August

Amubone twaambo tobilo tuyandika kapati ituli mulugwalo oolu: (1) Bantu balulami balajana mapenzi. (2) Jehova ulatuvwuna kumapenzi. Pele ino utuvwuna buti? Nzila imwi, nkwiinda mukutugwasya kuzilanga kabotu zintu munyika iino. Nokuba kuti Jehova utusyomezya kuti tuyooba alukkomano kwiinda mukumubelekela, kunyina natusyomezya kuti tunoopona buumi bunyina mapenzi. (Is. 66:14) Aboobo utukulwaizya kubikkila maano kubuumi bwakumbele, ciindi notuyoopona buumi mbwayanda kuti katupona kukabe kutamani. (2Kor. 4:16-18) Pele calino, ulatugwasya kuzumanana kumubelekela buzuba abuzuba (Malo. 3:22-24) Ncinzi ncotukonzya kwiiya kuzikozyanyo zyabakombi ba Jehova basyomeka, bakaindi abamazuba aano? Zimwi ziindi tulakonzya kusikilwa mapenzi cakutayeeyela. Pele kuti naa twamusyoma Jehova, lyoonse unootugwasya.—Int. 55:22. w23.04 14-15 ¶3-4

Tulakonzya kwiiya cikozyanyo ca Josefa a Mariya, balo ibakalibambilide kumvwida beendelezi nokuba kuti cakali kukatazya. (Lk. 2:1-6) Ciindi Mariya naakajisi da lyamyezi iili 9, mfwulumende yakabaambila kucita cintu cimwi icakali kukatazya kapati. Mweendelezi Augusito wakabikka mulawo wakuti, boonse ibakali kukkala mu Bulelo bwa Roma bakeelede kuunka kuminzi yokwabo kuyoolilembya. Aboobo Josefa a Mariya bakeelede kuunka ku Betelehemu musinzo uulampa makkilomita aali 150 kabayaabwiinda mumalundu. Lweendo oolu lwakali kukatazya kapati kwaambisya kuli Mariya. Kweelede kuti Josefa wakalilibilikide kujatikizya Mariya amwanaabo iwatakalinazyalwa. Ambweni bakali kulibuzya kuti, ino mbuti kuti da lyabuka kabali mulweendo? Kayi ooyu mwana ngowakali kuyooba Mesiya. Sena aaka nkaambo kakeelede kubapa kutatobela mulawo wamfwulumende? Nokuba kuti Mariya a Josefa bakalijisi twaambo itwakali kubapa kulibilika, kunyina nobakautyola mulawo pe. Jehova wakakulongezya kumvwida kwabo. Boonse bakasika ku Betelehemu kabotu-kabotu. Okuya Mariya wakatumbuka mwana uuli buyo kabotu, calo cakazuzikizya businsimi bwamu Bbaibbele.—Mik. 5:2. w23.10 8 ¶9; 9 ¶11-12

Ncinzi ncomukonzya kucita kuti kuyeeya buyo makani akwiingula ciindi camiswaangano kakumupa kuyoowa? Cilagwasya kapati kulibambila kabotu kabotu. (Tus. 21:5) Ikuti naa mwacimvwisya kabotu cibalo ciyiigwa, tamukayoowi kupa bwiinguzi. Kunze lyaboobo, amusole kupa bwiinguzi bufwaafwi. (Tus. 15:23; 17:27) Kupa bwiinguzi bufwaafwi inga tiikwamupa kuyoowa kapati. Aboobo kwiinda mukupa bwiinguzi bufwaafwi kubelesya majwi aanu, ciyootondezya kuti mwakalibambila kabotu alimwi mwakacimvwisya cibalo ciyiigwa. Mbuti kuti nokuba kuti mwasola kuzibelesya nzila eezyi pele kamuciyoowa kupa bwiinguzi bwiinda alibomwe naa bobilo? Amusyome kuti Jehova ulalumba kapati akaambo kakusolekesya nkomucita kusikila mpomugolela. (Lk. 21:1-4) Jehova tatwaambili kucita zintu nzyotutakonzyi kucita. (Flp. 4:5) Amucizyibe ncomukonzya kucita, amulibikkile mbaakani yakucicita mpoonya akupaila kutegwa moyo kaukkede nomucicita. Kusaanguna, ambweni inga mwalibikkila mbaakani yakupa bwiinguzi bomwe bufwaafwi. w23.04 21 ¶6-8

Mwaapostolo Paulo wakatukozyanisya kuli basikalumamba bapakamene alimwi balibambilide kuunka kunkondo. Sikalumamba uubikkila maano weelede kuti ciindi coonse kalibambilide kulwana nkondo. Mbubwenya buyo andiswe, tweelede kuti katulibambilide ciindi coonse. Tulazumanana kulibambila buzuba bwa Jehova kwiinda mukusama cilikwabilizyo cakucamba calusyomo aluyando alimwi acimpoompo cabulangizi. Cilikwabilizyo cakucamba cakali kukwabilila moyo wasikalumamba. Mbubwenya buyo, lusyomo aluyando zikwabilila moyo wesu wacikozyanyo. Zilakonzya kutugwasya kuzumanana kubelekela Leza akutobela Jesu. Lusyomo lutupa kusinizya kuti Jehova uyootulumbula akaambo kakumuyandaula camoyo woonse. (Heb. 11:6) Luyootugwasya kuzumanana kusyomeka kumusololi wesu Jesu, nokuba kuti twajana buyumuyumu buli buti. Tulakonzya kuyumya lusyomo lwesu kwiinda mukulanga-langa zikozyanyo zyababelesi ba Jehova bamazuba aano, ibazumanana kusyomeka nokuba kuti balapenzyegwa naa bajisi buyumuyumu bwakujana mali. Alimwi tulakonzya kweeleba kakole kakuyandisya lubono kwiinda mukwiiya baabo baubya-ubya buumi bwabo kutegwa babikke ziyandika zya Bwami mubusena bwakusaanguna. w23.06 10 ¶8-9

