July

Kugusya muntu mumbungano mbubambe bwa Jehova. Kulabagwasya bantu boonse, kubikkilizya ayooyo wakacita cibi. Umwi mumbungano ulakonzya kwaamba kuti baalu tiibasala kabotu kumugusya muntu umwi. Pele amuyeeye kuti muntu uuli boobo kanji-kanji tayandi kwaamba zintu zitali kabotu kujatikizya muntu ooyo wakacita cibi. Swebo tatutuzyi twaambo toonse tujatikizyidwe. Aboobo, ncabusongo kusyoma kuti baalu ibakalanganya makani aamuntu ooyo bakabeleka canguzu kutobela njiisyo zyamu Magwalo alimwi akubetekela “Jehova.” (2Mak. 19:6) Kwiinda mukuzumina kusala kwabaalu kujatikizya kugusya muyandwa wanu mumbungano, mulakonzya kumugwasya muyandwa wanu kupilukila kuli Jehova. Ba Elizabeth bakaamba kuti, “Cakali kukatazya kapati kutabonana munzila iili yoonse amwaneesu musankwa mupati. Pele naakapiluka kuli Jehova, wakaamba kuti wakaleelede kugusyigwa mumbungano. Mukuya kwaciindi, wakaamba kuti wakaiya ziiyo zinji kapati.” w21.09 28-29 ¶11-12

Amuyeeye kujatikizya mukamufwu ooyo. Kakunyina kudooneka wakali kuyanda kumupa zinji Jehova. Nokuba boobo, wakacita ncaakali kukonzya; wakapa Jehova ncaakajisi. Alimwi Jesu wakalizyi kuti cakusanga cakwe cakali kuyandika kapati mumeso aa Jehova. Nceeci ciiyo ciyandika kapati kulindiswe: Jehova ulakkomana ciindi notumupa nzyotukonzya nkokuti, kumubelekela kuzwa ansi aamoyo wesu. (Mt. 22:37; Kol. 3:23) Jehova ulakkomana ciindi nabona katucita zyoonse nzyotukonzya! Njiisyo eeyi ibikkilizya ciindi alimwi anguzu nzyotubelesya mubukombi bwesu, mbuli kukambauka alimwi akujanika kumiswaangano. Mbuti mbomukonzya kubelesya ciiyo icili mucibalo caamba mukamufwu? Amusoleke kuyeeya bantu bamwi ibayandika kukulwaizyigwa kutegwa bazyibe kuti kusolekesya kwabo Jehova ulakukkomanina. Ambweni inga kali mucizyi uucembeede ngomuzyi uulipa mulandu naa kulimvwa kubula mpindu, akaambo kakuti ulaciswa-ciswa naa tacijisi nguzu zyakucita zinji mumulimo wakukambauka. w21.04 6 ¶17, 19-20

Jehova ulizyi ciindi cibotu cakunyonyoona nyika eeyi mbyaabi. Akaambo kakukkazika moyo kwakwe, bantu banji bamuzyiba, alimwi lino nkamu mpati yabantu ilamukomba. Alimwi boonse balikkomene kuti Jehova wakaliyumya kwaciindi cilamfwu kutegwa bazyalwe, baiye kumuyanda alimwi akulyaaba kulinguwe. Ciindi bantu banji baakuliyumya kusikila kumamanino, ciyoolibonya kuti Jehova wakasala cabusongo kukkazika moyo. Tacikwe makani amause alimwi akupenga Saatani nkwaaleta, Jehova wazumanana kuba “Leza uukkomene.” (1Tim. 1:11) Andiswe tulakonzya kuzumanana kukkomana notulindila cakukkazika moyo kuti Jehova akasalazye zina lyakwe, kusumpula bweendelezi bwakwe, kumana bubi boonse, alimwi akumanizya mapenzi woonse ngotujisi lino. Aboobo atube amakanze aakuzumanana kuliyumya alimwi akuumbulizyigwa akaambo kakuzyiba kuti awalo Taateesu wakujulu ulaliyumya. w21.07 13 ¶18-19

Bantu banji mumwaanda wamyaka wakusaanguna bakamukaka Jesu. Balo bakali kuyeeya kuti wakali buyo mwana wasikubeza mapulanga mucete. Alimwi buya wakali kuzwa mu Nazareta, munzi bantu banji ngobakali kubona kuti unyina ampindu. Naba Natanayeli, iwakazooba sikwiiya wa Jesu, kumatalikilo wakaamba kuti: “Sena kuli cibotu cinga cazwa mu Nazareta?” Ambweni wakali kuyeeya businsimi bujanika kulugwalo lwa Mika 5:2, bwalo bwaamba kuti Mesiya wakali kuyoozyalilwa mu Betelehemu ikutali ku Nazareta. Musinsimi Isaya wakasinsima kuti basinkondonyina Jesu tiibakabikkila maano kuti baazyibe ‘makani oonse aazyalani lya Mesiya.’ (Is. 53:8) Ikuti bantu aabo nobakajana ciindi cakulanga-langa makani aamasimpe, nobakazyiba kuti Jesu wakazyalilwa mu Betelehemu alimwi akuti wakali wamuzyalani lya Mwami Davida. (Lk. 2:4-7) Aboobo Jesu wakazyalilwa kubusena bwakasinsimwa kulugwalo lwa Mika 5:2. Pele ino ncinzi cakalubide? Bantu bakafwambaana kukosola makani. Amana buya bakanyina abumboni. Akaambo kaceeci, bakamukaka. w21.05 2-3 ¶4-6

