Kuyungizya Luzyibo Lwesu Mumulimo Wakukambauka​—Kulemba Magwalo Aali Kabotu

IKAAMBO NCOCIYANDIKA: Ibbuku lya 1 Bakorinto lili akati kamagwalo aali 14 ngaakalemba mwaapostolo Paulo kukulwaizya Banakristonyina. Ciindi muntu nalemba lugwalo inga ulijisi ciindi cakusala kabotu majwi aakubelesya alimwi awalo sikulembelwa ulakonzya kulubala cakwiinduluka-induluka. Magwalo ninzila mbotu yakubelesya ikukambaukila bacibbululu alimwi abalongwe. Alimwi alagwasya kapati kukambaukila baabo mbotutakonzyi kubandika ambabo camulomo mpande. Mucikozyanyo, muntu umwi ulakonzya kutondezya luyandisisyo pele katavwuli kujanika aŋanda. Bantu bamwi bamucilawo cesu inga kacikatazya kubandika ambabo akaambo kakuti bakkala muzilawo zikwabilidwe kapati, mumaanda aayakilidwe bwaanda naa mumasena aatavwuli kusikwa abantu. Ino nzintu nzi zimwi nzyotweelede kubikkila maano kwaambisya ciindi notulembela muntu ngotutazyi kabotu?

MBOMUKONZYA KUCITA OOBO:

• 

  Amulembe ncomukonzya kwaamba kuti kamubwenene buya amuntu ooyo. Amulizyibye kumatalikilo, alimwi akwaamba kaambo ncomulembela lugwalo oolo. Ambweni mulakonzya kumubuzya mubuzyo akumukulwaizya kuti auyeeye cakuzinzibala, alimwi akumwaambila kujatikizya webbusaiti yesu. Mpoonya amumwaambile kujatikizya bubambe bwaciiyo ca Bbaibbele caaŋanda alimwi akulemba mitwe imwi yazibalo kuzwa mubbuku limwi akati kamabbuku ngotubelesya kuyiisya bantu. Zibelesyo mbuli kakkaadi ka jw.org, kapepa kakutamba bantu naa katulakiti inga zyabikkilizyigwa mulugwalo

• Mutavwuzyi zyakulemba. Lugwalo lwanu talweelede kulampa kapati, buyo-buyo sikulembelwa ulakonzya kumvwa butolo kulubala.—Amubone lugwalo lwacikozyanyo

• Amulubale cakwiinduluka-induluka kutegwa mubone aayandika kubambulula, musinizye kuti lulembedwe kabotu alimwi talukatazyi kubala, lulembedwe munzila yabulemu alimwi iili kabotu