Jesu Mupaizi Wesu Mupati Silweetelelo

1-2. (a) Nkaambo nzi Jehova ncaakatumina Mwanaakwe anyika? (b) Ncinzi ncotutiibandike mucibalo eeci? (Bahebrayo 5:​7-9)

MYAKA iibalilwa ku 2,000 yainda, Leza wakatuma Mwanaakwe ngwayandisya anyika. Nkaambo nzi? Kaambo kamwi nkakuti, kutegwa anunune bantu kucibi alufwu alimwi akupa kuti cikakonzyeke kuyoomana mapenzi ngaakatalisya Saatani. (Joh. 3:16; 1Joh. 3:8) Kunze lyaboobo, Jehova wakalizyi kuti zintu izyakali kuyoomucitikila Jesu kali muntunsi, zyakali kuyoomugwasya kuba Mupaizi Mupati silweetelelo. Aboobo Jesu wakaba Mupaizi Mupati naakamana kubbapatizyigwa mu 29 C.E.a

² Mucibalo eeci, tulabandika zintu zyakamucitikila Jesu naakali anyika mbozyakamugwasya kuba Mupaizi Mupati silweetelelo. Cilayandika kumvwisya makani aaya nkaambo kucita boobo ciyootuubila kupaila kuli Jehova alimwi akuswena kulinguwe kwaambisya ciindi notuuside akaambo kakulubizya kwesu.—Amubale Bahebrayo 5:​7-9.

MWANA WA LEZA UUYANDWA KAPATI WAKABOOLA ANYIKA

3-4. Nkuliimya nzi kupati nkwaakacita Jesu ciindi naakaboola anyika? Ino buumi bwakwe bwakali buti anyika?

³ Bunji bwesu twakajatikizyigwa kale akucinca kwabukkale mbuli kulonga akusiya busena mbotukkomanina, banamukwasyi alimwi abalongwe. Kucinca kuli boobu takuli kuubauba. Pele kunyina muntu wakajatikizyigwa kale akucinca bukkale mbuli Jesu. Nkaambo naakali kujulu wakali mwana wamuuya wa Jehova uuyandika kapati. Wakali kuyandwa kapati alimwi lyoonse wakali kukkomana kubeleka “kujanza lyalulyo” lya Leza. (Int. 16:11; Tus. 8:30) Nokuba boobo, lugwalo lwa Bafilipi 2:7 lwaamba kuti “wakasiya zintu zyoonse nzyaakajisi” kubikkilizya acuuno caatala ncaakajisi kujulu akuboola anyika kutegwa akkale abantu batalondokede.

⁴ Amuyeeye kujatikizya buumi bwa Jesu naakazyalwa. Mumukwasyi mwaakazyalilwa bakali bacete. Tulizyi oobo akaambo kakuti bazyali bakwe bakacikonzya buyo kupa nziba zyobilo kacili cituuzyo ciindi naakazyalwa. (Lev. 12:8; Lk. 2:24) Kunze lyaboobo, ciindi Mwami Heroda naakazyiba kuti Jesu wazyalwa, wakasola kuyanda kumujaya. Pele kutegwa avwunwe, bazyali bakwe bakaba bazangalisi ku Egepita kwaciindi cili mbocibede. (Mt. 2:​13, 15) Eelo kaka ooku kwakali kucinca kwabuumi bwa Jesu twabweezyanisya abuumi mbwaakali kupona kujulu!

5. Zintu nzi nzyaakabona Jesu naakali anyika? Mbuti kupona anyika mbokwakamugwasya kuba Mupaizi Mupati silweetelelo? (Amubone acifwanikiso.)

⁵ Ciindi Jesu naakali anyika, wakali kubona mapenzi koonse-koonse. Tacidoonekwi buya kuti wakakumvwa kucisa kuboola akaambo kakufwidwa muyandwa ambweni kubikkilizya akufwidwa bausyi bakujana ba Josefa. Ciindi naakali kucita mulimo wakwe, Jesu wakabonana abantu ibakali basicinsenda, ibatakali kucikonzya kweenda alimwi abakafwidwa bayandwa babo. Akaambo kaceeci, wakabeetelela. (Mt. 9:​2, 6; 15:30; 20:34; Mk. 1:​40, 41; Lk. 7:13) Masimpe kuti nociba ciindi naakali kujulu wakali kubona bantu kabapenga. Pele naakali anyika, wakatalika kwaabona munzila iimbi mapenzi ngobajisi bantu. (Is. 53:4) Wakali kukonzya kumvwisya kabotu-kabotu bantu mbobakali kulimvwa akaambo kakupenga. Amana buya awalo wakacitikilwa zintu zibacitikila bantu mbuli kukatala, kutyompwa alimwi akuusa.