Bube bwakulilesya kanji-kanji bupa muzeezo wakulijata kucita cintu cibi. Tuyandika bube oobu kutegwa tucikonzye kuzuzikizya mbaakani zyesu, kwaambisya kuti mbaakani eezyo kazikatazya kapati naa kuti katutajisi luyandisisyo. Kamuyeeya kuti kulilesya ncibeela camucelo wamuuya, aboobo amumulombe Jehova kuti amupe muuya uusalala, kutegwa umugwasye kuba abube oobu buyandika kapati. (Lk. 11:13; Gal. 5:22, 23) Mutalindili kuti mane zintu zyoonse zibe kabotu. Munyika iino, kunyina notukonzya kulangila kuti zintu zyoonse inga zyaba kabotu. Ikuti naa twalindila ciindi eeco, inga tiitwacikonzya kuzuzikizya mbaakani zyesu. Ikuti mbaakani kailibonya kukatazya kapati, cilakonzya kutupa kubula luyandisisyo lwakwiizuzikizya. Aboobo kuti naa oobu mbocibede kulindinywe, ambweni inga mwayandika kwiibikka muzibeela zisyoonto-syoonto. Mucikozyanyo, ikuti naa mujisi mbaakani yakuba abube bumwi, mbuti kuti mwasaanguna kutalika kubutondezya bube oobo aasyoonto-syoonto? Mpoonya kuti naa ijatikizya kubala Bbaibbele lyoonse, mbuti ikuti mwatalika kwiinda mukubala kwaciindi cisyoonto buyo? w23.05 29 ¶11-13

Mumazuba aano aakumamanino, Jehova wazumanana kubelesya mbunga yakwe kupa cakulya cakumuuya aciindi ceelede kutegwa atugwasye kuzumanana kweenda ‘Munzila ya Busalali.’ (Is. 35:8; 48:17; 60:17) Tulakonzya kwaamba kuti kufwumbwa ciindi muntu umwi naazumina kwiiya Bbaibbele, ulaba acoolwe cakutalika kweenda ‘Munzila ya Busalali.’ Ibamwi baleenda munzila eeyi kwakaindi kasyoonto buyo mpoonya akucileka. Pele bamwi balazumanana kweenda mulinjiyo mane kusikila bakasike nkobaya. Ino nkookuli ooko? Kuli baabo bajisi bulangizi bwakujulu, “Nzila ya Busalali” ibasololela “muparadaiso ya Leza” kujulu. (Ciy. 2:7) Mpoonya kuli baabo bajisi bulangizi bwakuyoopona aano anyika, mugwagwa ooyu ubasololela kumamanino aabulelo bwa Kristo bwamyaka iili 1,000 ciindi bantu boonse baakulondoka. Aboobo kuti naa mwakatalika kale kweenda mumugwagwa ooyu, akaka mutapiluki musyule. Alimwi mutazwi mulinguwo kusikila mukamanizye lweendo lwanu munyika mpya. w23.05 17 ¶15; 19 ¶16-18

Kuzinzibala kuyeeya zintu zyoonse nzyaamucitila Jehova, kuyoomupa kuti muyande kulyaaba kulinguwe. (Int. 116:12-14) Cakweelela, Bbaibbele lyaamba Jehova kuti nguupa “cipego cibotu cili coonse alimwi acipego cilondokede cili coonse.” (Jak. 1:17) Alimwi cipego ciinda zyoonse, ncipaizyo ca Mwanaakwe, Jesu. Amuciyeeyele buyo! Cinunuzyo cakapa kuti mucikonzye kuba acilongwe a Jehova. Kunze lyaboobo, cakamupa kuba abulangizi bwakuyoopona kukabe kutamani. (1Joh. 4:9, 10) Aboobo kulyaaba kwanu kuli Jehova ninzila imwi yakutondezya kuti mulalumba kapati akaambo kaluyando lwakwe kwiinda mukumupa cinunuzyo eeci alimwi azilongezyo zimbi zyoonse.—Dt. 16:17; 2Kor. 5:15. w24.03 5 ¶8

Twalanga bantu mbobatalilemeki kabotu mazuba aano, tulimvwa mbuli mbwaakalimvwa Loti. Wakali ‘katazyidwe kapati abukkale busesemya bwabantu babi,’ nkaambo wakalizyi kuti Taateesu wakujulu ulibusulide bukkale bubi. (2Pet. 2:7, 8) Akaambo kakuti Loti wakali kumuyoowa Leza alimwi akumuyanda kapati, wakalibusulide bukkale bwakutalilemeka mbobakali kupona bantu bakamuzingulukide. Andiswe tuzingulukidwe aabantu batazibikkili maano zyeelelo zya Jehova zyakulilemeka. Nokuba boobo, tulakonzya kuzumanana kusalala mukulilemeka ikuti katumuyanda kapati Leza alimwi akumuyoowa. Jehova ulatugwasya kucita oobo kwiinda mumajwi aakulwaizya ngotujana kulugwalo lwa Tusimpi. Aboobo Banakristo boonse, bamaalumi abamakaintu, bana abapati, balakonzya kugwasyigwa kapati kwiinda mukulanga-langa lulayo lwabusongo lujanika mulugwalo oolu. Ikuti katumuyoowa Jehova, tuyoobatantamuka balongwe bacita zintu zitali kabotu. w23.06 20 ¶1-2; 21 ¶5

