Amubacenjelele Bamayi Babeji!
“Mbubonya oobo aakati kanu kuyooba bamayi babeji.”—2 PITA 2:1, Ci.
1. Ncinzi Juda ncaakayandide kulemba, alimwi nkaambo nzi ncaakaacincila makani aakwe?
MA! CILANYANDYA kaka eco! Bamayi babeji mumbungano ya Bunakristo yamumwaanda wamyaka wakusaanguna! (Matayo 7:15; Incito 20:29, 30) Imunyinaa Jesu anyika Juda wakalicibwene kabotu-kabotu eci cakali kucitika. Wakaamba kuti wakakanzide kubalembela basyominyina “makani aalufutuko ndotufutusigwa toonse, nywebo aswebo,” pele wakapandulula boobu: “nkabela lino moyo wangu wandisinikizya kumulembela akumukombelezya kuti mulwanine lusyomo.” Nkaambo nzi Juda ncaakaacincila makani ngaakatiambe? Nkaambo mbuli ambwaakaamba, “kulisobelede [mukati kambungano] . . . bamwi bantu . . . balasandula luzyalo lwa-Leza wesu kuba zisusi zibi.”—Juda 3, 4.
2. Nkaambo nzi imagwalo aa 2 Petro caandaano 2 alimwi a Juda ncaakozyenye kapati?
2 Kulangilwa kuti Juda wakalemba lugwalo lwakwe Petro mbwaakamanizya buyo kulemba lugwalo lwakwe lwabili. Cakutadooneka Juda wakalilubalide kale lugwalo olu. Aboobo, wakalemba mizeezo minji iikozyenye mulugwalo lwakwe lwamalailile aakulwaizya kapati. Eelyo mukulanga-langa kwesu kwa 2 Petro caandaano 2, tuyakubona mbuli mbolukozyenye alugwalo lwa Juda.
Intenda zya Njiisyo Zyabubeji
3. Ncinzi cakacitika kaindi Petro ncaamba kuti cakali kuyoocitika alimwi?
3 Petro naakamana kukulwaizya ibanyina kuti bateye matwi kubusinsimi, wakaamba boobu: “Pele kwakasika abamwi basinsimi babeji akati kabantu [mu Israyeli yakale], mbubonya mbukuyooba baiyi babeji akati kandinywe.” (2 Petro 1:14-2:1) Ibantu ba Leza muciindi cakale bakatambula businsimi bwakasimpe, pele alimwi bakayaana anjiisyo zyabumpelenge zyabasinsimi babeji. (Jeremiya 6:13, 14; 28:1-3, 15) “Mubasinsimi baku-Jerusalemu,” mbwaakalemba Jeremiya obu, “ndibwene cintu ciinda kusesemya. Balacita bumambe, baleenda mukubeja.”—Jeremiya 23:14.
4. Nkaambo nzi bamayi babeji ncobeelede lunyonyooko?
4 Kakanana zintu bamayi babeji nzyobakali kuzyikucita mumbungano ya Bunakristo, Petro waamba kuti: “Aba bayoonjizya kumbali injisyo zinyonyoona, bayootama naba Mwami wabo [Jesu Kristo] uwakabanununa, aboobo bayoofwambaana kuliletela lunyonyooko.” (2 Petro 2:1; Juda 4) Munjiisyo eezyo nzyoona zinyonyoona zyamumwaanda wamyaka wakusaanguna mumwazwa Kristendomu ngotuzi mazubaano. Petro wakatondeezya ikaambo bamayi babeji mukusinizya boonse ncobeelede lunyonyooko naamba kuti: “Bantu banjibanji bayoobatobela muzisusi zyabo zibi, nkabela nkaambo kabaaba inzila yabwini iyoosampaulwa.”—2 Petro 2:2.
