Malifalensi Aamu Kabbuku Kamuswaangano Wabuumi Amulimo Wesu
© 2024 Watch Tower Bible and Tract Society of Pennsylvania
SEPTEMBER 2-8
MBONO IZILI MU JWI LYA LEZA INTEMBAUZYO 79-81
Amutondezye Luyando Kuzina lya Jehova Lilemekwa
Cinunuzyo—“Cipego Cilondokede” Kuzwa Kuli Taata
5 Ino mbuti mbotukonzya kutondezya kuti tulaliyanda zina lya Jehova? Nkwiinda mubukkale bwesu. Jehova uyanda kuti katusalala. (Amubale 1 Petro 1:15, 16.) Eeci caamba kuti tweelede kukomba buyo Jehova alimwi akuti katumumvwida amoyo wesu woonse. Noliba leelyo notupenzyegwa, tulacita kufwumbwa ncotukonzya kupona kweelana anjiisyo zyakwe ziluleme alimwi amilawo. Kwiinda mukucita milimo iiluleme, tumunika mumuni wesu, aboobo tuleta bulemu kuzina lya Jehova. (Mt. 5:14-16) Mbotuli bantu basalala, tulatondezya kwiinda muzintu nzyotucita mubuumi bwesu kuti milawo ya Jehova mibotu alimwi akuti nzyaakaamba Saatani zyakubeja. Ikuti twalubizya akaambo kakuti toonse tatulondokede, tuleempwa kuzwa ansi aamoyo alimwi akuleka micito iipa kuti Jehova atalemekwi.—Int. 79:9.
ijwbv 3 ¶4-5
Baroma 10:13—‘Kwiita Zina lya Jehova’
Mu Bbaibbele, mabala aakuti ‘kwiita zina lya Jehova’ taambi buyo kuzyiba zina lya Leza alimwi akulibelesya ciindi notumukomba. (Intembauzyo 116:12-14) Cibikkilizya kumusyoma Leza alimwi akulanga kulinguwe kutegwa atugwasye.—Intembauzyo 20:7; 99:6.
Izina lya Leza lyakali kuyandika kapati kuli Jesu Kristo. Majwi aakusaanguna mumupailo wakwe wacikozyanyo akali aakuti: “Taateesu ooli kujulu, alisalazyigwe zina lyako.” (Matayo 6:9) Kunze lyaboobo, Jesu wakatondezya kuti tweelede kumuzyiba, kumumvwida, alimwi akumuyanda Jehova, ikuti katuyanda kuba abuumi butamani.—Johane 17:3, 6, 26.
Mbono Zyakumuuya
Twaambo Tupati-Pati Kuzwa Mubbuku Lyatatu a Lyane lya Intembauzyo
79:9. Jehova ulaiswiilila mipailo yesu, ikapati noyijatikizya kusalazyigwa kwazina lyakwe.
SEPTEMBER 9-15
MBONO IZILI MU JWI LYA LEZA INTEMBAUZYO 82-84
Amulumbe Kuzyoolwe Nzyomujisi Mumulimo wa Jehova
Nzyotwiiya Kuzwa Kubayuni Bauluka Mujulu
Bantu baku Jerusalemu bakalituzyi kabotu tumembya, twalo tujisi cilengwa cakuyakila ziteente munsi aziluli zyamaanda. Tumwi twakali kuyaka ziteente mutempele lya Solomoni. Kulangilwa kuti, tumembya ooto itwakali kupanga ziteente mubusena bwatempele mwaka amwaka twakalikwabilidwe, mwalo twana motwatakali kukonzya kunyonganizyigwa.
Mulembi wa Intembauzyo 84—umwi wabana ba Kora, walo iwakali kubelekela atempele kwansondo yomwe mumyezi iili cisambomwe, wakazibona ziteente eezyo mubusena bwatempele. Kalombozya kuba mbuli tumembya twalo twakajisi munzi muŋanda ya Jehova, wakaamba kuti: “Eelo kaka ndibotu tente lyako lipati lyakukombela, O Jehova wamakamu! Moyo wangu uliyandide kapati, inzya, ndagonkelwa akaambo kakuyeeya, mabuwa aa Jehova . . . Nokaba kayuni kalijanina ŋanda ooko akalo kamembya kalibambila citeente, mokalanganizyila bana bankako munsi-munsi acipaililo cako cipati, O Jehova wamakamu, O Mwami wangu alimwi O Leza wangu!” (Intembauzyo 84:1-3) Sena swebo alimwi abana besu tulatondezya muuya ooyu wakuyanda kujanika lyoonse kumbungano abantu ba Leza?—Intembauzyo 26:8, 12.
Amucite Zyintu Nzyomukonzya Akuzumanana Kukkomana
Kucembaala naa kuciswa-ciswa kulakonzya kucesya milimo njotuyanda kubelekela Jehova. Kuti naa muli bazyali, mulakonzya kubona mbuli kuti kunyina lugwasyo ndomujana mukuliyiisya naa kumiswaangano ya Bunakristo nkaambo ciindi cinji alimwi anguzu zyanu zimanina mukulanganya bana baniini. Pele sena kubikkila maano kapati kukukompama kwanu ziindi zimwi kumupa kuti mutakonzyi kubona zyintu nzyomukonzya kuzwidilila kucita?
Zyuulu zyamyaka zili mbozibede zyainda, muna Levi umwi wakasala kucita cintu cimwi cakali ciyumu kulinguwe. Wakalijisi coolwe cakubelekela kutempele kwamvwiki zyobile amwaka. Pele wakatondezya kuti wakali kulombozya kuti akkalile limwi munsi aacipaililo. (Int. 84:1-3) Ino ncinzi cakagwasya mulombwana ooyu uusyomeka kuti akkutile? Wakabona kuti nobuba buzuba bomwe buyo mulubuwa lwatempele bwakalilibedelede. (Int. 84:4, 5, 10) Mbubwenya buyo, muciindi cakubikkila maano kukukompama kwesu, tuleelede kusoleka kubona alimwi akulumba milimo njotukonzya kucita.
Mulayandika Kapati Kuli Jehova Leza Wanu!
12 Ikuti naa mulaciswa, amusyome kuti Jehova ulibuzyi bukkale bwanu. Amumulombe kutegwa amugwasye kubulanga munzila yeelede bukkale bwanu. Mpoonya amubale mulumbe wamu Bbaibbele uumbulizya. Amubikkile maano kuzibalo izitondezya Jehova mbwababikkila maano babelesi bakwe. Nomucita boobo, muyoobona kuti Jehova ulababikkila maano aabo boonse ibamubelekela cakusyomeka.—Int. 84:11.
