Josué
11 Akxni Jabín, mapakgsina xalak Hazor, katsilh uma, kamalakgachanilh makatsininanin Jobab, mapakgsina xalak Madón, nachuna mapakgsina xalak Simrón, mapakgsina xalak Acsaf, 2 mapakgsinanin xalak kasipijni nema xwilakgolh knorte, mapakgsinanin nema xwilakgolh kxakaxtum* ksur Kinéret, tiku xwilakgolh kSefelá chu xalak Dor xlakpanin kasipijni nema xwilakgolh kʼoeste, 3 cananeos tiku xwilakgolh kʼeste chu kʼoeste, amorreos, hititas, perizitas, jebuseos tiku xwilakgolh kkasipijni chu heveos tiku xwilakgolh kxtantun ksipi Hermón, ktiyat xla Mizpá. 4 Wa xlakata akxtum katataxtukgocha putum ksoldadoskan, lu lhuwa xwankgonit chuna la muntsaya* nema anan kxkilhtun pupunu, na katataxtukgocha xkawayujkan chu xputlawkan nema litlawakgo guerra. 5 Putum umakgolh mapakgsinanin lakkaxwilikgolh makxtum nalakgo, ankgolh chu makxtum tawilakgolh kxkgalhtuchokgo Merom xlakata nakatalatlawakgo israelitas.
6 Alistalh Jehová wanilh Josué: «Ni kakapekuani, xlakata chali watiya uma hora, xanin nakkamakamaxki israelitas. Xalakluntu nakamakgxtakga* xkawayujkan chu nakalhkuyuwiliya xputlawkan nema litlawakgo guerra». 7 Josué chu putum ksoldados kaj xalan kalipataxtukgolh lakatsu kxkgalhtuchokgo Merom. 8 Jehová kamakamaxkilh Israel, kamakgatlajakgolh chu kaputsastalanikgolh asta kxaLanka Sidón, kMisrefot-Maim, chu kʼeste kxakaxtum Mizpé; kamakgnikgolh chu niti lakgtaxtulh. 9 Chu Josué tlawalh chuna la Jehová xwaninit: xalakluntu kamakgxtakgli xkawayujkan chu kalhkuyuwilinilh xputlawkan nema xlitlawakgo guerra.
10 Nachuna, Josué taspitli, akgchipalh Hazor chu limakgnilh espada xmapakgsina, xlakata Hazor tlakg xlakaskinka kachikin xwanit xliputum umakgolh kachikinin. 11 Kalimakgnikgolh espada putum latamanin tiku xwilakgolh anta chu chuna kamalakgsputukgolh. Niti lakgtaxtulh. Alistalh Josué lhkuyuwililh Hazor. 12 Josué kaʼakgchipalh putum xkachikinin umakgolh mapakgsinanin chu kalimakgnilh espada putum xmapakgsinanin. Kamasputukgolh chuna la xlimapakgsinanit Moisés, kskujni Jehová. 13 Pero israelitas ni kalhkuyukgolh kachikinin nema xwilakgolh klaktsu sipi, kajwatiya Hazor, nema Josué lhkuyuwililh. 14 Israelitas tatamakgxtakgkgolh putum tuku xʼanan kʼumakgolh kachikinin, tuku lhuwa xtapalh chu putum xʼanimaleskan. Pero kalimakgnikgolh espada putum latamanin. Niti lakgtaxtulh. 15 Tuku Jehová xlimapakgsinit kskujni Moisés, wa uma tuku Moisés limapakgsilh Josué, chu Josué chuna tlawalh. Makgantaxtilh putum tuku Jehová xlimapakgsinit Moisés.
16 Josué akgchipalh putum uma tiyat, xkasipijni Judá, Négueb, putum xtiyat Gosén, Sefelá,* Arabá, xkasipijni Israel chu laktsu ksipi,* 17 lata ksipi Halac, nema wi lakatsu kSeír, chu asta kBaal-Gad, nema wi kxakaxtum Líbano, kxtantun sipi Hermón, chu kachipalh putum xmapakgsinanin, kamakgatlajalh chu kamakgnilh. 18 Josué lu makgas la katalatlawalh putum umakgolh mapakgsinanin. 19 Ni analh akgtum kachikin nema israelitas tlan xtalalinkgolh, kajwatiya heveos tiku xlamakgolh kʼGabaón. Putum amakgapitsin katalatlawakgolh chu kaʼakgchipakgolh. 20 Wa Jehová tiku tlawalh pi xatsakat xwa xnakujkan xlakata xtatlawakgolh guerra Israel chu ni xkalimasiyanilh talakgalhaman akxni xkamasputulh. Xtalakaskin pi nakamasputukan chuna la Jehová xlimapakgsinit Moisés.
21 Amacha kilhtamaku, Josué kamasputulh anaquim kkasipijni, kʼHebrón, kDebir, kʼAnab chu putum kxkasipijni Judá chu Israel. Josué akxtum katamasputulh xkachikinin. 22 Nialh anankgolh anaquim kxtiyatkan israelitas. Kajwatiya kʼGaza, kʼGat chu kʼAsdod. 23 Chuna Josué akgchipalh putum uma tiyat, chuna la Jehová xmalaknuninit Moisés. Wa xlakata Josué kamakgpitsinilh israelitas chuna la xkalakgchan akgatunu akgatunu tribu. Chu nialh analh guerra kʼumakgolh kachikinin.