August

Kweelede kuti Jesu wakali kwaamba basikalumamba bana Roma ibakamugagaila mpikili kumaanza akumaulu. Jesu tanaakazumizya kuti kutalulama ooku kumupe kunyema alimwi akubikkilila. (1Pet. 2:23) Mbubwenya mbuli Jesu, tweelede kulisungula kulekelela bamwi. (Kol. 3:13) Bantu bamwi, kubikkilizya ababbululu, balakonzya kutukazya nkaambo tabazimvwisyi nzyotusyoma alimwi abuumi bwesu bwa Bunakristo. Balakonzya kwaambila bamwi makani aakubeja kujatikizya ndiswe, kutusampaula, kunyonyoona mabbuku eesu, naa kutukonga kutuuma buya. Muciindi cakubabikkilila, tulakonzya kulomba Jehova kuti ajalule meso aabo kutegwa bakabone kasimpe. (Mt. 5:44, 45) Zimwi ziindi, cilakonzya kutukatazya kulekelela, kwaambisya kuti naa twakacitilwa cibi cipati. Pele kuti twalekela kunyema alimwi akubikkilila kuzumanana mumoyo wesu tulakonzya kuliletela mapenzi. (Int. 37:8) Ciindi notulekelela bamwi, inga tusala kuti zintu zibyaabi zyakatucitikila zitazumanani kutupa kulimvwa bubi naa kutunyemya.—Ef. 4:31, 32. w21.04 8-9 ¶3-4

Sena kuli muyandwa wanu umwi uugusyidwe mumbungano? Eeco cilacisizya moyo! Amuyeeye buyo mbocakamucisa kapati Jehova ciindi bangelo bamwi ibakali cibeela camukwasyi wakwe nobakamuzangila! (Jud. 6) Alimwi amweezeezye buyo mbocakamucisa kapati ciindi bana Israyeli, bantu mbaakali kuyanda, nobakali kumuzangila ziindi zinji. (Int. 78:41) Amusyome kuti Taateesu wakujulu siluyando awalo cilamucisa kapati ciindi muntu umwi naamusiya. Ulakumvwisya kuusa kwanu. Caluzyalo, uyoomukulwaizya akumupa lugwasyo ndomuyandika. Ciindi mwana musimbi naa musankwa naamusiya Jehova, kanji-kanji bazyali inga bayeeya kuti kuli zintu zinji nzyobakeelede kucita kugwasya mwanaabo kuti azumanane kubelekela Jehova. Mukwesu umwi wakaamba kuti: “Ndakalipa mulandu. Mane ndakalota zintu zibyaabi kujatikizya ceeci icakacitika. Mucizyi awalo uuli aamwana iwakagusyigwa, kanji-kanji wakali kulibuzya kuti: “Ino ncinzi mebo ndebanyina ncondakalubizya? Ndakali kulimvwa kuti mwanaangu tiindakamuyiisya bweelede ikuyanda Jehova.” w21.09 26 ¶1-2, 4

Bantu bamwi bayeeya kuti bantu ba Leza tabakonzyi kuyiisya Bbaibbele nkaambo tiibakanjila zikolo zisumpukide ziyiisya makani aabukombi. Pele beelede kulanga-langa makani aamasimpe. Eeci ncaakakanzide kucita mulembi wa Makani Mabotu Luka. Wakabeleka canguzu kuziccililizya ‘cakulomya zintu zyoonse kuzwa kumatalikilo.’ Wakali kuyanda kuti bantu ‘basinizye kuti zintu’ nzyobakamvwa kujatikizya Jesu “nzyamasimpe.” (Lk. 1:1-4) Ba Juda ibakali kukkala mu Bereya yansiku bakali mbuli Luka. Nobakamvwa makani mabotu aajatikizya Jesu, bakaalingaula Magwalo aa Chihebrayo kutegwa basinizye nzyobakaambilwa. (Mil. 17:11) Munzila njiyona, bantu mazuba aano beelede kulanga-langa twaambo twamasimpe. Beelede kweezyanisya zintu nzyobayiisyigwa abantu ba Leza alimwi ancaamba Magwalo. Alimwi beelede kwiiya makani aajatikizya bantu ba Jehova bamazuba aano. Kuti bavwuntauzya cakulomya, tabakalekeli twaambo twakuyeeyela naa twakumvwa buyo kuboofwaazya. w21.05 3 ¶7-8

Sena kuli muntu umwi mumbungano yanu ngomukonzya kusamausya? Kuli ziindi Banakristoma nobakonzya kulumba kuyanzana ambabo. Bamwi balakonzya kukatazyigwa kuba akati kabanamukwasyi ibatali Bakamboni ba Jehova ciindi nobasekelela mazuba aakulyookezya. Bamwi balakonzya kuusa kapati mumazuba aamwi, mbuli buzuba mbwaakafwa muyandwa wabo. Kuti twalyaaba kujana ciindi cakuba abakwesu abacizyi ibajisi buyumu-yumu buli boobu, tuyootondezya kuti ‘tulabalanganya bweelede.’ (Flp. 2:20) Kuli twaambo tunji tukonzya kupa Munakristo kulimvwa kulendelelwa zimwi ziindi. Nokuba boobo, tatweelede kuluba kuti Jehova ulizyi mbotulimvwa. Kanji-kanji ubelesya bakwesu abacizyi kutupa nzyotuyandika. (Mt. 12:48-50) Aboobo ciindi notucita kufwumbwa ncotukonzya kugwasya bakwesu abacizyi, tutondezya Jehova kuti tulalumba kububambe bwakwe bwaluyando. Tacikwe makani ambotukonzya kulimvwa zimwi ziindi, tatuli tolikke pe, nkaambo Jehova uli kulubazu lwesu lyoonse! w21.06 13 ¶18-20

