ciindi naakapatide mulwaanzi lwamwala alimwi akubona cilengaano cabulemu bwa Jehova icakainda kumbele lyakwe. “Kulangilwa kuti eeci cakali cintu cigambya kapati icatakacitikilide muntu uuli woonse Jesu katanaboola anyika!” Musa wakaamvwa majwi aaya aakaambwa amungelo aakuti: “Jehova, Jehova, Leza siluse alimwi silweetelelo, uutafwambaani kukalala alimwi uuzwide luyando lutamani akasimpe, uutondezya luyando lutamani kubantu bali zyuulu, uulekelela milandu, nsotoko alimwi azibi.” (Kul. 33:17-23; 34:5-7) Kulangilwa kuti Musa wakali kwaayeeya makani aaya ciindi naakali kubelesya zina lya Jehova kwaamba majwi aali mulugwalo lwabuzuba bwasunu. Ciindi notubelesya zina lya Jehova, tweelede kuzinzibala kuyeeya kujatikizya ooyo uujisi zina eeli. Tweelede kuyeeya bube bwakwe, mbuli nguzu, busongo, bululami alimwi aluyando. Kuzinzibala kuyeeya bube oobu alimwi abube bumbi mbwajisi, kulakonzya kutukulwaizya kuzumanana kumulemeka.—Int. 77:11-15. w20.06 8-9 ¶3-4

Jesu wakaamba kuti basikwiiya bakwe bakali kuyoozyibwa kwiinda muluyando ndobakali kuyootondezya kuli umwi amweenzinyina. (Joh. 13:34, 35) Pele kuli zintu zinji iziyandika kutegwa tube alusyomo luyumu. Lusyomo lwesu lweelede kuti kaluyeeme aluyando Kristo ndwaakatondezya kubantu ba Leza. Nkaambo nzi? Mucikozyanyo, amweezeezye kuti musyominyoko, mwaalu naa mupainiya wacita cibi cipati. Mbuti kuti mukwesu naa mucizyi wamunyemya? Naa ambweni muntu umwi waba siluleyo, akutalika kwaamba kuti nzyotusyoma takali kasimpe. Ikuti zintu zili boobu zyacitika, sena muyoolebwa akuleka kubelekela Jehova? Ncotwiiya ncakuti: Kuti kamuyanda kuyumya lusyomo lwanu muli Leza kwiinda muzintu bantu bamwi nzyobacita muciindi cakubikkila maano kucilongwe canu a Jehova kumugama, lusyomo lwanu talukayumi. Mbomulimvwa kujatikizya Jehova alimwi abantu bakwe zilakonzya kumugwasya kuba alusyomo luyumu. Pele alimwi cilayandika kapati kubikkila maano kukwiiya Bbaibbele, kumvwisya nzyomwiiya alimwi akuvwuntauzya kutegwa musinizye kuti nzyomwiiya kujatikizya Jehova nkasimpe. Mweelede kusinizya nobeni kuti Bbaibbele lijisi kasimpe kajatikizya Jehova.—Rom. 12:2. w20.07 8 ¶2-3

Kuli zyakuluula zinji izitondezya kuti bangelo balatugwasyilizya kujana baabo ibatacisungweede ibayanda kupiluka kuli Jehova. (Ciy. 14:6) Mucikozyanyo, ba Silvio, ibakkala ku Ecuador, bakapaila kuli Jehova kutegwa abagwasye kupiluka kumbungano. Nobakacili kupaila, bakamvwa bantu ibakali kukonkomona. Baalu bobilo bakali amulyango wabo. Baalu aaba bakabapa lugwasyo ndobakali kuyandika. Tuyoojana lukkomano lunji kwiinda mukugwasyilizya baabo ibatacisungweede kupiluka kuli Jehova. Ba Salvador, bapainiya ibasolekesya kubeleka canguzu kugwasya baabo ibatacisungweede bakaamba kuti: “Zimwi ziindi, ndilalila akaambo kalukkomano. Cilandikkomanisya kapati kubona kuti Jehova wavwuna mbelele yakwe imwi njayanda kapati kuzwa munyika ya Saatani alimwi akuti andime ndakaba acoolwe cakubelekela antoomwe anguwe mumulimo ooyu.” Ikuti naa mwakacileka kuyanzana abantu ba Jehova, amusyome kuti Jehova ucimuyanda. Jehova ulangila kuti mupiluke kulinguwe, alimwi uyoomutambula calukkomano. w20.06 29 ¶16-18

