Mulimo Wakukambauka Uyandika Lukakatilo
1 Kwamyaka yiinda ku 30, mwaapostolo Paulo wakakkomana mumulimo wakwe wakukambauka. Mbuli mulimo uuli woonse uuyandika, wakajana buyumuyumu mumulimo wakwe wakukambauka. (2 Kor. 11:23-29) Pele, Paulo kunyina naakacileka kukambauka. (2 Kor. 4:1) Wakalizyi kuti nguzu zikonzya kumugwasya kukakatila mumulimo wakwe zyakali kuzwa kuli Jehova. (Flp. 4:13) Akaambo kacikozyanyo cakwe cibotu cakukakatila, Paulo wakali kukonzya kwaamba kuti: “Amwiiye ndime, mbubonya mbuli ambebo mbundaiya Kristo.”—1 Kor. 11:1.
2 Ikukakatila Mumasukusyo Mazuba Aano: Abuzuba, bakwesu banji balasampaulwa, kukazyigwa, naa kusulaikwa abamumukwasyi, babelesinyina naa basicikolonyina. (Mt. 10:35; Joh. 15:20) Ambweni eeci cilamucitikila andinywe. Kulubazu lumwi, andiza mulaciswa-ciswa, naa mujisi penzi limwi ndyomulwana lyalo ilisunka lusyomo lwanu alimwi alukakatilo. Tulakonzya kuyumizyigwa kwiinda mukulanga-langa makani aajatikizya zikozyanyo zyababelesi ba Leza basyomeka ibansiku alimwi azya Banakristoma bamazuba aano balo ibajana buyumuyumu akubuzunda.—1 Pet. 5:9.
3 Tulakonzya kujana nguzu kutegwa tuzumanane mumulimo wesu kwiinda mukuba masimpe kuti twasama “zilwanyo zyoonse zya-Leza.” (Ef. 6:10-13, 15) Alimwi mupailo ulayandika kapati kutegwa tukakatile. Leza ulatupa muuya wakwe uusalala kutegwa tuliyumye mumasukusyo. (2 Kor. 6:4-7) Kutegwa tuzwidilile munkondo yakumuuya, tweelede kutobela ziyeezyo zya Leza zyalo iziyootukulwaizya. (Int. 119:24, 85-88) Mbuli mwana mbwakonzya kubala cakwiinduluka-induluka lugwalo iluzwa kuli usyi siluyando, kubala Bbaibbele ciindi coonse kuyooyumya cilongwe cesu a Jehova. Tulaba abusongo ibukonzya kutugwasya kuliyumya mumasukusyo kwiinda mukuba aciiyo cesu tobeni calyoonse, calo iciyoopa kuti miyeeyo ya Leza itweendelezye notusala cakucita alimwi akuyumya lusyomo lwesu kuli Jehova.—Tus. 2:10, 11.
4 Lukakatilo Luleta Zilongezyo: Mbuli mbocakabede kuli Paulo, kukakatila cakusyomeka notucita mulimo wesu kulamukkomanisya Jehova alimwi kuleta zilongezyo kulindiswe alimwi akubantu bambi. (Tus. 27:11) Aboobo, atukanze kuliyumya mumulimo, eelyo tuyootondezya kuti lusyomo lwesu nduyandisi “kwiinda ingolida iikulumpala niiba yakasukusigwa mumulilo.”—1 Pet. 1:6, 7.