5. Milandu nzi bamayi babeji njobakajisi?
5 Amuceezeezye eci! Akaambo kakuyunga kwabamayi babeji, banji-banji mumbungano bakali kuyoojatikizigwa muzisusi zisofweede. Ibbala lya Cigiliki lisanduludwe kuti “zisusi” lyaamba kutalyeendelezya, kusesemya, kunyomenena, kubula nsoni mukutalilemeka. Petro wakali baambilide kale Banakristo kuti ‘bakalivunidwe kubusofwaazi bwaansi ano buzwa kuzisusi zibi.’ (2 Petro 1:4) Pele bamwi bakali kuyoojokela kuzisusi zili boobo, alimwi bamayi babeji mumbungano mbibakali kuyakubaa mulandu mupati! Aboobo inzila yalusinizyo yakali kuyoosampaulwa. Ma! Taali mpaakubija. Ncobeni, aka nkaambo Bakamboni ba Jehova sunu nkobeelede kulangisisya akucenjelela. Tatweelede kuluba kuti, ikwiinda mukulilemeka kwesu, tulakonzya kumutembaula alimwi akumusampaula Jehova Leza abantu bakwe.—Tusimpi 27:11; Ba-Roma 2:24.
Ikutalisya Njiisyo Zyakubeja
6. Ncinzi cikulwaizya bamayi babeji, alimwi ino baziyandaula buti zintu nzyobayanda?
6 Cabusongo, tulalibambila kubona mbuli bamayi babeji mbobakutalisya kuyeeya kwabo kwakuupaupa ameso. Petro wasaanguna kwaamba kuti balakucita cakumbali, kabotu-kabotu calucengo, munzila yabumpelenge. Mpoona uyungizya kuti: “Mululikumbuzyo lwabo bayoomunyanzya-nyanzya amajwi aalukukubiko.” Kulikumbuzya kwakuliyanda nkokubapa nguzu bamayi babeji, mbubwena mbuli mbokwaambisidwe mubusanduluzi bwa Ntestamente Impya yaci Ila kuti: “Inzyo nkaambo kamunatu bakalavubila kuli umwe kumazwi akucenga.” Mumuzeezo ngumunya oyu, busanduluzi bwa Cipangano Cipya mu ciLenje abwalo awa bwaamba kuti: “Ceebo cakusuna bubile, balaakusebensesha makani akubeca.” (2 Petro 2:1, 3) Ŋambilo zyabamayi babeji zikonzya kumvwika mbuli kuti zilikabotu, nzyakasimpe kumuntu uutacenjede munzila yakumuuya, pele majwi aabo abambilidwe kuti ‘banyanzye-nyanzye’ bantu, kubacenga calweeno kuti bacite makanze aabasilucengo aba basikuliyanda.
7. Ninjiisyo nzi yakubeja yakavwula mumwaanda wamyaka wakusaanguna?
7 Kakunyina akudooneka, bamayi babeji bamumwanda wakusaanguna bakayungwa anjiisyo zyabumpelenge zyanyika zyakaliko ciindi eco. Afwaafwi aciindi Petro naakalemba magwalo akwe, injiisyo yabusyaabusongo iitegwa Gnosticism [Luzibo Lwabasale] yakali kuyaabuba njiisyo iidumide. Aaba Basiluzibo Lwabusale bakazyi kuti kufwumbwa cintu cipangidwe kuzwa kubulongo cijisi cibi, pele buyo cizwa kumuuya ncecibotu. Aboobo, bamwi babo bakati tacikwe makani kufwumbwa muntu ncacita kumubili wakwe wanyama. Mukuya kwaciindi bakatondezya kuti, muntu takazumanani amubili ngoona oyu. Eelyo bakamanizya njiisyo yabo eyi kabati, zibi zicitwa kumubili—kubikkilizya azyamukoonana—tazikwe makani, kwiina mbozibede. Kulangika kuti nzila eyi yakulanga zintu kumwi njiyakabayunga bamwi bakali kulyaamba kuti Mbanakristo.
8, 9. (a) Nkuyeeya kunyongene kuli buti kwakajatikizya Banakristo bamwi bakusaanguna? (b) Kweelana abwakaamba Juda, ncinzi bamwi mumbungano ncobakali kucita?
8 Umwi sikwiiya Bbaibbele wakacaamba boobu eci kuti ‘kwakali bantu bamwi bakakasya injiisyo yaluse’ naa ‘yaluzyalo.’ (Ba-Efeso 1:5-7) Kweelana ambwaakaamba muntu oyu, kukazyanya kwabamwi akati kabo kwakali kwaambwa boobu: “Sena mwaamba kuti [luzyalo] lwa Leza ndunji kapati cakuti lulakonzya kulekelela zibi zyoonse? . . . Kuti naa mboobo nkokuti katuzumanana buyo kucita zibi, nkaambo luzyalo lwa Leza luyakusalazya zibi zyoonse. Atwaambe kuti mbozivwulila zibi nzyotucita, alwalo [luzyalo] lwa Leza luyakubelekesya.” Sena kuli nomwakamvwa kuyeeya kwabumpelenge kwiinda waawa?