Mbwali ‘Mwiiyi wesu Mupati,’ Jehova ulatupa zikozyanyo kwiinda mu Jwi lyakwe kutegwa atuyiisye. (Is. 30:21) Tulaiya ciindi notuzinzibala kuyeeya zibalo zyamu Bbaibbele izijatikizya baabo ibakatondezya bube bwabunaleza. Alimwi tulaiya ciindi notulanga-langa icakabacitikila aabo ibakaalilwa kutondezya bube bubotu oobu. (Int. 37:37; 1Kor. 10:11) Amuyeeye icakacitikila Mwami Saulo. Kumatalikilo wakali kulicesya. Naakacili mwana-mwana wakalikuzyi kulezya kwakwe alimwi buya wakali kulitenga kuzumina mikuli minji. (1Sam. 9:21; 10:20-22) Pele mukuya kwaciindi, Saulo wakatalika kulisumpula. Wakatalika kucita boobu nokwakainda buyo ciindi cisyoonto kuzwa naakaba mwami. Aciindi cimwi, wakaalilwa kukkazika moyo ciindi naakali kulindila musinsimi Samuele mpoonya wakatuula cipaizyo cuumpwa nokuba kuti tanaakazumizyidwe kucita boobo. Akaambo kaceeci, Jehova wakaleka kumukkomanina alimwi mukuya kwaciindi, wakamukaka kuba mwami. (1Sam. 13:8-14) Inga twacita cabusongo ikuti twaiya kucikozyanyo eeci itucenjezya alimwi akutacita zintu nzyotutazumizyidwe kucita. w20.08 10 ¶10-11

Masimpe kuti kwiinda muli Kristo, Jehova wakapa “zipego mubantu” kumbungano yakwe. (Ef. 4:8) “Zipego mubantu” eezyi zibikkilizya bamu Kabunga Keendelezya, basikugwasyilizya bamu Kabunga Keendelezya, bamu Kkomiti Yamutabi, balangizi bamabazu, bamayi bazikolo zyakumuuya, baalu alimwi abakutausi. Bakwesu boonse aaba bakasalwa amuuya uusalala kulanganya mbelele zya Jehova iziyandika kapati alimwi akuyumya mbungano. (1Pet. 5:2, 3) Bakwesu balasalwa amuuya uusalala kutegwa balanganye mikuli yiindene-indene. Mbubwenya zizo ziindene-indene zyamubili, mbuli maanza alimwi amaulu mbozibelekela antoomwe kugwasya mubili woonse, bakwesu ibasalwa amuuya uusalala balabeleka canguzu kutegwa bagwasye mbungano yoonse. Kunyina nobasola kuliyandawida bulemu. Muciindi caboobo, balasolekesya kubakulwaizya alimwi akubayumya Banakristonyina. (1Tes. 2:6-8) Eelo kaka tulamulumba Jehova akaambo kabakwesu aaba beelela ibabikka nzyobayandika bamwi mubusena bwakusaanguna! w20.08 21 ¶5-6

Kaambo kamwi ikapa kuti katukambauka nkakuti bantu ‘balapenzyegwa alimwi balimwaikide’ akuti bali anzala yakwiiya kasimpe kajatikizya Bwami. (Mt. 9:36) Jehova uyanda kuti bantu boonse babe aluzyibo lwini-lwini lwakasimpe alimwi akufwutuka. (1Tim. 2:4) Ciindi notuyeeya kujatikizya mulimo wakukambauka mbougwasya bantu kuyoofwutuka, tuyookulwaizyigwa kukambauka. Tufwutula buumi bwabantu. (Rom. 10:13-15; 1Tim. 4:16) Tweelede kuba azibelesyo izyeelede zyakubelesya mumulimo wakukambauka. Alimwi tweelede kuzyiba mbozibelesyegwa zibelesyo eezyo. Jesu wakapa basikwiiya bakwe malailile aasalede. Wakabaambila nzyobakeelede kubwezelezya, nkobakeelede kukambaukila alimwi anzyobakeelede kwaamba. (Mt. 10:5-7; Lk. 10:1-11) Mazuba aano, mbunga ya Jehova ilapa Zibelesyo Nzyotubelesya Kapati Mukuyiisya izibeleka kabotu. Alimwi tulayiisyigwa mbotukonzya kuzibelesya zibelesyo eezyi. Lwiiyo oolo lutupa busicamba mbotuyandika kutegwa tuzwidilile mumulimo wesu.—2Tim. 2:15. w20.09 4 ¶6-7, 10