Mbono Zyakumuuya
it-1-E 816
Bamucaala
Mbwaanga cakali cuuba kutababikkila maano bamucaala alimwi abaabo batakwe mugwasyi, Jehova wakabelesya bbala lyakuti “bamucaala” ikwaamba Israyeli naakalizandula munzila yabululami. Ciindi cisi nocakali kucita kabotu kumuuya, bamucaala bakali kubikkilwa maano. Pele ciindi nobatakali kucita cabululami mucisi, bamucaala bakali kulekelezyegwa, alimwi eeci cakali citondezyo cakuti cisi canyongana. (Int. 82:3; 94:6; Is. 1:17, 23; Jer. 7:5-7; 22:3; Ezk. 22:7; Zek. 7:9-11; Malk. 3:5) Jehova wakali kubasinganya aabo ibakali kupenzya bamucaala. (Dt. 27:19; Is. 10:1, 2) Jehova ulipandulula kuti Muvwuni (Tus. 23:10, 11), Mugwasyi (Int. 10:14), alimwi ngu Usyi (Int. 68:5) wabamucaala. Ulababetekela cabululami (Dt. 10:17, 18), ulabafwida luse (Hos. 14:3), ulabalanganya (Int. 146:9), alimwi akupa kuti bazumanane kupona.—Jer. 49:11.
Citondezyo cimwi ca Bunakristo bwini-bwini nkubabikkila maano bamukabafwu abamucaala. Sikwiiya Jaboko wakalembela Banakristo kuti: “Ibukombi busalala alimwi butasofweede mumeso aa Leza wesu alimwi Taata mboobu: ikulanganya bamucaala abamukabafwu mumapenzi aabo, alimwi akulibamba katutakwe kabala kali koonse kamunyika.”—Jak. 1:27.
SEPTEMBER 16-22
MBONO IZILI MU JWI LYA LEZA INTEMBAUZYO 85-87
Mupailo Ulatugwasya Kuliyumya
Sena Mulatondezya Bulemu bwa Jehova?
10 Acimbi ncotuyandika kutegwa tutondezye bulemu bwa Leza, ‘nkujatisya kupaila.’ (Lom. 12:12) Tweelede kupaila kutegwa Jehova atugwasye kuti tumubelekele munzila iimukkomanisya. Kutegwa tucite oobo tulakonzya kumulomba muuya uusalala, lusyomo luyumu, nguzu zyakuliyumya mumasunko azyakucikonzya ‘kuyiisya akupandulula ijwi lyakasimpe cakulomya.’ (2 Ti. 2:15; Mt. 6:13; Lk. 11:13; 17:5) Mbubwenya mbuli mwana mbwasyoma bausyi, andiswe tweelede kusyoma Taateesu wakujulu, Jehova. Kuti twamulomba kuti atugwasye kumubelekela cakumaninina, tulakonzya kusyoma kuti uyoocita oobo. Tatweelede kulimvwa kuti tulamukatazya pe. Muciindi caboobo, mumupailo atumutembaule, tumulumbe, tumulombe busolozi ikapati nituli mumapenzi alimwi akumulomba kuti atugwasye kumubelekela munzila iitondezya kuti tulemeka zyina lyakwe lisalala.—Int. 86:12; Jak. 1:5-7.
Jehova Mbwayiingula Mipailo Yesu
17 Amubale Intembauzyo 86:6, 7. Sintembauzyo Davida wakalisinizyide kuti Jehova wakaimvwa mipailo yakwe alimwi akuyiingula. Andinywe mulakonzya kuba alusyomo luli boobo. Zikozyanyo izyabandikwa mucibalo eeci, zitusyomezya kuti Jehova ulakonzya kutupa busongo alimwi anguzu nzyotuyandika kutegwa tucikonzye kuliyumya. Zimwi ziindi ulakonzya kubelesya bakwesu abacizyi naa bantu ibatali bakombi bakwe kuti batugwasye.
18 Nokuba kuti talili lyoonse Jehova naingula mipailo yesu munzila njotuyeeyela, pele tulizyi kuti ulayiingula. Ulakonzya kutupa buyo ceeco ncotuyandika alimwi aciindi ceelede. Aboobo, amuzumanane kupaila kamujisi lusyomo lwakuti Jehova uyoomumvwa akumulanganya alimwi akuti ‘uyookkutya cilenge coonse cipona kwiinda mukucipa ncociyanda’ munyika mpya iiboola.—Int. 145:16.
Mbono Zyakumuuya
“Kondipa Kuba Amoyo Omwe Kutegwa Kandiyoowa Zina Lyako”
17 Kuba amyoyo yobilo takugwasyi pe. Amweezeezye kuti mutiimu yabasizisobano bamwi tabamvwani. Bamwi bayanda buyo kuba ampuwo, bamwi tabayandi kusobana kweelana amalailile aacisobano alimwi bamwi tabamulemeki naaceya kkoocci. Tiimu iili boobo tayikonzyi kuzwidilila mumuzundano. Mukwiimpana, tiimu iibelekela antoomwe ilakonzya kuzwidilila. Moyo wanu ulakonzya kuba mbuli tiimu eeyo iikonzya kuzwidilila ikuti nzyomuyeeya, nzyomuyanda alimwi ambomulimvwa zileendelana ciindi nomumubelekela Jehova. Mutalubi kuti Saatani uyanda kuti mube amyoyo yobilo. Uyanda kuti mizeezo yanu, nzyomuyanda alimwi ambomulimvwa kaziteendelani azyeelelo zya Jehova. Pele nywebo muyanda kuti mumubelekele Jehova amoyo omwe. (Mt. 22:36-38) Mutamuzumizyi Saatani kumupa kuba amyoyo yobilo!
18 Kamupaila kuli Jehova mbubwenya mbwaakacita Davida naakati: “Kondipa kuba amoyo omwe kutegwa kandiyoowa zina lyako.” Mpoonya amucite kufwumbwa ncomukonzya kutegwa kamupona kweelana amupailo wanu. Buzuba abuzuba, amube amakanze aakuti zintu nzyomusala, zisyoonto naa zipati, mulatondezya kuti mulalilemeka kapati zina lya Jehova lisalala. Kwiinda mukucita boobo, mbomuli Bakamboni ba Jehova, muyoopa kuti zina eeli lilemekwe. (Tus. 27:11) Alimwi toonse tuyoocikonzya kwaamba mbubwenya mbwaakaamba musinsimi Mika naakati: “Swebo tunakweenda muzina lya Jehova Leza wesu lyoonse alyoonse mane kukabe kutamani.”—Mik. 4:5.
SEPTEMBER 23-29
MBONO IZILI MU JWI LYA LEZA INTEMBAUZYO 88-89
Bweendelezi bwa Jehova Mbobwiinda Kubota
Amubusumpule Bulelo bwa Jehova!
5 Kuli kaambo akambi Jehova ncayelela kweendelezya. Uleendelezya munzila yabululami alimwi iilondokede. Mboobu mbwaamba: “Ndime Jehova, ooyo uutondezya luyando lutamani, uubeteka kabotu akucita bululami munyika, nkaambo eezyi nzyezintu nzyendikkomanina.” (Jer. 9:24) Kunyina nasololelwa abbuku lili lyoonse ilyakalembwa abantu batalondekede kutegwa limugwasye kuzyiba ciluleme alimwi iceelede. Ibululami bwini-bwini alimwi ibulondokede buzwa kulinguwe, alimwi bululami oobo mpaayeeme milawo njaakapa bantu. “Bululami alubeta luluzi nentalisyo yacuuno [cakwe] cabwami,” aboobo tulakonzya kusyoma kuti milawo yakwe yoonse, njiisyo zyakwe alimwi anzyasala kucita zyoonse zililuleme. (Int. 89:14; 119:128) Mukwiimpana a Saatani walo iwaamba kuti bulelo bwa Jehova mbubyaabi, ilwakwe kumugama waalilwa kweendelezya nyika mubululami.