Ambweni mwakakazyigwa kale abanamukwasyi, naa kuliimya zintu zimwi zyakumubili kutegwa mubikke ziyandika zya Bwami mubusena bwakusaanguna. (Mt. 6:33) Ikuti kacili boobo, amuzyibe kuti Jehova ulaibona milimo yanu yalusyomo. (Heb. 6:10) Kweelede kuti mwalibonena kale mbwaali aamasimpe majwi aa Jesu aakuti: “Ncobeni ndimwaambila kuti, kunyina wakasiya ŋanda naa banabokwabo naa bacizyi bakwe naa banyina naa bausyi naa bana bakwe naa myuunda akaambo kandime alimwi akaambo kamakani mabotu uutakajani zintu ziyungizyidwe ziindi zili 100 muciindi cino—nkokuti maanda, banabokwabo, bacizyi, bamamama, bana alimwi amyuunda antoomwe akupenzyegwa—eelyo mubweende bwazintu buboola, ibuumi butamani.” (Mk. 10:29, 30) Tacidoonekwi buya kuti zilongezyo nzyomwajana nzinji kapati kwiinda zintu zili zyoonse nzyomwakaliimya.—Int. 37:4. w24.03 9 ¶5

Ciindi Banakristo baku Judaya nobakaba anzala mpati, bakwesu mumbungano yamu Antiokeya “bakakanza umwi aumwi kweelana ancaakali kukonzya kupa, ikutumina lugwasyo kubakwesu bakkala mu Judaya.” (Mil. 11:27-30) Nokuba kuti bakwesu aaba ibakali aanzala bakali kukkala kulamfwu kapati, Banakristo baku Antiokeya bakaliyandide kubagwasya. (1Joh. 3:17, 18) Andiswe mazuba aano, tulakonzya kutondezya lubomba ciindi notwazyiba kuti bakombima bakacitikilwa ntenda. Tulakonzya kucita oobo kwiinda mukufwambaana kulyaaba kugwasya, ambweni kwiinda mukulomba baalu kuti tugwasye mumulimo umwi, kusanga kumulimo wanyika yoonse alimwi akubapailila aabo ibakacitikilwa ntenda. Bakwesu abacizyi ambweni inga bayandika kugwasyigwa kujana zintu nzyobayandika. Aboobo ciindi Mwami wesu, Kristo Jesu aakuboola kubeteka bantu, tuyanda kuti akajane tulatondezya lubomba kutegwa akatwaambile kuti “amukone Bwami.”—Mt. 25:34-40. w23.07 4 ¶9-10; 6 ¶12

Jesu wakakwiiya kunyoneka kwa Jehova. Wakatumwa kuboola anyika kuzookambauka “kumbelele zisweekede zyamuŋanda ya Israyeli.” Pele wakatondezya kuti ulanyoneka ciindi naakali kucita mulimo ooyu. Aciindi cimwi, mukaintu umwi iwatakali muna Israyeli wakamulomba kuti aponye mwanaakwe musimbi, ‘iwakanjidwe daimona ilyakali kumupenzya kapati.’ Calubomba, Jesu wakacita ncaakalomba mukaintu ooyu akuponya mwanaakwe. (Mt. 15:21-28) Amubone cikozyanyo acimbi. Musyule mumulimo wakwe, Jesu wakaamba kuti: “Kufwumbwa uundikaka . . . , andime ndiyoomukaka.” (Mt. 10:33) Pele sena wakamukaka Petro, walo iwakamukaka ziindi zyotatwe? Peepe. Jesu wakalizyi kuti Petro wakeempwa alimwi wakali muntu uusyomeka. Aboobo ciindi naakabusyigwa, Jesu wakalibonya kuli Petro ambweni akumusyomezya kuti wakamulekelela alimwi akuti wakali kumuyanda kapati. (Lk. 24:33, 34) Jehova a Jesu balanyoneka. Ino mbuti kujatikizya ndiswe? Jehova uyanda kuti andiswe katuli bantu banyoneka. w23.07 21 ¶6-7