Bbaibbele lilapa zikozyanyo zyabaabo ibakalongezyegwa akaambo kakutambula lulayo. Atubone cikozyanyo ca Jobu. Nokuba kuti wakali kumuyoowa Leza, tanaakalondokede. Akaambo kakukopana mumizeezo, wakazibona munzila iitaluzi zintu. Aboobo wakapegwa lulayo lwacigaminina kuli Elihu alimwi akuli Jehova. Ino Jobu wakacita buti? Cakulicesya wakalutambula lulayo. Wakaamba kuti: “Ndakaambaula, pele kutali camaano . . . ndaajola majwi ngendaambide, ndeempwa mulusuko alimwi amumulota.” (Job. 42:3-6, 12-17) Wakatondezya kuti wakali kulicesya kwiinda mukutambula lulayo ndwaakamupa Elihu, nokuba kuti Elihu wakali mwana muniini kapati kulinguwe. (Job. 32:6, 7) Andiswe kulicesya kuyootugwasya kulubelesya lulayo, nokuba kuti tulimvwa kuti talutweelede naa kuti ooyo watupa lulayo muniini kapati kulindiswe. Ino nguni akati kesu uutayandi kuyaambele mukuzyala mucelo wamuuya alimwi akuzumanana kubeleka mulimo wa Bunakristo? w22.02 11 ¶8; 12 ¶12

Boonse mumbungano balijisi mukuli wakupa kuti kakuli luumuno aluyando kutegwa kubule naba omwe uulimvwa kulendelelwa. Nzyotwaamba akucita zilakonzya kubakulwaizya kapati bamwi. Ncinzi ncomukonzya kucita kutegwa mugwasye baabo ibali balikke mukasimpe kutegwa balimvwe kuba cibeela cambungano? Amusoleke kupanga cilongwe abapya. Tulakonzya kutalika kwiinda mukubatambula amaanza obilo bapya mumbungano. (Rom. 15:7) Nokuba boobo, nzinji nzyotweelede kucita kunze buyo lyakubaanzya cabulongwe. Tuyanda kuti mukuya kwaciindi tupange cilongwe ciyumu ambabo. Aboobo amube aluzyalo alimwi akutondezya kuzwa ansi aamoyo kuti mulabayanda bapya. Kwiinda mukutababuzya mibuzyo iijazya nsoni, amusole kuzyiba mapenzi ngobajisi. Bamwi cilakonzya kubakatazya kwaamba mbobalimvwa, aboobo amubikkile maano kutegwa mutabasinikizyi kwaambaula. Muciindi caboobo, amubabuzye mibuzyo njobakonzya kwaanguluka kwiingula alimwi amuswiilile kubwiinguzi bwabo cakukkazika moyo. Mucikozyanyo, mulakonzya kubabuzya mbobakaiya kasimpe. w21.06 11 ¶13-14

Tulacikkomanina coolwe cakubelekela antoomwe mulukamantano mbuli “tanga lyomwe” “amweembezi omwe”! Bbuku lya Bakamantene Mukucita Kuyanda kwa Jehova, apeeji 165, lyaamba kuti: “Akaambo kakuti mulagwasyigwa alukamantano oolu, mujisi mukuli wakugwasyilizya kulusumpula.” Aboobo, tweelede ‘kuliyiisya kubona bakwesu abacizyi mbuli mbwababona Jehova.’ Kuli Jehova toonse buyo tuli bana “basyoonto” bayandwa. Sena oobu mbomubabona bakwesu abacizyi? Jehova ulabona alimwi ulalumba kuzintu nzyomucita kugwasya bamwi akubalanganya. (Mt. 10:42) Tulabayanda bakombima. Aboobo ‘tukanzide kutabikkila mukwesu cilebyo naa cisinkilizyo.’ (Rom. 14:13) Tuyanda kubona bakwesu abacizyi kuti balatwiinda, alimwi akubalekelela kuzwa ansi amoyo wesu. Tutalekeli bamwi kutulebya. Muciindi caboobo, “atusungwaalile kucita zintu ziletela luumuno azintu iziyaka umwi aumwi.”—Rom. 14:19. w21.06 24 ¶16-17

Ikuti cabusungu katwiiya alimwi akutobela lulayo ndotujana mu Jwi lya Leza alimwi ambunga yakwe, asyoonto-syoonto tuyooba abube bwa Kristo. Alimwi tuyoomuzyiba kabotu Leza. Jesu wakapa cikozyanyo ikupandulula mulumbe wa Bwami ngotukambauka, mbouli mbuli nseke nsyoonto iikomena asyoonto-syoonto mumyoyo yababombe myoyo. Wakaamba kuti: “Mbuto zilamena akukomena—pele [sikuminza] tazyibi bwini mbozikomena. Bulongo kubugama bulazyala micelo buce-buce, kusaanguna busonga mpoonya makunka, kumamanino kulaba nseke kumakunka.” (Mk. 4:27, 28) Jesu wakali kupandulula kuti mbubonya cisyango mbocikomena asyoonto-syoonto, awalo muntu iwatambula mulumbe wa Bwami ulakomena kumuuya asyoonto-syoonto. Mucikozyanyo, ciindi basikwiiya Bbaibbele besu nobayaabuba acilongwe ciyumu a Jehova, tulatalika kubona kucinca kubotu kunji nkobacita. (Ef. 4:22-24) Pele tweelede kuyeeya kuti ngu Jehova uupa kuti nseke nsyoonto eeyo ikomene. w21.08 8-9 ¶4-5