9 Mwaapostolo Paulo wakaswaangana akuyeeya kulubide kujatikizya luse lwa Leza ciindi naakabuzya kuti: “Sa tucikonzya kukala muzibi kuti luzyalo lukainde kuvula?” Alimwi wakayungizya kubuzya kuti: “Sa tucite zibi, nkaambo kakuti tatuli kunsi ku-Mulao anukuti tuli kunsi kuluzyalo?” Kumubuzyo umwi aumwi Paulo wakaingula cakusinizya kuti: “Ne!” (Ba-Roma 6:1, 2, 15) Masimpe cilalibonya kuti, bamwi bantu “ba[k]asandula luzyalo lwa-Leza wesu kuba zisusi zibi,” mbubwena mbuli Juda mbwaakacibona. Pele Petro utondezya kuti kubantu bali boobo, ‘lunyonyooko taluli mukoona pe.’—Juda 4; 2 Petro 2:3.
Zikozyanyo Zicenjezya
10, 11. Nzikozyanyo nzi zyotatwe zyakucenjezya Petro nzyapa?
10 Kutegwa azyibye cakusinizya kuti Leza masimpe uyakutola ntaamu kubantu bacita zibi acaali, Petro wapa kwiinda mu Magwalo zikozyanyo zyotatwe zicenjezya. Lutaanzi, walemba kuti: “Leza takabalekede nibaba baangelo abakabisya.” Kuli baaba Juda waamba kuti, ‘tiibakajatisya bwami bwabo bwakusaanguna pele bakabusia busena bwabo’ kujulu. Bakaseluka baboola anyika Izambangulwe kalitanacitika akusama mibili yabuntu kutegwa baonane abana basimbi babantu. Ikusubula kutalilemeka kwabo kwabunyama, alimwi kuteelede, bakafwusilwa “mutulambwe twamudima uusia mbi,” naa mbuli mbwaamba Juda kuti Leza, “wakabaanga azyaanzyo zitamani mumudima uusia mbi, kuti bakalindile mane kusikila kulubeteko lwabuzuba bupati.”—2 Petro 2:4; Juda 6; Matalikilo 6:1-3.
11 Mpoona Petro wapa cikozyanyo cabantu muciindi ca Nowa. (Matalikilo 7:17-24) Waamba kuti muciindi ca Nowa Leza “takailekede nyika yakalekale . . . naakapazya maanzi kulibasikasampusampu boonse baansi.” Ikumanizya kwaamba, Petro walemba kuti Leza wakabamba “kuti cibe ciluuzyo kulibaabo beenda cakasampusampu” kwiinda ‘mukuibeteka minzi ya-Sodoma a-Gomora, wakaitenta amulilo mane kwakasyaala itwe luzutu.’ Juda wakayungizya amakani ambi aakuti aabo bantu “[baka]bisya kukucita bwaamu akuba azisusi ziteelede.” (2 Petro 2:5, 6; Juda 7) Aaba bantu takuli kuti bakakumbuzya buyo koonana kuteelede abanakazi, pele alimwi bakakumbuzya koonana abaaluminyina bambi, kulangilwa kuti bakakumbuzya akoonanaa zinyama zyamusyokwe.—Matalikilo 19:4, 5; Levitiko 18:22-25.
12. Kweelana abwakaamba Petro, mbuti kulilemeka mbokulumbulwa?
12 Pele aciindi ncimunya eci, Petro uzyibya kuti Jehova ngusikulumbula wabaabo bamubelekela cakusyomeka. Mucikozyanyo, ulaluula mbuli Leza “[mb]wakamubamba Nowa, mukambausi wabululami, abamwi bali musanu mubabili” ciindi Nilyakapazya Zambangulwe. Alimwi ulaamba mbuli Jehova mbwaakavwuna “Lota uululeme” muciindi ca Sodoma, kamanizya akwaamba kuti: “Jehova ulizi kuvuna bamukomba kumasukusyo, akuyobola bataluleme mulukomo mane kusikila kubuzuba bwalubeta.”—2 Petro 2:5, 7-9.