Jesu wakazumanana kukambauka nokuba kuti bamwi tiibakali kubikkila maano kumulumbe wakwe. Nkaambo nzi? Wakalizyi kaambo bantu ncobakali kuyandika kukazyiba kasimpe, alimwi wakali kuyanda kupa bantu banji coolwe cakutambula mulumbe wa Bwami. Kuyungizya waawo, wakalizyi kuti bamwi kumatalikilo tiibakali kuyoobikkila maano, pele kumbele bakali kuyookatambula kasimpe. Amubone cakacitika mumukwasyi wakwe. Mumulimo wakwe woonse iwakatola myaka yotatwe alimwi acisela, kunyina akati kabanabokwabo iwakaba sikwiiya wakwe. (Joh. 7:5) Pele naakabusyigwa, bakaba Banakristo. (Mil. 1:14) Tatuzyi uuyookatambula kasimpe kamu Bbaibbele nkotukambauka. Bantu bamwi cilabatolela ciindi kuutambula mulumbe wesu kwiinda bamwi. Nobaba baabo ibasala kutatuswiilila balabubona bukkale bwesu bubotu alimwi ambotuzilanga munzila yeelede zintu, aboobo mukuya kwaciindi balakonzya kutalika ‘kumulemeka Leza.’ w21.05 18 ¶17-18

Ciindi Jesu naakali anyika wakapa basikumutobela mulimo uuli muzibeela zyobilo. Wakabaambila kukambauka makani mabotu aa Bwami akubatondezya mbobakeelede kucita oobo. (Lk. 8:1) Mucikozyanyo, Jesu wakabaambila basikwiiya bakwe ncobakeelede kucita ciindi bantu nobakali kuuswiilila mulumbe wa Bwami alimwi aciindi nobatakali kuuswiilila. (Lk. 9:2-5) Alimwi wakasinsima mbowakali kuyoosakana mulimo wakukambauka, akubaambila kuti bakali kuyoopa “bumboni kumasi oonse.” (Mt. 24:14; Mil. 1:8) Kuyungizya waawo, wakaambila basikwiiya bakwe kuyiisya bantu kutobela zintu zyoonse nzyaakalailila. Jesu wakaamba kuti mulimo ooyu uuyandika kapati wakali kuyoozumanana “mane kusikila kumamanino aabweende bwazintu.” (Mt. 28:18-20) Alimwi muciyubunuzyo ncaakapa Johane, cakusalazya Jesu wakatondezya kuti basikwiiya bakwe boonse bakeelede kugwasya bantu kwiiya kujatikizya Jehova.—Ciy. 22:17. w21.07 2-3 ¶3-4

Munyika mazuba aano, bantu banji balakulwaizyigwa amuuya wakuzundana. Simakwebo umwi ulakonzya kubelesya bumpelenge kutegwa azwidilile kwiinda basimakwebonyina. Sikubalika mumuzundano, ulakonzya kucisa mweenzinyina acaali kutegwa azunde. Sicikolo ulakonzya kubeja mumusunko kutegwa atambulwe kuyunivesiti iili aampuwo. Mbotuli Banakristo, tulizyi kuti micito iili boobu tailuzi pe; ili akati ‘kamilimo yanyama.’ (Gal. 5:19-21) Nokuba boobo, sena babelesi ba Jehova bamwi balakonzya kubusya mizundano mumbungano kakunyina kuzyiba? Mubuzyo ooyu ulayandika kapati akaambo kuti muuya wakuzundana ulakonzya kunyonganya luumuno lwabunyina bwesu. Aboobo, inga twacita kabotu kulanga-langa zikozyanyo zyamu Bbaibbele zyabaalumi abamakaintu basyomeka ibakatantamuka muuya wakuzundana. w21.07 14 ¶1-2

Luyando lutamani lulatukulwaizya kubagwasya aabo ibatyompedwe. Bakwesu abacizyi banji mazuba aano balazumanana kubagwasya aabo ibatyompedwe naa kuusa mumbungano. Balabayanda bakwesu abacizyi alimwi balilibambilide kucita kufwumbwa ncobakonzya kutegwa babagwasye. (Tus. 12:25; 24:10) Eeci cileendelana akukulwaizya kwamwaapostolo Paulo kwakuti: “Amubaumbulizye aabo ibatyompedwe mumoyo, amubagwasye aabo ibatajisi nguzu, akubakkazikila moyo bantu boonse.” (1Tes. 5:14) Nzila imwi iibeleka kabotu yakugwasya mukwesu naa mucizyi uutyompedwe, nkwiinda mukumuswiilila buyo alimwi akumwaambila kuti tulamuyanda kapati. Jehova ulalumba kapati kulugwasyo ndomupa babelesi bakwe bayandwa. Lugwalo lwa Tusimpi 19:17 lwaamba kuti: “Ooyo uufwida luzyalo muntu uupengede ukweletesya Jehova, eelyo walo uyoomupa bulumbu akaambo kazintu eezyo nzyacita.” w21.11 10 ¶11-12

