December

Zimwi ziindi cilakonzya kutuyumina kumvwisya ncolyaamba Bbaibbele. Naa Jehova takonzyi kwiingula mipailo yesu munzila njitwali kuyeeyela. Eeci cilakonzya kutupa kutalika kudooneka. Kuti tiitwakubikkila maano kudooneka kuli boobu, kulakonzya kucesya lusyomo lwesu akunyonganya cilongwe cesu a Jehova. (Jak. 1:7, 8) Alimwi buya kulakonzya kutupa kusweekelwa bulangizi bwesu bwakumbele. Mwaapostolo Paulo wakakozyanisya bulangizi bwakumbele kungobyo. (Heb. 6:19) Ngobyo ipa bwato kuti kabutazungaani ciindi nokuli guwo alimwi akupa kuti bwiimikile kakunyina kulipwaya kumabwe. Pele ngobyo igwasya buyo kuti nketani iijisi bwato tiiyazutuka. Mbubwenya buyo nkalaya mboinyonganya nketani yangobyo, akwalo kudooneka kulakonzya kunyonganya lusyomo lwesu. Ciindi naasunkwa kwiinda mukukazyigwa, muntu uudooneka ulakonzya kuleka kusyoma kuti Jehova uyoozizuzikizya zisyomezyo zyakwe. Kuti lusyomo lwesu lwamana, abwalo bulangizi bwesu bulamana. Muntu uuli boobu kunyina nayookkomana pe! w21.02 30 ¶14-15

Kweelede kuti Abrahamu wakajisi myaka yiinda ku 70 ciindi walo amukwasyi wakwe nobakazwa ku Uri. (Matl. 11:31–12:4) Kwamyaka iitandila ku 100, Abrahamu wakali kukkala mumatente akweenda munyika yoonse ya Kanana. Abrahamu wakafwa kajisi myaka iili 175. (Matl. 25:7) Pele kunyina naakabona Jehova mbwaakacizuzikizya cisyomezyo cakwe cakupa nyika ya Kanana kulunyungu lwakwe. Alimwi tanaakapona ciindi cilamfwu kutegwa abone munzi, nkokuti Bwami bwa Leza nobwakatalisyigwa. Nokuba boobo, Abrahamu waambwa kuti wakafwa “naakacembaala akupona myaka minji.” (Matl. 25:8) Nokuba kuti wakajana buyumuyumu bunji, Abrahamu wakazumanana kuba alusyomo luyumu alimwi wakalilisungwide kulindila Jehova. Ino ncinzi cakamugwasya kuliyumya? Nkaambo kakuti mubuumi bwakwe boonse, Jehova wakali kumukwabilila alimwi akumweendelezya munzila yabulongwe. (Matl. 15:1; Is. 41:8; Jak. 2:22) Mbubwenya mbuli Abrahamu, tulindila munzi uujisi ntalisyo zini-zini. (Heb. 11:10) Nokuba boobo, swebo tatulindili kuti uyakwe. Bwami bwa Leza bwakatalisyigwa mu 1914 alimwi lino buleendelezya kujulu. (Ciy. 12:7-10) Pele tulindila kuti butalike kweendelezya aano anyika. w20.08 4-5 ¶11-12

Kutegwa tubaswiilile cakubikkila maano bantu, tweelede kulicesya alimwi akukkazika moyo. Kucita boobo kuyootugwasya mumbazu zyotatwe. Yakusaanguna, tuyootantamuka cilengwa cakuyeeyela bantu zintu zitali kabotu. Yabili, tuyoozyiba kujatikizya mbobalimvwa bamwi alimwi acibapa kucita zintu munzila imwi, aboobo eeco ciyootugwasya kubafwida luzyalo. Yatatu, tulakonzya kugwasya muntu kuzyiba cintu cimwi kujatikizya nguwe. Zimwi ziindi muntu takonzyi kumvwisya mbwalimvwa ccita kuti mwamupa ciindi cakwaamba mbwalimvwa. Bakwesu abacizyi bamwi cilabakatazya kwaamba mbobalimvwa akaambo kazintu zyakabacitikila, mbobakakomezyegwa, naa bube bwabo. Cilakonzya kubatolela ciindi kwaanguluka kubandika andiswe, pele lilikke buyo kuti baanguluka ndendilyo notukonzya kuzyiba bwini mbobalimvwa. Ikuti twamwiiya Jehova kwiinda mukubakkazikila moyo, balakonzya kwaanguluka kutwaambila mbobalimvwa. Mpoonya ciindi nobatwaambila mbobalimvwa, tweelede kubaswiilila cakubikkila maano. w20.04 15-16 ¶6-7

Kanji-kanji nswi zijanika mumasena muli meenda ngozikkomanina alimwi imuli cakulya cinji. Ciindi muzubi wanswi ncaunka kuyoozuba acalo cilayandika kapati. Kujatikizya ciindi cibotu cakuzuba nswi, amubone Kamboni umwi waku Pacific island ncaakaamba ciindi naakatamba misyinali umwi kuyoozuba nswi. Misyinali wakaamba kuti, “Tuyakuunka juunza kuseeni kuma 09:00.” Mpoonya mukwesu wakaingula kuti, “Tatuunki buyo kufwumbwa ciindi ncotuyanda, pele tuunka ciindi notukonzya kujaya nswi.” Mbubwenya buyo, basikwiiya ba Jesu ibakaba bazubi babantu bakali kuunka kumasena nkobakali kujanika bantu alimwi aaciindi ncobakali kujanika. Mucikozyanyo, basikutobela Jesu bakali kukambauka mutempele, muzikombelo, kuŋanda aŋanda alimwi akumusika. (Mil. 5:42; 17:17; 18:4) Andiswe tweelede kuzyiba ciindi bantu nobali aŋanda naa kumasena nkotukonzya kubakambaukila. Tweelede kucinca-cinca akukambaukila kumasena nkotukonzya kubajana bantu alimwi aciindi nobajanika.—1Kor. 9:19-23. w20.09 4 ¶8-9