Amubusumpule Bulelo bwa Jehova!
10 Jehova kunyina nabadyaaminina bantu naa kutanyoneka munzila mbweendelezya. Bweendelezi bwakwe bulapa lwaanguluko alimwi bupa kuti kube lukkomano. (2Kor. 3:17) Davida wakaamba boobu kujatikizya bweendelezi bwa Leza: “Bulemu abweebesi zili kumbele [lya Leza]; inguzu akukondwa zili mubusena bwakwe mwakkala.” (1Mak. 16:7, 27) Mbubwenya buyo, sintembauzyo Etani wakalemba kuti: “Balikkomene bantu ibacizyi koongolola cakukondwa. O Jehova, baleenda mumumuni wabusyu bwako. Balakondwa muzina lyako buzuba boonse, alimwi balasumpulwa mubululami bwako.”—Int. 89:15, 16.
11 Lyoonse ikuzinzibala kuyeeya kujatikizya bubotu bwa Jehova kulakonzya kuyumya lusyomo ndotujisi lwakuti bweendelezi bwakwe mbobwiinda kubota. Inga twalimvwa mbuli mbwaakalimvwa sintembauzyo iwakati: “Kukkala buzuba bomwe mumabuwa aako nkubotu kwiinda kukkala mazuba aali 1,000 kumbi!” (Int. 84:10) Oobu buya mbocibede. Mbwaanga ngu Sikwaanza alimwi Mulengi siluyando, Jehova ulizyi nzyotuyandika kutegwa tube alukkomano alimwi ulatupa nzyotuyandika mubunji. Kufwumbwa ncayanda kuti tucite inga cigwasya ndiswe alimwi cipa kuti tube alukkomano. Oobo mbocibede nokuba kuti kucita boobo inga kwayanda kuti tuliimye mumbazu zimwi.—Amubale Isaya 48:17.
Amube Aalusyomo Luyumu mu Bwami
14 Amubone Jehova ncaakasyomezya Mwami Davida wa Israyeli yansiku kwiinda mu cizuminano ca Davida. (Amubale 2 Samuele 7:12, 16.) Jehova wakatangana cizuminano eeci a Davida ciindi Davida naakali kulela mu Jerusalemu, wakamusyomezya kuti Mesiya wakali kuyakuba waluzubo lwakwe. (Lk.1:30-33) Kwiinda mucizuminano eeci, Jehova wakatondezya cacigaminina kuti simulyazina wa Davida, ‘nguuyakweelela’ kukkala acuuno ca Bwami bwa Mesiya. (Ezk. 21:25-27) Kwiinda muli Jesu, bwami bwa Davida buyakukkalilila “mane kukabe kutamani.” Masimpe, lunyungu lwa Davida ‘luyakuba lwalyoonse, cuuno cakwe ciyookalilila mbuli izuba.’ (Int. 89:34-37) Inzya, bweendelezi bwa Mesiya tabukanyongani naaceya, alimwi nzyobuyakucita ziyakukkalilila mane kukabe kutamani.
Mbono Zyakumuuya
Jehova Wakapanga Cizuminano a Davida
Izuba alimwi amwezi zituyeezya kuti Mesiya unakweendelezya lyoonse alyoonse. (Int. 89:35-37) Ciindi nomuzibona, amuyeeye kujatikizya zilongezyo Jehova nzyamusyomezyede nywebo alimwi amukwasyi wanu, kwiinda mu Bwami bwakwe.
AMUSUNGWAALE MUMULIMO WAMUMUUNDA
ijwbq 181
Ino Bbaibbele Ninzi?
Makani aali kumatalikilo aa Bbaibbele aamba twaambo tupati-pati kujatikizya Leza Singuzuzyoonse mbwaakalenga julu alimwi anyika. Kwiinda mukubelesya bbuku eeli, ulatwaambila izina lyakwe lyakuti Jehova, calo cipa bantu boonse coolwe cakumuzyiba.—Intembauzyo 83:18.
Bbaibbele lilapandulula kuti Leza wakabejekezyegwa alimwi lilaamba mbwayoopilusya mpuwo yakwe mbotu.
Bbaibbele lilayubununa makanze ngajisi Leza kujatikizya bantu alimwi anyika. Lilatondezya kumbele mbwayoogwisya zintu zipa kuti bantu kabapenga.
Bbaibbele lilapa lulayo lugwasya lutondezya mbotweelede kupona buzuba abuzuba. Zikozyanyo izitondezya mbolicita oobo zibikkilizya:
Kuzumanana kuba abalongwe bali kabotu. “Aboobo, zintu zyoonse nzyomuyanda kuti bantu bamucitile, anywebo nzyomweelede kubacitila.”—Matayo 7:12.
Bupanduluzi: Tweelede kweendelezya bamwi mbubonya mbotuyanda kweendelezyegwa andiswe.
Kulwana penzi lyakukopana mumizeezo. “Mutanoolibiliki zyabuzuba butobela, nkaambo buzuba butobela bunoojisi zyakulibilika zyambubo.”—Matayo 6:34.
Bupanduluzi: Muciindi cakuciindizya kulibilika kujatikizya zikonzya kutucitikila kumbele, cilainda kubota kubikkila maano kubukkale mbotujisi aciindi aawo.
Kuba alukkomano mucikwati. “Umwi aumwi wanu weelede kuyanda mukaintu wakwe mbubonya mbwaliyanda mwini; kunze lyaboobo, mukaintu awalo weelede kumulemeka kapati mulumaakwe.”—Baefeso 5:33.
Bupanduluzi: Luyando alimwi abulemu zilayandika kutegwa cikwati cizwidilile.
SEPTEMBER 30–OCTOBER 6
MBONO IZILI MU JWI LYA LEZA INTEMBAUZYO 90-91
Kutegwa Moongole Anyika, Amusyome Jehova
Kuyandaula Nzila Yakupona Myaka Minji
Basayaansi banji baamba kuti, nokuba kuti kuli nzila zinji zyakucesya kucembaala, pele bantu tabalangilwi kupona myaka minji kwiinda njobapona mazuba aano. Masimpe kuti, kuzwa mumwaanda wamyaka wa 19, myaka njobapona bantu yayungizyika asyoonto. Pele cili boobo akaambo kabulondo, misamu iikwabilila bantu kumalwazi alimwi amisamu iimbi iisilika malwazi manji. Basyaazibwene bamwi mumakani aambozizyalana zintu zyuumi bayeeya kuti kulibonya kuti bantu basika amyaka njobeelede kupona.