Ncinzi ncotukonzya kwaambila bamwi kutegwa abalo basyome kuti eeci ciyoocitika ncobeni? Cakusaanguna, Jehova lwakwe nguwakacaamba cisyomezyo eeci. Lugwalo lwa Ciyubunuzyo lwaamba kuti: “Ooyo uukkede acuuno cabwami wakati: ‘Amubone! Ndilengulula zintu zyoonse kuti zibe zipya.’” Leza ulijisi busongo, nguzu alimwi aluyandisisyo lwakuzuzikizya cisyomezyo cakwe. Cabili, Jehova ulisinizyide kuti cisyomezyo cakwe ciyoozuzikizyigwa ncobeni, cakuti kulinguwe cili mbuli kuti cazuzikizyigwa kale. Nkakaambo kaako wakaamba kuti: “Majwi aaya alasyomeka alimwi ngamasimpe. . . . Zyacitika!” Catatu, kunyina cikonzya kulesya Jehova kumanizya kucita cintu ncaakatalika. Nkakaambo kaako wakaamba kuti: “Ndime Alefa a Omega.” (Ciy. 21:6) Aboobo Jehova uyootondezya kuti Saatani mubeji alimwi takonzyi kulesya makanze aakwe kuzuzikizyigwa. Aboobo kuti muntu umwi akaambe kuti, “Mwati eeci ciyoocitika ncobeni?” Mulakonzya kumubalila akumupandulwida Ciyubunuzyo 21:5, 6. Amukamutondezye mbwasinizyide Jehova kuti uyoocizuzikizya ncobeni cisyomezyo eeci nkaambo wakacisaina naa kucibikka ciganto cacikozyanyo.—Is. 65:16. w23.11 7 ¶18-19

Jehova wakamusyomezya Abrahamu ciindi naakali aamyaka iili 75 kanyina mwana. Sena Abrahamu wakacibona cisyomezyo eeci kacizuzikizyigwa? Kutali coonse pe. Naakamana kuzabuka Mulonga wa Firate alimwi akulindila myaka iili 25, Abrahamu wakalibonena maleele aakuzyalwa kwamwanaakwe Izaka, mpoonya nikwakainda myaka iili 60, abalo bazyukulu bakwe ba Esau a Jakobo bakazyalwa. (Heb. 6:15) Pele Abrahamu kunyina naakabona balunyungu lwakwe nobakaba cisi cipati alimwi akukona Nyika Yakasyomezyedwe. Nokuba boobo, ooyu mwaalumi uusyomeka wakali acilongwe ciyumu a Mulengi. (Jak. 2:23) Eelo kaka uyookkomana aakubusyigwa Abrahamu ikuzyiba kuti masi manji akalongezyegwa akaambo kalusyomo lwakwe akukkazika moyo! (Matl. 22:18) Ino twiiya nzi? Tatukonzyi kulibonena zisyomezyo zya Jehova zyoonse kazizuzikizyigwa. Nokuba boobo, kuti katukkazika moyo mbuli Abrahamu, inga twasyoma kuti Jehova ulakonzya kutulongezya lino alimwi amunyika yakwe mpya.—Mk. 10:29, 30. w23.08 24 ¶14

Mwami Uziya wakali kulicesya ciindi naakali mwana. Wakaiya ‘kuyoowa Leza mwini-mwini.’ Mpoonya Jehova wakamulongezya kapati mumyaka iili 68 njaakapona. (2Mak. 26:1-4) Uziya wakazunda masi aabasinkondonyina manji alimwi akubona masimpe kuti Jerusalemu ulikwabilidwe kabotu-kabotu. (2Mak. 26:6-15) Eelo kaka Uziya wakalikkomene azintu zyoonse Leza nzyaakamugwasya kucita. (Muk. 3:12, 13) Mwami Uziya wakalizyibide kupa bantu bambi malailile. Sena eeci cakali kumupa kulimvwa kuti ulakonzya kucita kufwumbwa ncaakali kuyanda? Bumwi buzuba, Uziya wakasala kunjila mutempele lya Jehova akulicenjezya kuumpa tununkilizyo acipaililo, calo bami ncobatakazumizyidwe kucita. (2Mak. 26:16-18) Mupaizi Mupati Azariya wakasola kumululamika, pele Uziya wakanyema kapati. Cuusisya ncakuti, Uziya kunyina naakazumanana kusyomeka mpoonya Jehova wakamusubula acinsenda. (2Mak. 26:19-21) Eelo kaka naakapona buumi buli kabotu kuti naakazumanana kulicesya! w23.09 10 ¶9-10

Nociba ciindi naakaba Munakristo munanike, mwaapostolo Petro wakacili kulwana kulezya kwakwe. Mu 36 C.E., Leza wakatuma Petro kuli Korneliyo iwatakali mu Juda, okuya Leza wakananika Korneliyo amuuya uusalala, ibumboni bukkwene bwakuti “Leza tasalululi” alimwi aabo ibatakali ba Juda bakali kukonzya kuzulilwa mumbungano ya Bunakristo. (Mil. 10:34, 44, 45) Kuzwa leelyo Petro wakatalika kulya antoomwe abamasi, cintu ncaatakali kukonzya kucita musyule. Nokuba boobo, Banakristo ba Juda bamwi bakali kulimvwa kuti tiibakeelede kulya a Banakristonyina Bamasi. Bamwi ibakali kubona zintu munzila eeyi nobakaboola ku Antiokeya, Petro wakaleka kulya a Banakristonyina Bamasi, kweelede kuti wakali kuyoowa kufwumpuzya Banakristo ba Juda. Mwaapostolo Paulo wakakubona kuupa-upa ameso ooku aboobo wakamululamika Petro aabuleya. (Gal. 2:13, 14) Nokuba kuti wakalubizya, Petro tanaakatyompwa pe. w23.09 22 ¶8

