Mbuti Mbomunga Mwakwabilila Bana Benu?

NAAKAMANIZYA kwiiya kucikolo camumunzi kwamyaka iili mbwiibede, Wernera wakatalika lwiiyo lwaatala abakubusinyina ibasika ku 3,000 ku São Paulo mucisi ca Brazil. Ciindi cakusaanguna wakalibonena basicikolonyina kabasambala akubelesya misamu iikola. Akaambo kakuti wakalaa ciimo cabwana, tiilyakalampa basicikolonyina ibapati bakamupukula munzila zyoonse zibyaabi.

Mucizi wa Werner, Eva awalo wakalaa mapenzi aakwe. Akaambo kakuti wakali kuyanda kuzwidilila, wakatalika kubala kapati cakuti wakakatala cini-cini akunyongana mumizeezo. Mbubwena mbuli bakubusi bamwi, Werner a Eva bakali kuyandika lukwabililo lwakumubili alwamumizeezo. Ndugwasyo nzi bana benu ndobayandika? Mbuti mbomunga mwabayiisya mbobayookkala baakukomena? Ncobeni, ino bana benu muyanda kuti bakabe aabukkale bwakumbele buli buti?

Tabayandiki Buyo Kuti Kabalya Kabotu Pe

Amuyeeye buyumuyumu bazyali mbobajisi mukukwabilila bana babo mazubaano. Akaambo kakuti bukkale bwamukwasyi bwayaansi alimwi akaambo kabucete, mumanyika manji imweelwe wabana ibaponena mumigwagwa ulimukuvwula. Imulimo wabana balikke watalisigwa akaambo kakukakilwa kukwabilila bakubusi kukupenzyegwa. Kubelesya misamu iikola akwalo kulabanyonyoona bakubusi. Mucikozyanyo, imukubusi umwi waku Brazil naakabaa cilakalaka cakubelesya misamu iikola lyoonse, luumuno mumukwasyi wakwe alwalo lwakamana. Kunze lyakunyongana kwamizeezo kwabazyali, kwakaba kubeleka canguzu kuti babbadelele kusilikwa kwakwe, alimwi basambazi bamusamu uukola uutegwa narcotic bakabapenzya kwiinda mukubasesa mali.

Pele nokuba kuti kuli buyumuyumu mubukkale, ibazyali banji balazumanana kusolekesya kujanina bana babo, ikutali buyo cakulya, zyakusama amaanda mwakukkala pele alimwi alukwabililo lugwasya kulwana kubelesya misamu iikola alimwi amapenzi amwi. Ooyu mmulimo uusumpukide cini-cini, pele sena eci nceciyandika cilikke? Ino mbuti zyalukwabililo lwamumizeezo alimwi akunyonganizigwa munzila yakumuuya? Banji bazyiba kuti ikutegwa bazwidilile mukukomezya bana, beelede kulwana buyumuyumu bujatikizya kusala balongwe alimwi akulikondelezya bana babo nkobasala. Pele, mbuti bazyali mbobanga bakweeleba kuciindizya buya mukukwabilila kwabo naa kubalendekezya? Mwalombwa kuti mubale kwiingula ikwapegwa mucibalo citobela.

Bupanduluzi buyungizidwe