Amweezeezye buyo mbwaakalimvwa mwaapostolo Johane ciindi naakamvwa kuti aabo mbaakagwasya kwiiya kasimpe bakali kuzumanana kubelekela Jehova cakusyomeka! Bakajana mapenzi manji, pele Johane wakabeleka canguzu ikuyumya lusyomo lwa Banakristo aaba basyomeka, balo mbaakali kubona kuti mbana bakwe bakumuuya. Mbubwenya buyo, andiswe tulakkomana ciindi bana besu bakulizyalila naa bakumuuya nobalyaaba kuli Jehova alimwi akuzumanana kumubelekela. (3Joh. 3) Kuma 98 C.E., muuya uusalala wa Jehova wakamusololela Johane kulemba magwalo otatwe. Makanze aakulemba magwalo aaya akali aakukulwaizya Banakristo basyomeka kuti bazumanane kusyoma muli Jesu alimwi akuzumanana kweenda mukasimpe. Johane wakalilibilikide kujatikizya bamayi bakubeja mbobakali kuyunga mbungano ya Bunakristo. (1Joh. 2:18, 19, 26) Aboobo basiluleyo aaba bakali kulitaminina kuti balimuzyi Leza, pele tiibakali kwiitobela milawo yakwe. w20.07 20 ¶1-3

Tulausyoma mulumbe ngotukambauka, aboobo tulayanda kuwaambilizya kubantu banji kapati. Tulazisyoma zisyomezyo zijanika mu Jwi lya Leza. (Int. 119:42; Is. 40:8) Twalibonena businsimi bwamu Bbaibbele kabuzuzikizyigwa mumazuba eesu. Twalibonena bantu mbobacinca bukkale bwabo ciindi nobatalika kutobela lulayo lwamu Bbaibbele. Bumboni oobu buyumya lusyomo lwesu lwakuti makani mabotu aa Bwami mulumbe ngobeelede kumvwa bantu boonse. Tulamusyoma Jehova, Kasensa kamulumbe ngotukambauka, alimwi a Jesu ooyo ngwaakabikka kuba Mwami wa Bwami. Tacikwe makani abukkale motukonzya kulijana, lyoonse Jehova unooli mayubilo eesu alimwi anguzu zyesu. (Int. 46:1-3) Kuyungizya waawo, tulijisi lusyomo lwakuti Jesu ulausololela mulimo wakukambauka kali kujulu, kubelesya nguzu nzyaamupa Jehova. (Mt. 28:18-20) Lusyomo lutupa kusyoma kuti Jehova uyookulongezya kusoleka koonse nkotucita. w20.09 12 ¶15-17

Zimwi ziindi, bacizyi inga bayandika muntu wakubaiminina ciindi nobajana buyumuyumu bumwi. (Is. 1:17) Mucikozyanyo, mucizyi mukamufwu naa iwakalekwa inga wayandika muntu wakumugwasya milimo imwi njaakali kucita mulumi wakwe. Mucizyi uucembeede inga wayandika muntu wakumugwasya kubandika abamadokota. Mucizyi mupainiya uubeleka milimo iimbi mumbunga ya Jehova inga wayandika muntu wakumwiiminina, ikuti naa bamwi balamutongooka akaambo kakuti ziindi zinji taunki mumulimo wamumuunda mbuli bapainiya bambi. Atulange-lange cikozyanyo ca Jesu. Jesu kunyina naakali kuwayawaya kubaiminina bacizyi ciindi bamwi nobakali kubatongooka. Mucikozyanyo, wakamwiiminina Mariya ciindi Marta naakamutongooka. (Lk. 10:38-42) Alimwi wakamwiiminina Mariya ciindi cabili, eliya bamwi nobakamutongooka akaambo kakuyeeya kuti ncaakacita tiicakali kabotu. (Mk. 14:3-9) Jesu wakalaazyi makanze ngaakajisi Mariya alimwi wakamulumbaizya. Mane wakasinsima kuti ncaakacita mukaintu ooyu ciyakwaambwa “kufwumbwa makani mabotu aaya nkwaayookambaukwa munyika yoonse.” w20.09 24 ¶15-16