Kulilingula kwamusyobo ooyo kulakonzya kuyubununa kulezya kumwi mulindiswe, pele mutatyompwi pe. “Mwami ngusiluzyalo,” alimwi ulakonzya kumugwasya mumbazu momutaciti kabotu. (1Pet. 2:3) Mwaapostolo Petro utusyomezya kuti: “Leza . . . walo mwini uyoomanizya lwiiyo lwanu. Uyoomuzyatika.”Petro kumatalikilo wakali kulibona kuti tanaakali kweelela kuba munsi-munsi a Mwana wa Leza. (Lk. 5:8) Pele kwiinda mukugwasyigwa a Jehova alimwi a Jesu, Petro wakacikonzya kuba sikutobela Jesu uusyomeka. Aboobo Petro wakazumizyigwa ‘kunjila mu Bwami butamani bwa Mwami a Mufwutuli wesu Jesu Kristo.’ (2Pet. 1:11) Eelo kaka kubota bulumbu oobu! Ikuti mwazumanana andinywe kuliyumya mbuli mbwaakacita Petro, muyootambula bulumbu bwabuumi butamani. Inzya muyoosika “ambaakani yalusyomo lwanu, nkokuti lufwutuko lwanu.”—1Pet. 1:9. w23.09 31 ¶16-17

Tente lyakubunganina lyakajisi lubuwa lomwe, ibusena bupati ibwakakwabilidwe alukwakwa aawo bapaizi mpobakali kukutaukila. Cipaililo camukuba cipati mpobakali kuumpila zituuzyo, cakali mulubuwa munsi-munsi acakusambila camukuba mwalo bapaizi mobakali kusambila kabatanatalika kubeleka milimo yabo iisetekene. (Kul. 30:17-20; 40:6-8) Mazuba aano, bananike ibacili anyika beelede kuzumanana kusyomeka nobabeleka mulubuwa lwamukati katempele lyakumuuya. Cakusambila cipati icakaliko mutente lyakubunganina alimwi amumatempele, nciyeekezyo cibotu kubananike aku Banakristo boonse kuti beelede kuzumanana kusalala mukulilemeka alimwi akumuuya. Aboobo, ino nkuli nkobakombela Jehova ‘bankamu mpati’? Mwaapostolo Johane wakababona “kabaimvwi kumbele lyacuuno cabwami,” calo aano anyika iciimininwa alubuwa lwaanze, alimwi “balamubelekela [Leza] mulimo uusetekene isyikati amasiku mutempele lyakwe.” (Ciy. 7:9, 13-15) Eelo kaka tulalumba kucoolwe ncotujisi cakukomba Jehova mutempele lyakwe lipati lyakumuuya! w23.10 28 ¶15-16

Nzila imwi Jehova mwatuyumya nkwiinda mubaalu. (Is. 32:1, 2) Aboobo ikuti mwalibilika, amwaambile mwaalu umwi kujatikizya nzyomulibilika. Tamweelede kuwaya-waya kutambula lugwasyo ndobamupa baalu, nkaambo Jehova ulakonzya kumuyumya kwiinda mulimbabo. Cisyomezyo camu Bbaibbele cijatikizya buumi butamani kufwumbwa naa muparadaiso anyika naa nkuujulu acalo cilakonzya kutuyumya. (Rom. 4:3, 18, 19) Bulangizi bwesu oobu bulakonzya kutugwasya kutegwa tuliyumye kumapenzi, tucikonzye kukambauka alimwi akuzuzikizya mikuli iindene-indene mumbungano. (1Tes. 1:3) Oobu mbobulangizi bwakamuyumya awalo mwaapostolo Paulo. Wakali ‘kusyanikizyigwa,’ ‘kuzyingwa,’ alimwi ‘akuumputilwa ansi.’ Mubwini buumi bwakwe zimwi ziindi bwakali muntenda. (2Kor. 4:8-10) Paulo wakacikonzya kuliyumya kwiinda mukubikkila maano kubulangizi mbwaakajisi. (2Kor. 4:16-18) Paulo wakabikkilide maano kubulangizi bwakwe bwabuumi butamani. Wakali kubuyeeyesya kapati bulangizi oobo, akaambo kaceeco wakali kulimvwa ‘kubukulusyigwa buzuba abuzuba.’ w23.10 15-16 ¶14-17

Ciindi nomupaila amulange-lange naa cilisikide kale ciindi cakuti Jehova aingule kulomba kwanu. Tulakonzya kulimvwa kuti kulomba kwesu kwamuka kwiingulwa. Nokuba boobo, Jehova ulicizyi ciindi cibotu cakutugwasya. (Heb. 4:16) Ikuti tiitwapegwa cintu ncotulomba mpoonya-mpoonya, tulakonzya kuyeeya kuti Jehova tayandi buya kutupa. Pele ambweni inga ciindi cakwe tacinasika. Mucikozyanyo, mukwesu uucili mwana wakapaila kuti bulwazi bwakwe bupone. Pele kunyina naakapona. Ikuti Jehova naakamuponya camaleele, Saatani naakaamba kuti mukwesu ooyo wazumanana kumubelekela Jehova akaambo kakuti wakamuponya. (Job. 1:9-11; 2:4) Kuyungizya waawo, Jehova wakabikka kale ciindi nayakuponya malwazi oonse. (Is. 33:24; Ciy. 21:3, 4) Tatukonzyi kulangila kuponesyegwa camaleele kusikila cikasike ciindi eeco. Aboobo mukwesu ulakonzya kulomba Jehova kuti amupe nguzu alimwi aluumuno lwamumizeezo kutegwa acikonzye kuliyumya kubulwazi bwakwe akuzumanana kumubelekela cakusyomeka. w23.11 24 ¶13