Nzila imwi mbotukonzya kuyumya cilongwe cesu a Jesu nkwiinda mukugwasyilizya bubambe bwambungano ya Bunakristo. Tulaciyumya cilongwe cesu a Jesu mbwali mutwe wambungano ciindi notubelekela antoomwe abaabo ibasalidwe kutulanganya. (Ef. 4:16) Mucikozyanyo, tuli mukusolekesya lino kubona kuti Maanda aa Bwami oonse alabelesyegwa kabotu. Kutegwa eeci cikonzyeke, mbungano zimwi zyakaswaanganizyigwa antoomwe. Bubambe oobu bwapa kuti kuyobolwe mali manji aasangwa mumbunga ya Jehova. Pele aciindi nciconya, bwapa kuti basikumwaya bamwi bacince kweelana abukkale oobu bupya. Basikumwaya basyomeka aabo ambweni bali kuyanzana ambungano imwi kwamyaka minji alimwi ambweni balijisi cilongwe ciyumu abakwesu alimwi abacizyi mumbungano eeyo. Pele lino balombwa kuti balongele kumbungano iimbi. Eelo kaka Jesu weelede kuti ulikkomene kapati kubona basikwiiya basyomeka aaba kabatobela bubambe oobu! w20.04 24 ¶14

Mwami wakunyika alimwi amwami wakumusanza bazumanana kuzundana akaambo kakuti aumwi uyanda kuba mfwulumende iilaanguzu kapati munyika yoonse. Mucikozyanyo, noyakainda Nkondo Yabili Yanyika Yoonse, cisi ca Soviet Union cakatalika kweendelezya cibeela cipati ca Europe. Aboobo mwami wakumusanza wakapanga cizuminano cankondo amasi aambi icitegwa North Atlantic Treaty Organization (NATO) kutegwa balwane mwami wakunyika. Mwami wakunyika alimwi amwami wakumusanza babelesya mali manji kapati kusola kuba ampi yabasikalumamba iilaanguzu kapati munyika yoonse. Kuyungizya waawo, bami aaba balalwana kwiinda mukugwasyilizya basinkondonyina amwami ooyo ngobalwana limwi. Mumyaka misyoonto yainda, cisi ca Russia alimwi abeenzinyina baba anguzu kapati munyika yoonse. Alimwi bamulwana mwami wakumusanza kwiinda mukubelesya makkompyuta. Bami aaba balatamikizyanya kuti aumwi ubelesya mapulogilamu aakkompyuta aatali kabotu kusola kunyonganya lubono lwaumwi alimwi amfwulumende yakwe. Alimwi kweelana ambwaakasinsima Daniele, mwami wakunyika wazumanana kubalwana bantu ba Leza.—Dan. 11:41. w20.05 13 ¶5-6

“Sena mutumbu inga waluba mwanaakwe uucinyonka?” Ooyu ngomubuzyo Jehova ngwaakabuzya mumazuba aamusinsimi Isaya. Leza wakaambila bantu bakwe kuti, “Nokuba kuti bamatumbu aaba inga baluba, mebo tandikonzyi kukuluba yebo pe.” (Is. 49:15) Kanji-kanji Jehova talyeezyanisyi kumutumbu. Pele mubukkale oobu wakacita oobo. Jehova wakabelesya luyando luyumu iluli akati kamutumbu amwanaakwe kutondezya mbwabayanda kapati babelesi bakwe. Bamatumbu banji balimvwa mbubwenya mbwaakalimvwa mucizyi Jasmin iwakaamba kuti, “Ciindi nookomezya mwanaako, inga uba aluyando luyumu kapati ilulibedelede alimwi lukonzya kukkalilila lyoonse.” Jehova ulazyiba ciindi umwi wababelesi bakwe naacileka kuyanzana ambungano ya Bunakristo alimwi anacileka kukambauka. Bakwesu abacizyi banji aaba ibaleya, inga balapiluka mumbungano alimwi balatambulwa amaanza obilo! Jehova uyanda kuti bapiluke kulinguwe, andiswe mbotuyanda oobo.—1Pet. 2:25. w20.06 18 ¶1-3

Zipego zimwi tatukonzyi kuzibona. Alimwi buya, zipego ziinda kubota tazilibonyi. Mu Mulumbe waa Cilundu, Jesu wakaamba lubono lwakujulu kuti lulayandika kapati kwiinda lubono lwakumubili. Mpoonya wakayungizya kuti: “Ooko kuli lubono lwako, awalo moyo wako nkuuyooba.” (Mt. 6:19-21) Moyo wesu uyootukulwaizya kuyandaula zintu nzyotuyandisya kapati. ‘Tulaliyobweda lubono kujulu’ kwiinda mukulipangila zina libotu a Leza, naa kupona kweelana ambwayanda. Jesu wakaamba kuti lubono luli boobu talukonzyi kunyonyooka naa kubbigwa. Mwaapostolo Paulo utukulwaizya ‘kulanga zintu zitalibonyi.’ (2Kor. 4:17, 18) Zintu eezyi zitalibonyi ndubono ilubikkilizya zilongezyo nzyotuyooba anzizyo munyika mpya ya Leza. Sena tulatondezya kuti tulalumba kuzintu eezyi izitalibonyi? w20.05 26 ¶1-2

