Jueces
5 Ama kilhtamaku, Débora chu Barac xkgawasa Abinoam kilhtlikgolh uma takilhtlin:
2 «Xlakata soldados tiku laklhman xkgalhikgo xchixitkan* kʼIsrael,
xlakata kachikin tiku xatapaxuwan alh makgtayanan kʼguerra.
¡Kamalankitit Jehová!
3 ¡Kakgaxpattit, mapakgsinanin! ¡Kuenta katlawatit,
xpulalinanin kachikinin!
Akit nakkilhtlini Jehová. Naklimalanki tatlakgni* Jehová, xDios Israel.
4 Jehová, akxni taxtupi kSeír,
akxni taxtupi kxtiyat Edom,
tachikilh tiyat chu kʼakgapun taktakgocha chuchut;
puklhni sen litaxtukgolh.
5 Sipi tachikilh kxlakatin Jehová,
asta sipi Sinaí tachikilh kxlakatin Jehová, xDios Israel.
6 Kxkilhtamaku Samgar xkgawasa Anat,
kxkilhtamaku Jael, ktiji niti xlaktlawan;
latamanin alakatanu niku xtlawankgo.
7 Tiku kskujkgo kkapukuxtun kʼIsrael nialh xʼanankgo,*
nialh xʼanankgo, asta akxni akit Débora, kchilh,
asta akxni klitaxtulh la chatum tse xpalakata Israel.
8 Xlakan laksakkgolh atanu dioses.
Wa xlakata analh guerra kxmalakcha kachikinin.
Kxmakankan tipuxam mil israelitas ni xtasiya akgtum escudo
nipara kgantum lanza.
9 Kkatataya xpulalinanin Israel
tiku xatapaxuwan kataʼankgolh kachikin.
¡Kamalankitit Jehová!
10 Wixin tiku kgewilatit xalakkapejwa burros;
wixin tiku laktawilayatit xastlan lhakgat,
chu wixin tiku tlawampatit ktiji,
¡kalilakpuwantit!
11 Niku xtiyakan chuchut takgaxmatli xtachuwinkan tiku xmakgpitsikgo chuchut.
Anta lichuwinankgolh tuku xaʼakgstitum xtlawanit Jehová,
tuku xaʼakgstitum xtlawakgonit tiku kskujkgo kkapukuxtun kʼIsrael.
Wa xlakata xkachikin Jehová ankgolh kxmalakcha kachikinin.
12 ¡Kalakastakwananti, Débora, kalakastakwananti!
¡Kalakastakwananti, kalakastakwananti, kakilhtli uma takilhtlin!
¡Kataya, Barac! ¡Kakalipi mintachin, xkgawasa Abinoam!
13 Tiku tamakgxtakgkgolh kalakgankgolh tiku lu xlakaskinka xlitaxtukgo;
xkachikin Jehová kilakgmilh xlakata nakatalatlawayaw tiku lu lakgtliwakgan.
14 Tiku xalak Efraín xwilakgolh kxakapuskan;
akxtum taʼankgoyan Benjamín, kxlakgstipan misoldados.
Lata kMakír, taktakgolh xnapuxkun soldados chu tiku xalak Zabulón,
nema xkalaksakkgo tiku soldados xlitaxtukgolh.*
15 Xnapuxkun Isacar akxtum xtawilakgolh Débora.
Chuna la xwi Isacar, nachuna tawi Barac.
Katantun alh niku kxakapuskan.
Kxlakgstipan xtribu Rubén lhuwa ni xkatsikgo tuku natlawakgo.*
16 ¿Tuku xlakata laktawila kgetiy bolsas xla takuka
chu xkakgaxpatnipat mapuchwayananin tiku xkatlakgnimakgolh flauta borregos?
Kxlakgstipan xtribu Rubén lhuwa ni xkatsikgo tuku natlawakgo.*
17 Galaad xwilacha kxakilhtutu kgalhtuchokgo Jordán.
¿Tuku xlakata Dan tamakgxtakgli lakatsu niku xwilakgo barcos?
Aser tamakgxtakgli kxkilhtun pupunu,
chu chuntiya latamalh anta niku xchankgo barcos.
18 Zabulón litaxtulh akgtum kachikin nema kalipekua wililh xlatamat;*
nachuna Neftalí, anta kkasipijni.
19 Minkgolh mapakgsinanin chu talachipanankgolh;
wa xlakata latalachipakgolh mapakgsinanin xalak Canaán kTaanac, lakatsu kxchuchut Meguidó.
Nila linkgolh tuku lhuwa xtapalh chuna la plata.
20 Lata kʼakgapun latalatlawakgolh staku,
lata kxtiji talatlawakgolh Sísara.
21 Xpuxkga Cisón kaxwatalilh,
xamakgan puxkga, xpuxkga Cisón.
Kalaktayapi tiku lakgtliwakgan.
22 Wa xlakata xtakgaxmata la xtlawankgo kawayu
akxni kawayu lakapala xkgosnankgo.
23 Xʼángel Jehová wa: “Kawantit pi kaʼakgspulalh tuku nitlan Meroz,
chuna kawantit pi kakaʼakgspulalh tuku nitlan tiku anta lamakgo,
xlakata ni minkgolh makgtayakgo Jehová,
ni makgtayakgolh Jehová chu xalakgtliwakgan ksoldados”.
24 Puskat tiku tlakg sikulunatlawakanit wa Jael,
xpuskat Héber tiku quenita xwanit;
puskat tiku tlakg sikulunatlawakanit tiku lama kchiki xaxuwa.
25 Xla skinilh chuchut; xla maxkilh leche.
Kʼakgtum pulhman pulatu nema lu stlan maxkilh xatalakgtawilan leche.*
26 Pakgatu xmakan litiyalh xatakinkalhpitni kiwi.
Chu kxpakgastakat litiyalh martillo.
Liʼaknikli Sísara chu liʼakgskgalh;
lilakgchitanilh xlakgxtin chu lilakgxtokgonilh xatakinkalhpitni kiwi.
27 Kxlakatin Jael talikasnokgli; chu nialh tatsuwilh.
Kxlakatin talikasnokgli chu tamacha.
Niku talikasnokgli anta makgatlajaka.
28 Kventana talakaxtu chatum puskat.
Xtse Sísara talakaxtu krejas:
“¿Tuku xlakata makgapalama xputlaw?
¿Tuku xlakata ni kkakgaxmatni xkawayu?”.
29 Xalakgskgalalan xlakskujnin xkgalhtikgo,
chu xla xwampara tuku xwanikan:
30 “Max mapitsimakgolh tuku lhuwa xtapalh:
chatum tsumat,* chatiy laktsuman* xpalakata chatunu soldados;
xatamanin lhakgat xpalakata Sísara, tuku lhuwa xtapalh xatamanin lhakgat;
maktum xatalakatsapan lhakgat xatamanin,
maktiy xatalakatsapan lhakgat xlakata napixtawakakgo soldados”.
31 ¡Oh, Jehová! Chuna nanikgo putum mintalatlawananin,
pero tiku paxkikgoyan nalitaxtukgo chuna la chichini akxni tliwakga taya».
Chu tipuxam kata analh takaksni kkachikin.*