Lugwalo oolu lulapandulula icikonzya kutugwasya kukkomana. Muntu uukkomana “acintu ncaabwene meso” ulalumba kuzintu nzyajisi, mbuli bukkale mwabede. Mukwiimpana, muntu wiile kuzemba kuyandaula zintu nzyalombozya, ulazumanana kuyeeya cintu cimwi ncatakonzyi kujana. Aboobo nciiyo nzi ncotwiiya aawa? Kutegwa tukkomane, tweelede kubikkila maano kuzintu nzyotujisi kale alimwi azintu nzyotukonzya kujana. Sena mubwini cilakonzyeka kukkutila azintu nzyomujisi kale? Kayi mukuya kwaciindi, toonse inga tulayanda kusoleka kucita zintu zipya. Inzya, cilakonzyeka ncobeni. Tulakonzya kukkomana ncobeni azintu nzyotujisi lino. Mbuti mbotukonzya kucita oobo? Kutegwa mujane bwiinguzi, amulange-lange cikozyanyo ca Jesu camatalenta, icijanika kulugwalo lwa Matayo 25:14-30 alimwi akubikkila maano kuciiyo ncotukonzya kwiiya kujatikizya mbotukonzya kujana lukkomano, alimwi mane buya ambotukonzya kuyungizya lukkomano muzilongezyo nzyotujisi lino. w21.08 21 ¶5-6

Jehova ulababikkila maano kapati ‘aabo batyompedwe alimwi ibajisi muuya wakulicesya.’ Toonse buyo, ikutali buyo baalu balikke tulakonzya kubakulwaizya bakwesu abacizyi. Nzila imwi motukonzya kubakulwaizya, nkwiinda mukutondezya kuti tulababikkila maano. Jehova uyanda kuti tutondezye luyando ndwajisi kumbelele zyakwe. (Tus. 19:17) Alimwi tulakonzya kubagwasya bakwesu abacizyi kwiinda mukuba bantu balicesya alimwi balibombya. Tatuyandi kulibona kuti tulayandika kapati kwiinda bamwi calo cikonzya kupa kuti batufwide munyono. Muciindi caboobo, tubelesya zipego nzyotujisi alimwi aluzyibo kukulwaizya bamwi. (1Pet. 4:10, 11) Tulakonzya kwiiya zinji kujatikizya mbotweelede kubeendelezya bamwi kwiinda mukulanga-langa Jesu mbwaakali kubeendelezya basikwiiya bakwe. Wakali muntu mupati kwiinda wakaponede. Nokuba boobo, wakali ‘mubombe moyo alimwi wakali kulicesya.’ (Mt. 11:28-30) Wakali kuyiisya kwiinda mukubelesya mwaambo muuba-uba alimwi azikozyanyo izyakali kubasika amoyo bantu balicesya.—Lk. 10:21. w21.07 23 ¶11-12

Amujane ciindi cakubandika abacembeede. Mubwini, ambweni tabaciboni kabotu, tabaceendi cakufwambana, baambaula aasyoonto-syoonto, pele baciyanda kubeleka cabusungu, alimwi bakapanga “zina libotu” a Jehova. (Muk. 7:1) Amuyeeye kaambo Jehova ncabayandila. Amuzumanane kubalemeka. Amube mbuli Elisha. Wakakakatila kuli Elija mubuzuba bwamamanino nobakali antoomwe. Ziindi zyotatwe Elisha wakaamba kuti: “Tandikookuleka pe.” (2Bam. 2:2, 4, 6) Amutondezye kuti mulababikkila maano kapati bacembeede kwiinda mukubabuzya mibuzyo iikonzya kubapa kwaanguluka. (Tus. 1:5; 20:5; 1Tim. 5:1, 2) Inga mwababuzya mibuzyo mbuli yakuti: “Nomwakacili bana, ncinzi cakamupa kusyoma kuti mwakakajana kasimpe?” “Mbuti zintu izyakamucitikila mbozyamugwasya kuyumya cilongwe canu a Jehova?” “Ncinzi camugwasya kuzumanana kukkomana mumulimo wa Jehova?” (1Tim. 6:6-8) Mpoonya amuswiilile ciindi nobapandulula. w21.09 5 ¶14; 7 ¶15