Zintu Musa nzyaakayiisya bana Israyeli zyakabayumya alimwi akubakatalusya, mbubwenya mbuli lusuunsu luwida azisyango. Mbuti mbotukonzya kuba masimpe kuti kuyiisya kwesu kulikozyenye akwa Musa? Ciindi notuli mubukambausi bwakuŋanda aŋanda naa bwakubuleya, tulakonzya kubelesya Bbaibbele kutondezya bantu zina lya Leza lyakuti, Jehova. Tulakonzya kubatondezya mabbuku mabotu, mavidiyo mabotu alimwi azimwi buyo izili awebbusaiti yesu izilemeka Jehova. Ciindi notuli kumulimo, kucikolo naa mulweendo, tulakonzya kuba azyoolwe zyakubandika abamwi kujatikizya Leza wesu alimwi ambwabede. Tulakonzya kubaambila kujatikizya zintu zibotu nzyayootucitila Jehova anyika. Aboobo ciindi nobazimvwa zintu eezyo bayoobona mbwatuyanda Jehova. Ciindi notwaambila bantu kasimpe kajatikizya Taateesu siluyando, tulagwasyilizya mukusalazya zina lya Leza. Tulabagwasya bantu kuzyiba kuti bunji bwazintu nzyobakayiisyigwa kujatikizya Jehova nzyakubeja. Nzyotuyiisya bantu kuzwa mu Bbaibbele zilakatalusya kapati.—Is. 65:13, 14. w20.06 10 ¶8-9

Mbube nzi mbotweelede kuba ambubo kutegwa tubagwasye aabo ibayanda kujokela kuli Jehova? Amubone ncotukonzya kwiiya kucikozyanyo ca Jesu camwana mutaka iwakazwide aŋanda. (Lk. 15:17-24) Wakaliyeeya mwana ooyu akusala kuti ajokele kuŋanda. Bausyi bakamubalikila mwanaabo akumukumbata munzila yaluyando cakuti wakabona kuti bakali kumuyanda kapati. Mwana wakakatazyigwa amanjezeezya alimwi wakalimvwa kuti taceeleli kwiitwa kuti mwanaabo. Bausyi bakeetezyegwa kapati kujatikizya mwanaabo iwakabaambila bwini mbwaakalimvwide. Mpoonya bakabweza ntaamu zigwasya kusyomezya mwanaabo kuti watambulwa alimwi aŋanda, pele mbuli munamukwasyi uuyandwa. Kutondezya kuti bakali kumuyanda mwanaabo, bausyi bakapanga pobwe alimwi akumupa zisani zibotu mwanaabo iwakeempwa. Jehova uli mbuli bausyi bamucikozyanyo camwana mutaka. Ulabayanda bakwesu abacizyi ibatacisungweede alimwi uyanda kuti bapiluke kulinguwe. Kwiinda mukwiiya Jehova, tulakonzya kubagwasya kutegwa bapiluke. Kutegwa tucite oobo, tweelede kutondezya lweetelelo, luzyalo, luyando alimwi akukkazika moyo. w20.06 25-26 ¶8-9

Jesu wakaamba kuti bamwi bakali kuyookatambula kasimpe “calukkomano,” pele lusyomo lwabo lwakali kuyooceya ciindi nobajana mapenzi. (Mt. 13:3-6, 20, 21) Ambweni tiibakamvwisya kuti aabo batobela Jesu balakonzya kujana mapenzi. (Mt. 16:24) Ambweni bakali kuyeeya kuti kuba Munakristo cakali kwaamba kuti kunyina nobakonzya kuba amapenzi naa kuti lyoonse Leza unakwaagwisya mapenzi aabo. Pele munyika eeyi mbyaabi, mapenzi anooliko. Bukkale bwesu bulakonzya kucinca akupa kuti lukkomano lwesu lumane. (Int. 6:6; Muk. 9:11) Bakwesu abacizyi banji balatondezya kuti balisinizyide kuti balikajisi kasimpe. Munzila nzi? Kunyina nobazungaana nokuba kuti musyominyina wabanyemya naa wacita cibi cipati. (Int. 119:165) Musunko limwi alimwi, lusyomo lwabo lulazumanana kuyuma ikutali kuceya. (Jak. 1:2-4) Tweelede kuba alusyomo luyumu boobu. w20.07 8 ¶1; 9 ¶4-5

Kamutanatalika kubala Bbaibbele, amumulombe Jehova kuti amugwasye kubona mbozikonzya kumugwasya zintu nzyomubala. Mucikozyanyo, ikuti naa muyandaula lulayo lukonzya kumugwasya kulwana penzi limwi, amumulombe Jehova kutegwa amugwasye kujana njiisyo mu Jwi lyakwe zikonzya kumugwasya. (Flp. 4:6, 7) Jehova wakatupa nguzu zyakuti katucikonzya kweezeezya zintu. Kutegwa mucimvwisye kabotu-kabotu cibalo camu Bbaibbele, amusole kweezeezya zintu izyakali kucitika alimwi akulibikka mubukkale bwamuntu ooyo ngomubala. Amusole kubona zintu nzyaakali kubona alimwi akulimvwa mbuli mbwaakali kulimvwa muntu ooyo. Mpoonya, amuzinzibale kuyeeya. Kuzinzibala kuyeeya caamba kuyeeyesya makani ngomubala alimwi akubona mbwaamugwasya. Kucita boobo kumugwasya kuswaanganya twaambo alimwi akumvwisya makani ngomubala. Kubala Bbaibbele kakunyina kuzinzibala kuyeeya kuli mbuli kulangilila citina comwe-comwe kakunyina kuzibikka antoomwe kutegwa zipange ŋanda. Aboobo kuzinzibala kuyeeya kuli mbuli kubikka zitina antoomwe kutegwa zipange ŋanda. w21.03 15 ¶3-5