JESU WAKALI KUBEETELELA BANTU

6. Ino mabala aamaambilambali ngaakabelesya Isaya atuyiisya nzi kujatikizya lweetelelo lwa Jesu? (Isaya 42:3)

⁶ Mumulimo wakwe waanyika, Jesu wakatondezya lweetelelo kubantu bakanyina nguzu alimwi ibakali kweendelezyegwa calunya abamwi. Kwiinda mukucita boobo, wakazuzikizya businsimi. Mumagwalo aa Chihebrayo, bantu bavwubi alimwi bayumu zimwi ziindi bakozyanisyigwa kumuunda uutilailwa kabotu walo uujisi masamu malamfwu. (Int. 92:12; Is. 61:3; Jer. 31:12) Pele aabo ibanyina mugwasyi alimwi ibeendelezyegwa calunya, bakozyanisyigwa kutete lipwayikide alimwi akukatambo kalambe kasuka busi ikayanda kuzima. (Amubale Isaya 42:3; Mt. 12:20) Kwiinda mukusololelwa amuuya uusalala, musinsimi Isaya wakabelesya mabala aaya aamaambilambali kwaamba luyando alimwi alweetelelo Jesu ndwaakajisi kubantu-bantu buyo balo ibakali kubonwa kuti banyina mpindu abamwi.

7-8. Mbuti Jesu mbwaakabuzuzikizya businsimi bwa Isaya?

⁷ Matayo wakatondezya kuti Jesu wakabuzuzikizya businsimi bwa Isaya ibwaamba kuti: “Takatyoli tete lipwayikide, alimwi takakazimi katambo kalambe kasuka busi.” Maleele amwi aa Jesu akabagwasya aabo ibakali kulimvwa mbuli tete lipwayikide alimwi akatambo kalambe kasuka busi ikayanda kuzima. Akati kabaabo, kwakali mwaalumi iwakazwide cinsenda mubili woonse. Kweelede kuti mwaalumi ooyu wakali kulimvwa kubula bulangizi bwakuponesyegwa alimwi akuba antoomwe abamukwasyi wakwe abalongwe. (Lk. 5:​12, 13) Aciindi cimwi wakayaanya mwaalumi musinke matwi alimwi iwakali sikamaama. Amweezeezye buyo mbwaakali kulimvwa mwaalumi ooyu ciindi naakali kubona bamwi kababandika pele katacikonzyi kumvwa nzyobaamba. (Mk. 7:​32, 33) Pele kuli azimbi nzyaakacita Jesu.

⁸ Mumazuba aa Jesu, ba Juda banji bakali kusyoma kuti aabo ibakali kupenga bakali kusubulwa akaambo kazibi zyabo naa zibi zyabazyali babo. (Joh. 9:2) Akaambo kaceeci, banji bakali kubapenzya alimwi akubapa kulimvwa kuti banyina mpindu bantu bali boobu. Aboobo kutegwa azuzikizye businsimi bwa Isaya, Jesu wakali kubaponya akubagwasya kuzyiba kuti Leza ulababikkila maano. Ino eeci cituyiisya nzi kujatikizya Jesu mbwalimvwa kujatikizya ndiswe mazuba aano?