Ciindi notusolekesya kutobela mulawo wakukambauka alimwi akugwasya bantu kuba basikwiiya, tutondezya luyando ndotujisi kuli Leza. (1Joh. 5:3) Amuyeeye kaambo aaka: Luyando ndomujisi kuli Jehova lwakamupa kale kukambauka kuŋanda aŋanda. Sena cakali cuuba-uba kuutobela mulawo ooyu? Peepe. Nomwakaunka mumulimo wamumuunda ciindi cakusaanguna, sena mwakaliyoowede? Cakutadooneka, mwakaliyoowede! Pele mwakalizyi kuti, ooyu ngomulimo Jesu ngwayanda kuti mucite, aboobo mwakautobela mulawo ooyu. Kweelede kuti, mukuya kwaciindi cakatalika kumuubila kuunka mumulimo wakukambauka. Pele ino mulimvwa buti kujatikizya kusololela ciiyo ca Bbaibbele? Sena mulayoowa? Ambweni. Nokuba boobo, kuti mwamulomba Jehova kuzunda buyoofwu alimwi akuba abusicamba bwakutalisya ciiyo ca Bbaibbele, uyoomugwasya kuyumya makanze aanu kutegwa mugwasye bantu kuba basikwiiya. w21.07 3 ¶7

Kaindi bazike bakali kubikkwa caando kutondezya kuti bakali kuzulilwa kumuntu umwi. Mbubwenya buyo, mazuba aano bantu bayanda kubona caando citondezya umwi aumwi nkwazulilwa. Micito alimwi amizeezo yabo iyootondezya umwi aumwi nkwazulilwa abweendelezi mbwagwasyilizya. Sena tuyoozumina kubikkwa caando cacikozyanyo akugwasya mfwulumende zyamunyika? Aabo ibakaka kubikkwa caando bayoonjila mumapenzi alimwi amuntenda. Bbuku lya Ciyubunuzyo lyaamba kuti: “Kutabi muntu naba omwe uukonzya kuula naa kusambala ccita buyo muntu ooyo uujisi caando.” (Ciy. 13:17) Pele bantu ba Leza balizyi Leza ncayoobacita aabo ibajisi caando caambidwe ku Ciyubunuzyo 14:9, 10. Muciindi cakuba acaando cacigaminina buya, balo bayoolemba ajanza lyabo kuti, “Ndili wa Jehova.” (Is. 44:5) Ecino nciindi cakuti lusyomo lwesu muli Jehova kaluli luyumu. Kuti kaluli luyumu, Jehova calukkomano uyakwaamba kuti tuli bakwe. w21.09 18 ¶15-16

Kutegwa tuzwidilile mumulimo wakukambauka, tulakonzya lugwasyo kuli bamwi. Paulo wakayiisya Timoteyo kukambauka akuyiisya, alimwi wakakulwaizya Timoteyo kuzibelesya nzila eezyo kugwasya bamwi. (1Kor. 4:17) Mbubwenya mbuli Timoteyo, tulakonzya kwiiya kubakwesu abacizyi basimide mumbungano. Alimwi, tweelede kupaila kuli Jehova kulomba lugwasyo. Amumulombe Jehova kuti amugwasye lyoonse nomutola lubazu mumulimo wakukambauka. Kakunyina muuya wakwe uusalala uujisi nguzu kapati, kunyina ncotukonzya kuzuzikizya. (Int. 127:1; Lk. 11:13) Ciindi nomulomba lugwasyo kuli Jehova mumupailo, amumwaambile cacigaminina. Mucikozyanyo, amumulombe kuti amusololele kumuntu uujisi luyandisisyo alimwi uulibambilide kuswiilila. Alimwi tweelede kujana ciindi cakucita ciiyo cesu tobeni. Ijwi lya Leza lyaamba kuti: ‘Amuzyibe kuyanda kwa Leza, ikubotu, kutambulika alimwi kulondokede.’ (Rom. 12:2) Ikuti katusinizyide ncobeni kuti tulikazyi kasimpe kajatikizya Leza, tuyoobandika cakusinizya ciindi notukambaukila bamwi. w21.05 18 ¶14-16

Ambweni mwiiya Bbaibbele amuntu umwi. Mwabeleka canguzu kuba mwiiyi mubotu alimwi mulapaila lyoonse kujatikizya sikwiiya ooyo. Pele tazitobeli nzyaiya aboobo mweelede kucileka kwiiya anguwe. Ambweni tamunagwasyide muntu cacigaminina kusikila wabbapatizyigwa. Sena mweelede kulipa mulandu ambweni akuyeeya kuti Jehova taulongezyi mulimo wanu? Amubone Jehova mbwakubona kuzwidilila kwamulimo wesu. Jehova ulanga kusolekesya kwesu alimwi akuliyumya. Kweelana a Jehova, mulimo ngotumubelekela ulazwidilila ciindi notuubeleka cabusungu alimwi acaluyando, tacikwe makani ambobautambula bantu. Paulo wakalemba kuti: “Leza tali Leza uutaluleme pe uunga waluba milimo yanu alimwi aluyando ndomwakatondezya kuzina lyakwe kwiinda mukubabelekela alimwi akuzumanana kubabelekela basalali.” (Heb. 6:10) Jehova ulakuyeeya kusolekesya kwesu alimwi aluyando lwesu, nokuba kuti kusolekesya ooko kunyina nokwasololela kucintu cili coonse cikulwaizya. Aboobo Paulo ncaakaamba mulugwalo lwabuzuba bwasunu ncamasimpe akulindiswe. w21.10 25 ¶4-6