Imicito Iinga Yaleta Cisubulo
13. Mbaani kapati ibabambilidwe lubeta, alimwi muukulota-lota kuli buti mobalinjizya?
13 Petro wabagama buya bantu bayobodelwe lubeta lwa Leza, kaambisya kuti, ‘mbaabo bazumina kweenda muzisusi zisofweede zyabunyama, abaabo banenya bwami.’ Tulakonzya kukumvwa kucimwa Petro nkwaakajisi mbweena mbuli mbwaamba kuti: “Ma! Aba basingulumukila balalipa bupati! Tabayoowi kusampaula balemu.” Juda walo ulemba boobu ategwa “aba basikulota-lota bacibisya mbubonya, balalisofwaazya kumubili . . . akusampaula malemu.” (2 Petro 2:10; Juda 8) Ikulota-lota kwabo kulakonzya kakujatikizya zyakuyeeya koonana kutasalali kwalo kubakulwaizya kuti bazumanane kuyandaula nkobanga bajana kutalilemeka mukoonana. Pele ino muuciimo nzi “[mo]banenya bwami” alimwi “akusampaula malemu”?
14. Muuciimo nzi bamayi babeji “[mo]banenya bwami” alimwi “akusampaula malemu”?
14 Balacita obo mukuti balazinyansya inguzu zyabuleza nzyabikkide mwini. Baalu Banakristo baiminina Jehova Leza mulemu a Mwanaakwe alimwi kwiinda mukuba boobo, abalo balibujisi bulemu bumwi bupedwe mumaanza abo. Mmasimpe balalubizya, mbubwena bwakacita Petro lwakwe, pele Magwalo akulwaizya basimbungano boonse kuti babaswiilile balemu bali boobu. (Ba-Hebrayo 13:17) Ibulubizyi bwabo mbobacita takali nkekaambo kanga kalapa kuti basampaulwe. Petro waamba kuti baangelo ibabainda kunguzu “tababikili imbeta [bamayi babeji] zyakusampaula,” nokuba kuti inga kwayandika kapati. “Pele abo,” Petro wazumanana kati, “bali mbuli banyama batakwe muyeeyo bakalengwa mbuli zinyama ziteegwa akunyonyoonwa, nkabela mbobaamba ncobatezi, balafwidilila akunyonyooka.”—2 Petro 2:10-13.
“Mumapobwe . . . Ngobapobola Akati Kanu”
15. Bamayi babeji bajisi nzila nzi zyakweena, alimwi nkukuli nkobaongelezezya lucengo lwabo?
15 Nokuba kuti aaba bantu bampelenge “cibabotela nkulilela lyoonse isikati” alimwi otu “ntotubala, ntotumpenda,” pele alimwi mbaasilucengo. Balabeleka “kumbali,” kababelesya ‘njiisyo zinyonyoona,’ mbubwena mbuli mbwaakasaanguna kwaamba Petro. (2 Petro 2:1, 3, 13) Aboobo aba inga kabatakazyi buya caantangalala ibaalu nobakwabilila zyeelelo zya Leza zyakulilemeka kubotu nokuba kulitondezya antangalala kuti bayanda buyo kuzuzikizya zisusi zyabo zyamukoonana. Muciindi caboobo, Petro waamba kuti “balalilela beni mumapobwe aabo ngobapobola akati kanu.” Awalo Juda wakalemba kuti: “Aba bantu mbobali mabwe aayubide mumapobwe aanu.” (Juda 12) Inzya, mbubwena mbuli mabwe aabosya kunsi aameenda mbwaakonzya kubbwankula bwaato nkobuli kunsi, akwiinkizya basibwaato batacenjede, bamayi babeji bakali kweena bantu batacenjede balo mbobakacenga calweeno kuti balabayanda ciindi “[ca]mapobwe.”
16. (a) “Mapobwe” zyakali zinzi, alimwi munzila nzi zikozyanya azyeezyo nzyobanga ibataluleme balabelesya sunu? (b) Mpaali bani bamayi babeji kapati mpobagamika makanze abo, aboobo ino abo ibakanzigwa boobo beelede kucita nzi?