Mwaapostolo Paulo naakayeeya zintu zyakamucitikila musyule, kayeeya kuti, ikuti naatakaba Munakristo musungu, naatakaangwa. Naakazumanana kubabikkilila baalumi bamu cooko ca Asiya ibakamumwaika, alimwi naakaleka kubasyoma balongwe bakwe bamwi. Pele Paulo tanaakacita oobo. Nokuba kuti Paulo wakalizyi kuti ulaafwaafwi kufwa, kunyina naakaluba kuti cilayandika kapati kuleta bulemu kuli Jehova. Alimwi wakazumanana kuyeeya mbwakonzya kukulwaizya bamwi. Wakasyoma Jehova kwiinda mukupaila cakutaleka. Paulo kunyina naakazumanana kuyeeya kujatikizya bakwesu ibakamumwaika, muciindi caboobo, wakaamba kuti wakalumba kapati akaambo kalugwasyo ndobakamupa balongwe bakwe. Kuyungizya waawo, Paulo wakazumanana kubala Jwi lya Leza. (2Tim. 3:16, 17; 4:13) Kwiinda zyoonse, wakajisi lusyomo luyumu lwakuti Jehova alimwi a Jesu balamuyanda. w21.03 18 ¶17-18

Aciindi cimwi mumwaanda wamyaka wabili C.E., Banakristo bakubeja banji bakanjila mumbungano ya Banakristo bakasimpe, bakatalika kuyiisya njiisyo zyakubeja alimwi akusisa kasimpe kali mu Jwi lya Leza. Kuzwa ciindi eeco kusikila kumamanino amwaanda wamyaka wa 19, kwakanyina mbunga iikamantene yababelesi ba Leza anyika. Banakristo bakubeja bakavwula kapati mbuli nsaku mumuunda. Akaambo kaceeci, cakali kukatazya kapati kubazyiba ibakali Banakristo bakasimpe. (Mt. 13:36-43) Nkaambo nzi ncociyandika kapati kwaazyiba makani aaya? Nkaambo kakuti kweelana ancotubala kuli Daniele caandaano 11, mwami wakunyika alimwi amwami wakumusanza tiibakali kukonzya kuba bami naa mfwulumende akati kamwaanda wamyaka wabili kusikila akati kamwaanda wamyaka wa 19. Kayi kwakanyina mbunga iikamantene yabantu ba Leza njobakali kukonzya kulwana. Nokuba boobo, kumamanino amwaanda wamyaka wa 19, cakali kukonzyeka kumuzyiba mwami wakunyika alimwi amwami wakumusanza. w20.05 3 ¶5

Joeli wakasinsima kuti cipenzyo cacikwikwi ciyoonyonyoona cisi ca Israyeli, ciyoozinyonyoona zisyango zyoonse! (Joel. 1:4) Kwamyaka minji, twali kuyeeya kuti businsimi oobu, munzila yacikozyanyo bwaamba nzila bantu ba Jehova mbobaubeleka mulimo wabo wakukambauka mbuli cikwikwi icitakonzyi kulesyegwa. Twakazyi kuti mulimo ooyu unyonyoona “nyika” naa bantu ibeendelezyegwa abasololi babukombi. Nokuba boobo, ikuti naa twaalanga-langa makani oonse aajatikizya businsimi oobu, tulakonzya kubona kuti tweelede kubumvwisya munzila yiindene. Amubone cisyomezyo ca Jehova kujatikizya cipenzyo cacikwikwi: “Muntu wakunyika [cikwikwi] ndiyoomutandila kulamfwu andinywe.” (Joel. 2:20) Ikuti naa cikwikwi ciiminina Bakamboni ba Jehova ibatobela mulawo wa Jesu wakukambauka alimwi akugwasya bantu kuba basikwiiya, nkaambo nzi Jehova ncakonzya kusyomezya kubatandila kulamfwu? (Ezk. 33:7-9; Mt. 28:19, 20) Aboobo, calibonya kuti Jehova ncatandila kulamfwu, tabali babelesi bakwe basyomeka, pele ncintu cimwi naa bantu aabo ibapenzya bantu bakwe. w20.04 3 ¶3-5

Ncinzi ncotweelede kucita ciindi notwabona kuti Jehova tawiinguli mupailo wesu mpoonya-mpoonya? Jakobo wakalemba kuti tweelede ‘kuzumanana kumulomba’ Leza. Jehova kunyina nanyema kuti twazumanana kumulomba busongo. Kunyina nayootunyemena pe. Taateesu wakujulu ‘ulapa cabuuya’ ciindi notumulomba busongo kutegwa tuliyumye mumasunko. (Int. 25:12, 13) Jehova inga ulaabwene masunko eesu, ulaalweetelelo, alimwi inga ulilibambilide kutugwasya. Eelo kaka eeci cilatupa lukkomano! Pele ino mbuti Jehova mbwatupa busongo? Nkwiinda mu Jwi lyakwe. (Tus. 2:6) Kutegwa tube abusongo oobu, tweelede kubala Jwi lya Leza alimwi amabbuku aamba zyamu Bbaibbele. Pele zinji nzyotweelede kucita muciindi cakuba buyo aluzyibo. Tweelede kububelesya busongo bwa Leza mubuumi bwesu kwiinda mukutobela lulayo lwakwe. Jakobo wakalemba kuti: “Amube basikucita caamba jwi lya Leza, ikutali basikumvwa buyo pe.” (Jak. 1:22) Ikuti twalubelesya lulayo lwa Leza, tuba basiluumuno, bantu banyoneka alimwi basiluzyalo. (Jak. 3:17) Bube oobu buyootugwasya kuliyumya mumasunko aali oonse kumwi katukkomene. w21.02 29 ¶10-11

