Kubelekela Antoomwe Mumulimo Wakwaambilizya Muswaangano Wacooko wa “Amutobele Kristo!”
Basikumwaya Bayooabila Kapepa Kaalubazu Alimwi
1 Mwaka wamana, mulimo wakwaambilizya munyika yoonse kujatikizya Muswaangano Wacooko wa “Lufwutuko Luli Afwaafwi!” wakabakulwaizya kapati aabo bajisi luyandisyo. Aabo bakakatambula kapepa kakutamba kaalubazu bakalibonena ciindi cakusaanguna pobwe lipati lyakumuuya licitwa a Bakamboni ba Jehova mbolibede. (Is. 65:13) Bakakkomana akuyanzana kwesu kwabunyina bwa Bunakristo. (Int. 133:1) Kutegwa tugwasye bantu banji kuyoojanika ku Muswaangano Wacooko wa “Amutobele Kristo!,” tuyootola lubazu alimwi mukwaabila kapepa kaalubazu munyika yoonse.
2 Zyakacitika Mwaka Wamana: Kweelana amakani aakatambulwa kuzwa muzibeela zyanyika yoonse, kwakacitika zintu zibotu akaambo kakwaambilizya kwakacitwa kujatikizya Muswaangano Wacooko wa “Lufwutuko Luli Afwaafwi!” Mumasena manji, twakalumbaizigwa kubuleya. Mucikozyanyo, mumuteende umwi kwakamwaigwa cibalo cijatikizya kwaambilizya ooku, wakati: “Kutegwa bakambaukile bantu boonse buzuba bwamuswaangano wacooko kabutanasika, Bakamboni bakali kusolekesya kubeleka mucilawo—kwamawoola manji, kweenda misinzo milamfwu alimwi akubandika cakubindaana.” Kwaabila kapepa kwakeendelezyegwa kabotu ooku kwakabakkomanisya kapati baŋanda yasikapepele mudolopo limwi calo cakabapa kuti baambilizye kapati kujatikizya kwaabila ooko nibakali kubala makani aabo. Miteende yotatwe yakaamba twaambo tubotu kujatikizya mulimo wesu wakacitwa kabutanasika buzuba bwamuswaangano wacooko. Umwi musankwa simubweza twaambo wakalemba zibalo ziindene-indene zyakajisi makani manji aainda kumapeeji obile mumuteende umwi uumwaigwa mu Nsondo. Muteende ooyu wakali kubandika nzyotusyoma, bunyina bwesu, kwaabila kapepa alimwi amuswaangano wacooko. Umwi mucizi sikumwaya naakali kwaabila kapepa amunzi umwi, mukaintu uuli aŋanda wakamutyokezya mubandi kati, “Masimpe. Ino-ino aawa ndali kubala makani aayo mumuteende!” Mukaintu uuli aŋanda uumwi wakakankamana kati: “Ino-ino aawa ndali kubala makani aajatikizya ndinywe, pele ndagambwa kuti mwasika kale kuno! Sena aako nkapepa kangu kakunditamba?” Wakayungizya kati, “Eeci ncecintu cibotu ncobeelede kunoocita Bakamboni ba Jehova.”
3 Bantu banji bajisi luyandisyo bakali kuboola kumuswaangano wacooko kabajisi tupepa twabo twakubatamba mumaanza. Bamwi bajisi luyandisyo bakeenda misinzo milamfwu kutegwa bakajanike kumuswaangano. Kusolekesya kwesu mukutamba bantu kwapa kuti mweelwe wabantu bajanika uyungizyigwe, mucikozyanyo, cisi cimwi cakaba abantu banji bainda ku 27 pesenti ikwiinda bakaliko mwaka wakamana.
4 Kucibeleka Cilawo Coonse: Inga Mwatalika kwaabila kapepa kaalubazu kubantu kakucili nsondo zyotatwe muswaangano wacooko kautanatalika. Mweelede kusolekesya kucibelekela cilawo cambungano coonse. Mumbungano zijisi cilawo cipati, basikumwaya inga bakasiya kapepa kaalubazu cabusongo aŋanda aatajanika muntu munsondo yamamanino muswaangano wacooko kautanatalika. Mbungano zyeelede kusolekesya kwaabila tupepa twaalubazu toonse twatuminwa alimwi akucibeleka cilawo coonse kweelana ambozikonzya. Ooto tunga twaindilila tulakonzya kubelesyegwa abapainiya bali mumbungano.
5 Ncomweelede Kwaamba: Inga mwaamba boobu: “Tutola lubazu mumulimo uuli mukucitwa nyika yoonse wakwaabila kapepa aaka kakumutamba kumuswaangano uuyandika kapati uuboola. Aaka kapepa nkakumupa buyo. Twaambo tunji atumwi tulilembedwe akapepa aaka.” Kufwiinsya mubandi wanu lyoonse kuyoomupa kumwaya mulumbe mubusena bupati kapati. Ikuti uuli aŋanda kajisi mibuzyo, amwiingule. Ikuti naa bamwi balibonya kuba aluyandisyo, amubalembe alimwi akuyoopilukila kubantu aabo cakufwambaana.
6 Eelyo kaka cilayandika kuti twasolekesya kumutobela Kristo! (Joh. 3:36) Muswaangano wesu wacooko uuboola uyoobagwasya boonse bayoojanika kutegwa bacikonzye kucita boobo. Masimpe, tulakonzya kulangila kuti auuno mwaka kuyoocitwa bukambausi bubotu akaambo kakubelekela antoomwe mumulimo wakwaambilizya Muswaangano Wacooko wa “Amutobele Kristo!” Aboobo, amube basungu kusikila mpomukonzya mukutamba bantu banji kuti bakajanike. Jehova amulongezye kapati mukusoleka kwanu nomutola lubazu mumulimo ooyu wakubelekela antoomwe munyika yoonse.