Luzyalo lwa Jesu alimwi aluyando lwakali kulibonya munzila mbwaakali kubeendelezya basikwiiya bakwe. Wakalizyi kuti bakajisi zipego ziindene-indene alimwi abukkale bwiindene-indene. Aboobo tabali boonse ibakali kukonzya kubeleka milimo iikozyenye naa kubeleka ciindi ceelene. Nokuba boobo, wakali kulumba kumulimo umwi aumwi ngwaakali kucita kuzwa ansi amoyo. Jesu wakacitondezya eeci mucikozyanyo camatalenta. Mucikozyanyo eeco, simalelo wakapa muzike ‘umwi aumwi kweelana anguzu zyakwe.’ Omwe akati kabazike basyomeka wakajana mpindu mpati kwiinda umwi. Pele simalelo wakabalumbaizya boonse kwiinda mukwaamba majwi aakozyenye aakuti: “Wacita kabotu, omuzike mubotu alimwi uusyomeka!” (Mt. 25:14-23) Jesu lyoonse ulatweendelezya caluzyalo alimwi acaluyando. Ulizyi kuti toonse tujisi zipego alimwi abukkale bwiindene, pele ulakkomana ciindi notubeleka kusikila aagolela nguzu zyesu. Aboobo tweelede kumwiiya Jesu. w21.07 23 ¶12-14

Talili lyoonse Mwami Davida naakali kutondezya luse. Mucikozyanyo, ciindi Nabala mwaalumi mubyaabi, naakamusampaula alimwi akumwiima cakulya Davida abaalumi bakwe, Davida wakanyema kapati akukanza kuyoojaya Nabala alimwi abaalumi bamuŋanda yakwe boonse. Eelo kaka cilakkomanisya kubona ntaamu njaakabweza cakufwambaana mukaintu wa Nabala iwakali kukkazika moyo, Abigayeli, calo cakapa kuti Davida atabi amulandu wabulowa. (1Sam. 25:9-22, 32-35) Amubone kuti ciindi Davida naakanyema kapati, wakasala kuti Nabala abaalumi bamuŋanda yakwe boonse bajaigwe. Mpoonya kumbele, Davida wakaamba kuti mwaalumi muvwubi wamucikozyanyo ca Natani wakeelede kujaigwa akaambo kancaakacita. Mubukkale bwabili, mbwaanga Davida wakali mwaalumi uulaaluzyalo, nkaambo nzi ncaakababeteka calunya beenzinyina? Amubone cakacitika mubuumi bwa Davida. Aciindi eeco, Davida wakali kupengezyegwa amanjezyeezya aakwe. Kuti muntu kabeteka bamwi calunya, ncitondezyo cakuti cilongwe cakwe a Jehova tacili kabotu pe. w21.10 12 ¶17-18; 13 ¶20

Kumajwi aalugwalo lwabuzuba bwasunu, twiiya kuti tulakonzya kumwiiya Jehova, walo uuli ncikozyanyo ciinda kubota cakusalala. Tweelede kusalala mubukkale bwesu. Eeci inga calibonya mbuli kuti tacikonzyeki nkaambo tatulondokede. Mwaapostolo Petro lwakwe wakali kulubizya ziindi zinji, pele cikozyanyo cakwe citondezya kuti tulakonzya kusalala. Mumasena aamwi, ciindi bantu nobayeeya kujatikizya muntu uusalala, banji bayeeyela kuti muntu uutaseki-seki, akuti muntu uusama yunifoomu yacikombelo. Pele aaya taali masimpe pe. Jehova, walo uusalala, waambwa kuti ngu “Leza uukkomene.” (1Tim. 1:11) Aabo bamukomba baambwa kuti “balikkomene.” (Int. 144:15) Amana buya Jesu wakabasinganya aabo ibakali kusama zisani zyacikombelo akucita milimo mibotu kutegwa babonwe abamwi. (Mt. 6:1; Mk. 12:38) Mbotuli Banakristo bakasimpe, tulizyi ncocaamba kusalala kweelana ancolyaamba Bbaibbele. Tulisinizyide kuti Leza wesu siluyando takonzyi kutupa mulawo ngotukonzya kwaalilwa kutobela. w21.12 2 ¶1, 3

Akati kazipego zyoonse Leza nzyaakatupa, cimwi cipati akati kazipego eezyo, ncoolwe cakumukomba. Tulatondezya kuti tulamuyanda Jehova kwiinda ‘mukubamba milawo yakwe.’ (1Joh. 5:3) Kaamba kujatikizya ncobayanda Bausyi, Jesu wakatulailila kugwasya bantu kuba basikwiiya akubabbapatizya. (Mt. 28:19) Alimwi wakatulailila kuti katuyandana. (Joh. 13:35) Jehova ulabatambula aabo ibatobela malailile aakwe mumukwasyi wabakombi bakwe nyika yoonse. (Int. 15:1, 2) Amutondezye kuti mulabayanda bamwi. Luyando mbube bwa Jehova buyandika kapati. (1Joh. 4:8) Jehova wakataanguna kutuyanda swebo katutana muzyiba. (1Joh. 4:9, 10) Tulamwiiya ciindi notutondezya kuti tulabayanda bamwi. (Ef. 5:1) Nzila imwi mbotu motukonzya kutondezya kuti tulabayanda bantu, nkwiinda mukubagwasya kwiiya kujatikizya Jehova ciindi nociciliko. (Mt. 9:36-38) Kwiinda mukucita boobo, tulabapa coolwe cakuba abulangizi bwakuba cibeela camukwasyi wa Leza. w21.08 5-6 ¶13-14

