Kubandika Kwiinda Mukulembelana Ŋwadi

IŊWADI zyasumpula buumi abukkale bwatuulunzuma twabantu. Bunji bwamabbuku aamu Magwalo aa Bunakristo aa Cigiliki kumatalikilo akali buyo ŋwadi. Sunu tulakonzya kulemba ŋwadi ikutegwa tuyumye-yumye basyomi bapya, ikutambikizyanya makani abeenzuma, ikukulwaizya bakwesu abacizyi bajisi mikuli iilibedelede, ikuyumya-yumya baabo ibali mumapenzi akutumya makani aayandika mukulanganya milimo yambungano.—1 Tes. 1:1-7; 5:27; 2 Pet. 3:1, 2.

Alimwi ikulemba ŋwadi ninzila imwi iigwasya kapati mukupa bumboni. Mumasena amwi kulakonzya kuba minzi azyooko zimwi zikasyidwe oomo motutakonzyi kupa bumboni cakwaanguluka. Ibamwi tabavwuli kujanika aŋanda, aboobo tatwaambauli ambabo ciindi notuli mubukambausi bwakuŋanda aŋanda. Bamwi bakkala mumasena motutakonzyi kusika.

Mulakonzya kukakilwa kuzwa aŋanda ikuti kamucisidwe, kakuli mpeyo, imvula naa mulawo uukasya bantu kweendeenda cakkwana ciindi cimwi cibikkidwe. Sena tamukonzyi kulemba ŋwadi kucita kuti muzumanane kukambauka kumusazinyoko naa muntu buyo umbi ngomwakabandikide limwi nomwakali kwiizya? Sena kuli muntu ngomwali kwiiya limwi Bbaibbele iwakalonga? Ambweni inga mwamuyumya-yumya ikuzumanana aluyando ndwajisi kuzintu zyakumuuya kwiinda mukumulembela ŋwadi. Antela mulijisi makani amwi amu Magwalo aayandika ngomuyanda kwaambila baabo ibakakwatana ino-ino, ibakatumbuka ino-ino naa bakafwidwa muyandwa wabo.

Ikukambauka Kwiinda Muŋwadi

Nomukambaukila muntu ngomutanabwene kwiinda mukumulembela ŋwadi, ncibotu kusaanguna kulipandulula. Mulakonzya kumupandulwida kuti muli mukutola lubazu mumulimo uucitwa abasikulisungula nyika yoonse mboizulwa. Amumwaambile kuti muli Bakamboni ba Jehova ikuti kacili buyo kabotu kucita boobo. Amumuzyibye muntu ooyo ncomwamulembela ŋwadi muciindi cakumuswaya buya. Amulembe mbuli kuti mubandika anguwe mulomo mpande. Pele, kweelana alulayo lwakuti tweelede kuba ‘bantu bacenjede mbuli nzoka alimwi akuba babombe mbuli nkwilimba,’ amuyeeye bunji bwamakani ngomuya kulemba.—Mate. 10:16.

Muŋwadi, amubikkilizye anzyomwalikunga mwamwaambila muntu ooyo ikuti mwamuswaya buya. Mulakonzya kubelesya ntalisyo iili mubbuku lya Kukambitsirana naa ntalisyo iiyeeme aa Lugwalo iijanika mu Mulimo Wesu Wabwami waino-ino. Mulakonzya kumubuzya mubuzyo akumukulwaizya kuti auyeeye cakuzinzibala. Basikumwaya bamwi bapandulula buyo kuti tujisi bubambe butabbadelwi bwakwiingula mibuzyo iijatikizya Bbaibbele mpoonya akwaamba mitwe yazibalo zimwi kuzwa mubbuku ndyotubelesya kweendelezya ziiyo. Apeeji 73 kwalembwa ŋwadi yacitondezyo mukupa bumboni. Ŋwadi eeyi ilakonzya kumupa twaambo tumwi ntomunga mwabelesya, pele ncibotu ikucinca-cinca nzyomulemba. Ikuti kamubelesya twaambo ntutonya lyoonse, mukuya kwaciindi ibantu balakonzya kutambula ŋwadi njeena cakwiinduluka-induluka.

Ibantu bamwi tabalibambilide pe ikubala ŋwadi ndamfwu iizwa kumuntu ngobatazyi. Aboobo, cilayandika ikulemba ŋwadi mfwaafwi. Ikuti ŋwadi yanu kaili ndamfwu, sikwiitambula uyoomvwa butolo kwiibala yoonse. Inga cagwasya ikubikkilizya akapepa kamwi kasimbidwe buya ikakubatamba kumiswaangano ku Ŋanda ya Bwami. Mulakonzya kubikkilizya akatulakiti, broshuwa naa Ngazi Yamulindizi antela Galamukani! akubapandulwida kuti balakonzya kunootambula mamagazini aaya lyoonse ikuti kabayanda. Ambweni mulakonzya kubabuzya naa inga bayanda kuswaigwa kuŋanda yabo ikutegwa mukazumanane amubandi kumakani ngomwabalembela.