Sikwiiya Bbaibbele ulakonzya kuyaambele akweelela kubbapatizyigwa ciindi nagwasyigwa abamwi mumbungano. Sikumwaya aumwi ulakonzya kugwasya bapya kuba cibeela cambungano. Mupainiya wakaamba kuti: “Kuli kaambyo kakuti, mulonga uvwula bunkumunkumu. Ndasyoma eeci cilikozyenye akugwasya bantu kuba basikwiiya. Boonse mumbungano balakonzya kugwasya muntu kwiiya kasimpe.” Banamukwasyi, balongwe alimwi abamayi boonse beelede kugwasyilizya mwana kuti akomene. Balacita oobo kwiinda mukumukulwaizya mwana alimwi akumuyiisya ziiyo ziyandika. Mbubwenya buyo, kutegwa sikwiiya Bbaibbele ayelele kubbapatizyigwa, bakwesu abacizyi balakonzya kumupa lulayo, kumukulwaizya alimwi akuba cikozyanyo cibotu. (Tus. 15:22) Nkaambo nzi sikumwaya uusololela ciiyo ca Bbaibbele ncayelede kukkomana ciindi basikumwaya bambi nobamugwasya sikwiiya wakwe? Nkaambo kakuti mbanji bakonzya kumugwasilizya sikwiiya Bbaibbele kuyaambele kumuuya. w21.03 8 ¶1-3

Banakristo boonse, bana alimwi abapati, beelede kukukaka kupona buumi bwakuupaupa ameso. Mwaapostolo Johane cacigaminina wakaamba kuti tatukonzyi kweenda mukasimpe kumwi katupona buumi bwakutalilemeka. (1Joh. 1:6) Ikuti katuyanda kuti Jehova atukkomanine lino alimwi akumbele, lyoonse tweelede kuyeeya kuti Jehova ulazibona zintu zyoonse nzyotucita. Nokuba kuti bantu tabakonzyi kuzibona zintu nzyotucita cakusisikizya, pele kuli Jehova zintu zyoonse zili antangalala. (Heb. 4:13) Tweelede kwiikaka nzila yabantu bamunyika iijatikizya mbobacibona cibi. Kuciindi ncaakali kupona Johane, basiluleyo bakali kwaamba kuti muntu ulakonzya kabisya acaali pele aciindi nciconya kajisi cilongwe cibotu a Leza. Mazuba aano, tupona akati kabantu ibajisi mizeezo iili boobu. Ibanji balitaminina kusyoma Leza, pele cibi tabaciboni mbwacibona Jehova, ikapati ciindi nocijatikizya makani aakoonana. Bukkale Jehova mbwabona kuti ncibi balo babubona kuti ncintu ncakonzya kulisalila muntu, naa kuti ninzila buyo aimbi yabukkale. w20.07 22 ¶7-8

Sena mulabaiminina bacizyi ciindi nobayandika lugwasyo? Amubone bukkale oobu. Basikumwaya bamwi babona kuti mucizyi uuzwa mumukwasyi bamwi mobatali Bakamboni ziindi zinji ulamuka kusika kumiswaangano alimwi akufwambaana kuunka mboyamanina buyo. Kunze lyaboobo, balabona kuti bunji bwaziindi tabaleti kumiswaangano bana bakwe. Aboobo balamutongooka nkaambo bayeeya kuti weelede kumusinikizya mulumaakwe kutegwa kamuzumizya kunoobatolelezya bana kumiswaangano. Pele ncobatazyi ncakuti, mucizyi ooyu ulasolekesya kucita kweelana ambwakonzya. Kunyina mbwakonzya kucita mbwaanga weendelezyegwa buya amulumaakwe alimwi kujatikizya bana talinguwe alikke uusala. Ikuti naa mwamulumbaizya mucizyi ooyu akwaamba zintu nzyacita kabotu, inga mwapa kuti bacileke kumutongooka. Baalu balizyi kuti Jehova uyanda kuti bacizyi kabeendelezyegwa kabotu. (Jak. 1:27) Aboobo baalu baiya Jesu kwiinda mukuba bantu banyoneka. Balakonzya kucita oobo kwiinda mukutabikka milawo ciindi nokuyandika kutondezya lubomba alimwi akumvwisya. (Mt. 15:22-28) Ciindi baalu nobasolekesya kugwasya, cipa bacizyi kulimvwa kubikkilwa maano a Jehova alimwi ambunga yakwe. w20.09 24-25 ¶17-19

Mubuumi bwakwe boonse, Daniele wakazumanana kulicesya alimwi lyoonse wakali kulomba Jehova kuti amusololele. Mucikozyanyo, ciindi naakabelesyegwa a Jehova kupandulula ciloto ca Nebukadinezara, Daniele kunyina naakayanda kuti apegwe nguwe bulemu akaambo kakupandulula ciloto eeci. Muciindi caboobo, bulemu boonse wakabupa kuli Jehova. (Dan. 2:26-28) Ino ncinzi ncotwiiya? Ikuti bakwesu balakkomana kuswiilila makani eesu naa ikuti kuli kuzwidilila kuli koonse nkotujisi mumulimo wamumuunda, tweelede kupa bulemu boonse kuli Jehova. Tweelede kuzyiba kuti tulacikonzya kucita zintu zyoonse akaambo kalugwasyo lwa Jehova. (Flp. 4:13) Ikuti naa katujisi muuya uuli boobu, nkokuti twiiya cikozyanyo ca Jesu cibotu. Jesu wakali kusyoma Jehova. (Joh. 5:19, 30) Kunyina naakasola kubanyanga nguzu zyabweendelezi Bausyi bakujulu. Lugwalo lwa Bafilipi 2:6 lwaamba kuti Jesu “kunyina pe naakayeeya kubweza bweendelezi, nkokuti kutegwa kabeelene a Leza.” Mbwali Mwana uulibombya, Jesu wakalizyi kuti nguzu zyakwe kuli mpozigolela alimwi wakali kubulemeka bweendelezi bwa Bausyi. w20.08 11 ¶12-13