9. Ino lugwalo lwa Bahebrayo 4:​15, 16 lutondezya buti kuti Mupaizi wesu Mupati ulabeetelela bantu batalondokede?

⁹ Amubale Bahebrayo 4:​15, 16. Tulakonzya kuba masimpe kuti Jesu lyoonse unootweetelela. Ino eeci caamba nzi? Ibbala lya Chigiriki ilyakasandululwa kuti “lweetelelo” lyaamba kulibikka mubukkale bwamuntu uuside alimwi uuli mumacise. Cilakkomanisya kubona kuti Paulo wakabelesya bbala ndilyonya eeli lya Chigiriki kulugwalo lwa Bahebrayo 10:​34, kutondezya kuti tweelede kubeetelela aabo ibali muntolongo. Zibalo izyaamba maleele aa Jesu zitondezya kuti wakali kujatikizyigwa kapati akupenga kwabamwi. Tanaakali kuponya bantu cakwiinzya buyo mulawo, pele wakali kubabikkila maano alimwi wakaliyandide ncobeni kubagwasya. Mucikozyanyo, ciindi naakali kuyanda kuponya sicinsenda, naakacita oobo kali kulamfwu pele lweetelelo lwakamukulwaizya kumujata. Alimwi ambweni eeci ncecakali ciindi cakusaanguna kwamyaka minji sicinsenda ooyu kujatwa amuntu. Kuyungizya waawo, ciindi Jesu naakali kuyanda kuponya mwaalumi iwakali musinkematwi, wakamutola kubusena bwakanyina bantu akumuponya. Kunze lyaboobo, ciindi ba Farisi nobakamusampaula mukaintu wakeempwa walo iwakatesya maulu aa Jesu amisozi akwaapukuta amasusu aakwe, Jesu wakamuvwuninina. (Mt. 8:3; Mk. 7:33; Lk. 7:44) Tulakonzya kubona kuti Jesu kunyina naakali kubatantamuka aabo ibakali kuciswa naa aabo ibakacitide zibi zipati. Muciindi caboobo, wakali kuyanda kuti baunke kulinguwe alimwi wakatondezya kuti ulabayanda. Masimpe tulakonzya kusyoma kuti andiswe Jesu ulatweetelela.

IKWIIYA MUPAIZI MUPATI MAZUBA AANO

10. Zintu nzi nzyotukonzya kubelesya mazuba aano kugwasya basinkematwi alimwi aboofwu? (Amubone azifwanikiso.)

¹⁰ Mbotuli basikutobela Jesu, tulamwiiya kwiinda mukutondezya luyando alweetelelo kuli bamwi. (1Pet. 2:21; 3:8) Nokuba kuti tatukonzyi kubaponya basinkematwi alimwi aboofwu, tulakonzya kubagwasya munzila yakumuuya. Mucikozyanyo, mabbuku alimwi amavidiyo aapandulula Bbaibbele alajanika mumyaambo yakutambaika yiinda ku 100. Alimwi kutegwa aabo ibataboni kabotu naa boofwu bagwasyigwe, kuli mabbuku aaboofwu mumyaambo yiinda ku 60. Kunze lyaboobo, kuli mavidiyo aajisi muntu uupandulula zicitika mumyaambo yiinda ku 100. Zyoonse eezyi zigwasya basinkematwi alimwi aboofwu kuba acilongwe a Jehova alimwi a Jesu.

11. Mbuti mbunga ya Jehova mboitondezya lweetelelo ndwajisi Jesu kubantu bamisyobo yoonse? (Milimo 2:​5-7, 33) (Amubone azifwanikiso.)

¹¹ Mbunga ya Jehova ilasolekesya kugwasya bantu bamisyobo yoonse. Amuyeeye kuti ciindi naakabusyigwa, Jesu wakatila muuya uusalala ali basikwiiya bakwe kutegwa boonse aabo ibakabungene lyapobwe lya Pentekoste bakonzye kumvwa makani mabotu aumwi “mumwaambo wakwe.” (Amubale Milimo 2:​5-7, 33.) Kwiinda mubusolozi bwa Jesu, mbunga yapa kuti zyakumwaya kazijanika mumyaambo yiinda ku 1,000 alimwi imwi akati kamyaambo eeyi yaambaulwa buyo abantu basyoonto. Mucikozyanyo, myaambo imwi yaci Amerindian yaambaulwa buyo abantu basyoonto ibakkala ku North alimwi a South America. Nokuba boobo, zyakumwaya zyesu zilajanika mumyaambo yiinda ku 160 calo capa kuti bantu ibakkala mumasena aayo bakonzye kwaamvwa makani mabotu. Kunze lyaboobo, zyakumwaya zyesu zilajanika mumyaambo yiinda ku 20 yaci Romany. Cikkomanisya ncakuti, bantu banji baambaula myaambo eeyi batalika kumubelekela Jehova.

12. Ncinzi acimbi mbunga ya Jehova ncoibacitila bantu mazuba aano?

¹² Kunze buyo lyakugwasya bantu kumvwa mulumbe wamakani mabotu, mbunga ya Jehova ilabagwasya aabo bajatikizyigwa antenda zilicitikila. Alimwi bakwesu abacizyi banji balalisungula kubagwasya aabo ibajatikizyigwa antenda eezyi. Kunze lyaboobo, mbunga ilayaka masena aakukombela kwalo bantu nkobakonzya kubungana akwiiya kujatikizya luyando Leza ndwajisi kulimbabo.

