Levítico
6 Chu Jehová wanilh Moisés: 2 «Komo wi tiku kgalhakgaxmatmakgan Jehová akxni tlawa umakgolh talakgalhin: akgskgawi xtalataman xlakata tuku makuentajlika, makgkgalhanan, xafuerza makglhti tuku tapakgsini xtalataman, 3 natekgsa tuku tsankganit pero ni nawan, chu litaya tuku ni xaxlikana akxni wan pi xla ni tlawanit pulaktum umakgolh talakgalhin, wa uma tuku xlitlawat: 4 komo tlawanit talakgalhin chu lin kuenta, xlimaspitat tuku kgalhalh, tuku xafuerza makglhtinalh chu akgskgawimakglhtinalh, tuku makuentajlika, tuku tekgsli nema xtsankganit 5 o komo nalitaya tuku ni xaxlikana xlakata nakgalhi tuku tapakgsini xtalataman, xlilakgxokgot chu namaliwakani tsinu xtapalh.* Akxni nalimasiyakan pi wa lin kuenta, namakamaxki uma tiku tapakgsini. 6 Nalini sacerdote tantum borrego nema ni xatatatla chuna la akgtum tamakamastan nema namakamaxki Jehová xpalakata talakgalhin nema tlawalh. Uma borrego xlikgalhit xtapalh nema kgalhi tamakamastan xpalakata tiku tlawalh tuku nitlan, chuna la lakkaxwilinit sacerdote. 7 Sacerdote namakamasta kxlakatin Jehová xpalakata xtalakgalhin lataman, chu chuna natapatikan katuwa talakgalhin nema tlawanit».
8 Jehová wanipa Moisés: 9 «Kakamaxki uma limapakgsin Aarón chu xlakgkgawasan chu kakawani: “Wa uma limapakgsin xlakata xalhkun tamakamastan. Xalhkun tamakamastan natamakgxtakga tantaskaka asta lichali tsisa kxʼakpun pumakamastan, chu lhkuyat ni xliʼakgmixat kxʼakpun pumakamastan. 10 Chu tsisa sacerdote nalhakga xlakaskinka lhakgat nema litlawakanit lino, chu xlakata ni xalhtantala* natasiya kxtampin klhakgat, xliwilit xtatanu xalino. Nachuna, namapanu klhkaka* xalhkun tamakamastan nema lhkulh kxʼakpun pumakamastan chu anta kxlakpan nawili. 11 Alistalh nalakgpali* klhakgat chu tanu nalhakga, chu nalin lhkaka kxkilhtin kachikin niku* ankan makgankan. 12 Lhkuyat ankgalhin napasa kpumakamastan. Ni xlimixat. Chali chali tsisa, sacerdote nalhkuyu kiwi kpumakamastan, tamakamastan nalhkuyu kxkgalhni kiwi, chu namajini xmanteca tamakamastan xla takaksni kxʼakpun pumakamastan. 13 Lhkuyat ankgalhin napasa kpumakamastan. Ni xlimixat.
14 »”Wa uma limapakgsin xlakata tamakamastan xla talhtsi: xlakgkgawasan Aarón namakamaxkikgo Jehová kxlakatin pumakamastan. 15 Chatum nalitiya akgtum xmakgxtampun xatlan harina tuku kgalhi aceite chu putum olíbano nema wi kxʼakpun tamakamastan xla talhtsi, namajini kxʼakpun pumakamastan xlakata Dios nalakapastaka putuminika tamakamastan. Uma tamakamastan nalhkuyukan chu Jehová lu muksun nakgankgawanan. 16 Aarón chu xlakgkgawasan nawakgo tamakamastan nema naʼakgataxtu. Nawakgo chuna la kaxtalanchu nema ni kgalhi limaxkutin anta niku xasanto. Nawakgo kxkilhtin tabernáculo.* 17 Ni natamakchakan tuku kgalhi limaxkutin. Xlakata tuku akgataxtu xla tamakamastan nema kilhkuyunikan wa kkamaxkinit xlakata wa katapakgsini. Uma lu xasanto, chuna la tamakamastan xpalakata talakgalhin chu tamakamastan xpalakata tiku tlawalh tuku nitlan. 18 Nawakgo putum lakgkgawasan tiku xalak xfamilia Aarón. Tuku akgataxtu xla tamakamastan nema lhkuyunikan Jehová wa katapakgsini, uma limapakgsin lhuwa kilhtamaku namakgapala. Putum tuku namaklakaskinkan kʼuma tamakamastan, xasanto nawan”».
19 Jehová tachuwinampa Moisés chu wanilh: 20 «Wa uma tuku Aarón chu xlakgkgawasan namakamaxkikgo Jehová akxni xla* nalaksakkan: ankgalhin namakamastakan akgtum kilo* xatlan harina chuna la tamakamastan xla talhtsi, itat namakamastakan tsisa chu kakgotanun* namakamastakan aitat. 21 Natlawaya kaxtalanchu kʼakgtum sartén chu natalakgtlawaya aceite. Akxni nalipina, liwana talakgkaxtlawakanit nawan aceite chu laktsu laktsu namakamastaya tamakamastan xla talhtsi nema makchakanit chuna la akgtum tamakamastan nema lu muksun nakgankgawanan Jehová. 22 Xkgawasa Aarón tiku naskuja xlakgxokgo chuna la sacerdote nema laksakkanit natlawa tamakamastan. Uma akgtum limapakgsin nema lhuwa kilhtamaku namakgapala: namajinikan putum tamakamastan xlakata namakamaxkikan Jehová. 23 Tamakamastan xla talhtsi nema mastakan xpalakata sacerdote putuminika xlitamakamastat. Uma niti xliwat».
24 Jehová tachuwinampa Moisés chu wanilh: 25 «Kawani Aarón chu xlakgkgawasan: “Wa uma limapakgsin xlakata tamakamastan xpalakata talakgalhin. Animal nema namakamastakan xpalakata talakgalhin namakgnikan kxlakatin Jehová, anta niku makgnikan animal nema xalhkun makamastakan. Uma lu xasanto. 26 Nawa sacerdote tiku namakamasta xpalakata talakgalhin. Nawa anta niku xasanto, kxkilhtin tabernáculo.
27 »”Putum tuku namaklakaskinkan kʼuma tamakamastan, xasanto nawan, chu komo wi tiku namakpasa xkgalhni uma animal, xlitachakget lhakgat nema pasalh kgalhni anta niku xasanto. 28 Komo xaliwa makchaka kʼakgtum tlamink,* uma xlitalakgpakglhat. Pero komo niku makchaka xacobre, liwana naxakgakan chu nalichakgekan chuchut.
29 »”Nawakgo putum tiku sacerdotes litaxtukgo. Uma lu xasanto. 30 Pero ni xlitawat tamakamastan xpalakata talakgalhin komo nalinkan tsinu xkgalhni kxpulakni tabernáculo xlakata naxapakan talakgalhin anta niku xasanto. Uma xlitalhkuyut.