Bamwi ibali mukubalika munzila eeyi iitola kubuumi bajisi mapenzi bantu bambi ngobatakonzyi kubona alimwi akumvwisya. Kuti kamutakonzyi kucita zyoonse nzyomuyanda alimwi akulimvwa kuti bantu tababumvwisyi bukkale bwanu, mulayumizyigwa kapati acikozyanyo ca Mefiboseti. (2Sam. 4:4) Wakali mulema alimwi Mwami Davida wakamuyeeyela zintu zitali kabotu akumweendelezya calunya. Nokuba boobo, kunyina naakanyema, pele wakalumba kuzintu zibotu izyakacitika mubuumi bwakwe. Wakalumba kuluzyalo ndwaakamutondezya Davida musyule. (2Sam. 9:6-10) Aboobo ciindi Davida naakamuyeeyela zintu zitali kabotu, Mefiboseti wakabikkila maano kutwaambo toonse itwakajatikizyidwe. Tanaakalekela kulubizya kwa Davida kuti kumunyemye. Alimwi kunyina naakatongooka Jehova kujatikizya ncaakacita Davida. Mefiboseti wakabikkila maano kubona ncaakali kukonzya kucita kutegwa agwasyilizye mwami iwakasalidwe a Jehova. (2Sam. 16:1-4; 19:24-30) Jehova wakapa kuti cikozyanyo ca Mefiboseti icibotu kapati cilembwe mu Jwi lyakwe kutegwa citugwasye.—Rom. 15:4. w20.04 26 ¶3; 30 ¶18-19

Bamwi mumbungano balakonzya kusalwa kubeleka kabali bamisyinali, bapainiya baalubazu naa bapainiya baciindi coonse. Bakasala kunjila mulimo waciindi coonse kutegwa bakambaukile bantu akubagwasya kuba basikwiiya. Nokuba kuti bunji bwababelesi baciindi coonse aaba tabajisi zintu zinji zyakumubili, Jehova wabagwasya azintu zinji nzyobayandika. (Mk. 10:29, 30) Tulabayanda kapati bakwesu abacizyi aaba alimwi tulalumba kuti bali mumbungano! Sena bakwesu ibapedwe mikuli alimwi abaabo ibali mumulimo waciindi coonse mbambabo balikke bajisi busena mumbungano? Peepe! Sikumwaya makani mabotu uuli woonse ulayandika kapati kuli Leza alimwi akumbungano. (Rom. 10:15; 1Kor. 3:6-8) Alimwi buya, makanze mapati aambungano ngakugwasya bantu kuba basikwiiya ba Mwami wesu Jesu Kristo. (Mt. 28:19, 20; 1Tim. 2:4) Bakambausi boonse, babbapatizyidwe alimwi abaabo batanabbapatizyigwa, balasoleka kubikka mulimo ooyu mubusena bwakusaanguna.—Mt. 24:14. w20.08 21 ¶7-8

Mbubwenya mbwaatondezya majwi aali mulugwalo lwabuzuba bwasunu, ciindi notujana mapenzi, Jesu uyootugwasya. Masimpe majwi aa Jesu alatuyumya. Nkaambo nzi? Nkaambo kakuti zimwi ziindi cilatukatazya kuliyumya. Mucikozyanyo, ciindi notwafwidwa muyandwa wesu, tuba mubuumba ikutali buyo mazuba masyoonto pele ambweni buya kwamyaka minji. Ibamwi zimwi ziindi balapenga akaambo kakucembaala. Alimwi buya bambi mazuba aamwi balatyompwa. Nokuba boobo, tulajana nguzu zyakuzumanana kuliyumya akaambo kakuti tulizyi kuti Jesu ulaandiswe “mazuba oonse,” kubikkilizya amazuba mabi kapati aamubuumi bwesu. (Mt. 11:28-30) Ijwi lya Leza litusyomezya kuti Jehova uyootugwasya kwiinda mubangelo bakwe. (Heb. 1:7, 14) Mucikozyanyo, bangelo balatugwasya akutusololela ciindi notukambauka “makani mabotu aa Bwami” kubantu bazwa “kumasi oonse, kumisyobo yoonse, kumilaka yoonse.”—Mt. 24:13, 14; Ciy. 14:6. w20.11 13-14 ¶6-7

Tuyanda kuti sikwiiya azyibe kuti zintu nzyaiya zizwa mu Bbaibbele. (1Tes. 2:13) Ino mbuti mbotukonzya kucita boobo? Amumukulwaizye sikwiiya kwaambila bamwi zintu nzyaiya. Muciindi cakuti lyoonse ndinywe mupandulula magwalo, amumulombe kuti awalo kapandulula. Amumugwasye sikwiiya kubona kuti Jwi lya Leza lilakonzya kumugwasya cacigaminina. Amumubuzye mibuzyo iikonzya kumupa kwaamba mbwayeeya alimwi ambwalimvwa kujatikizya magwalo. (Lk. 10:25-28) Mucikozyanyo, amumubuzye kuti: “Mbuti lugwalo oolu mbolwamugwasya kubona bube bwa Jehova bumwi?” “Mbuti mbomukonzya kugwasyigwa akasimpe kamu Bbaibbele aaka?” “Ino mwalimvwa buti kujatikizya makani ngomwaiya?” Ciyandika kapati, takuli kuvwula kwamakani ngazyi sikwiiya, pele mbwaayanda alimwi ambwaabelesya makani aayo. Amubelesye Bbaibbele. Kuti kamuyanda kuba mwiiyi uucibwene, mweelede kulicesya. w20.10 15 ¶5-6