16 Aaya “mapobwe” kulangilwa kuti zyakali ziindi zyakusangana elyo Banakristo bamumwaanda wakusaanguna nobakasangana kuti balye cakubotelwa abeenzinyina caantoomwe. Bakamboni ba Jehova sunu abalo zimwi ziindi balayanzana, ndiza ciindi cabwiinga, nyendo zyakweendeenda akutolelela a bulilu, neciba ciindi cakumangolezya nobaswaangana abeenzinyina. Ino inga bantu bampelenge bazibelesya buti ziindi ezi kuti bacenge batacenjede? Petro ulemba kuti: “Meso aabo alizwide mamambi . . . Baloonga bapilausi.” Kapati “myoyo yabo ilizibilide lulinyanzizyo” baigamika kubantu mbobazyi kuti tabacenjede kapati munzila yakumuuya balo bakakilwa kweenda cakumaninina mukasimpe. Eelyo amucenjezegwe kuzintu zyakacitika kuciindi ca Petro, aboobo amucenjele! Amukukazye kutalilemeka koonse, alimwi mutacengwi akubota kwaciwa camuntu ooyo uutondezya kutalilemeka!—2 Petro 2:14.
“Inzila ya-Balamu”
17. “Inzila ya-Balamu” yakali buti, alimwi ino yakabajatikizya buti ibana Israyeli bali 24,000?
17 Aaba bana “balutuko” bakakaziba kasimpe kwaciindi cili mbocibede. Balakonzya kabaciboneka kuba bantu bankutwe mumbungano. Pele Petro waamba kuti: “Basia inzila iiluleme, baleya, baakutola inzila ya-Balamu mwanaakwe Beori. Ooyo musinsimi Balamu wakali kuyanda cilumbo cabutaka.” (2 Petro 2:14, 15) Inzila yamusinsimi Balamu yakali yakulailila kutalilemeka kukuzuzikizya kulikumbuzya kwakwe mwini. Wakaambila Mwami wa Moabu Balaki kuti Leza wakali kuyoobasinganya ba Israyeli kuti naa baongelezegwa kucita bwaamu. Cakacitika ncakuti, mmasimpe bantu ba Leza bakabisigwa abanakazi bana Moabu, elyo ibantu bali 24,000, bakajaigwa akaambo kakutalilemeka kwabo.—Myeelwe 25:1-9; 31:15, 16; Ciyubunuzyo 2:14.
18. Balamu wakakanzide buti kuzumanana, alimwi ino cakamucitikila citondezya nzi kuli bamayi babeji?
18 Petro alimwi watondezya kuti Balamu tanaakazumizigwa kuzumanana ciindi imbongolo yakwe noyakakanana kulinguwe, pele Balamu “wakali kuyanda cilumbo cabutaka” kapati cakuti nomuba muciimo eci cigambya, tanaakaileka “inzila” yakwe yabumpelenge. (2 Petro 2:15, 16) Wabija kaka muntu oyo! Maawe kuli baabo bali mbuli Balamu ibasola kweena bantu ba Leza kwiinda mukubasunka kucita kutalilemeka muciimo cili coonse! Balamu wakafwa akaambo kabubi bwakwe, icitondezyo ciiminina ciyakubacitikila boonse batobela inzila yakwe.—Myeelwe 31:8.
Kucenga Kwabo Kwabuna Saatani
19, 20. (a) Ibantu bali mbuli Balamu bakozyanizidwe kunzi, alimwi ino nkaambo nzi? (b) Mbaani mbobaongelezya alimwi mubuti? (c) Nkaambo nzi ncotunga tulaamba kuti lucengo lwabo ndwabuna Saatani, alimwi ino inga twalikwabilila buti swebo lwesu alimwi abamwi kubantu bali boobu?
19 Kapandulula zyabaabo ibali mbuli Balamu, Petro wakalemba kuti: “Aba bantu nzikala [naa, migoti] zitakwe maanzi, ningubi [na, makumbi] zipepuluka aguwo.” Kuli sinyendo uulaanyota mucimpayuma, ikujana cikala cinyina maanzi kakuli wasyomede kuti ulagondwa asika alincico inga caile kupa kuti awizuke akufwa. Aboobo tacigambyi kuti “bayobwedwa mudima uusia mbi” ibantu bakozya zintu zili boobu! “Balaamba majwi aakulitunkula amakani aatawo,” oobu mbwazumanana Petro, “aboobo baloongelezya azisusi zibi zyabunyama beenzinyina bati loboke kuzwa kulibaabo bateendi munzila imbotu.” Balabacenga batazyibide kwiinda “[muku]basyomezya bulubusi,” mbwaamba Petro, “anukuti balo beni mbazike babubi.”—2 Petro 2:17-19; Ba-Galatiya 5:13.