Myaka iibalilwa ku 3,500 yainda, mulembi wa Bbaibbele Musa wakaamba kuti: “Imyaka yabuumi bwesu ili buyo 70, naa 80, ikuti muntu kali muyumu kapati. Pele yoonse izwide buyo mapenzi amause; ilafwambaana kumana.” (Intembauzyo 90:10) Nokuba kuti bantu basoleka kupa kuti katupona myaka minji, tulazumanana kupona mbubwenya mbuli mbwaakaamba Musa.
Mukwiimpana amyaka njobapona bantu, banyama bamwi balakonzya kupona myaka iinda kuma 100 alimwi azyalo zisamu zimwi mbuli cisamu camubuyu cilakonzya kupona myaka iinda kuma 1,000. Ikuti tweezyanisya myaka njotupona amyaka njozipona zilenge eezyi alimwi azimbi, tulakonzya kulibuzya kuti, ‘Sena buumi oobu bwakupona buyo myaka iili 70 naa 80 mbobuliko bulikke?’
wp19.1 5, kabbokesi
Ino Leza Nguni Zina?
Ooyu ngomubuzyo bantu banji ngobabuzya. Ambweni andinywe inga mulaubuzya. Alimwi tulakonzya kuubuzya boobu: Ikuti bubumbo azintu zyoonse izili mumo zyakalengwa a Leza, ino walo Leza wakazwa kuli?
Basayaansi banji balazumina kuti bubumbo bulijisi matalikilo. Kweelana amajwi aaya, kapango kakusaanguna kamu Bbaibbele kaamba kuti: “Kumatalikilo, Leza wakalenga julu anyika.”—Matalikilo 1:1.
Bubumbo boonse kunyina nobwakalitalikila buyo bulikke. Kutegwa cintu cimwi cibeko, kweelede kuti kakuli muntu umwi wakacipanga. Aboobo kuti mulengi naataliko, zintu zyoonse nzyotubona nozyataliko pe, kubikkilizya andiswe. Masimpe, cintu tacikonzyi kubako ikuti naa kakunyina sikucitalisya. Aboobo, mulengi nkwali! Alimwi ulaanguzu kapati, zina lyakwe ngu Jehova.—Johane 4:24.
Bbaibbele lyaamba boobu kujatikizya Leza: “Malundu kaatanazyalwa alimwi kotanalenga nyika alimwi ansi mbotu, kuzwa lili alili mane kukabe kutamani nduwe Leza.” (Intembauzyo 90:2) Aboobo, Leza waliko lyoonse. Mpoonya, “kumatalikilo” wakalenga zintu zyoonse.—Ciyubunuzyo 4:11.
Luyando Mbolutugwasya Kuzunda Kuyoowa
16 Saatani ulizyi kuti tulabuyanda kapati buumi bwesu. Aboobo waamba kuti tulakonzya kupa zintu zyoonse nzyotujisi kutegwa tukwabilile buumi bwesu. (Job. 2:4, 5) Eelo kaka Saatani mubeji! Pele, mbwaanga ‘ulijisi nguzu zyakuleta lufwu,’ Saatani ubelesya kuyoowa lufwu nkotwakazyalwa ankuko kutupa kuti tumuzangile Jehova. (Heb. 2:14, 15) Zimwi ziindi, bantu ba Saatani inga batukonga kutujaya ciindi notuzumanana kusyomeka. Mpoonya ziindi zimwi, Saatani ulakonzya kutulya caangwa ciindi notuyandaula busilisi. Bamadokota naa banamukwasyi batali Bakamboni balakonzya kutusinikizya kubikkwa bulowa calo cikonzya kutyola mulawo wa Leza. Naa muntu ulakonzya kutoongelezya kubelesya busilisi buteendelani anjiisyo zyamu Magwalo.
17 Nokuba kuti tatuyandi kufwa, tulizyi kuti Jehova takaleki kutuyanda ikuti twafwa. (Amubale Baroma 8:37-39.) Ciindi balongwe ba Jehova nobafwa, ulazumanana kubayeeya mbuli kuti mbaumi. (Lk. 20:37, 38) Ulayandisisya kuyoobabusya. (Job. 14:15) Jehova wakabbadela muulo waatala kapati ‘kutegwa tube abuumi butamani.’ (Joh. 3:16) Tulizyi Jehova mbwatuyanda alimwi akutulanganya. Aboobo, muciindi cakumuzangila ciindi nitwaciswa naa notuyanda kufwa, tweelede kusyoma kuti ulatuumbulizya, kutupa busongo alimwi anguzu. Eeci ncencico ncobakacita ba Valérie alimwi abalumi babo.—Int. 41:3.
Mbono Zyakumuuya
Sena Mulijisi Mungelo Uumukwabilila?
Ibbaibbele taliyiisyi kuti muntu umwi aumwi ulijisi mungelo uumukwabilila. Masimpe kuti, Jesu aciindi cimwi wakaamba kuti: “Amubone kuti tamusampauli umwi wabasyoonto aaba [basikwiiya ba Kristo], nkaambo ndimwaambila kuti bangelo babo kujulu lyoonse balanga busyu bwa Taata uuli kujulu.” (Matayo 18:10) Nokuba boobo, muciindi cakwaamba kuti muntu umwi aumwi ulijisi mungelo uumukwabilila, Jesu wakali kwaamba kuti bangelo balamubikkila maano sikwiiya wakwe umwi aumwi. Nkakaambo kaako, bakombi bakasimpe tabaciti buyamba naa kulibikka muntenda acaali kabalangila kuti bangelo ba Leza balabakwabilila.
Sena eeci caamba kuti bangelo tababagwasyi bantu? Peepe. (Intembauzyo 91:11) Bamwi balimvwa kuti Leza wakabagwasya kwiinda mukubatumina bangelo kuti babakwabilile alimwi akubasololela. Ba Kenneth ibaambwa kumatalikilo, bali akati kabaabo ibalimvwa boobo. Ambweni baliluzi, pele tatukonzyi kwaamba cakusinizya kujatikizya makani aaya. Bakamboni ba Jehova kanji-kanji balalibonena bumboni bwakuti bangelo balabagwasya ciindi nobali mumulimo wakukambauka. Nokuba kuti bangelo tabalibonyi, tatukonzyi kwaamba cakusinizya kujatikizya mbuli Leza mbwababelesya bangelo kugwasya bantu mubukkale bwiindene-indene. Pele bwini mbwakuti, takuli kulubizya kulumba Singuzuzyoonse kulugwasyo luli loonse ndwakonzya kutupa.—Bakolose 3:15; Jakobo 1:17, 18.
AMUSUNGWAALE MUMULIMO WAMUMUUNDA
lmd makani aayungizyidwe A kaambo 5
Makani Aamu Bbaibbele Ngotukkomanina Kuyiisya
5. Mulakonzya kupona kukabe kutamani anyika.—Int. 37:29; Mt. 5:5.
OCTOBER 7-13
MBONO IZILI MU JWI LYA LEZA INTEMBAUZYO 92-95
Kubelekela Jehova Mbobuumi Bwiinda Kubota!
Nobakubusi, Sena Mulabikkila Maano Kumbaakani Zyakumuuya?
