Amubambe Lukamantano Mumbungano

Ciindi notuli abasyomima, tulimvwa mbuli mbwaakalimvwa Mwami Davida naakati: “Eelo kaka ncibotu alimwi cilakondelezya kuti babunyina kabakkede antoomwe calukamantano!” (Intembauzyo 133:1) Lukamantano lwesu talulibooleli buyo. Toonse tweelede kucita lubazu lwesu mukubamba lukamantano.

1. Ncinzi cikkomanisya akati kabantu ba Leza?

Kuti wajanika kumuswaangano wambungano kubusena bumbi, ambweni inga kotauzyi mwaambo, pele munzila zinji unoolimvwide kwaanguluka. Nkaambo nzi? Nkaambo kufwumbwa nkooya twiiya Bbaibbele kubelesya mabbuku aakozyenye. Alimwi tulasolekesya kutondezyanya luyando. Kufwumbwa naa tukkala kuli, toonse ‘twiita zina lya Jehova, akumukomba calukamantano.’—Zefaniya 3:9, bupanduluzi buyungizyidwe.

2. Ncinzi ncomukonzya kucita kutegwa mukulwaizye lukamantano?

“Amuyandane kapati kuzwa ansi aamoyo.” (1 Petro 1:22) Mbuti mbomukonzya kulubelesya lulayo oolu? Muciindi cakubikkila maano kukutalondoka kwabamwi, amubone bube bubotu mbobajisi. Muciindi cakuyanzana buyo abantu bajisi bukkale bukozyenye abwanu, amusole kuyanzana abaabo bazwa mubukkale bwiindene abwanu. Alimwi tweelede kubeleka canguzu kutegwa tucileke kuba alusalululo.—Amubale 1 Petro 2:17.a

3. Ncinzi ncomukonzya kucita kuti kwaba kutamvwana a Munakristonyoko?

Tulikamantene, nokuba kuti tatulondokede. Zimwi ziindi tulakonzya kumutyompya umwi naa kumunyemya buya. Aboobo Jwi lya Leza litwaambila kuti “amuzumanane . . . kulekelelana,” lilayungizya kuti: “Mbubonya Jehova, mbwaakamulekelela camoyo woonse, andinywe mweelede kucita mbubonya oobo.” (Amubale Bakolose 3:13.) Tulamulubizyila Jehova ziindi zitabaliki, pele lyoonse ulatulekelela. Aboobo uyanda kuti andiswe katubalekelela bakwesu. Kuti mwazyiba kuti mwamunyemya umwi, amubweze ntaamu yakubamba twaambo.—Amubale Matayo 5:23, 24.b

AMWIIYE ZINJI

4. Amuleke kusalulula

Toonse tweelede kubayanda bakwesu boonse. Pele cilakonzya kutuyumina kuyanda muntu uujisi bukkale bwiindene abwesu. Ncinzi cikonzya kutugwasya? Amubale Milimo 10:34, 35, akubandika mibuzyo eeyi:

• Jehova ulabayanda Bakamboni bakwe ibazwa kumisyobo yoonse. Ino eeci ceelede kumupa kubabona buti aabo ibazwa mubukkale bwiindene abwanu?

• Nkusalulula kuli buti kudumide kubusena nkomukkala nkomweelede kutantamuka?

Amubale 2 Bakorinto 6:11-13, akubandika mubuzyo ooyu:

• Mbuti mbomukonzya kubamba cilongwe abakwesu abacizyi ibazwa mubukkale bwiindene abwanu?

5. Amulekelele camoyo woonse alimwi akubamba luumuno

Jehova ulatulekelela camoyo woonse nokuba kuti walo kunyina nayooyandika kuti swebo tumulekelele. Amubale Intembauzyo 86:5, akubandika mibuzyo eeyi:

• Ino nkupati buti kulekelela kwa Jehova?

• Nkaambo nzi ncomulumba akaambo kakulekelela kwakwe?

• Mbukkale nzi bukonzya kupa kuti cituyumine kumvwana abamwi?

Mbuti mbotukonzya kumwiiya Jehova alimwi akuzumanana kumvwana abakwesu abacizyi? Amubale Tusimpi 19:11, akubandika mubuzyo ooyu:

• Kuti muntu umwi wamunyemya naa kumutyompya, ncinzi ncomukonzya kucita kutegwa mubambe luumuno?

Zimwi ziindi tulakonzya kubanyemya bamwi. Pele kuti eeco cacitika, ncinzi ncotweelede kucita? Atweebelele VIDIYO, akubandika mubuzyo uutobela.

VIDIYO: Kubamba Luumuno Kuletela Zilongezyo (6:01)

• Muvidiyo, ncinzi ncaacita mucizyi kutegwa abambe luumuno?

6. Amubone bube bubotu mbobajisi bakwesu abacizyi

Ciindi notuba acilongwe abakwesu abacizyi, tulazyiba mbazu mobacita kabotu amoomo mobalezya. Mbuti mbotukonzya kubikkila maano mumbazu mobacita kabotu? Atweebelele VIDIYO, akubandika mubuzyo uutobela.

VIDIYO: Amuzilange Kabotu Zintu! (5:10)

• Ncinzi cikonzya kumugwasya kubona bube bubotu mbobajisi bakwesu alimwi abacizyi?

Jehova ubikkila maano kubube bubotu mbotujisi. Amubale 2 Makani 16:9a, akubandika mubuzyo ooyu:

• Ino kuzyiba kuti Jehova ulabikkila maano kubube bubotu mbomujisi kumupa kulimvwa buti?

MUBUFWAAFWI

Mulakonzya kukulwaizya kubamba lukamantano mumbungano kwiinda mukulekelela bamwi alimwi akuyanda bakwesu abacizyi boonse.

Ncinzi Ncomwaiya?

• Mbuti mbomukonzya kuzunda muuya wakusalulula?

• Ncinzi ncomukonzya kucita kuti kwaba kutamvwana a Munakristonyoko?

• Nkaambo nzi ncomuyanda kwiiya cikozyanyo ca Jehova cakulekelela bamwi?

AMUZYIBE ZINJI

Amubone zikozyanyo zya Jesu mbozitugwasya kutabeteka bamwi.

Gusya Tanda (6:56)

Sena tuleelede kulilekelela nokuba kuti tulimvwa kuti kunyina nitwakalubizya?

“Ikulilekelela​—Ninzila Iizwidilila Mukubamba Luumuno” (Ngazi Yamulindizi, November 1, 2002)

Amubone bamwi mbobakaiya mbociyandika kutasalulula.

Mutani Kubeteki Kweelana Ambwalibonya Muntu (5:06)

Amubone nzila nzyomukonzya kubelesya kumana mazwanga ngomujisi kaataningasika antaamu yakunyonganya luumuno lwambungano.

“Amumanizye Mazwanga Munzila Yaluyando” (Ngazi Yamulindizi, May 2016)