Akaambo kakuti Jesu ulamuyanda kapati Jehova, wakalyaaba kulinguwe alimwi akaambo kandiswe. (Joh. 14:31) Jesu wakalutondezya luyando lupati ndwajisi kubantu kweelana ambwaakali kupona aano anyika. Buzuba abuzuba wakali kutondezya kuti ulabayanda bantu alimwi akubeetelela, noliba leelyo naakali kukazyigwa. Nzila iiyandika kapati mwaakatondezya luyando ndwaakajisi kubantu nkwiinda mukubayiisya kujatikizya Bwami bwa Leza. (Lk. 4:43, 44) Alimwi Jesu wakalutondezya luyando lwakwe lwakulyaaba ndwajisi kuli Leza akubantu kwiinda mukulisungula kupenzyegwa alimwi akufwa lufwu lucisa mumaanza abasizibi. Aboobo wakajalula nzila kulindiswe toonse yakuba abulangizi bwabuumi butamani. Twakalyaaba kuli Jehova akubbapatizyigwa akaambo kakuti tulamuyanda Taateesu wakujulu. Aboobo mbubonya mbuli Jesu, tweelede kutondezya luyando ndotujisi kuli Jehova kweelana ambotubeendelezya bantu. Mwaapostolo Johane wakalemba kuti: “Ooyo uutayandi munyina ngwabwene, takonzyi pe kuyanda Leza ngwatanabona.”—1Joh. 4:20. w22.03 10 ¶8-9

Nokuba kuti tulakukkomanina kuyanzana a Jehova, talili lyoonse nocili cuuba-uba. Tujisi bubi mubuumi, calo cikonzya kupa kuti cituyumine kujana ciindi cakucita zintu zyakumuuya. Mulimo wakumubili, kulanganya mukwasyi alimwi amilimo iimbi iiyandika, ziyanda ciindi cinji. Aboobo tulakonzya kulimvwa kuti tujisi bubi kapati cakuti tatukonzyi kupaila, kwiiya naa kuzinzibala kuyeeya. Kuli cintu acimbi cikonzya kutumanina ciindi. Kuti naa tiitwacenjela, tulakonzya kujata bubi kucita zintu zitali zibyaabi pele izimanina ciindi ncotweelede kubelesya kuyumya cilongwe cesu a Jehova. Mucikozyanyo, atulange-lange makani aajatikizya kulikondelezya. Toonse tulakkomana kujana ciindi cakulikondelezya. Pele noziba zyakulikondelezya zili kabotu zilakonzya kutumanina ciindi cakucita zintu zyakumuuya. Tweelede kuyeeya kuti zyakulikondelezya tazili nzyezintu ziyandika kapati mubuumi.—Tus. 25:27; 1Tim. 4:8. w22.01 26 ¶2-3

Ciindi Jehova naakalailila bana Israyeli kuyanda beenzinyina, tanaakaamba kuti beelede kuyanda buyo bantu bamubala omwe naa cisi comwe. Pele bakeelede kubayanda abeenzu ibakali akati kabo. Ooyu mulumbe uusalede uuli ku Levitiko 19:33, 34. Mweenzu wakeelede kweendelezyegwa ‘mbuli sicisinyina,’ alimwi bana Israyeli bakeelede “kumuyanda” mbubonya mbobakali kuliyanda beni. Mucikozyanyo, bana Israyeli bakeelede kubazumizya beenzu alimwi abacete kugwasyigwa abubambe bwakuvwulula. (Lev. 19:9, 10) Mulawo wakuyanda beenzu ucibeleka ku Banakristo amazuba aano. (Lk. 10:30-37) Mubuti? Kuli mamiliyoni aabamuzwakule, alimwi ambweni bamwi bakkala munsi-munsi andinywe. Cilayandika kapati kulindiswe kubeendelezya munzila yabulemu bantu aaba, kufwumbwa naa mbaalumi, mbaamakaintu naa mbana. w21.12 12 ¶16

Ikuti katubusyoma kapati busolozi bwa Jehova lino, tunoojisi lusyomo luyumu munguzu zyakwe zyakutukwabilila kumbele. Kuyandika kulyaaba akusyoma Jehova kutegwa tubalombe basikutulemba mulimo kutupa ciindi cakujanika kumuswaangano wabbazu, wacooko naa kubalomba kuti batucince mbotubeleka mulimo wesu kutegwa katucikonzya kujanika kumiswaangano yoonse alimwi akuba aciindi cinji cakutola lubazu mumulimo wamumuunda. Amweezyeezye kuti basikutulemba mulimo tiibakuzumina kulomba kwesu aboobo twasweekelwa mulimo. Sena tulijisi lusyomo lwakuti Jehova takatusiyi naa kutulekelezya alimwi akuti lyoonse unootupa nzyotuyandika? (Heb. 13:5) Banji ibali mumulimo waciindi coonse balakonzya kwaamba zyakuluula izitondezya mbwaakabagwasya Jehova ciindi nobakali mumapenzi. Jehova ulasyomeka. Mbwaanga Jehova uli kulubazu lwesu, tatweelede kuyoowa ziboola kumbele naaceya. Leza wesu kunyina nayootulekelezya kufwumbwa buyo kuti twabikka nzyayanda mubusena bwakusaanguna mubuumi bwesu. w22.01 7 ¶16-17