5 Ikaambo kapati ncotweelede kulibikkila mbaakani zyakumuuya nkakuti tutondezye Jehova mbokuli kupati kulumba kwesu kuluyando lwakwe alimwi azintu nzyaakatucitila. Sintembauzyo wakaamba kuti: “Ncibotu kukulumba, O Jehova . . . Wapa kuti ndikondwe, O Jehova, akaambo kazintu nzyoocita; akaambo kamilimo yamaanza aako ndiloongolola cakukondwa.” (Int. 92:1, 4) Mbomuli mukubusi, amuyeeye zintu zyoonse nzyomweelede kumupa Jehova. Buumi bwanu, lusyomo lwanu, Bbaibbele, mbungano alimwi abulangizi butaliboteli bwakumbele. Kusaanguna kubikkila maano kuzintu zyakumuuya ninzila imwi iitondezya kulumba kuli Leza akaambo kazilongezyo eezyi, alimwi eeci cimupa kuti muswene kulinguwe.
Ino Nguni Weendelezya Mizeezo Yanu?
8 Mbubwenya mbuli muzyali mubotu, Jehova uyanda kuti bana bakwe kabajisi buumi bulaampindu. (Is. 48:17, 18) Aboobo, ulapa njiisyo zijatikizya kulilemeka alimwi ambotweelede kubeendelezya bamwi. Ulatuyiisya kubona zintu mbuli mbwazibona walo alimwi akupona kweelana amalailile aakwe. Kucita boobo takuli kuciindizya, muciindi caboobo, kutugwasya kucita zintu munzila iiluzi. (Int. 92:5; Tus. 2:1-5; Is. 55:9) Eeci citugwasya kusala cabusongo calo icisololela kulukkomano alimwi akuzwidilila. (Int. 1:2, 3) Masimpe, kuyeeya mbwayeeya Jehova kulagwasya alimwi nkubotu!
Mulayandika Kapati Kuli Jehova Leza Wanu!
18 Nokuba kuti tuyaabucembaala, tulakonzya kuba masimpe kuti kuli mulimo Jehova ngwaciyanda kuti tucite. (Int. 92:12-15) Jesu wakatuyiisya kuti nokuba kuti zintu nzyotukonzya kucita zilibonya kuti taziyandiki kapati kulindiswe, Jehova ulabikkila maano kucintu cili coonse ncotukonzya kucita mumulimo wakwe. (Lk. 21:2-4) Aboobo kamubikkila buyo maano kuzintu nzyomukonzya kucita. Mucikozyanyo, mulakonzya kwaamba makani aajatikizya Jehova, kupailila bakwesu alimwi akukulwaizya bamwi kuti bazumanane kusyomeka. Jehova umubona kuti muli basimilimonyina, ikutali akaambo kazintu nzyomukonzya kucita, pele akaambo kakulyaaba kwanu kumumvwida.—1 Kor. 3:5-9.
Mbono Zyakumuuya
“Ha! Muli Bulondo Buteeli Mubusongo bwa-Leza!”
18 Amubone mbwaakabwaamba kuti bulilibedelede busongo bwa Jehova imwaapostolo Paulo naakati: “Ha! muli bulondo buteeli mubusongo bwa-Leza amuluzibo lwakwe! Ncobeni imbeta zyakwe tazilangiki, aziyanza zyakwe tazitobeleki!” (Ba-Roma 11:33) Kwiinda mukutalika kapango akukankamuka kwakuti “Ha!,” Paulo wakatondezya kuti wakagambwa kapati—nkokwaamba kuti ikuyoowa kwabulemu. Ibbala lya Cigiliki ndyaakabelesya kwaamba “bulondo buteeli” liliswaangene kapati abbala lyakuti “mulindi uutagoli.” Aboobo, imabala ngaakabelesya apa kuzibona kabotu zintu mumizeezo. Notutelaika busongo bwa Jehova, cili mbuli kuti tulanga mumulindi wajeleele uutagoli, ibusena bulamfwu kapati cakuti tatukonzyi kuteelela mbobuli bupati, kutaambaa kukakilwa kubona mougolela. (Intembauzyo 92:5) Sena aako takali kaambo keelede kutupa kulicesya?
OCTOBER 14-20
MBONO IZILI MU JWI LYA LEZA INTEMBAUZYO 96-99
“Amwaambilizye Makani Mabotu”!
w11-E 3/1 6 ¶1-2
Ino Makani Mabotu Ninzi?
BANAKRISTO beelede kukambauka “makani mabotu aabwami” kwiinda mukwaambila bamwi kujatikizya mbubo, akubapandulwida kuti Bwami nemfwulumende iyakweendelezya nyika mubululami. Pele mabala aakuti “makani mabotu” alimwi alabelesyegwa munzila imwi mu Bbaibbele. Mucikozyanyo, tulajana mpolyaamba kuti “makani mabotu aalufwutuko” (Intembauzyo 96:2); “makani mabotu aa Leza” (Baroma 15:16); alimwi aakuti “makani mabotu aamba zya Jesu Kristo.”—Marko 1:1.
Mubufwaafwi, makani mabotu abikkilizya twaambo toonse Jesu ntwaakaamba alimwi antobakalemba basikwiiya bakwe. Katanaunka kujulu, Jesu wakaambila basikumutobela kuti: “Aboobo kamuya mukayiisye bantu bazisi zyoonse kuti babe basikwiiya, akubabbapatizya muzina lya Taata alya Mwana alya muuya uusalala, mukabayiisye kutobela zintu zyoonse nzyondakamulailila.” (Matayo 28:19, 20) Aboobo mulimo wa Banakristo bakasimpe tauli buyo wakwaambila bamwi kujatikizya Bwami; pele beelede kusolekesya kugwasya bantu kuti babe basikwiiya.
Ino Ncinzi Ciyakucitika Mubuzuba Bwalubeta?
Mbuli mbokutondezyedwe acifwanikiso cili kululyo, bantu banji bayeeya kuti Mubuzuba Bwalubeta, mabbiliyoni aabantu bayakuletwa kumbele lyacuuno ca Leza kutegwa bakabetekwe kweelana amicito njobakali kucita kaindi—bamwi kupegwa bulumbu bwakuba abuumi bwakujulu, bamwi kuti bakasubulwe mumulilo wahelo. Nokuba boobo, Bbaibbele litondezya kuti makanze Aabuzuba Bwalubeta ngakufwutula bantu kukutalulama. (Intembauzyo 96:13) Leza wakasala Jesu kuba Mubetesi uutikalete bululami kubantu boonse.—Amubale Isaya 11:1-5; Milimo 17:31.
Luumuno Kwamyaka Iili 1,000—Alimwi Mane Kukabe Kutamani!