Nokuba kuti Samusoni wakalubizya kapati, wakazumanana kumubelekela Jehova. Wakalangaula nzila mwaakali kukonzya kuzuzikizya mukuli ngwaakapegwa a Leza wakulwana ba Filisiti. (Bab. 16:28-30) Samusoni wakalomba Jehova kuti: ‘Andipilusizye ba Filisiti cibi.’ Leza mwini-mwini wakawiingula mupailo wa Samusoni akumupa nguzu zilibedelede nzyaakajisi kaindi. Akaambo kaceeci, Samusoni wakajaya ba Filisiti banji aciindi aawa kwiinda mbaakajaya musyule. Nokuba kuti Samusoni wakapenga kapati akaambo kakulubizya kwakwe, kunyina naakacileka kumubelekela Jehova. Andiswe tatweelede kucileka kumubelekela Jehova nokuba kuti twalubizya naa kusweekelwa mukuli buya. Amuyeeye kuti Jehova ulilibambilide kulekelela. (Int. 103:8, 9) Nokuba kuti tulalezya, Jehova ulakonzya kutupa nguzu zyakucikonzya kucita kuyanda kwakwe mbubwenya mbuli mbwaakacita kuli Samusoni. w23.09 6 ¶15-16

Kuliyumya kwanu kupa kuti Jehova amukkomanine. Pele eeci tacaambi kuti Jehova ulakkomana ciindi nomwajana mapenzi. Ncakkomanina Leza ndinywe ikutali mapenzi aanu. Aboobo kuliyumya kwanu kupa kuti mube abukkale mbwakkomanina. Eelo kaka taciliboteli cilongezyo eeci! (Int. 5:12) Kamuyeeya kuti Abrahamu wakajana mapenzi alimwi ciindi naakaliyumya, Jehova wakamukkomanina. Jehova wakamwaamba kuti mulongwe wakwe akumubona kuti mululami. (Matl. 15:6; Rom. 4:13, 22) Eeci andiswe cilakonzya kutucitikila. Jehova tatukkomanini buyo akaambo kakuvwula kwamilimo njotumubelekela naa zyoolwe nzyotujisi. Pele ulatukkomanina akaambo kakuliyumya kwesu cakusyomeka. Alimwi toonse tulakonzya kuliyumya tacikwe makani aciimo cesu, bukkale naa nzyotukonzya kucita. Sena kuli penzi ndyomuliyumya calino akuzumanana kusyomeka kuli Jehova? Ikuti kacili boobu, amuzyibe kuti mupa kuti Jehova akkomane. Ikuzyiba kaambo aaka kulakonzya kuyumya bulangizi bwesu muzilongezyo nzyatusyomezyede kumbele. w23.12 11 ¶13-14

Mwaalumi Munakristo weelede kwiiya kubandika kabotu abantu. Eeci caamba kuti weelede kuswiilila akuzyiba mbobalimvwa bamwi. (Tus. 20:5) Ulakonzya kuzyiba mbwalimvwa muntu kwiinda mukuswiilila mbolilimvwisya jwi, mbwalibonya kumeso alimwi ambwanyanyaasya mubili. Pele tamukonzyi kuzyiba mbobalimvwa bantu kuti kamutajani ciindi cakubandika ambabo cantongolameso. Ikuti lyoonse kamubandika abantu kubelesya ma email, tugwalo twaafooni alimwi anzila zimbi zyakulembelana tugwalo, ciyoomuyumina kapati kubandika abantu cacigaminina. Aboobo, amusolekesye kujana nzila zyakubandika abantu camulomo mpande. (2Joh. 12) Mwaalumi Munakristo uusimide alimwi weelede kuti kacikonzya kulijanina mali aakuligwasya akugwasya mukwasyi wakwe. (1Tim. 5:8) Cilayandika kapati kwiiya zintu zimwi izikonzya kumugwasya kujana mulimo. (Mil. 18:2, 3; 20:34; Ef. 4:28) Amube ampuwo yakuba muntu uubeleka canguzu alimwi uumanizya mulimo ngwaatalika. Ikuti mwacita oobo, muyooba acoolwe cakujana mulimo akuzumanana kubeleka. w23.12 27 ¶12-13

Ciindi Bbaibbele nolyaamba “buzuba bwa Jehova,” inga lyaamba ciindi Jehova nayoonyonyoona basinkondonyina mpoonya akufwutula bantu bakwe. Kaindi, Jehova wakazisubula zisi zimwi. (Is. 13:1, 6; Ezk. 13:5; Zef. 1:8) Mumazuba eesu, “buzuba bwa Jehova” buyootalika ciindi Babuloni Mupati aakulwanwa mane kusikila kumamanino aankondo ya Amagedoni. Kutegwa tukafwutuke “buzuba” oobu, tweelede kulibambila lino. Jesu wakaamba kuti tatweelede kulibambila buyo kujatikizya “mapenzi mapati,” pele alimwi tweelede kuti ‘katulibambilide’ abuzuba bwa Jehova. (Mt. 24:21; Lk. 12:40) Mulugwalo lwakusaanguna mwaapostolo Paulo ndwaakalembela bana Tesalonika, wakabelesya zikozyanyo zili mbozibede kugwasya Banakristo kulibambila buzuba bupati bwalubeta lwa Jehova. Paulo wakalizyi kuti buzuba bwa Jehova tiibwakali kuyoosika aciindi eeco. (2Tes. 2:​1-3) Nokuba boobo, wakakulwaizya basyominyina kulibambila kujatikizya buzuba oobo mbuli kuti bwakali kuboola juunza. Andiswe tweelede kulutobela lulayo oolu. w23.06 8 ¶1-2

