CIIYO 16
Ncinzi Ncaakacita Jesu Naakali Anyika?
Bantu banji Jesu bamuyeeyela kuba muvwanda, musinsimi musongo, naa mwaalumi uuli afwaafwi kufwa. Sena kuli ncotukonzya kwiiya kujatikizya nguwe kwiinda mukulanga-langa buumi bwakwe naakali anyika? Muciiyo eeci, tulalanga-langa zintu zimwi ziyandika kapati nzyaakacita Jesu alimwi ambozimujatikizya.
1. Mulimo nzi mupati Jesu ngwaakacita?
Mulimo mupati ngwaakacita Jesu, ‘nkwaambilizya makani mabotu aa Bwami bwa Leza.’ (Amubale Luka 4:43.) Wakakambauka makani mabotu aakuti Leza wakali kuyootalisya bwami, naa mfwulumende iyakali kuyoomanizya mapenzi woonse ngobajisi bantu.a Kwamyaka yotatwe acisela, Jesu wakabeleka canguzu kwaambila bantu mulumbe uukulwaizya ooyu.—Matayo 9:35.
2. Ino maleele aa Jesu akajisi makanze nzi?
Bbaibbele lyaamba ‘milimo minji mipati, zintu zigambya, azitondezyo Leza nzyaakacita kwiinda muli Jesu.’ (Milimo 2:22) Kwiinda munguzu zya Leza, Jesu wakali kukonzya kuumuzya guwo, kusanina bantu banji, kuponya balwazi, nokuba kubusya bafwide. (Matayo 8:23-27; 14:15-21; Marko 6:56; Luka 7:11-17) Maleele aa Jesu akatondezya caantangalala kuti Leza ngonguwe wakamutuma. Alimwi akasinizya kuti Leza ulijisi nguzu zyakwaamanizya mapenzi woonse.
3. Ncinzi ncotukonzya kwiiya kujatikizya mbwaakali kupona Jesu?
Jesu wakali kumumvwida Jehova mubukkale boonse. (Amubale Johane 8:29.) Nokuba kuti wakali kukazyigwa, cakusyomeka Jesu wakacita zyoonse nzyobakamulomba Bausyi mane kusikila kulufwu. Wakasinizya kuti cilakonzyeka kubantu kumubelekela Leza nomuba mubukkale bukatazya. Aboobo Jesu wakatusiila ‘citondezyo kutegwa twiitobelesye mikondo yakwe.’—1 Petro 2:21.
AMWIIYE ZINJI
Atulange-lange Jesu mbwaakaambila bantu makani mabotu alimwi akucita maleele.
4. Jesu wakaambilizya makani mabotu
Jesu wakali kweenda misinzo milamfwu mulusuko, kayaabwaambilizya makani mabotu kubantu banji. Amubale Luka 8:1, akubandika mibuzyo eeyi:
Sena Jesu wakali kukambaukila buyo bantu ibakali kubungana akumuswiilila?
Nkusoleka kuli buti nkwaakali kucita Jesu kutegwa ajane bantu?
Leza wakaambilizya kuti Mesiya uyakwaambilizya makani mabotu. Amubale Isaya 61:1, 2, akubandika mibuzyo eeyi:
Ino Jesu wakabuzuzikizya buti businsimi oobu?
Sena muyeeya kuti bantu mazuba aano bayandika kwaamvwa makani mabotu aaya?
5. Jesu wakayiisya kasimpe kayandika
Kunze buyo lyakukambauka makani mabotu aajatikizya Bwami bwa Leza, Jesu wakayiisya ziiyo zigwasya. Atulange-lange zikozyanyo zimwi kuzwa mu Mulumbe wakwe waa Cilundu uuzyibidwe kapati. Amubale Matayo 6:14, 34 a 7:12, akubandika mibuzyo eeyi:
Ndulayo nzi lugwasya Jesu ndwaakapa mutupango ootu?
Sena muyeeya kuti lulayo oolu lucigwasya?
6. Jesu wakacita maleele
Jehova wakamupa nguzu zyakucita maleele manji. Kutegwa mubone cikozyanyo comwe, amubale Marko 5:25-34 naa kweebelela VIDIYO. Mpoonya tulabandika mibuzyo iitobela.
Muvidiyo, ncinzi mukaintu iwakali kuciswa ncaakasyoma?
Ncinzi camukkomanisya kujatikizya maleele aaya?
Amubale Johane 5:36, akubandika mubuzyo ooyu:
Ino maleele aa Jesu apa “bumboni” nzi, naa atondezya nzi kujatikizya nguwe?
Sena Mulizyi?
Bunji bwamakani ngotuzyi kujatikizya Jesu azwa mumabbuku aamu Bbaibbele one aayitwa kuti Mabbuku aa Makani Mabotu—Matayo, Marko, Luka alimwi a Johane. Mulembi wa Makani Mabotu umwi aumwi wakabikkilizya twaambo tumwi kujatikizya Jesu. Twaambo toonse ootu tuleendelana calo icitugwasya kubumvwisya kabotu buumi bwakwe.
MATAYO
nguwakalemba bbuku lyakusaanguna lya Makani Mabotu. Litwaambila makani manji kujatikizya njiisyo zya Jesu, kwaambisya nzyaakayiisya kujatikizya Bwami bwa Leza.
MARKO
wakalemba Bbuku lya Makani Mabotu liinda kufwiimpa. Litwaambila zintu zinji alimwi izikkomanisya.
LUKA
Utwaambila mbuli mbowakali kuyandika kapati mupailo kuli Jesu alimwi ambwaakali kubeendelezya bamakaintu.
JOHANE
utwaambila zintu zinji Jesu nzyaakaambila balongwe bakwe alimwi abantu bambi. Eeci citugwasya kuzyiba bwini Jesu mbwaakeabede.
BAMWI BAAMBA KUTI: “Jesu wakali mwaalumi buyo mubotu, ikutali Mesiya.”
Ino nywebo muyeeya buti?
MUBUFWAAFWI
Jesu wakakambauka kujatikizya Bwami bwa Leza, wakacita maleele, alimwi wakamumvwida Jehova mubukkale buli boonse.
Ncinzi Ncomwaiya?
Mulimo nzi mupati ngwaakacita Jesu naakali anyika?
Ino maleele aakwe akatondezya nzi?
Ino nziiyo nzi zigwasya nzyaakayiisya Jesu?
AMUZYIBE ZINJI
Makani nzi ngaakabandika kapati Jesu?
“Bwami bwa Leza—Ncobuyandika Kapati Kuli Jesu” (Ngazi Yamulindizi, October 1, 2014)
Amubone kaambo katupa kusyoma kuti maleele aa Jesu akacitika ncobeni.
“Ino Ncinzi Ncomukonzya Kwiiya Kumaleele Aa Jesu?” (Ngazi Yamulindizi, July 15, 2004)
Amubone cikozyanyo ca Jesu cakulyaaba mbocakamugwasya kucinca mwaalumi umwi.
“Buumi Bwangu Bwakali Bwakuliyanda” (Ngazi Yamulindizi, October 1, 2014)
Amubone mulongo wazintu zipati-pati nzyaakacita Jesu izibikkidwe kweelana ambozyakali kutobelana kucitika.
a Mu Ziiyo 31-33 tuyoobandika makani manji kujatikizya Bwami bwa Leza.