CIBEELA 3
Kucisizyigwa Moyo—Ciindi Notujisi “Kaambo Kakutongooka”
“Mucizyi umwi mumbungano wakandibejekezya kuti ndakamubbida mali. Bamwi mumbungano bakaamvwa makani aaya akumusyoma. Mukuya kwaciindi, mucizyi ooyu wakandaambila kuti wakatambula makani ambi alo aakapa bumboni bwakuti tandijisi mulandu. Nokuba kuti wakalilekelela, mumoyo ndakali kulimvwa kuti tandikonzyi pe kumulekelela ndalanga zyakandicitikila.”—Ba Linda.
SENA mulimvwa mbuli mbobakalimvwa ba Linda, aabo ibakacisizyigwa kapati moyo akaambo kazintu nzyaakacita musyominyina? Cilausisya kuti bamwi balapenga kapati amicito yabambi cakunga balaleka kucita zintu zyakumuuya. Sena oobo mbocibede akulindinywe?
Sena Kuli Uukonzya “Kutwaandaanya Kuluyando lwa Leza”
Masimpe, cilakonzya kutuyumina kapati kulekelela musyomima iwakatucisizya moyo. Kayi, Banakristo beelede kuyandana umwi amweenzinyina. (Johane 13:34, 35) Ikuti musyomima watulubizyila, tulakonzya kutyompwa kapati akumvwa moyo kucisa.—Intembauzyo 55:12.
Ncobeni, Bbaibbele lyaamba kuti kuli ziindi Banakristo nobacita zintu izikonzya kupa umwi kuba ‘akaambo kakutongooka mweenzinyina.’ (Bakolose 3:13) Ikuti cili boobo catucitikila swebo kutugama, aabona cilakonzya kutuyumina kuliyumya mubukkale buli boobo. Sena kuli cikonzya kutugwasya? Amulange-lange njiisyo zyamu Magwalo zyotatwe:
Taateesu wakujulu ulizizyi zyoonse. Jehova ulazibona zintu zyoonse zicitika, kubikilizya azintu zitaluleme zitucitikila alimwi amapenzi aaboola akaambo kanzizyo. (Bahebrayo 4:13) Kuyungizya waawo, Jehova ulatweetezyegwa notupenga. (Isaya 63:9) Kunyina pe nalekela “mapenzi, naa kukatazyigwa” naa cintu cimbi cili coonse, inzya naba mubelesi wakwe umwi “kutwaandaanya kuluyando lwa Leza.” (Baroma 8:35, 38, 39) Aboobo, andiswe tatweelede kulekela cintu cili coonse naa muntu uuli woonse kutwaandaanya a Jehova.
Kulekelela tacaambi kuti mulazizuminizya zibi. Ciindi notubalekelela aabo batulubizyila, tatuubyi-ubyi, naa kuzuminizya micito yabo pe. Amuyeeye kuti Jehova tazizuminizyi pe zibi, pele ulalekelela ikuti kakuli kaambo kakucitila boobo. (Intembauzyo 103:12, 13; Habakuku 1:13) Ciindi natukulwaizya kulekelela bamwi, Jehova utwaambila kuti tumwiiye. Walo ‘tabikkilili lyoonse mane kukabe kutamani.’—Intembauzyo 103:9; Matayo 6:14.
Ciindi notuleka kubikkilila bamwi, cigwasya ndiswe. Ino citugwasya buti? Amweezyeezye bukkale butobela. Atwaambe kuti mwabweza bbwe, ambweni litalemi kapati, akulijata mujanza litandabede. Cakutadooneka inga tiilyamubeda penzi kulijata bbwe eelyo kwaciindi cisyoonto buyo. Pele ino mbuti kuti mwasola kulijata kwaciindi cilamfwu? Ino inga mwalijata kwaciindi cilamfwu buti? Sena mulakonzya kulijata kwamaminiti masyoonto buyo, kwawoola lyomwe naa manji? Masimpe, janza lyanu lilakonzya kulema! Mubwini takuli kuti bbwe eelyo lyacinca mbolilema. Pele ikuti mwazumanana kulijata, lilakonzya kumulemena. Ncimwi buyo akubikkilila. Ikuti twazumanana kuba amfwundiilili, nomuba mukaambo kaniini buyo, tulakonzya kulicisa tobeni. Nkakaambo kaako, Jehova utukulwaizya kuti tuleke kubikkilila naa kuba amfwundiilili. Ncobeni, kuti twaleka kubikkilila, cigwasya ndiswe.—Tusimpi 11:17.
Ciindi notuleka kubikkilila bamwi, cigwasya ndiswe
“Ndakalimvwa Mbuli Kuti Jehova Lwakwe Nguwakali Kwaambaula Andime”
Ino ncinzi cakabagwasya ba Linda kuti baleke kuba amfwundiilili ciindi musyominyina naatakabacita kabotu? Cintu cimwi icakabagwasya nkuzinzibala kuyeeya twaambo twamu Magwalo itutondezya kaambo ncobakeelede kulekelela. (Intembauzyo 130:3, 4) Icakabakulwaizya kapati ba Linda nkuzyiba kuti ciindi notubalekelela bamwi, Jehova awalo ulatulekelela. (Baefeso 4:32–5:2) Ikwaamba mbotwakabajatikizya twaambo ootu, bakaamba kuti: “Ndakalimvwa mbuli kuti Jehova lwakwe nguwakali kwaambaula andime.”
Mukuya kwaciindi, ba Linda bakazyikuleka kuba amfwundiilili. Bakamulekelela camoyo woonse mucizyi ooyo, aboobo lino balo anguwe mbalongwe bamvwana kapati. Ba Linda lino baluujisi kubelekela Jehova. Amuzyibe kuti Jehova uyanda kumugwasya andinywe kucita mbubonya oobo.