Mboyeelede Kuboneka Ŋwadi

Amwiilangisye lino ŋwadi yacitondezyo. Amubone kuti: (1) Iboneka kabotu, tailembedwe cabuyamba pe. (2) Nokuba kuti imvwulupu yasweeka, sikutambula ŋwadi unoocijisi kkeyala alimwi azina lyanu. (3) Ncoyalembelwa ŋwadi caambwa kabotu-kabotu alimwi munzila iigaminide mumuncali wakusaanguna. (4) Kaambo akamwi kalembwa mumuncali nsini. (5) Ikutegwa ŋwadi eeyi izuzikizye makanze aanjiyo, yalembwa munzila yabulongwe alimwi yabulemu.

Iŋwadi iilembwa munzila yabulemu mbuli yeeyo mulembi wambungano njalembela kuofesi lyamutabi, kulabikkilizyigwa izina lyambungano alyamulembi, ikkeyala yakwe abuzuba bwamwezi. Izina akkeyala lyamuntu walembelwa naa mbunga yalembelwa ŋwadi zilabikkilizyigwa azyalo. Mpoonya kutobela ntalisyo yeelede. Kumamanino aaŋwadi imajwi aakuti “Ndime wanu” naa “Ndime” alalembwa atala lyazina lyasikulemba. Ikuti naa mwali kubelesya ntaipi, mweelede kulemba izina lyanu abboopeni.

Nomulemba ŋwadi iili yoonse, amubikkile maano kukulemba mabala aaluzi, kwaalemba munzila yeelede, kubikka twaandaanyo toonse tuyandika alimwi akwiilemba kabotu. Mwacita boobo, ŋwadi yanu inoolembedwe cabulemu kubikkilizya amulumbe uuli mumo.

Muŋwadi, lyoonse mweelede kulemba kkeyala njayakubelesya sikutambula aakuyanda kwiingula—inga cainda kubota kuti mwalemba kkeyala yanu. Ikuti kamuyeeya kuti tacili kabotu ikulemba kkeyala yanu nomupa bumboni kwiinda mukulemba ŋwadi kubantu mbomutazyi, amubabuzye baalu naa inga bamuzumizya kubelesya kkeyala yaku Ŋanda ya Bwami. Mutabelesyi kkeyala ya Watch Tower Society pe, akaambo kakuti kucita boobo inga kwabonwa kuti ŋwadi yanu yakazwa kuofesi imwi ya Mutabi calo icikonzya kunyonganya zintu. Ikuti kunyina nomwalemba kkeyala njakonzya kubelesya sikutambula ŋwadi pele kakuli mabbuku naa mamagazini ngomwabikkilizya, acalo eeci inga camupa kuyeeya kuti ibaku Mutabi mbabakamutumina ŋwadi.

Amubone kwaamba kuti mwabikka zitampa zyamali aakkwene, ikapati kuti mwabikkilizya amabbuku naa mamagazini. Ikuti mwabelesya citampa camali aabulide, nkokuti sikutambula ŋwadi uyoobbadelesyegwa mali aabulila, aboobo eeci ciyooubya-ubya mulumbe wanu. Kamuyeeya kuti muzisi zinji ikuti kwabikkilizyigwa magazini naa broshuwa mumvwulupu, kuyandika kuyungizya mali kutegwa zitumwe kuleka leelyo noili ŋwadi buyo.

Ikubelesya Mabala Aayelede

Mwamanizya buyo kulemba ŋwadi yanu, amwiibale kutegwa mulange-lange mabala ngomwabelesya. Ino amvwika buti? Sena yalembwa munzila yabulongwe alimwi cabupampu? Luyando alubomba mbube bumwi mbotulombozya kutondezya notuyanzana abamwi. (Gal. 5:22, 23) Ikuti kakuli mpomwabona mabala aatali kabotu naa aapa muzeezo uutyompya, amwaacince.

Iŋwadi ilakonzya kusika kumasena nkomutakonzyi kusika. Akaambo kaceeci, iŋwadi ncibelesyo ciyandika kapati mumulimo wesu. Mbwaanga iŋwadi iiminina ndinywe azintu nzyomusyoma, amubikkile maano kapati kutwaambo ntomwalemba, mbotumvwika amboiboneka ŋwadi. Ilakonzya kugwasya kapati mukuyumya-yumya akukulwaizya muntu kutegwa atalike kweenda munzila iitola kubuumi butamani.