Kwasika Bamisyinali Abambi

Mu July 9, 1964, Dipatimenti yamfwulumende yacisi ca Indonesia iitegwa Ministry of Justice yakalembya kabunga ka Bible Students Association, mbunga iizumizyidwe mumulawo iibelesyegwa a Bakamboni ba Jehova. Pele bakwesu kabatanaanguluka kukomba, bakali kuyandika kulilembya ku Dipatimenti iitegwa Ministry of Religious Affairs. Mutabi ooyu wakamvwida mizeezo yakazwa kucibeela citegwa Department of Christian Community Guidance, icakavwulide ba Pulotesitanti bayumu myoyo alimwi ibakali kubakazya cakuteengelela Bakamboni ba Jehova.

Bumwi buzuba mukwesu umwi wakayaanya walupati-pati mumfwulumende iwakali kubelekela antoomwe aba Minisita ba Ministry of Religious Affairs. Baalumi aabo bobilo bakazyibana kuti bazwa mumunzi omwe, aboobo bakakkomana kubandika mucisyobo cabo. Ciindi mukwesu naakaambila walupati-pati mumfwulumende ooyo kujatikizya mapenzi ngobakajisi Bakamboni kucibeela citegwa Directorate General of Christian Community Guidance, walupati-pati mumfwulumende ooyo wakabikka bubambe bwakuti bakwesu botatwe bakabonane abaminisita beni, aabo ibakali ba Mozilemu babotu moyo alimwi ibamvwisya. Mu May 11, 1968, baminisita bakaambilizya caantangalala kuti Bakamboni ba Jehova ncikombelo akuti bakalaangulukide kubeleka mulimo wabo mucisi ca Indonesia.

Walupati-pati mumfwulumende ooyu alimwi wakalyaaba kubagwasya Bakamboni bamisyinali ibakali kuzwa kumasi aambi kujana mapepa aakubazumizya kukkala mucisi ca Indonesia muciindi cakuti bakaabwezyele kucibeela ca Directorate General of Christian Community Guidance. Kwiinda mulugwasyo lwamwaalumi ooyu uujisi moyo mubotu, bamisyinali ibali 64 bakazumizyigwa kunjila mucisi ca Indonesia mumyaka misyoonto buyo iyakatobela.

Kuzyikusika mu 1968, bamisyinali abapainiya baalubazu ibatandila ku 300 alimwi abasikumwaya ibainda ku 1,200 bakali kukambauka makani mabotu mucisi ca Indonesia coonse. Bamisyinali bakayiisya bakwesu bamu Indonesia mboucitwa kabotu mulimo. Eeci cakabagwasya kufwambaana kuyaambele kumuuya. Lwiiyo ndobakapegwa lwakali lwaaciindi ceelede akaambo kakuti tiilyakalampa pe, bakwesu bakatalika kupenzyegwa kapati.

“Cipego ca Kkilisimasi” Kubasololi Bazikombelo

Mu 1974, cibeela citegwa Directorate General of Christian Community Guidance cakabusya makani aakuti Bakamboni ba Jehova balesyegwe. Musololi wacibeela camfwulumende eeco wakalembela ofesi yacooko cimwi acimwi camutabi wa Department of Religious Affairs, kaamba zyakubeja kuti Bakamboni ba Jehova tiibakalembedwe akuzumizyigwa mumulawo. Wakaambila balupati-pati bamumfwulumende bamucooko cimwi acimwi kuti balakonzya kubelesya twaambo tuli toonse twakulitamizya kupenzya bantu ba Jehova. Ibunji bwabalupati-pati aabo tiibakaatobela malailile aaya. Pele bamwi cakababeda coolwe cakukasya miswaangano ya Bakamboni ba Jehova alimwi amulimo wabo wakukambauka kuŋanda aŋanda.

Aaciindi nciconya eeco, mbunga iitegwa World Council of Churches (WCC) yakajisi makanze aakuba amuswaangano wazisi zinji mu Jakarta, intaamu ba Mozilemu baku Indonesia njobakabona kuti yakali ntaamu mbyaabi yakubasoka alimwi akubalwana. Akaambo kakuti manyongwe aajatikizya bukombi akatalika kukomena, mbunga ya WCC yakauleka muzeezo wakucita muswaangano ooyu. Nokuba boobo, mulimo wakusandula bantu kuba Banakristo wakaba makani aalula aciindi eeco, alimwi basitwaambo twacisi banji bakaliyoowede. Mbubonya mbocakali kulangilwa, basololi bazikombelo mulandu bakausowela kuli Bakamboni ba Jehova kwiinda mukuutongooka caantangalala mulimo wabo wakukambauka. Eeci cakapa kuti balupati-pati bamumfwulumende banji batanikubalangi kabotu Bakamboni.

Mu December 1975, manyongwe aajatikizya bukombi kaaciyaambele, cisi ca Indonesia cakalwana nsumbu ya East Timor (lino iitegwa Timor-Leste), yalo iyakali kulelwa acisi ca Portugal. Nokwakainda myezi iili ciloba, nsumbu ya East Timor yakatalika kulelwa acisi ca Indonesia, calo icakatalisya muuya wakuyandisya cisi. Bakwesu tiibakatola lubazu mutwaambo twacisi alimwi bakakaka kutola lubazu munkondo naa kusalyuuta ndembela, calo eeco icakabusya bukali bwabapati babasikalumamba. (Mt. 4:10; Joh. 18:36) Kabacibona kuti eeci ncoolwe, basololi bazikombelo bakatalisya ciyoyooyo mukusola kwaambila mfwulumende kuti ibakazye Bakamboni. Kumamanino, akati-kati kamwezi wa December 1976, basololi bazikombelo bakapegwa “cipego ca Kkilisimasi” ncobakali kulangila—inzya, mfwulumende yakaambilizya kuti Bakamboni ba Jehova balesyegwa.