Ncinzi ncotukonzya kucita lino kulibambila zyakumbele? Tweelede kukkutila akuba alukkomano kapati mucilongwe cesu a Jehova. Ikuti twamuzyiba kabotu Leza, tunoojisi lusyomo luyumu kapati munguzu zyakwe zyakutukwabilila ciindi Gogo waku Magogo aakutulwana. Majwi aali mulugwalo lwabuzuba bwasunu atondezya kaambo Davida ncaakali kukonzya kusyoma kuti Jehova uyoomugwasya. Kanji-kanji Davida wakali kusyoma Jehova, alimwi Leza wakwe kunyina naakamulekelezya. Ciindi naakali mukubusi, Davida wakaunka kuli singuzu muna Filisiti Goliati akumwaambila sikalumamba ooyu uuyoosya kuti: “Sunu Jehova ulakwaaba mumaanza aangu.” (1Sam. 17:46) Kumbele, Davida wakali kubelekela mwami Saulo, ooyo iwakasoleka ziindi zinji kuti amujaye. Pele “Jehova wakali” aa Davida. (1Sam. 18:12) Mbwaanga Davida wakagwasyigwa a Jehova musyule, wakalizyi kuti Jehova wakali kuyoomugwasya mumapenzi ngaakajisi aciindi eeco. w22.01 6 ¶14-15

Muzintu zyoonse nzyacita, Jehova cakukkazika moyo ulabelesya ciindi cili coonse ciyandika kutegwa amanizye mulimo wakwe. Ulacita oobo kutegwa alemeke zina lyakwe alimwi akugwasya bamwi. Mucikozyanyo, amubone Jehova mbwaakabalengela nyika bantu asyoonto-syoonto. Ciindi nolipandulula nyika, Bbaibbele lyaamba mbwaakeenga “masimpilo aanjiyo,” mbwaakasimpa “misemu yanjiyo,” alimwi ambwaakayala “bbwe lyayo lyakukkona.” (Job. 38:5, 6) Mane buya wakajana ciindi cakwiilanga-langa milimo yakwe. (Matl. 1:10, 12) Amweezeezye buyo mbobakalimvwa bangelo ciindi nobakali kubona cintu cimwi acimwi cipya Jehova ncaakalenga. Kweelede kuti bakakkomana kapati! Nkaambo bakatalika “koompolola cakubotelwa.” Ncinzi ncotwiiya? Cakatola myaka minji kuti Jehova alenge nyika, nyenyeezi azintu zyoonse zipona. Pele ciindi Jehova naakalanga zintu zyoonse nzyaakalenga cakubikkila maano, wakaamba kuti “nzibotu kapati.”—Matl. 1:31. w21.08 9 ¶6-7

Mucikozyanyo ca Jesu, muntu umwi wakali kuyanda kuunka mulweendo. Katananyamuka, wakaita bazike bakwe akubapa umwi aumwi matalenta kutegwa bacite makwebo. Mwaalumi ooyu wakalizyi mbwakonzya kubeleka muzike wakwe umwi aumwi, aboobo wakapa muzike wakusaanguna matalenta osanwe, wabili wakamupa obilo mpoonya watatu wakamupa lyomwe. Bazike bakusaanguna bobilo bakabeleka canguzu akumupangila mpindu simalelaabo. Nokuba boobo, muzike watatu kunyina ncaakacita amali ngaakapegwa, aboobo simalelaakwe wakamutanda mulimo. Muzike wakusaanguna awabili bakaubikkila maanu kapati mulimo ngobakapegwa, akumubelekela canguzu simalelo wabo. Akaambo kaceeci, bakayungizya matalenta aasimalelo wabo ziindi zyobilo. Busungu bwabo bwakabapa kulumbulwa kapati. Simalelo wabo tanaakakkomana buyo, pele alimwi wakabona kuti baleela kupegwa mikuli iimbi! w21.08 21 ¶7; 22 ¶9-10

Jehova wakkazika moyo kapati muciindi eeci camazuba aamamanino. Tayandi kuti muntu uuli woonse akanyonyoonwe. (2Pet. 3:9) Ulapa coolwe kubantu boonse kuti beempwe. Pele tanookkazikide moyo mane kukabe kutamani. Aabo ibatayandi kucibelesya coolwe eeci bayoolijana mubukkale bukozyenye abwa Farao mumazuba aa Musa. Jehova wakaambila Farao kuti: “Nkaambo kusikila lino nindalitandabikide kale janza lyangu akukuumya cilwazi, yebo abantu bako alimwi nimwalilobede kale anyika. Pele kaambo ncondakulekela kuti kocipona nkakuti: ndikutondezye nguzu zyangu akuti izina lyangu lyaambilizyigwe munyika yoonse.” (Kul. 9:15, 16) Kumbele masi oonse ayoozyiba kuti Jehova ngo Leza alikke wakasimpe. (Ezk. 38:23) Kuzungaanya kwaambidwe mulugwalo lwabuzuba bwasunu, kwaamba kuti aabo ibali mbuli Farao, ibakaka kuzumina bweendelezi bwa Jehova bayoonyonyoonwa kukabe kutamani. w21.09 18-19 ¶17-18