Mweembezi mubotu wakalizyi kuti mbelele zyakali kukonzya kusweeka. Ikuti naa mbelele yaleya kuzwa kubutanga, mweembezi tanaakali kwiisubula pe. Amubone cikozyanyo ncaakapa Leza ciindi naakali kugwasya babelesi bakwe bamwi, aabo kwakaindi kasyoonto ibakaleya kuzwa kulinguwe. Musinsimi Jona wakautija mulimo wakwe. Nokuba boobo, Jehova kunyina naakamukaka. Mbubwenya mbuli mweembezi mubotu, Jehova wakamuvwuna alimwi akumugwasya kuba anguzu nzyaakali kuyandika kutegwa azuzikizye mulimo wakwe. (Jon. 2:7; 3:1, 2) Mpoonya Leza wakabelesya cisyango cili mbuli ceeco cizyala myuungu kugwasya Jona kuti amvwisye mbobuyandika buumi bwamuntu umwi aumwi. (Jon. 4:10, 11) Ino ncinzi ncotwiiya? Baalu tabeelede kufwambaana kuleka kubagwasyilizya aabo ibatacisungweede. Muciindi caboobo, baalu balasoleka kuzyiba icakapa kuti mbelele ileye kubutanga. Alimwi ciindi mbelele noyapiluka kuli Jehova, baalu balazumanana kwiibikkila maano alimwi akwiiyanda. w20.06 20-21 ¶10-12

Nobwakamana bulelo bwa Soviet Union mu 1991, bantu ba Leza ibakali kweendelezyegwa abulelo oobu bakaba alwaanguluko kwaciindi cili mbocibede. Akaambo kaceeci, bantu ba Leza bakalaangulukide kukambauka, aboobo kakutanainda ciindi cilamfwu, basikumwaya bakavwula kapati muzisi izyakali kweendelezyegwa a Soviet Union. Pele nokwakainda myaka iili mbwiibede, cisi ca Russia alimwi abeenzinyina zyakaba mwami wakunyika. Kutegwa mfwulumende yeelele kwaambwa kuti mwami wakunyika naa mwami wakumusanza, kuli zintu zyotatwe nzyoyeelede kucita: (1) kulwana bantu ba Leza cacigaminina, (2) kulitondezya kwiinda mumicito kuti tayimuyandi Jehova alimwi abantu bakwe, alimwi (3) kuzundana amwami. Cisi ca Russia alimwi abeenzinyina bakabalwana bantu ba Leza cacigaminina ciindi nobakalesya mulimo wakukambauka alimwi akupenzya bakwesu abacizyi banji kapati. Micito iili boobu itondezya kuti tabamuyandi Jehova alimwi abantu bakwe. Alimwi balazundana amwami wakumusanza, Bulelo Bweendelezya Nyika Yoonse bwa Anglo-America. w20.05 12-13 ¶3-4

Mbwaanga kuyiisya kuliswaangene akugwasya bantu kuba basikwiiya, nkokuti tweelede kuyiisya munzila iiluzi. Tulayiisya bantu banji kasimpe kajanika mu Bbaibbele. Tulazikkomanina zintu nzyotuyiisya kuzwa mu Jwi lya Leza. Aboobo tulakonzya kusunkwa kwaamba makani manji kujatikizya zintu eezyo. Nokuba boobo, sikusololela Ciiyo ca Ngazi Yamulindizi, Ciiyo ca Bbaibbele Cambungano naa ciiyo ca Bbaibbele caaŋanda, teelede kwaamba zinji. Kutegwa alibelesye kabotu Bbaibbele ciindi nayiisya, mwiiyi weelede kulijata kwaambaula, kutasola kupandulula makani woonse ngazyi kujatikizya cibalo naa kaambo kamwi kamu Bbaibbele. (Joh. 16:12) Amweezyanisye luzyibo lwamu Bbaibbele ndomwakajisi ciindi nomwakabbapatizyigwa alimwi aloolo ndomujisi lino. Ambweni kuciindi eeco mwakazyi buyo njiisyo zyantalisyo. (Heb. 6:1) Cakamutolela myaka minji kutegwa mube aluzyibo ndomujisi lino, aboobo mutasoli kumuyiisya zintu zyoonse nzyomuzyi sikwiiya mupya. w20.10 14-15 ¶2-4