Mumwaka wa 1978, kwakayakwa ŋanda ndamfwu kapati iijisi maanda aali 60 kuyamujulu mudolopo lya Tokyo, ku Japan. Bantu bakali kulibuzya naa iyoocikonzya kuzumanana kaitawi, akaambo kakuti kwakali kuvwula kuba mizuzumo yanyika mudolopo eeli. Ino ncinzi cakagwasya kuti itawi? Basikwiiyaka bakaiyaka munzila yakuti kaili njumu kapati alimwi kaitakonzyi kuwa akaambo kamuzuzumo wanyika. Banakristo bali mbuli ŋanda eeyi ndamfwu. Munzila nzi? Munakristo weelede kuba muntu uukakatila alimwi uunyoneka. Weelede kuba muntu muyumu alimwi uutazungaani caboola kukutobela milawo ya Jehova azyeelelo zyakwe. Weelede kuti ciindi coonse kali muntu ‘uulibambilide kumvwida.’ Pele kulubazu lumbi, weelede kuba muntu ‘uunyoneka’ ciindi bukkale nobuzumizya kucita boobo naa nociyandika kucita boobo. (Jak. 3:17) Munakristo uunyoneka, tanoociindizyi kujatikizya mbwazilanga zintu naa kuzyuubya-ubya buya. w23.07 14 ¶1-2

Jesu wakeelede kwaazunda masunko aa Saatani Diabolosi, kubikkilizya ayaayo ngaakamusunka cacigaminina kutegwa acileke kusyomeka kuli Leza. (Mt. 4:1-11) Saatani wakaliyandide kapati kupa kuti Jesu abisye kutegwa citakonzyeki kupa cinunuzyo. Ciindi naakali kucita mulimo wakwe aano anyika, Jesu wakaliyumya kumasunko aambi. Basinkondonyina bakali kumupenzya akuyanda kumujaya. (Lk. 4:28, 29; 13:31) Wakeelede kuliyumya kukutalondoka kwabasikumutobela. (Mk. 9:33, 34) Ciindi naakali kubetekwa, wakaumwa akusampaulwa. Kumane wakajaigwa mbuli cigwebenga, ilufwu lucisa kapati. (Heb. 12:1-3) Wakeelede kuliyumya kukupenzyegwa ikwakamucitikila kumamanino aabuumi bwakwe bwaanyika, kakunyina kugwasyigwa a Jehova. (Mt. 27:46) Masimpe, Jesu wakapenga kapati kutegwa aabe buumi bwakwe kacili cinunuzyo. Ciindi notuzinzibala kuyeeya zintu zyoonse nzyaakalyaabide kutucitila Jesu, citupa kumuyanda kapati. w24.01 10-11 ¶7-9

Kukkazika moyo kulatugwasya kubeendelezya kabotu bamwi. Kulatugwasya kuswiilila cakubikkila maano ciindi bamwi nobaambaula. (Jak. 1:19) Kukkazika moyo kulatugwasya kuba muluumuno abamwi. Kulatukwabilila kutacita zintu cakufwambaana naa kwaamba cintu citali kabotu notutyompedwe. Alimwi kuti katukkazika moyo, tuyoomuka kukalala ciindi umwi naatunyemya. Muciindi cakupilusya cibi, “tuyoozumanana kweengelelana akulekelelana camoyo woonse.” (Kol. 3:12, 13) Kukkazika moyo kulakonzya kutugwasya kusala camaano. Muciindi cakufwambaana kusala kakunyina kusaanguna kuyeeya, tuyoojana ciindi cakuvwuntauzya alimwi akwaalanga-langa makani ngotuyanda kusala. Mucikozyanyo, ciindi notuyandaula mulimo, tulakonzya koongelezyegwa kuzumina mulimo uuli woonse wafwambaana kujanika. Pele, kuti katukkazika moyo, tuyoojana ciindi cakulanga-langa mulimo mboukonzya kujatikizya mukwasyi wesu alimwi acilongwe cesu a Jehova. Kwiinda mukukkazika moyo, tulakonzya kuyeeleba ntenda yakwaalilwa kusala camaano. w23.08 22 ¶8-9

Kuti mwatyompwa akaambo kakulubizya kwanu, kuyeeya ncomwakamusyomezya Jehova ciindi nomwakalyaaba kulinguwe kuyoomugwasya kulwana masunko. Mubuti? Ciindi nomwalyaaba kuli Jehova, mulaliimya zintu zimwi. Eeci caamba kuti musala kukaka zintu zimwi nzyomulombozya alimwi ambaakani zyanu kutegwa mukkomanisye Jehova. (Mt. 16:24) Aboobo mwaakusunkwa, tamukayandiki kutalika kuyeeya buya ncomweelede kucita. Kayi munoozyi kale ncomweelede kucita, nkokuti kuzumanana kusyomeka kuli Jehova. Muyoozumanana kuyanda kukkomanisya Jehova. Kwiinda mukucita boobo, muyooba mbuli Jobu. Nokuba kuti wakajana mapenzi aakatazya kapati, cakusinizya wakaamba kuti: “Tandikaleki kusyomeka pe!”—Job. 27:5. w24.03 9 ¶6-7