Sena cilamucisa kumoyo akaambo kakuti muntu ngomuyanda waagwisyigwa mumbungano? Alimwi ino mbuti kuti bamwi mumbungano kabamwaambila zintu izimupa kwiindila buya kulimvwa bubi? Mubwini, tatukonzyi kulangila kuti boonse buyo lyoonse banikwaamba zintu zili kabotu. (Jak. 3:2) Toonse tatulondokede, aboobo tamweelede kugambwa kuti bamwi kabatazyi cakwaamba naa buya cakutazyiba baamba cintu cimwi cikonzya kumucisa. Amuyeeye lulayo lwamwaapostolo Paulo lwakuti: “Amuzumanane kweengelelana akulekelelana camoyo woonse nokuba kuti umwi kajisi kaambo kakutongooka.” (Kol. 3:13) Amuzumanane kubagwasyilizya banamukwasyi basyomeka. Bayandika luyando alimwi akukulwaizyigwa kapati kwiinda lyoonse. (Heb. 10:24, 25) Zimwi ziindi, banamukwasyi bamuntu wakagusyigwa babona kuti bamwi mumbungano tabacibaambauzyi, mbuli kuti abalo bakagusyigwa. Tatuyandi kuti kabalimvwa boobo. Kwaambisya bana ibali aabazyali bakazwa mukasimpe bayandika kulumbaizyigwa alimwi akukulwaizyigwa. w21.09 29 ¶13-14; 30 ¶16

Ciindi uucembeede alimwi amukubusi nobabandika, boonse bobilo balakulwaizyigwa. (Rom. 1:12) Nywebo nobakubusi, muyooyumya lusyomo lwanu kubona Jehova mbwabalanganya babelesi bakwe basyomeka, mpoonya bacembeede bayoolimvwa kulemekwa. Bayookkomana kumwaambila mbobalongezyegwa a Jehova. Kubota kwaciwa kulamana muntu mbwayaabucembaala, pele aabo basyomeka kuli Jehova inga bayabwiindila buya kubota kulinguwe mboiyaabuya myaka. (1Tes. 1:2, 3) Nkaambo nzi kaambo aaka ncokali kamasimpe? Nkaambo mboiyaabuya myaka, bakazumizya muuya wa Leza kubayiisya alimwi akubagwasya kuba abube bubotu. Kuti twabazyiba kabotu bakwesu abacizyi bacembeede, twabalemeka alimwi akwiiya kuzwa kulimbabo, tuyoobabona kuti ndubono luyandisi! Mbungano ilayuma kapati ciindi bakubusi nobabalemeka bacembeede alimwi abalo bacembeede nobabalemeka bakubusi. w21.09 7 ¶15-18

Tweelede kweeleba cilengwa cakuba bantu bayumu moyo, pele atusolekesye “kubaaluse kapati,” mbuli Leza wesu. (Ef. 2:4) Kuti katulaaluse, tatukalimvwi buyo kuba alweetelelo. Mubwini, bantu balaaluse balacita zintu kugwasya bamwi. Nkokuti toonse, tweelede kulanga-langa cakulomya nzyobayandika banamukwasyi, bamumbungano, alimwi abamucilawo motukkala. Kwaamba masimpe, kuli nzila zinji zyakutondezya luse. Sena kuli muntu uuyanda kuumbulizyigwa? Sena tulakonzya kumugwasya cacigaminina, ambweni kwiinda mukumupa cakulya naa kucita cimwi cigwasya? Sena Munakristo iwakapilusyigwa ino-ino uyanda mulongwe wakumukulwaizya? Sena inga twabaambila bantu mulumbe wamakani mabotu? (Job. 29:12, 13; Rom. 10:14, 15; Jak. 1:27) Kuti katubikkila maano kuzintu nzyobayandika bamwi, tuyoobona kuti kuli zyoolwe zinji zyakutondezya luse. Eelo kaka Taateesu wakujulu, Leza “uulaaluse kapati” ulakkomana kapati ciindi notutondezya luse”! w21.10 13 ¶20-22

Mu Intembauzyo 23, Davida wakaamba zintu ziyandika kapati, mbuli zilongezyo zinji zyakumuuya nzyaakajana kwiinda mukuzumina Jehova kuba Mweembezi wakwe. Jehova wakali kumusololela “munzila zyabululami” alimwi cakusyomeka wakamugwasyilizya kapati Davida muziindi zibotu azyamapenzi. Davida wakazumina kuti buumi bwakwe “mumacelelo aamweemvwe” aa Jehova bwakali kuyooba amapenzi. Zimwi ziindi, wakali kutyompwa mbuli kuti weenda “mukkuti lisiya mbi,” alimwi wakali kuyooba abasinkondonyina. Pele mbwaanga Jehova wakali mweembezi wakwe, Davida ‘kunyina cintu cibi ncaakali kuyooyoowa.’ Munzila nzi Davida ‘mwaatakabula cintu cibotu niciba comwe’? Munzila yakumuuya, wakalijisi zyoonse nzyaakali kuyandika. Lukkomano lwakwe tiilwakayeeme azintu zyakumubili. Davida wakakkutila azintu Jehova nzyaakamupede. Zintu izyakali kuyandika kapati kulinguwe nzilongezyo alimwi alukwabililo lwa Leza. Kumajwi aa Davida tulakonzya kubona mbociyandika kapati kulindiswe kuzilanga munzila iili kabotu zintu zyakumubili. w22.01 3-4 ¶5-7