Mbuti lusyomo lwesu mubaalu mbolukonzya kusunkwa? Amweezeezye kuti muntu iwagusyigwa mumbungano kali mulongwe wesu. Tulakonzya kutalika kuyeeya kuti baalu tiibakatulanga-langa twaambo toonse, naa tulakonzya kudooneka kuti bakasala kweelana ambwakonzya kucita Jehova. Ncinzi cikonzya kutugwasya kuzumanana kukubona munzila iiluzi kusala kwakacitwa? Tweelede kuyeeya kuti kugusya muntu mumbungano mbubambe bwa Jehova, bugwasya mbungano alimwi asikubisya. Ikuti sikubisya uuteempwi walekelwa kuzumanana mumbungano, ulakonzya kuyunga bamwi kucita cibi. (Gal. 5:9) Kuyungizya waawo, takonzyi kuzyiba mbocili cipati cibi ncaakacita, alimwi inga camwaalila kubona kuti uyandika kucinca mbwayeeya amicito kutegwa atalike kukkomaninwa a Jehova. (Muk. 8:11) Tweelede kuba alusyomo lwakuti ciindi nobalanga-langa kubona naa muntu weelede kugusyigwa mumbungano, baalu balaubikkila maano kapati mukuli wabo. w22.02 5-6 ¶13-14

Kukkazika moyo akuba aluzyalo kulayandika kapati, kwaambisya ciindi muntu kumatalikilo natayandi kutobela lulayo lwamu Bbaibbele. Mwaalu tayelede kunyema ikuti mukwesu naa mucizyi iwapegwa lulayo tanaalutambula naa kulubelesya mpoonya-mpoonya. Aboobo mumipailo yakwe, mwaalu weelede kumulomba Jehova kuti amugwasye sikupegwa lulayo ikumvwisya kaambo ncaapedwa lulayo alimwi ancayelede kulubelesya. Sikupegwa lulayo uyandika ciindi kutegwa ayeeye nzyaambilwa. Ikuti mwaalu kakkazika moyo akwaambaula caluzyalo, ciyoomubila sikupegwa lulayo kulutambula. Nokuba boobo lulayo lyoonse lweelede kuzwa mu Jwi lya Leza. Tuyanda kuti lulayo lwesu kalugwasya alimwi akupa ‘moyo kukondwa.’—Tus. 27:9. w22.02 18 ¶17; 19 ¶19

Ciindi notupaila kulomba nguzu zyakulwana sunko naa lugwasyo lwakuzunda kulezya kumwi, tulakonzya kulimvwa kuti lugwasyo lwamuka ikwiinda mbotwali kulangila. Nkaambo nzi Jehova ncatainguli mipailo yesu yoonse mpoonya-mpoonya? Mipailo yesu iizwa ansi amoyo wiibona kuti ncitondezyo cakuti tulamusyoma. (Heb. 11:6) Ciindi notupaila kuli Jehova kutegwa atugwasye kumukkomanisya, uliyandide kubona kuti tulilyaabide kubeleka canguzu kutegwa tucite kuyanda kwakwe. (1Joh. 3:22) Aboobo ciindi notulomba Jehova kuti atugwasye kuleka kucita cimwi cintu ncatayandi, inga twayandika kukkazika moyo alimwi akubeleka canguzu kutegwa tucince. Jesu wakaamba kuti mipailo yesu imwi taikonzyi kwiingulwa mpoonya-mpoonya. Wakaamba kuti: “Amuzumanane kulomba, eelyo muyoopegwa; amuzumanane kuyandaula, eelyo muyoojana; amuzumanane kukonkomona, eelyo muyoojulilwa; nkaambo kufwumbwa uulomba ulapegwa, uuyandaula ulajana, ayooyo uukonkomona uyoojulilwa.”—Mt. 7:7, 8. w21.08 8 ¶1; 10 ¶9-10

Kutegwa muyumye lusyomo lwanu mu Mulengi, mweelede kuzumanana kwiiya Jwi lya Leza. (Jos. 1:8) Amubikkile maano kubusinsimi alimwi akweendelana kwamakani aali mumo. Kucita boobo kulakonzya kuyumya lusyomo lwanu mu Mulengi siluyando alimwi musongo ooyo wakapa kuti Bbaibbele lilembwe. (2Tim. 3:14; 2Pet. 1:21) Ciindi nomwiiya Jwi lya Leza amubone lulayo luli mulindilyo mbolugwasya. Mucikozyanyo, kaindi Bbaibbele lyakacenjezya kuti kuciindizya kuyandisya mali nkubyaabi alimwi kuletela “macise manji.” (1Tim. 6:9, 10; Tus. 28:20; Mt. 6:24) Aboobo, nkokuti ncenjezyo yamu Bbaibbele yakuti tatweelede kuciindizya kuyandisya mali nimbotu kapati. Sena kuli njiisyo zyamu Bbaibbele zimwi izyakamugwasya? Ciindi notulukkomanina lulayo lwamu Bbaibbele, ndendilyo notuyoogwasyigwa abusongo mbwatupa Mulengi wesu siluyando. (Jak. 1:5) Kuti twacita oobo, tunookkomene mubuumi.—Is. 48:17, 18. w21.08 17-18 ¶12-13