Jehova wakamusalila bazyali ibali kabotu Jesu. (Mt. 1:18-23; Lk. 1:26-38) Majwi ngaakaamba Mariya kuzwa ansi aamoyo aalembedwe mu Bbaibbele atondezya luyando lupati ndwaakajisi kuli Jehova alimwi a Jwi lyakwe. (Lk. 1:46-55) Alimwi ncaakacita Josefa kumalailile ngaakamupa Jehova cakatondezya kuti wakali kumuyoowa Leza alimwi akuti wakali kuyanda kumukkomanisya. (Mt. 1:24) Amubone kuti Jehova kunyina naakamusalila bazyali bavwubide Jesu. Zituuzyo Josefa a Mariya nzyobakapa naakamana kuzyalwa Jesu zitondezya kuti bakali bacete. (Lk. 2:24) Kweelede kuti bakali kupona buumi buuba-uba kwaambisya ciindi nowakali kuyaabukomena mukwasyi wabo, akuba abana bali ciloba naa kwiinda waawo. (Mt. 13:55, 56) Jehova wakali kumukwabilila Jesu kuntenda zimwi, pele kunyina naakali kumukwabilila kumapenzi oonse. (Mt. 2:13-15) Mucikozyanyo, Jesu wakajisi banamukwasyi ibatakali kumusyoma kumatalikilo ibatakali kuzumina kuti ngu Mesiya. (Mk. 3:21; Joh. 7:5) Alimwi tacidoonekwi kuti Jesu wakali kuliyumya akaambo kakufwidwa bausyi, ba Josefa. w20.10 26-27 ¶4-6

Sena kuli nomwakalimvwa kale kuti tamujisi wakumugwasya kutegwa muliyumye mupenzi limwi? Banji bakalimvwa kale oobo, kubikkilizya ababelesi ba Jehova ibasyomeka. (1Bam. 19:14) Ikuti naa andinywe mwalimvwa boobu, amuyeeye cisyomezyo ca Jehova eeci: “Ziyume zitete, tandikakusiyi pe alimwi tandikakulekelezyi pe.” Aboobo cakusinizya tulakonzya kwaamba kuti: “Jehova ngomugwasyi wangu; tandikooyoowa pe.” (Heb. 13:5, 6) Mwaapostolo Paulo nguwakalemba majwi aaya kubasyominyina ibakali kukkala mu Judaya mu 61 C.E. Majwi aakwe atuyeezya twaambo tulembedwe kulugwalo lwa Intembauzyo 118:5-7. Mbubwenya mbuli sintembauzyo, Paulo wakalizyi kwiinda muzintu zyakamucitikila kuti Jehova wakali mugwasyi wakwe. Mucikozyanyo, kakucili myaka yiinda kuli yobilo katanalemba lugwalo oolu kubana Hebrayo, Paulo wakapanga lweendo lukatazya kapati mulwizi imwakali guwo pati. (Mil. 27:4, 15, 20) Mulweendo loonse oolo alimwi akuciindi cakasololela kulindulo, Jehova wakatondezya kuti Mugwasyi wa Paulo munzila ziindene-indene. w20.11 12 ¶1-2

Nkaambo nzi ncocitali cabusongo kuzumanana kuyeeya kuti buumi bwesu bwakali kabotu kaindi? Nkaambo eeci cilakonzya kutupa kuyeeya buyo zintu zibotu zyakatucitikila kaindi akuluba zintu zibyaabi. Mucikozyanyo, amuyeeye cakacitika kubana Israyeli. Nobakazwa mu Egepita, cakufwambaana bakaluba buumi mbobwakali buyumu mucisi eeci. Muciindi caboobo, bakabikkila buyo maano kuzilyo zibotu nzyobakali kukkomanina. Bakaamba kuti: “Eelo kaka twaziyeeya nswi nzyotwakali kulya kakunyina kuula mu Egepita, alimwi amakowa, banamunywa, mahanyisi amagaliki!” (My. 11:3) Pele sena mubwini bakali kulya zyakulya “kakunyina kuula”? Peepe. Bana Israyeli bakali kubbadela muulo waatala; aciindi eeco, bakali kupenzyegwa kapati kabali bazike mu Egepita. (Kul. 1:13, 14; 3:6-9) Nokuba boobo, mukuya kwaciindi bakaaluba mapenzi aayo akulombozya buumi bwakaindi. Bakasala kubikkila maano “kumazuba mabotu aakaindi” muciindi cakubikkila maano kuzintu zibotu nzyaakabacitila Jehova. Aboobo Jehova wakakalala kapati kuli ceeco ncobakacita.—My. 11:10. w20.11 25 ¶5-6