Bakamboni ba Jehova bakusaanguna bakali kukambaukila bantu ibatakali kuyanda kuswiilila. Mucikozyanyo, Nowa wakali “mukambausi wabululami,” kweelede kuti kwamyaka minji. (2Pet. 2:5) Cakutadooneka, wakajisi bulangizi bwakuti bamwi bakali kuyooswiilila kumulumbe ngwaakali kukambauka, pele Jehova kunyina naakapa citondezyo cili boobo. Muciindi caboobo, naakali kulailila Nowa kuyaka bwato, Leza wakati: “Weelede kunjila mubwato, yebo, bana bako, mukaintu wako alimwi abamakaintu babana bako.” (Matl. 6:18) Alimwi ciindi Jehova naakamwaambila mbobwakali kuyookomena bwato mbwaakeelede kuyaka, Nowa weelede kuti wakazyiba kuti tabali banji ibakali kuyoomuswiilila akaambo kakuti tiibakali kuyookkwana mubwato. (Matl. 6:15) Mbubwenya mbotuzyi, kunyina naba muntu omwe kuzwa munyika eeyo mbyaabi iwakaswiilila kumulumbe wa Nowa. (Matl. 7:7) Sena Jehova wakayeeya kuti Nowa kunyina naakaubeleka kabotu mulimo? Naaceya! Kuli Leza, Nowa wakazwidilila kali mukambausi akaambo kakuti wakaubeleka cakusyomeka mulimo Jehova ngwaakamupa.—Matl. 6:22. w21.10 26 ¶10-11

Amweezyeezye buyo mbwaakalimvwa Rute ciindi naakamvwa majwi aaya! Rute wakacita zyoonse nzyaakali kukonzya kutegwa agwasye Naomi. Rute wakali kulila antoomwe a Naomi, kumuumbulizya alimwi akweenda anguwe kwamazuba manji. Nokuba kuti Rute wakacita zintu zyoonse eezyi, Naomi wakaamba kuti: “Jehova wandipilusya cinkwamaanza.” Kwiinda mukwaamba majwi aaya, Naomi kunyina anaakalubikkila maano lugwasyo lwa Rute iwakaimvwi munsi lyakwe. Kweelede kuti eeci cakamucisa kapati Rute! Nokuba boobo, wakakakatila kuli Naomi. (Rut. 1:3-18) Mazuba aano, mucizyi uutyompedwe ulakonzya kwaamba zintu zikonzya kutunyemya, nokuba kuti twasoleka kucita zyoonse nzyotukonzya kutegwa tumugwasye. Pele tulasoleka kutanyema. Tulakakatila kulinguwe nkaambo uyandika lugwasyo, alimwi tulamulomba Jehova kuti atugwasye kujana nzila yakumuumbulizya. (Tus. 17:17) Mucizyi uuyandika lugwasyo, kumatalikilo ulakonzya kulukaka lugwasyo lwesu. Nokuba boobo, luyando lutamani luyootupa kusolekesya kukakatila kulinguwe.—Gal. 6:2. w21.11 11 ¶17-19

Mu Bbaibbele, bbala lyakuti “kusalala” lyaamba kusalala mukulilemeka alimwi akusalala kumuuya naa kusetekana. Eeli bbala alimwi lilakonzya kwaamba kuzandulwa kutegwa tubelekele Leza. Mumajwi aamwi, tulakonzya kwaambwa kuti tulasalala mukulilemeka, kuti katukomba Jehova munzila iitambulika kulinguwe alimwi akuti katujisi cilongwe ciyumu anguwe. Eelo kaka cilagambya kuzyiba kuti, nokuba kuti swebo tatulondokede alimwi akuti Jehova ulasalala cakumaninina, uyanda kuti tube balongwe bakwe! Jehova ulasalala munzila zyakwe zyoonse. Tulaiya kujatikizya bupanduluzi oobu kumajwi aabaserafi, ibangelo babelekela munsi-munsi acuuno cabwami. Bamwi bakali koompolola kuti: “Ulasalala, ulasalala, ulasalala Jehova wamakamu.” (Is. 6:3) Masimpe kuti, kutegwa bangelo babe acilongwe ciyumu a Leza wabo uusalala, abalo beelede kusalala, amana buya oobo mbobabede. w21.12 3 ¶4-5