20 Ilucengo lwabamayi babeji bali boobu ndwabuna Saatani. Mucikozyanyo balakonzya kwaamba kuti: ‘Maa, Leza ulizyi kuti tulibateteete alimwi tulijisi nzyotukumbuzya. Aboobo kuti naa twacita ziyanda mibili yesu akuzuzikizya kuyandisisya kwesu kwa zyakoonana, Leza uyootubedaa luzyalo. Ikuti naa twacaamba cibi cesu, uyakutulekelela mbubwena mbuli mbwaakatulekelela lutaanzi notwakaboola mukasimpe.’ Amuyeeye kuti Diabolosi wakabelesya kuyeeya kukozyenye akooku kuli Eva, naakamusyomezya kuti wakali kukonzya kubisya kakwiina mapenzi aakali kunga amusikila kumbele. Mumakani aajatikizya Eva, wakalitaminina kuti cibi kuli Leza cakali kuyoomucenjezya akumulubusya. (Matalikilo 3:4, 5) Ikuti naa cimwi ciindi tukaswaangane amuntu mumpelenge mbuli yooyu uuyanzana ambungano, tulijisi mulimo wakulikwabilila lwesu alimwi abamwi kwiinda mukumwaamba kuli baabo bajisi mikuli mumbungano ya Bunakristo.—Levitiko 5:1.
Kukwabililwa a Luzibo Lwini-Lwini
21-23. (a) Nintenda nzi zimwi ziboola kwiinda mukukakilwa kubelesya luzibo lwini-lwini? (b) Ndipenzi nzi limbi Petro ndyakanana litikalangwe-langwe mucibalo citobela?
21 Petro mukumanizya cibeela eci calugwalo lwakwe wapandulula intenda ziliko kuti naa muntu wakakilwa kubelesya luzibo ndwaakaamba lutaanzi kuti lulayandika kapati ‘kuzintu zyoonse zyabuumi azyankombelo.’ (2 Petro 1:2, 3, 8) Mboobu mbwalemba: “Kuti banooli bavunwa kubusofwaazi bwaansi kukuzibisya Mwami Mufutuli Jesu Kristo, elyo kusule babweedela kukusambailwa akuzundwa mbubo, ncobeni magolelo aabo abija kwiinda aalutaanzi.” (2 Petro 2:20) Ma! Taalibijili makani aya. Ibantu bali boobu kuciindi ca Petro bakabubikkide ambali bulangizi bubotu bwabulumbu bwa buumi butafwiki kujulu akusala bwalunyonyooko mukutalilemeka kwakoonana kwakaindi kasyoonto buyo.
22 Eelyo Petro waamba kuti: “Nicakabota nibatakaziba inzila yabululami kwiinda kuti basaangune kwiiziba, elyo musule bafutatile mulao uusalala ngobapedwe. Kwababeda mbubonya mbobakaamba kasimpi kenikeni kakuti, Mubwa wabweedela bulusi bwakwe mwini, alakwe nkuntula uwakasambide wabweedela kwaalabana mubutimba.”—2 Petro 2:21, 22; Tusimpi 26:11.
23 Alimbi penzi lilangilwa kuti lyakatalikide kale kubatabukila Banakristo bakusaanguna, lilakozyanyaa penzi libakatazya bamwi asunu. Kaindi elyo, bamwi kutegwa bamwi bakali kutongooka kuboneka kumuka kwakuboola kwa Kristo kwakasyomezyegwa. Atulange-lange mbwaakaaingula Petro makani aya.
Sena Mulayeeya?
◻ Nzikozyanyo nzi zyotatwe zyakucenjezya Petro nzyaamba?
◻ Mbuti bamayi babeji “[mbo]banenya bwami”?
◻ Inzila ya Balamu ilibuti, alimwi ino aabo baitobela inga balasola buti kucenga abambi?
◻ Nintenda nzi ziliko naa muntu wakakilwa kubelesya luzibo lwini-lwini?
[Cifwanikiso icili apeeji 24, 25]
Balamu ncikozyanyo cakucenjezya