18 Cilongwe eeco calukamantano cakanyonganizyigwa ciindi bantu nibakayungwa a Saatani kuzangila bweendelezi bwa Jehova. Nikuba boobo, kuzwa mu 1914, Bwami bwabu Mesiya bwali kubweza ntaamu ziyandika kutegwa bupilusye lukamantano oolo alimwi alumvwano. (Ef. 1:9, 10) Mumyaka ya Bulelo Iili 1,000 zyintu ‘zitanalibonya’ lino, ziyoolibonya ncobeni. Mpoonya “mamanino” ayoosika nkokuti mamanino aa Bulelo bwa Kristo bwa Myaka Iili 1,000. Ncinzi ciyoocitika kuzwa waawo? Nikuba kuti wakapegwa “nguzu zyoonse kujulu alimwi aanyika,” Jesu tayandi kulipangila zyina pe. Tajisi makanze aakubweza cuuno ca Jehova. Cakulibombya “uyoopa Bwami kuli Leza wakwe alimwi Usyi.” Uyoobelesya cuuno cakwe cilibedelede alimwi anguzu “kutegwa Leza . . . alemekwe.”—Mt. 28:18; Flp. 2:9-11.
19 Kuciindi eeco balelwa baanyika ba Bwami banoolondokede. Bayootobela cikozyanyo ca Jesu, alimwi cakulibombya acakuliyandila bayoobuzumina bweendelezi bwa Jehova. Bayooba acoolwe cakutondezya luyandisisyo lwabo kwiinda mukuzwidilila mumusunko wamamanino. (Ciy. 20:7-10) Kuzwa waawo, bazangi boonse—bantu alimwi azilenge zyamuuya—bayoonyonyoonwa kukabe kutamani. Eelo kaka cinooli ciindi calukkomano eeco! Mukwasyi woonse mububumbo boonse uyookkomana kutembaula Jehova walo uuyooba “mweendelezi wazyintu zyoonse.”—Amubale Intembauzyo 99:1-3.
Mbono Zyakumuuya
Jehova Utusyomezya Kuti Uyoopanga Nyika Kuba Paradaiso
9 Lino atulange-lange cintu citobela ncaakaamba kubbuku lya Ciyubunuzyo 21:5 kuti: “Ndilengulula zintu zyoonse kuti zibe zipya.” Ino majwi aaya aamba nzi? Mucaandaano eeci camu Bbaibbele, majwi aaya aamba zintu zyobilo Jehova nzyayoocita. Cakusaanguna, uyoonyonyoona bweende oobu bwakaindi. Kumane cabili, uyooleta bweende bupya. Ku Ciyubunuzyo 21:1 tubala kuti: “Julu lyakaindi anyika yakaindi zyakamana.” “Julu lyakaindi” lyaamba mfwulumende zyamunyika eeyi iziyungwa a Saatani amadaimona aakwe. (Mt. 4:8, 9; 1Joh. 5:19) Bbala lyakuti “nyika” kweelana ambolibelesyegwa mu Bbaibbele, lilakonzya kwaamba bantu bakkala mpawo. (Matl. 11:1; Int. 96:1) Aboobo “nyika yakaindi” yaamba bantu babyaabi. Jehova takabambululi buyo “julu” alimwi “anyika” ziliko kale pe, pele uyoozinyonyoona buya cakumaninina. Kumane uyoopa kuti zinjililwe busena ‘ajulu lipya alimwi anyika mpya,’ calo caamba kuti bantu baluleme banooyendelezyegwa amfwulumende mpya.
OCTOBER 21-27
MBONO IZILI MU JWI LYA LEZA INTEMBAUZYO 100-102
Amutondezye Kulumba Kuluyando lwa Jehova Lutamani
Mbomukonzya Kulibambila Kubbapatizyigwa
18 Luyando ndomujisi kuli Jehova mbube buyandika kapati, ibwiinda kubota. (Amubale Tusimpi 3:3-6.) Kuba aluyando luyumu kuli Leza kulakonzya kumugwasya kuzwidilila ciindi nomwajana mapenzi mubuumi. Kanji-kanji Bbaibbele lilaamba kujatikizya luyando lutamani ndwajisi Jehova kubabelesi bakwe. Luyando oolu lutamani lutondezya kuti kunyina nayoobalekelezya babelesi bakwe naa kuleka kubayanda. (Int. 100:5) Mwakalengwa mucinkozya ca Leza. (Matl. 1:26) Aboobo mbuti mbomukonzya kutondezya luyando luli boobu?
19 Cakusaanguna, amutondezye kulumba. (1Tes. 5:18) Buzuba abuzuba, amulibuzye kuti, ‘Mbuti Jehova mbwaanditondezya luyando sunu?’ Mpoonya amumulumbe kwiinda mumupailo, akuzyaamba cacigaminina zintu nzyaamucitila. Mbubwenya mbuli mwaapostolo Paulo, amubone zintu zibotu nzyamucitila nywebo kumugama zyalo izitondezya kuti ulamuyanda. (Amubale Bagalatiya 2:20.) Amulibuzye kuti, ‘Sena andime ndilayanda kumutondezya kuti ndilamuyanda?’ Luyando ndomujisi kuli Jehova luyoomugwasya kuzumanana kuzunda masunko alimwi akuliyumya kumapenzi. Luyoomukulwaizya kuzumanana kucita zintu zyakumuuya, ikutondezya kuti mulamuyanda Uso wanu buzuba abuzuba.
“Amulibatamike, Amupakamane!”
10 Zintu zimwi nzyotweelede kutantamuka zibikkilizya, kuciindizya kunywa bukoko, kucita mbuli kuti mulamuyanda muntu ngomwiindene zizo, bulyato, kwaamba zintu zinyemya bamwi, kweebelela zyakulikondelezya zitali kabotu, zintu ziletela muzeezo wakoonana alimwi azimwi buyo. (Int. 101:3) Sinkondoma Diabolosi, uluujisi kuyandaula nzila mbwakonzya kunyonganya cilongwe cesu a Jehova. (1Pet. 5:8) Ikuti naa tiitwacenjela, Saatani ulakonzya kupa kuti tube amunyono, kutasyomeka, busyaacivwulemwangu, lusulo, kulisumpula alimwi akubikkilila. (Gal. 5:19-21) Kumatalikilo, tulakonzya kuyeeya kuti zintu eezyi tazikonzyi kutunyonganya. Pele kuti naa tiitwabweza ntaamu cakufwambaana kuzigwisya mumyoyo yesu, zintu eezyi zilakonzya kukomena mbuli cisyango cijaya akutuletela mapenzi.—Jak. 1:14, 15.
Sena Muyakukubikkila Maano Kucenjezya Kwa Jehova?
7 Ino ncinzi ncotweelede kucita kutegwa tubatantamuke bamayi bakubeja? Tatweelede kubandika ambabo naa kubaita kumaanda eesu. Tatweelede kubala mabbuku aabo, kubeebelela acipeku-peku, kubala nzyobalemba a Intaneti naa kwaamba cimwi cintu kujatikizya nzyobalemba a Intaneti. Nkaambo nzi ncotweelede kubatantamuka? Cakusaanguna, nkaambo kakuti tulamuyanda “Leza uusyomeka.” Aboobo, tatuyandi kuswiilila njiisyo zyakubeja zyalo zikazyanya akasimpe kajanika mujwi lya Leza. (Dt. 32:4; Joh. 17:17) Alimwi tulaiyanda mbunga Jehova njabelesya kutuyiisya kasimpe. Nimbunga ya Jehova yatuyiisya zyina lya Jehova ancolipandulula, makanze aakwe kujatikizya nyika, cicitika twafwa alimwi abulangizi mbobajisi bafwide. Sena muliyeeyede mbomwakakkomana nomwakazyiba kasimpe kujatikizya makani aaya alimwi aambi? Aboobo, mutazumizyi makani aakubeja aazwa kubamayi bakubeja kuti amupe kusiya mbunga yakamuyiisya kasimpe.—Joh. 6:66-69.