Bakubusi kanji-kanji balalibilika kujatikizya mbobakonzya kubelesya buumi bwabo. Kulubazu lumwi, bamayi alimwi abanamukwasyi ibatali Bakamboni ba Jehova balakonzya kukulwaizya bakubusi kuunka kuyunivesiti kutegwa bakajane mulimo waatala akunoovwola mali manji. Lwiiyo oolo lulakonzya kutola myaka minji. Mpoonya, bazyali alimwi abalongwe mumbungano balo inga kabakulwaizya bakubusi kubelesya buumi bwabo mumulimo wa Jehova. Aboobo ncinzi cikonzya kugwasya mukubusi uumuyanda Jehova kusala cabusongo? Inga wacita kabotu kubala akuzinzibala kuyeeya lugwalo lwa Baefeso 5:15-17. Amanizya kubala tupango ootu, mukubusi ulakonzya kulibuzya kuti: ‘Ncinzi “ncayanda Jehova”? Nkusala kuli buti kukonzya kumukkomanisya Jehova? Nkusala kuli buti kukonzya kundigwasya kucibelesya kabotu ciindi cangu?’ Kamuyeeya kuti, “mazuba aaya mabi” alimwi bweende bwazintu oobu bwa Saatani buyoomana lino-lino. w22.01 27 ¶5

Ino ndilili Jakobo naakaba sikutobela Jesu uusyomeka? Naakabusyigwa Jesu, “wakalibonya kuli Jakobo, mpoonya akubaapostolo boonse.” (1Kor. 15:7) Naakamana kubonana a Jesu, Jakobo wakaba umwi wabasikwiiya ba Jesu. Wakaliko cindi baapostolo nobakali kulindilila muuya uusalala ngobakasyomezyedwe muŋanda yamujulu ku Jerusalemu. (Mil. 1:13, 14) Kumbele, Jakobo wakakkomana kubeleka mukabunga keendelezya kamumwaanda wamyaka wakusaanguna. (Mil. 15:6, 13-22; Gal. 2:9) Mpoonya kumbele kautanasika mwaka wa 62 C.E., wakasololelwa amuuya kulemba lugwalo ku Banakristo bananike. Lugwalo oolu lulatugwasya amazuba aano, kufwumbwa naa tujisi bulangizi bwakuyoopona kujulu naa aano anyika. (Jak. 1:1) Syaazibwene mumakani aakaindi mu Juda wazina lya Josephus wakalemba kuti, Mupaizi Mupati waba Juda Hananiya Imusyoonto wakalailila kuti Jakobo ajaigwe. Jakobo wakazumanana kusyomeka kusikila ciindi naakamanizya buumi bwakwe bwaanyika. w22.01 8 ¶3; 9 ¶5

Ciiyo cimwi ncotwiiya mulugwalo lwabuzuba bwasunu ncakuti, tatweelede kulangila kuti Jehova unootukwabilila kumasunko aakonzya kusunka lusyomo lwesu. Mbubwenya Jesu mbwaakasunkwa kapati, andiswe tweelede kuzumanana kusyomeka kusikila kulufwu kuti kaceelela kucita boobo. (Mt. 16:24, 25) Nokuba boobo, tulakonzya kusinizya kuti Leza kunyina nayoozumizya kuti tusunkwe kwiinda nguzu zyesu. (1Kor. 10:13) Ciiyo cimbi ncotwiiya ncakuti, mbubwenya mbuli Jesu, andiswe tulakonzya kucitilwa cakutalulama. (1Pet. 2:19, 20) Basikutupenzya balakonzya kutusunka, ikutali kuti ambweni twacita cintu cibyaabi pe, pele akaambo buyo kakuti tatuli banyika alimwi akuti tupa bumboni kukasimpe. (Joh. 17:14; 1Pet. 4:15, 16) Jesu wakalizyi kaambo Jehova ncaakazumizya kuti apenge. Pele bakombi basyomeka bamwi ciindi nobasunkwa balalibuzya kaambo Jehova ncazumizya zintu zimwi kucitika. (Hab. 1:3) Leza wesu siluse alimwi uukkazika moyo ulizyi kuti bakombi bakwe nobalimvwa boobu inga takuli kubula lusyomo buya pe; pele inga bayandika luumbulizyo luzwa buyo kulinguwe.—2Kor. 1:3, 4. w21.04 11 ¶9-10

Jehova ulabutambula bukombi bwesu kuti kabweendelana amakanze aakwe alimwi akuti bwacitwa caluyando abulemu. Tulizyi kuti uleelela kukombwa, alimwi tuyanda kuti katucita oobo munzila yiinda kubota. Tulamukomba Jehova ciindi notupaila kulinguwe. Magwalo akozyanisya mipailo yesu kutununkilizyo tubambidwe kabotu itwakali kupegwa kutente lyakubunganina, mpoonya kumbele, kutempele. Tununkilizyo ooto twakali kumukkomanisya Leza. Mbubwenya buyo, mipailo yesu iizwa ansi aamoyo ‘ilamubotela’ Leza, nokuba kuti twabelesya mabala mauba-uba. (Tus. 15:8; Dt. 33:10) Cilamukkomanisya Jehova kutumvwa katwaamba mbotumuyanda alimwi akumulumba. Uyanda kuti katumwaambila nzyotulibilika alimwi anzyotulombozya. Aboobo katutanapaila kuli Jehova, mbuti kuti twasaanguna kuyeeya nzyotuyanda kwaamba? Kwiinda mukucita boobo, tuyoopa ‘tununkilizyo’ twiinda kubota kuli Taateesu wakujulu. w22.03 20 ¶2; 21 ¶7