MUPAIZI WESU MUPATI ULAKONZYA KUTUGWASYA

13. Muunzila nzi zimwi Jesu mwatugwasya?

¹³ Mbwali mweembezi mubotu, Jesu ulatupa aumwi nzyayandika kumuuya. (Joh. 10:14; Ef. 4:7) Zimwi ziindi tulakonzya kulimvwa mbuli katambo kasuka busi kayanda kuzima naa mbuli tete lipwayikide. Tulakonzya kutyompwa akaambo kakuciswa, kulezya kwesu naa ambweni akaambo kakutamvwana amukombima. Muziindi zili boobu tulakonzya kubikkila maano kumapenzi ngotujisi lino akwaalilwa kubikkila maano kubulangizi bwakumbele. Pele kamuyeeya kuti Jesu ulabikkila maano kujatikizya zintu zimucitikila alimwi ambozimupa kulimvwa. Akaambo kakuti ulamweetelela, uliyandide kumugwasya. Mucikozyanyo, ulakonzya kubelesya muuya uusalala kutegwa amupe nguzu ciindi nomutyompedwe. (Joh. 16:7; Tit. 3:6) Kuyungizya waawo, ulakonzya kubelesya baalu alimwi abakwesu abacizyi mumbungano kutegwa bamukulwaizye akumugwasya.—Ef. 4:8.

14. Ncinzi ncotweelede kucita ciindi notwatyompwa?

¹⁴ Ikuti naa twatyompwa, tweelede kuyeeya mulimo ngwajisi Jesu mbwali Mupaizi Mupati alimwi akuzinzibala kuyeeya eeci ncocaamba kulindiswe. Kamuyeeya kuti Jehova wakamutuma anyika ikutali buyo kuzoopa buumi bwakwe kacili cinunuzyo, pele alimwi akumugwasya kumvwisya mapenzi ngobajana bantu. Aboobo ciindi notwatyompwa akaambo kakubisya naa kulezya kwesu, Jesu ulilibambilide kutugwasya “aciindi ceelede.”—Heb. 4:​15, 16.

15. Ncinzi cakagwasya mukwesu umwi kupiluka kumbungano?

¹⁵ Jesu ulabasololela bantu bakwe ikugwasya baabo ibakacileka kumubelekela Jehova kutegwa bapiluke kulinguwe. (Mt. 18:​12, 13) Amubone cakuluula caba Stefano.b Nobakakkala kabagusyidwe mumbungano kwamyaka iili 12, bumwi buzuba bakasala kujanika kumuswaangano. Bakaamba kuti: “Tiicakali cuubauba kulindime, pele ndakali kuyanda kuba cibeela camukwasyi wa Jehova uujisi luyando. Nondakasika, baalu ibakabandikide andime bakanditambula camaanza obilo. Masimpe kuti zimwi ziindi ndilaakuusa kapati akaambo kakuti ndakamusiya Jehova. Pele baalu aaba bakandiyeezya kuti Jehova alimwi a Jesu bayanda kuti ndizumanane. Ciindi nondakapilusyigwa mumbungano, bakwesu abacizyi bakanditambula camaanza obilo mebo alimwi amukwasyi wangu. Mukuya kwaciindi, bakaintu bangu bakatalika kwiiya Bbaibbele alimwi sunu tulamubelekela Jehova mbuli mukwasyi.” Eelo kaka Mupaizi Mupati ulakkomana kubona bantu ibeempwa kabatambula lugwasyo alimwi akupiluka kumbungano!

16. Nkaambo nzi ncomulumba akaambo kakuba a Mupaizi Mupati silweetelelo?

¹⁶ Ciindi naakali anyika, Jesu wakapa lugwasyo ndobakali kuyandika bantu banji. Mazuba aano, tulakonzya kuba alusyomo lwakuti unootugwasya ciindi notuyandika lugwasyo. Mpoonya munyika mpya uyoobagwasya bantu bamvwida kutegwa bakabe abuumi bulondokede. Eelo kaka tulamulumba kapati Jehova Leza walo iwakatupa Mwanaakwe kuba Mupaizi wesu Mupati silweetelelo akaambo kakuti ulatuyanda!