Tulamwaisya Mampangala Mayumu
1 Kwiinda mukubelesya njiisyo zyakubeja alimwi alweeno kwamyaanda yamyaka iili mbwiibede, Saatani walesya myoyo amizeezo yabantu banji kuti batacinci. Umwaya njiisyo mbuli zya Butatu, kutafwidilila kwabuumi alimwi akupya mumulilo wahelo. Ukulwaizya kudooneka kuti naa Mulengi nkwali alimwi akutasyoma kuti Leza ngowakalemba Bbaibbele. Kusalaulana mubala alimwi akuyandisisya cisi cabo nzyezyintu zimwi zilesya bantu kuzumina kasimpe. (2 Kor. 4:4) Ino mbuti mbotukonzya kumwaisya makani ngobasyoma bantu aasimpide miyanda mumyoyo yabo?—2 Kor. 10:4, 5.
2 Zijatikizya Mbwalimvwa Muntu: Zyintu nzyobasyoma bantu eezyo nzyobakaambilwa kuti nzyamasimpe kanji-kanji zijatikizya mbwalimvwa muntu. Bamwi basyoma zyintu zyakubeja kuzwa kubwana. Ikutegwa tubagwasye aabo, tweelede kubandika munzila iitondezya kuti tulazilemeka nzyobayeeya.—1 Pet. 3:15.
3 Tulakonzya kubalemeka bantu aaba kwiinda mukubapa ciindi cakuti bapandulule nzyobasyoma alimwi acibapa kuti kabasyoma boobo. (Jak. 1:19) Antela basyoma kapati mukutafwidilila kwabuumi akaambo kakuti bayandwa babo bakafwa, aboobo bayandisisya kuti bakabonane alimwi. Ambweni balasekelela mazuba aakulyookezya akaambo kakuti abapa ciindi cakuba amukwasyi wabo. Kuswiilila mbobabandika kulakonzya kutugwasya kuti tuzyibe mbobalimvwa alimwi akuti twiingule munzila yeelede.—Tus. 16:23.
4 Amwiye Jesu: Jesu wakatupa cikozyanyo cibotu naakaingula mibuzyo yamwaalumi wakali syaazibwene mu Mulawo. Mbwaanga mwaalumi ooyu wakali kuziyandisya nzyaakali kusyoma, Jesu kwiina naakamwaambila cakucita pe, nkaambo naatakazumina kucicita. Pele Jesu wakamutondezya ncaamba Magwalo, wakamulomba kuti aambe mbwayeeya alimwi akumugwasya kuti amvwisye kwiinda mukubelesya cikozyanyo.—Lk. 10:25-37.
5 Ijwi lya Leza lilakonzya kupa bantu kuti baleke kusyoma njiisyo zyamuzikombelo zyakubeja. (Heb. 4:12) Kwiinda mukubapandulwida kasimpe cakukkazyika moyo, inga twakonzya kubagwasya kuti bazikake njiisyo zyakubeja akuzumina kasimpe kakonzya kubanununa.—Joh. 8:32.