Zimwi ziindi, tulakonzya kuyeeya kuti buumi mbufwaafwi alimwi akuti bujisi “mapenzi manji kapati.” (Job. 14:1) Aboobo cilalimvwisya kuti zimwi ziindi tulakonzya kutyompwa. Babelesi ba Jehova banji bamu Bbaibbele mbobakali kulimvwa oobo. Mane buya bamwi bakalombozya kufwa. (1Bam. 19:2-4; Job. 3:1-3, 11; 7:15, 16) Pele ciindi aciindi, Jehova, Leza ngobakali kusyoma, wakabaumbulizya alimwi akubayumya. Makani aamba kujatikizya mbabo akalembwa kutegwa atuumbulizye alimwi akutuyiisya. (Rom. 15:4) Atubandike kujatikizya Josefa mwana wa Jakobo. Muciindi buyo cisyoonto buumi bwa Josefa bwakacinca cakumaninina. Tanaakacili kukkala aŋanda abausyi ibakali kumuyanda kapati. Wakaba muzike uutakwe ambwabede mu Egepita, kabelekela mwaalumi iwatakamuzyi Jehova. (Matl. 37:21-28; 39:1) Mpoonya mukaintu wa Potifara wakamutamikizya kuti wakali kuyanda kumujata. Kakunyina kwaasinizya makani, Potifara wakabikka Josefa muntolongo, mwalo mwaakaangwa nsimbi. (Matl. 39:14-20; Int. 105:17, 18) Masimpe Josefa wakalijisi twaambo itwakeelede kumupa kutyompwa! w20.12 16-17 ¶1-4

Jesu wakaamba kuti eeci ncimwi cazintu iziyandika kapati nzyotweelede kubikkilizya mumupailo. Pele ino majwi aa Jesu aaya aamba nzi? Aamba kusalazya cintu cimwi. Pele bamwi balakonzya kubuzya kuti, ‘Tee zina lya Jehova lilasalala kale?’ Kutegwa twiingule mubuzyo ooyu, tweelede kuyeeya zintu zibikkilizyidwe kuzina eeli. Izina talili buyo bbala ilikonzya kulembwa apepa naa kwiile kwaambwa buyo. Amubone ncolyaamba Bbaibbele: “Izina libotu lyeelede kusalwa kwiinda lubono lunji.” (Tus. 22:1; Muk. 7:1) Nkaambo nzi zina ncoliyandika kapati? Nkaambo libikkilizya mpuwo, nkokuti mbobayeeya bamwi kujatikizya muntu uulaazina eelyo. Aboobo mbolilembwa zina naa mbolyaambwa taali ngamakani mapati; iciyandika kapati nceeco bantu ncobayeeya ciindi nobalibona naa kulimvwa zina eelyo. Ciindi bantu nobaamba zyakubeja kujatikizya Jehova, basola kunyonganya mpuwo yakwe. Ciindi nobanyonganya mpuwo yakwe, basola kusampaula zina lyakwe. w20.06 3 ¶5-7

Tulakonzya kulibilika kapati kujatikizya mapenzi eesu cakuti ambweni inga catwaalila akuyeeya zintu zimbi buyo. Mucikozyanyo, tulakonzya kulibilika kuti tatukonzyi kujana mali akuula zintu nzyotuyandika naa kuti ambweni inga twaciswa akwaalilwa kuunka kumulimo naa kumaninwa mulimo buya. Alimwi tulakonzya kulibilika kuti tuyoocita cakutasyomeka ciindi twaakusunkwa kutyola mulawo wa Leza. Lino-lino Saatani uyoopa baabo mbeendelezya kubukila bantu ba Leza, aboobo tulakonzya kulibilika kujatikizya ncotuyoocita ciindi Saatani abantu bakwe baakutubukila. Tulakonzya kulibuzya kuti, ‘Sena cililubide kulibilika kujatikizya zintu eezyi?’ Tulizyi kuti Jesu wakaambila basikwiiya bakwe kuti: “Amuleke kulibilika.” (Mt. 6:25) Sena Jesu wakali kwaamba kuti tatweelede kulibilika kujatikizya cintu cili coonse? Peepe! Amuyeeye kuti kaindi, babelesi ba Jehova bamwi abalo bakali kulibilika. Pele Jehova kunyina naakaleka kubakkomanina. (1Bam. 19:4) Aboobo Jesu wakali kutuumbulizya buya. Tanaakali kuyanda kuti katulibilika kapati kujatikizya zintu nzyotuyandika mubuumi, cakuti mane buya mulimo wesu kuli Leza wanyonganizyigwa. w21.01 3 ¶4-5