8 Kufwumbwa nzyobakonzya kwaamba bamayi bakubeja tatukabatobeli pe. Tatujisi kaambo kakonzya kutupa kutobela bantu bali mbuli migoti iitajisi meenda. Aabo baswiilila nzyobaamba bayootyompwa. Tuyanda kusyomeka kuli Jehova akumbunga yakwe. Mbunga yakwe lyoonse ilatupa meenda aasalala aakasimpe ka Mujwi lya Leza.—Is. 55:1-3; Mt. 24:45-47.
Mbono Zyakumuuya
Mbomukonzya Kuzumanana Kuzilanga Kabotu Zintu
21 Intembauzyo 102 alimwi ilatondezya mbotukonzya kuzilanga kabotu zintu. Sintembauzyo wakacita oobo kwiinda mukucinca akubikkila maano kucilongwe cakwe a Jehova. (Int. 102:12, 27) Wakaumbulizyigwa kuzyiba kuti lyoonse Jehova unooliko kutegwa alanganye bantu bakwe mumasunko aabo. Aboobo, ikuti kwaciindi cisyoonto kulimvwa bubi kumupa kuyaansi mumulimo wanu kuli Leza kwiinda mbomuyanda, amwaapailile makani aaya. Amumulombe Leza kuti aumvwe mupailo wanu kutali buyo kuti amuumbulizye mupenzi lyanu pele kutegwa “bantu baluule izina lya-Jehova.”—Int. 102:20, 21.
AMUSUNGWAALE MUMULIMO WAMUMUUNDA
ijwbq 129
Sena Bbaibbele Kuli Mbolyakacincwa?
Peepe. Ikuti tweezyanisya malembe aakaindi, tujana kuti Bbaibbele kunyina nolyacincwa nokuba kuti kwamyaka minji lyalikukkopololwa akulembululwa kubelesya zintu zinyonyooka.
Sena eeci caamba kuti kunyina bulubizi bwakacitwa nolyakali kukkopololwa?
Kuli malembe aakaindi aamu Bbaibbele manji aakajanwa. Akati kamalembe aaya, aamwi aliindene ikutondezya kuti kwakali bulubizi nokwakali kukkopololwa Bbaibbele. Kwiindana ooku takuli kupati alimwi takunyonganyi bupanduluzi. Nokuba boobo, kuli kwiindana kumwi ikwajanwa ikutondezya kuti basikukkopolola bakacinca zintu acaali kutegwa banyonganye mulumbe wamu Bbaibbele. Amulange-lange zikozyanyo zyobilo:
1.Mulugwalo lwa 1 Johane 5:7, ma Bbaibbele aamwi aakaindi ajisi mabala aakuti: “kujulu, Taata, Ijwi alimwi Amuuya Uusalala: kupandulula cintu comwe.” Nokuba boobo, malembe aasyomeka atondezya kuti majwi aali boobu taajaniki mumalembe aakusanguna. Pele akazoobikkwa buya. Aboobo, muma Bbaibbele aasyomeka aamazubaano majwi aaya taako.
2.Izina lya Leza limugeme lilalibonya ziindi zinji mumalembe aakaindi aa Bbaibbele. Pele basanduluzi bamwi ba Bbaibbele balaligusya zina eeli akubikka mabala aabulemu mbuli aakuti “Mwami” naa “Leza” mubusena bwandilyo.
Ino inga twasinizya buti kuti kunyina bulubizi abumbi ibuyoojanwa?
Mazuba aano, kuli malembe manji kapati aaliko cakuti ncuuba-uba kujana bulubizi mubusanduluzi. Ino kweezyanisya malembe aaya kwatondezya buti kuti Bbaibbele tiilyacincwa?
Kaamba kujatikizya malembe aa Magwalo aa Chihebrayo (kanji-kanji aaitwa kuti “Cizuminano Cakaindi”) syaazibwene William H. Green wakaamba kuti: “Cakutadooneka, kunyina bbuku limbi lyakaindi lyakalembululwa munzila iiluzi mbuli Bbaibbele.”
Ikujatikizya Magwalo aa Banakristo aa Chigiriki, naa “Cizuminano Cipya,” syaazibwene mumakani aa Bbaibbele F. F. Bruce wakalemba kuti: “Bumboni ibutondezya kuti magwalo aa Cizuminano Cipya ngamasimpe mbunji kapati kwiinda bumboni bwamalembe manji aabasyaazibwene, cakunga kunyina uukonzya kukazya kuti mbwamasimpe.”
Awalo Sir Frederic Kenyon syaazibwene mumalembe aakaindi aa Bbaibbele uulemekwa wakaamba kuti umwi “ulakonzya kunyamuna Bbaibbele akwaamba cakusinizya kuti ujisi Jwi lya Leza akuti ndyakasimpe kalo katakacincwa kuzwa kaindi.”
Sena kuli twaambo atumwi itutondezya kuti ncobeni Bbaibbele tiilyakacincwa?
Basikukkopolola Bbaibbele ba Juda alimwi a Banakristo bakaabikkilizya amakani aamba zyakulubizya kwabantu ba Leza. (Myeelwe 20:12; 2 Samuele 11:2-4; Bagalatiya 2:11-14). Alimwi bakaabikkilizya aalo makani aamba ba Juda mbobakali kusotoka milawo ya Leza alimwi aakutalika kutobela njiisyo zyakubeja. (Hosea 4:2; Malaki 2:8, 9; Matayo 23:8, 9; 1 Johane 5:21). Kwiinda mukukkopolola makani aaya kweelana ambwaakalembedwe, basikukkopolola bakatondezya kuti bakali kusyomeka alimwi akulemeka Jwi lya Leza lisetekene.
Mbwaanga Bbaibbele lyakasololelwa aa Leza, nkokuti wakabikkila maano kuti lilembwe munzila iiluzi? (Isaya 40:8; 1 Petro 1:24, 25) Alimwi makanze aakwe akali aakuti ligwasye bantu bakapona kaindi andiswe notupona mazuba aano. Masimpe ngakuti “zintu zyoonse izyakalembwa kaindi zyakalembelwa kutuyiisya, kutegwa kwiinda mukuliyumya kwesu alimwi akwiinda muluumbulizyo lwamu Magwalo tube abulangizi.”—Baroma 15:4.
Jesu alimwi abasikwiiya bakwe bakazubulula majwi kuzwa mu Magwalo aa Chihebrayo kakunyina kulibilika kuti izyakalembwa tiizyakaluzi.—Luka 4:16-21; Milimo 17:1-3.
