Tulakonzya Kucita Ncayanda Kuti Tucite Jehova
1. Nkupenzyegwa nzi kwamumizeezo kutucitikila zimwi ziindi, alimwi ino nkaambo nzi?
1 Ikutobela milawo anjiisyo zya Jehova mbobuumi bwiinda kubota sunu, alimwi kutugwasya kuba antalisyo yabuumi bwakumbele butamani. (Int. 19:7-11; 1 Tim. 6:19) Nokuba boobo, inyika ya Saatani ilatutyompya kapati. Ikutalondoka kwesu kupa kuti ciindile kukatazya. Notusoleka kuzuzikizya mikuli yesu yamuma Magwalo, izimwi ziindi tulakonzya kuzyingwa. (Int. 40:12; 55:1-8) Tulakonzya akudooneka naa inga twakonzya kucita zyoonse nzyayanda kuti tucite Jehova. Notulimvwa boobo, ino ncinzi cinga catugwasya kuzumanana kuyuma kumuuya?
2. Mbuti Jehova mbwataciindizyi muzintu nzyayanda kuti tucite?
2 Milazyo ya Jehova Tiili Miyumu: Kunyina Jehova nalangila kuti tucite zintu nzyotutakonzyi. Milazyo yakwe tiili miyumu, pele njakuti tugwasyigwe. (Dt. 10:12, 13; 1 Joh. 5:3) Ulizyi kuti tulikompeme, “ulaibulukwa kuti tuli bulongo buyo.” (Int. 103:13, 14) Calubomba Leza ulazizumina nzyotucita kusikila mpotugolela mukumubelekela, nokuba kuti tulalezya kweelana abukkale bwesu. (Lev. 5:7, 11; Mk. 14:8) Utwaambila kuti tubikke makatazyo eesu oonse mumaanza aakwe, alimwi utusyomezya kuti uyootugwasya kuzumanana kusyomeka.—Int. 55:22; 1 Kor. 10:13.
3. Mbuti Jehova mbwatukulwaizya kuliyumya?
3 Ncokuyandika Kuliyumya: Izibalo zyamu Bbaibbele zyabantu basyomeka mbuli Eliya, Jeremiya alimwi a Paulo zitondezya ncokuyandika kuliyumya. (Heb. 10:36) Jehova wakabagwasya muciindi camapenzi akutyompwa. (1 Bam. 19:14-18; Jer. 20:7-11; 2 Kor. 1:8-11) Alimwi tulakulwaizyigwa akusyomeka kwabakwesu mazubaano. (1 Pet. 5:9) Ikuzinzibala kuyeeya zikozyanyo zili boobo kulakonzya kutugwasya kutatyompwa.
4. Nkaambo nzi ncociyandika kuyeeya zisyomezyo zya Leza lyoonse?
4 Bulangizi muzisyomezyo zya Leza “[m]musemu” wesu. (Heb. 6:19) Bwakakulwaizya ba Abrahamu a Sara ikuzumina kulomba kwa Jehova kwakuti basiye munzi wabo ‘akukkala kabali beenzu mucisi cakasyomezyegwa.’ Bwakapa Musa nguzu zyakwiiminina bukombi bwakasimpe cakutayoowa. Bwakapa kuti Jesu aliyumye acisamu cakupenzezya. (Heb. 11:8-10, 13, 24-26; 12:2, 3) Ikuyeeya cisyomezyo ca Leza canyika mpya iiluleme lyoonse mumyoyo yesu kuyootugwasya kuliyumya aswebo.—2 Pet. 3:11-13.
5. Nkaambo nzi ncokunga kwatukulwaizya ikuyeeya milimo yesu yakusyomeka yamusyule?
5 Ikuyeeya milimo yesu yamusyule yakusyomeka, kulyaaba alimwi abusicamba akwalo kulakonzya kutuyumya mumulimo wesu. (Heb. 10:32-34) Kutuyeezya lukkomano ndotujana notupa Jehova nzyayanda—ikumubelekela camoyo woonse.—Mt. 22:37.