Jehova alimwi a Jesu balabikkila maano kapati kujatikizya mwaalumi mbwabeendelezya bamukwasyi wakwe. (1Pet. 3:7) Mbwaanga Jehova ngo Silutwe wamukwasyi wakujulu aanyika, nkokuti ulijisi nguzu zyakubikka milawo kujatikizya bana bakwe mbobeelede kulilemeka, alimwi akubona kuti milawo eeyo ilatobelwa. (Is. 33:22) Jesu, mbwali mutwe wambungano ya Bunakristo, awalo ulijisi nguzu zyakubikka milawo akubona kuti ilatobelwa. (Gal. 6:2; Kol. 1:18-20) Kutobela cikozyanyo ca Jehova a Jesu, silutwe wamukwasyi wa Bunakristo ulijisi nguzu zyakubikkila mukwasyi wakwe milawo. (Rom. 7:2; Ef. 6:4) Nokuba boobo, nguzu nzyajisi kuli mpozigolela. Mucikozyanyo, milawo yakwe yeelede kuti kaiyeeme anjiisyo zyamu Jwi lya Leza. (Tus. 3:5, 6) Alimwi silutwe wamukwasyi tajisi nguzu zyakupangila baabo ibatali bamukwasyi wakwe milawo. (Rom. 14:4) Kuyungizya waawo, bana bakwe basankwa abasimbi bakomena akuzwa aŋanda, balazumanana kumulemeka, pele tabacili ansi aabweendelezi bwakwe.—Mt. 19:5. w21.02 2-3 ¶3-5

Nzila imwi iiyandika kapati silutwe wamukwasyi mbwatondezya kuti ulauyanda mukwasyi wakwe, nkwiinda mukuupa nzyouyandika kumubili. Pele weelede kuyeeya kuti ciyandika kapati kulinguwe, nkugwasya mukwasyi kuba aacilongwe cibotu a Jehova. (Mt. 5:3) Ciindi Jesu naakali acisamu cakupenzezya, wakali kuyanda kuba masimpe kuti banyina bayoolanganizyigwa kabotu. Nokuba kuti wakamvwide kucisa kapati, Jesu wakalomba mwaapostolo Johane kuti kamulanganya Mariya. (Joh. 19:26, 27) Kuti mukwesu kali silutwe wamukwasyi, inga kajisi mikuli minji iiyandika. Weelede kuba munkutwe kumulimo kutegwa Jehova atembaulwe akaambo kambwalilemeka. (Ef. 6:5, 6; Tit. 2:9, 10) Alimwi inga kajisi mikuli imwi mumbungano, mbuli mulimo wabweembezi alimwi akusololela mumulimo wakukambauka. Aciindi nciconya, cilayandika kapati kuti kajisi bubambe bwakubala Bbaibbele lyoonse amukaintu wakwe alimwi abana. Banamukwasyi banoomulumba kapati silutwe wamukwasyi uubeleka canguzu ikubapa nzyobayandika kumubili, mumizeezo akumuuya.—Ef. 5:28, 29; 6:4. w21.01 12 ¶15, 17

Bbaibbele lilazyaamba zintu nzyakonzya kucita mukaintu musongo. Mucikozyanyo, ulakonzya kusololela milimo iicitwa muŋanda, kuula akusambala nyika, alimwi akucita makwebo amwi. (Tus. 31:15, 16, 18) Mukaintu tali muzike uutakonzyi kupa mizeezo. Muciindi caboobo, mulumaakwe ulamusyoma akumuswiilila. (Tus. 31:11, 26) Kuti mulumi keendelezya mukaintu munzila eeyi yabulemu, mukaintu cinoomukkomanisya kulibombya kulinguwe. Nokuba kuti Jesu wakacita zintu zipati-pati, kunyina nalimvwa kuti kulibombya kubweendelezi bwa Jehova nkudyaamininwa. (1Kor. 15:28; Flp. 2:5, 6) Mbubwenya buyo, mukaintu uutobela cikozyanyo ca Jesu, kunyina nalimvwa kuti kulibombya kumulumaakwe nkudyaamininwa. Uyoomugwasyilizya mulumaakwe ikutali buyo akaambo kakuti ulamuyanda, pele akaambo kakuti ulamuyanda akumulemeka Jehova. Nokuba boobo, mukaintu Munakristo uulibombya, kunyina nayoozumina kuti mulumaakwe wamulomba kutyola milawo naa njiisyo zyamu Bbaibbele. w21.02 11 ¶14-15; 12 ¶19