OCTOBER 28–NOVEMBER 3
MBONO IZILI MU JWI LYA LEZA INTEMBAUZYO 103-104
Ulaibaluka “Kuti Tuli Bulongo Buyo”
Amwiiye Jehova Kwiinda Mukuba Bantu Banyoneka
5 Kulicesya kwa Jehova alweetelelo kupa kuti kanyoneka. Mucikozyanyo, Jehova wakatondezya kuti ulalicesya ciindi naakali kuyanda kunyonyoona munzi mubyaabi wa Sodoma. Kwiinda mumungelo, wakaambila Loti kuti atijile kumalundu. Pele Loti wakayoowa kuunka nkuko. Aboobo wakalomba kuti walo amukwasyi wakwe baunke ku Zoari, idolopo syoonto, alyalo ndyaakali kuyanda kunyonyoona Jehova. Naakali kuyanda, Jehova naakaambila Loti kuti atobele buyo ncaakaambilwa. Pele muciindi cakucita boobo, wakamuzumizya Loti kuunka ku Zoari, alimwi tanaakalinyonyoona dolopo eeli. (Matl. 19:18-22) Nokwakainda myaanda yamyaka, Jehova wakatondezya lweetelelo kubantu bakali kukkala ku Nineve. Wakatuma musinsimi Jona kuti akaambilizye lunyonyooko lwakali kuyoosikila munzi ooyu antoomwe abantu babi ibakali mumo. Pele ciindi bana Nineve nobakeempwa, Jehova wakabafwida lubomba alimwi tanaakaunyonyoona munzi ooyu.—Jon. 3:1, 10; 4:10, 11.
Amumusyome Jehova Mbubwenya Mbuli Samusoni
16 Nokuba kuti Samusoni wakapenga kapati akaambo kakulubizya kwakwe, kunyina naakacileka kumubelekela Jehova. Andiswe tatweelede kucileka kumubelekela Jehova nokuba kuti twalubizya naa kusweekelwa mukuli buya. Amuyeeye kuti Jehova ulilibambilide kulekelela. (Int. 103:8-10) Nokuba kuti tulalezya, Jehova ulakonzya kutupa nguzu zyakucikonzya kucita kuyanda kwakwe mbubwenya mbuli mbwaakacita kuli Samusoni.
17 Amubone cikozyanyo camukwesu ucili mwana-mwana wazina lya Michael. Wakajisi bubi mumulimo wa Jehova, kali mukutausi alimwi amupainiya waciindi coonse. Nokuba boobo, cuusisya ncakuti, wakacita cintu cimwi cakapa kuti asweekelwe mikuli mumbungano. Wakaamba kuti: “Ciindi zintu eezyi nozyakacitika, ndakajisi bubi kapati mumulimo wa Jehova. Zyakacitika cakutayeeyela cakuti ndakalimvwa kuti kunyina ncondakali kukonzya kucita mumulimo wa Jehova. Kunyina nondakayeeya kuti Jehova wandilekelezya, pele ndakali kulibuzya naa cilongwe cangu anguwe kuli nociyooba mbuli mbocakabede kaindi, akuti naa kuli nondiyoomubelekela kabotu mumbungano mbuli mbondakali kucita kaindi.”
18 Cikkomanisya ncakuti mukwesu Michael kunyina naakatyompwa pe. Wakayungizya kwaamba kuti: “Ndakabeleka canguzu kapati kubambulula cilongwe cangu a Jehova kwiinda mukupaila lyoonse, kubala alimwi akuzinzibala kuyeeya.” Mukuya kwaciindi, mukwesu Michael wakapilusyigwa alimwi mumikuli. Lino ulabeleka kali mwaalu alimwi amupainiya waciindi coonse. Wakaamba kuti: “Lugwasyo ndondakapegwa kwaambisya kuzwa kubaalu, lwakandigwasya kubona kuti Jehova ucindiyanda. Lino alimwi ndilabeleka mumbungano kandijisi manjezyeezya aasalala. Eeci cakandicitikila cakandiyiisya kuti, Jehova ulakonzya kumulekelela muntu uuli woonse weempwa kuzwa ansi aamoyo.” Tulakonzya kuba alusyomo lwakuti andiswe Jehova unootubelesya alimwi akutulongezya nokuba kuti twalubizya, lilikke buyo kuti twabambulula nzila zyesu alimwi akuzumanana kumusyoma.—Int. 86:5; Tus. 28:13.
Mulakonzya Kuzizuzikizya Mbaakani Zyanu Zyakumuuya
2 Ikuti naa kuli mbaakani njomujisi kale njomutanazuzikizya, akaka mutatyompwi akuyeeya kuti mwaalilwa. Kanji-kanji, nokuba kuzuzikizya mbaakani iitakatazyi kuyandika ciindi alimwi akubeleka canguzu. Mbwaanga muciyanda kwiizuzikizya mbaakani yanu eeyo, ncitondezyo cakuti mulacibikkila maano kapati cilongwe canu a Jehova alimwi muyanda kumubelekela kusikila mpomugolela. Jehova ulalumba kapati akaambo kakusolekesya kwanu. Nokuba boobo, talangili kuti mumupe zintu ziinda ali zeezyo nzyomukonzya. (Int. 103:14; Mik. 6:8) Aboobo, mweelede kulibikkila mbaakani njomukonzya kuzuzikizya kweelana abukkale bwanu. Lino mwamana kulibikkila mbaakani eeyo, ncinzi ncomweelede kucita kutegwa mwiizuzikizye? Atubandike nzila zimwi.
Mbono Zyakumuuya
Inguzu Zyakulenga—“Iwakalenga Ijulu Anyika”
18 Ino twiiya nzi kujatikizya mbwazibelesya Jehova nguzu zyakwe zyakulenga? Cilatuyoosya ikubona bunji bwamisyobo yazintu nzyalengede. Sintembauzyo umwi wakakankamuka ulaamba: “O Jehova, milimo yako yavula! . . . Nyika ilizwide zilenge zyako.” (Intembauzyo 104:24) Aayo mmasimpe! Bahaazibwene mubumpiyompiyo bwazilenge bazyiba misyobo-misyobo yazintu zipona yiinda kukaulunzuma komwe; pele baliindene mumizeezo, ibamwi bayeeya kuti inga kwaba misyobo iisika kutuulunzuma tuli 10, tuli 30 naa kwiindaawo. Haazibwene mukuzekaula zimwi ziindi ulakonzya kubulilwa muzeezo wazintu zimbi zyakuzekaula. Mukwiimpana, ibuhaazibwene bwa Jehova—inguzu nzyajisi zyakwaanza akulenga zintu zipya alimwi zyamisyobo-misyobo—tazyeeli pe.
AMUSUNGWAALE MUMULIMO WAMUMUUNDA
lmd makani aayungizyidwe A kaambo 6
Makani Aamu Bbaibbele Ngotukkomanina Kuyiisya
6.Mwaalumi weelede “kuyanda mukaintu wakwe mbubonya mbwaliyanda mwini.”—Ef. 5:33; Kol. 3:19.