‘Mbuti Mbobakonzya Kumvwa?’
1 Jesu wakakankaizya kwaamba kuti: “Anzina Makani Mabotu akakambaukwe kumasi oonse.” (Mk. 13:10) Nokuba kuti tulasoleka canguzu, kucili bantu babalilwa kumyaanda-myaanda yatuulunzuma ibatana akukambaukilwa. Imfwulumende zimwi tiizyali kuuzuminzya mulimo wesu kukambaukwa. Mumasi manji mweelwe wabantu uyabuvwula cakufwambaana. Aboobo, ino bantu aabo ‘mbuti mbobakonzya kumvwa?’—Rom. 10:14.
2 Amusyome Jehova: Tweelede kuzyiba kuti Jehova uliizyi myoyo yabantu boonse mboibede. Kunyina makani abukkale bwamuntu mbobubede, ikuti kasinizyide kukayandaula kasimpe ka Leza, uyookajana.—1 Mak. 28:9.
3 Abrahamu wakalilibilikide kujatikizya bantu bakali kukkala mu Sodoma alimwi a Gomora. Pele Leza wakamusyomezya kuti munzi wa Sodoma tiiwakali kuyoonyonyoonwa pe neliba leelyo nokwakali kuyoojanwa buyo bantu bali kkumi ibaluleme. (Matl. 18:20, 23, 25, 32) Jehova kunyina naakanyonyoode bantu baluleme antoomwe abasizibi mbubwenya mbokwaatondezyegwa naakafwutula Loti alimwi abana bakwe basimbi.—2 Pet. 2:6-9.
4 Cimwi ciindi, Eliya wakayeeya kuti wakali alikke nzu iwakali kubelekela Leza wakasimpe. Pele Jehova wakamusyomezya kuti tanaakali alikke pe akuti mulimo ngwaakatalikide wakali kuyoomaniizyigwa. (1 Bam. 19:14-18) Ino mbuti mbotupona mazubaano?
5 Amujate Bubi Mumulimo wa Leza: Ikukomena kwamulimo uucisyeede ngotweelede kucita tatuuzyi. Jehova nguuyendelezya mulimo ooyu alimwi ubelesya bangelo bakwe ikucita boobo. (Ciy. 14:6, 7) Walo nguuzyi mpobweelede kugolela bukambausi mumasi oonse. Ikuti Jehova kayanda, ulakonzya kucita kuti mulumbe wa Bwami umwaigwe munzila nzyotutakonzyi kuyeeyela kutegwa bantu banji bakonzye ‘kumvwa Makani Mabotu akusyoma.’ (Inc. 15:7) Eeco Jehova ncayoocita ciyooyendelana kapati ambwabede—nkaambo ngu Leza siluyando, musongo alimwi uliluleme.
6 Tulaacoolwe cipati kubeleka kweendelanaa kuyanda kwa Jehova, ikubeleka kusikila mpotugolela kutegwa boonse baamvwe makani mabotu.—1 Kor. 9:16.