Lya Amagedoni, tatuli ndiswe tuyoosala naa nguni uuyakweelela autakeeleli kutambula luse lwa Jehova. (Mt. 25:34, 41, 46) Sena tuyoocikonzya kukusyoma kusala kwa Jehova, naa tuyoocileka kumubelekela nkaambo tatukuzumini kusala kwakwe? Cilisalede kuti, lino tweelede kumusyoma kapati Jehova kutegwa cikatuubile kumusyoma cakumaninina kumbele. Amweezyeezye buyo mboyootulimvwa munyika mpya. Kunoonyina zikombelo zyakubeja, mbunga zyamakwebo izilida bantu masuku amutwe alimwi amfwulumende izyapenzya kapati bantu. Takukabi limbi kuciswa, kucembaala, alimwi akufwidwa bayandwa besu. Saatani amadaimona aakwe bayakwaangwa myaka iili cuulu. Zintu zibyaabi izicitika akaambo kabuzangi bwabo tazinooliko. (Ciy. 20:2, 3) Eelo kaka tuyoolumba kapati kuti twakasyoma nzila ya Jehova yakucita zintu! w22.02 6-7 ¶16-17

Jesu wakali kubweza ntaamu yakubamba luumuno alimwi akukulwaizya bamwi kumana mazwanga. Wakabayiisya kuti bakeelede kubamba luumuno abamwi ikuti kabayanda kuti Jehova abutambule bukombi bwabo. (Mt. 5:23, 24) Kuyungizya waawo ciindi aciindi wakali kubagwasya baapostolo kumana mazwanga kujatikizya iwakali mupati akati kabo. (Lk. 9:46-48; 22:24-27) Kutegwa tube basiluumuno, tatweelede kugolela buyo akutaleta mazwanga. Tweelede kusolekesya kubamba luumuno akubakulwaizya bakwesu abacizyi kumana mazwanga. (Flp. 4:2, 3; Jak. 3:17, 18) Aboobo tulakonzya kulibuzya kuti: ‘Ncinzi ncondilibambilide kucita kutegwa ndibambe luumuno abamwi? Ciindi mukwesu naa mucizyi naandinyemya, sena ndilamubikkilila? Sena ndilindila kuti umwi abweze ntaamu kubamba luumuno, naa ndilabweza ntaamu kucita boobo nokuba kuti muntu ooyo ngowakatalisya mazwanga? w22.03 10 ¶10-11

Bbaibbele lyakasinsima kuti bantu ba Leza bakali ‘kuyoolyaaba cakuliyandila’ mumulimo wa Jehova kwiinda mukusololelwa a Mwanaakwe. (Int. 110:3) Businsimi oobu buli mukuzuzikizyigwa mazuba aano. Mwaka amwaka, babelesi ba Jehova balalyaaba kubeleka mawoola manji mumulimo wakukambauka. Balacita oobo cakuliyandila alimwi tababbadelwi. Alimwi balaaba ciindi cinji kugwasya basyominyina kumubili, alimwi akubakulwaizya kumuuya. Bakwesu basalidwe balabeleka mawoola manji kulibambila zibeela zyamiswaangano alimwi akucita nyendo zyabweembezi kubasyominyina. Ncinzi cibakulwaizya kucita boobo? Nduyando ndobajisi kuli Jehova akubantu. (Mt. 22:37-39) Jesu wakatusiila cikozyanyo cibotu cakubabikkila maano bamwi. Tulasolekesya kumwiiya. (Rom. 15:1-3) Aabo bamwiiya balagwasyigwa kapati. w22.02 20 ¶1-2

Mu Israyeli bantu banji bakali kubeleka mumafaamu, alimwi bakeelede kuvwola kumamanino aabuzuba bumwi abumwi. Kuti mubelesi tanaavwozyegwa kumamanino aabuzuba, ambweni tanaakali kucikonzya kujana mali aakali kuyandika kutegwa asanine mukwasyi wakwe buzuba oobo. Jehova wakaamba kuti: “Ulipengede alimwi uponena acakuvwola cakwe.” (Dt. 24:14, 15; Mt. 20:8) Mazuba aano babelesi banji balavwola ciindi comwe naa zyobilo mumwezi, kutali abuzuba. Nokuba boobo, njiisyo iili ku Levitiko 19:13 icibeleka amazuba aano. Basikulemba milimo bamwi balabaunina babelesi babo kwiinda mukubavwozya mali masyoonto kapati kwiinda ngobeelede kuvwola. Balizyi kuti babelesi aabo ambweni kunyina ncobakonzya kucita kunze buyo lyakuzumanana kubeleka nokuba kuti mali ngobavwola masyoonto kapati. Mubwini, basikulemba milimo bali boobu ‘bayobola zyakuvwola zyababelesi babo.’ Munakristo uujisi babelesi weelede kukabikkila maano kaambo aaka. w21.12 10 ¶9-10