Jehova, “Leza siluyando” ulaandiswe. (2Kor. 13:11) Ulamubikkila maano umwi aumwi wesu kumugama. Alimwi tulisinizyide kuti ‘tuzingulukidwe aluyando lwakwe lutamani.’ (Int. 32:10) Ciindi notuzinzibala kuyeeya mbwatondezya luyando lwakwe kulindiswe, tulalibonena kuti ulatulanganya ncobeni alimwi uba mulongwe wesu mwini-mwini. Aboobo tulakonzya kumusikila mumupailo cakulikwaya akumwaambila mbotukkomene akaambo kakuti ulatuyanda. Kunze lyaboobo, tulakonzya kumwaambila zyoonse zitulibilisya, katusinizyide kuti ulatumvwa alimwi akuti ulilibambilide kutugwasya. (Int. 145:19) Mbubwenya mbotukwelelezyegwa akukasaala kwamulilo ciindi nokutontola, andiswe tulakwelelezyegwa aluyando lwa Jehova. Nokuba kuti Jehova ulaanguzu, pele alimwi uli aluyando kapati. Aboobo, amukkomane akaambo kakuti Jehova ulamuyanda. Mpoonya toonse atutondezye kuti tulalumba kuluyando ndwatutondezya kwiinda mukwaamba kuti: “Ndilamuyanda Jehova!”—Int. 116:1. w24.01 31 ¶19-20

Jesu tanaakagolela buyo akwaambila bantu kuti zina lya Leza ngu Jehova. Kayi ba Juda mbaakali kuyiisya bakalilizyi kale zina lya Leza. Pele Jesu “ngonguwe wakamupandulula” bwini mbwabede. (Joh. 1:17, 18) Mucikozyanyo, Magwalo aa Chihebrayo atondezya kuti Jehova ngusiluse alimwi ngusilweetelelo. (Kul. 34:5-7) Jesu wakakasalazya kaambo aaka ciindi naakaamba cikozyanyo camwana mutaka abausyi. Ciindi notubala kuti bausyi nobakamubona mwanaabo iwakeempwa “kacili kulaale,” bakamubalikila akumukumbata mpoonya akumulekelela camoyo woonse, tulamvwisya kuti Jehova ngusiluse alimwi ngusilweetelelo kapati. (Lk. 15:11-32) Aboobo Jesu wakabagwasya bantu kuzyiba bwini mbwabede Jehova. w24.02 10 ¶8-9

Jehova ulabakatalusya akubaumbulizya aabo bali mumapenzi. Mbuti mbotukonzya kumwiiya Jehova caboola kukubafwida lweetelelo bamwi alimwi akubaumbulizya? Nzila imwi mbotukonzya kucita oobo nkwiinda mukuba abube bukonzya kutugwasya kufwida bamwi lweetelelo akubaumbulizya. Ino mbube nzi oobo? Ncinzi cikonzya kutugwasya kuyandana alimwi ‘akuzumanana kuumbulizyanya’ buzuba abuzuba? (1Tes. 4:18) Tweelede kweetelelana, kutondezya luyando lwabunyina alimwi aluzyalo. (Kol. 3:12; 1Pet. 3:8) Ino bube oobu inga bwatugwasya buti? Ikuti katubafwida lweetelelo bakwesu alimwi akubabikkila maano ncobeni, tunooyandide kapati kubaumbulizya ciindi nobali mumapenzi. Kweelana ambwaakaamba Jesu, “mulomo waamba zizwide mumoyo. Nkaambo muntu mubotu ulagusya zintu zibotu kuzwa muciyobwedo cakwe cibotu.” (Mt. 12:34, 35) Aboobo kuumbulizya bakwesu abacizyi ibali mumapenzi, masimpe ninzila iiyandika kapati yakutondezya kuti tulabayanda. w23.11 10 ¶10-11

Tweelede kulomba lugwasyo ikuti katuyanda kumvwisya businsimi bwamu Bbaibbele. Amubone cikozyanyo eeci. Amweezyeezye kuti mwaswaya busena mbomutanasikide, pele mulongwe wanu ngomweenda limwi ulibuzyi kabotu busena oobo. Ulaazyi kabotu mpomweendela alimwi ulizyi nzila iili yoonse nkoitozya. Cakutadooneka mulakonzya kukkomana akaambo kakuti mulongwe wanu wakazumina kumusangana mulweendo oolo! Mbubwenya buyo, Jehova ulicizyi kabotu ciindi ecino ncotupona alimwi aziyoocitika kumbele. Aboobo kutegwa tubumvwisye businsimi bwamu Bbaibbele, cakulicesya tweelede kulomba lugwasyo kuli Jehova. (Dan. 2:28; 2Pet. 1:19, 20) Mbubonya mbuli muzyali mubotu uuli woonse, Jehova uyanda kuti bana bakwe bakapone buumi bukkomanisya kumbele. (Jer. 29:11) Pele mukwiindana amuzyali muntunsi uuli woonse, Jehova ulakonzya kwaamba ziyoocitika kumbele alimwi lyoonse nzyaamba zilacitika. Wakasala kuti businsimi bulembwe mu Jwi lyakwe kutegwa tuzizyibile limwi zintu ziyandika kapati kazitanacitika.—Is. 46:10. w23.08 8 ¶3-4