Tulakonzya kuba alusyomo lwakuti mulimo wakukambauka Bwami uyoomana aciindi ceelede. Amubone cakacitika mumazuba aa Nowa. Jehova wakatondezya kuti lyoonse ulacita zintu aciindi ceelede. Kakucili myaka iili 120, Jehova wakabikka ciindi Zambangulwe nolyakali kuyootalika. Nokwakainda myaka minji, Jehova wakaambila Nowa kutalika kuyaka bwato. Ambweni kakucili myaka iili 40 naa 50 kalitanatalika Zambangulwe, Nowa wakazumanana kubeleka canguzu. Nokuba kuti bantu tiibakali kumuswiilila, Nowa wakazumanana kwaambilizya mulumbe wakucenjezya kusikila Jehova naakaamba kuti anjile mubwato. Mpoonya aciindi aceelede, “Jehova wakaujala mulyango.” (Matl. 6:3; 7:1, 2, 16) Lino-lino Jehova uyakwaamba kuti mulimo wakukambauka Bwami wamana; ‘uyakuujala mulyango’ wabweende bwazintu bwa Saatani akuleta nyika mpya yabululami. Kusikila ciindi eeco, atwiiye cikozyanyo ca Nowa, Habakuku alimwi abamwi ibatakalekela maanza aabo kulyookezya. Aboobo atubikkile maano kukambauka, atukkazike moyo alimwi akuzumanana kuyumya lusyomo lwesu muli Jehova alimwi amuzisyomezyo zyakwe. w20.09 13 ¶18-19

Ikuti nokwanyina busolozi busalede kujatikizya weelede kweendelezya, mumukwasyi wa Jehova nokuli manyongwe alimwi nokunyina kukkomano. Mucikozyanyo, nokunga kunyina uuzyi iweelede kukosola makani kujatikizya zyakusala alimwi aweelede kubona kuti zyazuzikizyigwa. Ikuti bubambe bwa Leza bwabusilutwe ncintu cibotu, nkaambo nzi bamakaintu banji mazuba aano ncobeendelezyegwa calunya? Nkaambo kakuti baalumi banji tabazibikkili maano zyeelelo zya Jehova zijatikizya mukwasyi, muciindi caboobo, basala kutobela zilengwa naa tunsiyansiya twakubusena nkobakkala. Alimwi balakonzya kubatundulula bamakaintu babo akaambo buyo kakuyanda kulikkomanisya. Mucikozyanyo, mulumi ulakonzya kudyaaminina mukaintu wakwe kusola kuti kalemekwa kapati naa kutegwa atondezya bamwi kuti “mwaalumi ncobeni.” Ulakonzya kuyeeya kuti, takonzyi kusungilizya mukaintu wakwe kumuyanda, pele ulakonzya kumupa kuti kamuyoowa. Mpoonya ulakonzya kubelesya buyoofwu oobu kaili nzila yakumweendelezya. Baalumi ibayeeya alimwi akucita zintu munzila iili boobu tabali kabotu pe. Tababapi bulemu ibubeelede bamakaintu, alimwi nzyobacita tazyeendelani ancayanda Jehova.—Ef. 5:25, 28. w21.02 3 ¶6-7

Ciindi nomwalibilika kapati kujatikizya mapenzi aanu, amupaile kuli Jehova kulomba lugwasyo. Uyakwiingula mipailo yanu kwiinda mukumupa “luumuno lwa Leza oolo lwiinda maano oonse.” (Flp. 4:6, 7) Aboobo Jehova ulakonzya kumupa luumuno oolo kwiinda mukumupa muuya wakwe uusalala. (Gal. 5:22) Ciindi nomupaila kuli Jehova, amumwaambile bwini mbomulimvwide. Amumwaambile cacigaminina penzi ndyomujisi, alimwi akumupandulwida mbomulimvwa kujatikizya penzi eelyo. Ikuti naa kuli cikonzya kucitwa kutegwa penzi eelyo limane, amulombe busongo kulinguwe kutegwa mucizyibe cintu eeco alimwi akulomba nguzu zyakuti mukonzye kucicita. Kuti naa kunyina cikonzya kucitwa kutegwa penzi limane, amumulombe Jehova kuti amugwasye kutaciindizya kulibilika kujatikizya penzi eelyo. Ciindi nomupaila mipailo iigaminide, mukuya kwaciindi muyoolibonena caantangalala mbwayakuyiingula Jehova. Kuti naa mupailo wanu tiiwaingulwa mpoonya-mpoonya nomwamana kupaila, mutatyompwi pe. Jehova uyanda kuti muzumanane kupaila alimwi akucita oobo cacigaminina.—Lk. 11:8-10. w21.01 3 ¶6-7