Naakamana kupenzyegwa Jesu, kweelede kuti wakafwide nyota ncobeni. Wakali kuyandika kumana nyota njaakamvwide. Jesu kunyina naakayeeya kuti nkubula nguzu kwaamba mbwaakalimvwide, andiswe tweelede kwaamba mbotulimvwa. Ziindi zinji mubuumi, tulakonzya kulombozya kutaambila bamwi kujatikizya zintu nzyotuyanda. Pele kuti katuyandika lugwasyo, tatweelede kuwaya-waya kulomba lugwasyo kuzwa kuli bamwi. Mucikozyanyo, kuti katucembeede naa katuciswa, tulakonzya kulomba mulongwe kuti atutole kucintoolo naa kuyoobonana adokota. Ikuti katutyompedwe, tulakonzya kulomba mwaalu naa Munakristo uusimide kuti atuswiilile naa kutukulwaizya kwiinda mukutwaambila “jwi libotu.” (Tus. 12:25) Katuyeeya kuti bakwesu abacizyi balatuyanda, alimwi balayanda kutugwasya “muziindi zyamapenzi.” (Tus. 17:17) Pele tabakonzyi kuzyiba nzyotuyeeya. Tabakonzyi kuzyiba kuti tuyandika lugwasyo ccita kuti twabaambila. w21.04 11-12 ¶11-12

Tacili cuuba-uba kulindiswe toonse ciindi bukkale nobwacinca. Bukkale bwakacinca kuli bamwi ibakali kubeleka mulimo waciindi coonse waalubazu kwaciindi cilamfwu. Bamwi bakaileka mikuli njobakali kuyandisya akaambo kakucembaala. Tacilubide kuusa ciindi bukkale nobwacinca. Tulakonzya kuliyumya kukucinca kuti zintu twazibona mbuli mbwazibona Jehova. Jehova uli mukuzuzikizya zintu zipati-pati mazuba aano, alimwi tulijisi coolwe cilibedelede cakuba basimilimonyina. (1Kor. 3:9) Luyando Jehova ndwajisi kulindiswe talucinci pe. Aboobo, kuti kuli kucinca mumbunga kwatujatikizya, tatweelede kuyanda kuzyiba twaambo toonse tujatikizyidwe mukucinca ooko. Muciindi cakuyeeya “mazuba aakaindi,” atupaile kutegwa tubone bubotu mukucinca ooko. (Muk. 7:10) Amuzilange munzila yeelede zintu. Ikuti twacita oobo tuyoozumanana kuba alukkomano alimwi akusyomeka nociba ciindi bukkale bwesu nobwacinca. w22.03 17 ¶11-12

Mbaani Jehova mbatondezya luyando lutamani? Bbaibbele lyaamba kuti tulakonzya kuyanda zintu zinji, mbuli “bulimi,” “waini amafwuta,” “lulayo,” “luzyibo,” “busongo,” azimwi buyo. (2Mak. 26:10; Tus. 12:1; 21:17; 29:3) Nokuba boobo, luyando lutamani talutondezyegwi kuzintu; lutondezyegwa buyo kubantu. Pele Jehova tatondezyi luyando lutamani kumuntu uuli woonse. Ulutondezya buyo kulibaabo bajisi cilongwe cilibedelede anguwe. Leza wesu ulasyomeka kubalongwe bakwe. Ujisi makanze mabotu kuli mbabo, alimwi unoobayanda lyoonse. Jehova ulatondezya luyando kubantu boonse. Jesu wakaambila mwaalumi wazina lya Nikodemo kuti: “Leza wakaiyanda kapati nyika [nkokuti bantu] cakuti wakapa Mwanaakwe simuzyalwaalikke, kutegwa muntu uuli woonse uumusyoma atanyonyoonwi, pele abe abuumi butamani.”—Joh. 3:1, 16; Mt. 5:44, 45. w21.11 2 ¶3; 3 ¶6-7

Buumi mubweende oobu mbuyumu, alimwi tulalangilwa kuyooba amapenzi mapati kumbele. (Mt. 24:21) Eelo kaka tulabulangila buzuba oobo ciindi mapenzi oonse aaya naayoomana, kulubwa alimwi anaatakabi limbi! (Is. 65:16, 17) Kwaamba masimpe, tweelede kuzumanana kwiiya kuliyumya. Nkaambo nzi? Nkaambo Jesu wakaamba kuti: “Kwiinda mukuliyumya kwanu, muyoofwutula buumi bwanu.” (Lk. 21:19) Kuyeeya mbobazwidilila bamwi kuliyumya mumasunko aakozyenye angotujisi kulakonzya kutugwasya kuliyumya. Nguni uujisi cikozyanyo cibotu cakuliyumya? Ngu Jehova Leza. Sena bwiinguzi oobu bulamugambya? Ambweni mwagambwa, pele kuti mwabuyeeyesya tamukonzyi kugambwa. Nyika eeyi yeendelezyegwa a Diabolosi, alimwi izwide mapenzi. Jehova ulijisi nguzu zyakwaamana mapenzi noliba lino, pele ulindila kubuzuba nayoocita oobo. (Rom. 9:22) Calino, Leza wazumanana kuliyumya kusikila ciindi eeco ncabikkide cikasike. w21.07 8 ¶2-4