Kuyanda Leza lyoonse kulabagwasya babelesi bakwe kuliyumya ciindi nobapenzyegwa. Mucikozyanyo, ciindi baapostolo nobakalaililwa a Nkuta Mpati yaba Juda kuti bacileke kukambauka, kuyanda Leza kwakabapa “kumvwida Leza mbwali mweendelezi kutali bantu.” (Mil. 5:29; 1Joh. 5:3) Luyando luli boobu lulabayumya bakwesu mazuba aano, ibunji bwabo bazumanana kusyomeka ciindi nobapenzyegwa amfwulumende. Muciindi cakutyompwa, tucibona kuba coolwe kuzumanana kuliyumya notusulaikwa anyika. (Mil. 5:41; Rom. 5:4, 5) Ciindi banamukwasyi nobatukazya cilakonzya kutukatazya kapati kuliyumya. Nobabona kuti tuyanda kwiiya kujatikizya Jehova, banamukwasyi bamwi balakonzya kuyeeya kuti tweenwa buya. Ibamwi inga batalika kuyeeya kuti twasondoka. (Amweezyanisye Marko 3:21.) Mane buya inga batalika kutukazya. Ikukazyigwa kuli boobu takweelede kutugambya pe. Jesu wakaamba kuti: “Basinkondo bamuntu bayooba bantu bamuŋanda yakwe mwini.”—Mt. 10:36. w21.03 21 ¶6-7

Ciindi nomwasangana sikumwaya aciiyo cakwe ca Bbaibbele, amuswiilile cakubikkila maano ciindi mwiiyi alimwi asikwiiya nobaambaula. Kuti mwacita oobo, munoolibambilide kugwasya aciindi ceelede. Pele mweelede kubelesya bupampu. Mucikozyanyo, tamweelede kwaamba zinji, kumunjila mukanwa sikuyiisya naa kwaamba buyo makani aamwi aateendelani ancomwiiya. Pele kwiinda mukupa bupanduluzi bufwaafwi, cikozyanyo naa mubuzyo, mulakonzya kukasalazya kaambo kabandikwa. Zimwi ziindi, mulakonzya kulimvwa kuti tamujisi zinji zyakwaamba kumakani aabandikwa. Pele kuti mwamulumbaizya sikwiiya alimwi akutondezya kuti mulamubikkila maano, muyoomugwasya kapati kuyaambele. Ikuti kaceelela, mulakonzya kumwaambila sikwiiya mubufwaafwi mbomwakaiya kasimpe, mbomwakacikonzya kuzunda buyumuyumu bumwi naa Jehova mbwaamugwasya mubuumi bwanu. (Int. 78:4, 7) Ambweni cakuluula canu ncecikonzya kumugwasya sikwiiya. Ambweni cilakonzya kuyumya lusyomo lwakwe naa kumukulwaizya kuzumanana kuyaambele kutegwa ayelele kubbapatizyigwa. w21.03 10 ¶9-10

Nguni weelede kupegwa bulemu kukuzwidilila kuli koonse nkotujisi mumulimo wakukambauka? Paulo wakawiingula mubuzyo ooyu ciindi naakalemba majwi aaya kumbungano yaku Korinto: “Mebo ndakasyanga, Apolo wakatilila, pele Leza nguwakali kukomezya, aboobo ooyo uusyanga naba yooyo uutilila kunyina mbwabede pe, pele Leza uukomezya.” (1Kor. 3:6, 7) Mbubwenya mbuli Paulo, lyoonse notwazwidilila mumulimo wakukambauka, bulemu boonse bweelede kuunka kuli Jehova. Mbuti mbotukonzya kutondezya kulumba kucoolwe cakuba “basimilimonyina” a Leza, Kristo alimwi abangelo? (2Kor. 6:1) Inga twacita oobo kwiinda mukucita zyoonse nzyotukonzya kutegwa twaambile bamwi makani mabotu. Tatweelede kunoosyanga buyo mbuto zyakasimpe pele alimwi tweelede kunoozitilila. Ciindi muntu natondezya luyandisisyo, tuyanda kusolekesya kusikila mpotugolela kupilukila kumuntu ooyo naa kupanga bubambe bwakuti muntu umwi akamuswaye kajisi makanze aakutalisya ciiyo ca Bbaibbele. Tulakkomana ciindi notubona Jehova mbwamugwasya sikwiiya kucinca mbwayeeya alimwi ambwalimvwa. w20.05 30 ¶14, 16-18