Mumbungano, muli banabukwetene alimwi amikwasyi. Kunze lyaboobo, muli bakwesu banji batakwete alimwi abacizyi banji ibatakwetwe. Mbuti mbotweelede kubabona aabo ibatakwete alimwi abatakwetwe? Atubone Jesu mbwaakali kubabona. Mumulimo wakwe woonse waanyika, Jesu kunyina naakakwata. Wakazumanana katakwete akubikkila maano kumulimo wakwe. Kunyina naakayiisya kuti kukwata naa kukwatwa nceelelo ca Bunakristo. Nokuba boobo, wakaamba kuti Banakristo bamwi bayoosala kutakwata naa kutakwatwa. Jesu wakali kubalemeka aabo ibatakakwete naa kukwatwa. Kunyina naakali kubabona kuti mbaansi naa kuti kuli ncobaindwa. Mbubwenya mbuli Jesu, mwaapostolo Paulo awalo wakazumanana katakwete mumulimo wakwe. Paulo kunyina naakayiisya kuti cililubide ku Munakristo kukwata naa kukwatwa. Wakalizyi kuti aaya makani aakulisalila. w20.08 28 ¶7-8

Mwaapostolo Johane wakapona myaka minji alimwi akucitikilwa zintu zinji zikkomanisya. Alimwi wakajana buyumuyumu bunji bwalo ibwakali kukonzya kunyonganya lusyomo lwakwe. Pele wakabeleka canguzu kutobela malailile aa Jesu, kubikkilizya amulawo wakuyanda bakwesu alimwi abacizyi. Akaambo kaceeco, Johane wakalisinizyide kuti Jehova alimwi a Jesu balamuyanda alimwi akuti bayoomupa nguzu zyakuzunda buyumuyumu buli boonse. (Joh. 14:15-17; 15:9, 10) Saatani alimwi anyika yakwe kunyina nobakali kukonzya kumukasya Johane ikuyanda bakwesu abacizyi alimwi akutondezya kwiinda muzintu nzyaakaamba akucita. Mbubwenya mbuli Johane, tupona munyika yeendelezyegwa a Saatani, leza silunya wabweende oobu. (1Joh. 3:1, 10) Nokuba kuti uyanda kuti tucileke kubayanda bakwesu abacizyi, takonzyi kuzwidilila, ccita buyo kuti swebo twamuzumizya. Aboobo aabe makanze eesu kubayanda bakwesu abacizyi, kulutondezya luyando oolo muzintu nzyotwaamba alimwi akulusinizya kwiinda muzintu nzyotucita. Kwiinda mukucita boobo, tuyookkomana kuba cibeela camukwasyi wa Jehova akupona buumi bukkomanisya.—1Joh. 4:7. w21.01 13 ¶18-19

Buumi munyika iino yeendelezyegwa a Saatani bulakonzya kuyuma, mane buya zimwi ziindi tulakonzya kubula cakucita. (2Tim. 3:1) Pele tatweelede kulibilika naa kuyoowa. Jehova ulaazyi mapenzi ngotujisi. Ciindi notuyandika lugwasyo, utusyomezya kuti unootujatilide ajanza lyakwe lyalulyo lyanguzu. (Is. 41:10, 13) Tulijisi lusyomo lwakuti Jehova unootugwasya, alimwi Bbaibbele lilatupa nguzu nzyotuyandika kutegwa tuliyumye mumasunko aali woonse. Mavidiyo eesu, zisobano zyakuswiilila buyo alimwi amulongo wazibalo zyakuti, “Amwiiye Lusyomo Lwabo” zilakonzya kutugwasya kulimvwisya kabotu Bbaibbele. Kamutaneebelela, kuswiilila naa kubala zibalo eezyi, amumulombe Jehova kutegwa amugwasye kujana twaambo tugaminide ntomukonzya kubelesya. Amulibikke muciimo camuntu ngomubala. Amuzinzibale kuyeeya nzyobakacita babelesi ba Jehova aaba basyomeka, alimwi ambwaakabagwasya Jehova kuzunda buyumuyumu. Mpoonya amuzibelesye ziiyo nzyomwaiya. Amumulumbe Jehova kulugwasyo ndwamupa. Alimwi amutondezye kuti mulalumba kwiinda mukubona ncomukonzya kucita kutegwa mukulwaizye bamwi alimwi akubagwasya. w21.03 19 ¶22-23

Ikuti naa muli banabukwetene ibayanda kuba abana, amulibuzye kuti: ‘Sena tuli bantu balicesya ibamuyanda Jehova alimwi a Jwi lyakwe? Sena Jehova inga watusala kulanganya mwana muvwanda?’ (Int. 127:4) Ikuti naa muli bazyali, amulibuzye kuti: ‘Sena ndilabayiisya bana bangu mbociyandika kubeleka canguzu?’ (Muk. 3:12, 13) ‘Sena ndilacita kufwumbwa ncondikonzya kutegwa ndikwabilile bana bangu kuzintu zibyaabi izikonzya kubacitikila?’ (Tus. 22:3) Mubwini, tamukonzyi kubakwabilila bana banu kumapenzi oonse. Pele mulakonzya kubagwasya kulibambila mapenzi aamubuumi kwiinda mukuzumanana kubayiisya munzila yaluyando kujatikizya mbobakonzya kusyoma lulayo lwamu Bbaibbele. (Tus. 2:1-6) Mucikozyanyo, ikuti naa munamukwasyi wasala kuleka kubelekela Jehova, amubagwasye bana banu kwiiya kuzwa mu Jwi lya Leza kaambo ncociyandika kapati kuzumanana kusyomeka kuli Jehova. (Int. 31:23) Ikuti mwafwidwa muyandwa wanu, amubatondezye bana banu mbobakonzya kubelesya Jwi lya Leza kulwana penzi lyabuumba alimwi akujana luumbulizyo.—2Kor. 1:3, 4; 2Tim. 3:16. w20.10 27 ¶7