Ikuti naa muyaabucembaala, amusyome kuti Jehova ulaiyeeya milimo njomwakacita musyule. Cabusungu mwalikugwasyilizya mumulimo wakwe wakukambauka. Mwaliyumya mumasunko, naaba yaayo aatyompya kapati, mwalikuzitobela zyeelelo zyamu Bbaibbele ziluleme, kulanganya mikuli mipati mumbunga ya Jehova alimwi akuyiisya bamwi. Mwacita zyoonse nzyomukonzya kutegwa kamweendela antoomwe ambunga ya Jehova iili mukweenda cakufwambaana. Mwalikubakulwaizya bamwi ibali mumulimo waciindi coonse. Jehova Leza ulamuyanda kapati akaambo kakusyomeka. Usyomezya kuti “takabalekelezyi pe bantu bakwe basyomeka”! (Int. 37:28) Alimwi umusyomezya kuti: “Kusikila mukatube mvwi, mebo ndilazumanana kumuyumuna.” (Is. 46:4) Aboobo mutanikuyeeyi kuti akaambo kakuti mwacembaala, tamuciyandiki mumbunga ya Jehova. Mubwini, mulayandika kapati! w21.09 3 ¶4

Jehova ulatondezya luse nkaambo kabusongo bwakwe buteeli. Bbaibbele lyaamba kuti ‘busongo buzwa kujulu bulizwide luse amicelo mibotu.’ (Jak. 3:17) Mbuli muzyali siluyando, Jehova ulizyi kuti luse lwakwe lugwasya bana bakwe. (Is. 49:15) Akaambo kakuti Jehova ulatondezya luse kubantu bakwe, balijisi bulangizi bwakumbele nokuba kuti tabalondokede. Aboobo mbwaanga Jehova ulijisi busongo buteeli, lyoonse ulatondezya luse ciindi naabona kuti cileelela kucita boobo. Pele alimwi ulizyi ciindi nateelede kutondezya luse. Mbwaanga musongo, kunyina natondezya luse kuti kucita boobo nkulekela bukkale bubyaabi. Ikuti mubelesi wa Leza acaali wasala kutalika kupona buumi bwakutalilemeka. Tweelede kucita nzi? Jehova wakaambila Paulo kulailila mbungano ‘kucileka kuyanzana amuntu ooyo.’ (1Kor. 5:11) Basizibi bateempwi balagusyigwa mumbungano. Eeyi ntaamu ilayandika kutegwa bakwesu abacizyi basyomeka bakwabililwe alimwi akutondezya kuti nzila zya Jehova zilasalala. w21.10 9-10 ¶7-8

Tulamukomba Jehova ciindi notugwasyilizya mulimo wa Bwami kwiinda mukusanga. Bana Israyeli tiibakeelede kulibonya kubusyu bwa Jehova cinkwamaanza. (Dt. 16:16) Bakeelede kutola cipego kweelana abukkale bwabo. Kwiinda mucita boobo, bakali kutondezya kulumba kuzintu zyakumuuya zyoonse nzyaakali kubacitila Jehova. Mbuti mbotukonzya kutondezya luyando kuli Jehova alimwi akulumba kuzintu zyakumuuya nzyatupa? Nzila imwi, nkwiinda mukusanga mumbungano motuzulilwa alimwi akumulimo wanyika yoonse kweelana abukkale bwesu. Mwaapostolo Paulo wakaamba kuti: “Ikuti kusaanguna muntu kalibambilide, eeco ncapa cilatambulika ikapati kuti wacipa kweelana anzyajisi ikutali kweelana anzyatajisi.” (2Kor. 8:4, 12) Jehova ulacikkomanina cakusanga cesu cili coonse cizwa ansi aamoyo, tacikwe makani naa ncisyoonto.—Mk. 12:42-44. w22.03 24 ¶13

Baalu tabakonzyi kwaagusya masunko woonse bantu ba Jehova ngobajana. Nokuba boobo, Jehova uyanda kuti bacite zyoonse nzyobakonzya kutegwa kabakulwaizya mbelele akuzikwabilila. Mbuti baalu ibajisi kale bubi mbobakonzya kujana ciindi cakugwasya bakwesu abacizyi? Kwiinda mukwiiya cikozyanyo camwaapostolo Paulo. Paulo lyoonse wakalilibambilide kubalumbaizya alimwi akubakulwaizya bakwesu. Baalu inga bacita kabotu kwiiya cikozyanyo ca Paulo caluyando kwiinda mukubeendelezya kabotu bantu ba Jehova. (1Tes. 2:7) Paulo wakabaambila basyominyina kuti ulabayanda alimwi akuti awalo Jehova ulabayanda. (2Kor. 2:4; Ef. 2:4, 5) Boonse mumbungano wakali kubabona kuti mbalongwe, alimwi wakali kujana ciindi cakuba ambabo. Wakatondezya kuti ulabasyoma kwiinda mukubaambila caantangalala kujatikizya zintu nzyaakali kulibilika alimwi akulezya kwakwe. (2Kor. 7:5; 1Tim. 1:15) Nokuba boobo, Paulo kunyina naakabikkila buyo maano kumapenzi aakwe. Muciindi caboobo, wakali kuyanda kugwasya bakwesu abacizyi. w22.03 28 ¶9-10