Xlimaktum Samuel
28 Ama kilhtamaku, filisteos kamamakxtumikgolh ksoldados xlakata nakatalatlawakgo israelitas. Wa xlakata Akís wanilh David: «Chuna la wix katsiya, wix chu misoldados nakintapinatit ktatalachipat». 2 Akxni David kgaxmatli uma, kgalhtilh: «Liwana katsiya tuku natlawa miskujni». Chu Akís wanilh: «Wa xlakata kinkuentajtlawana nalitaxtuya putum kilhtamaku».*
3 Pero Samuel xninita, chu putum israelitas xlakgtasamakgolh chu xmaknukgonit* anta kRamá, niku kxkachikin xwanit. Kxliputum kachikin, Saúl xkamapanunit skgoyunanin chu tiku xwankgo tuku aku nala.
4 Filisteos tamakxtumikgolh, ankgolh kSunem chu anta tamakgxtakgkgolh. Wa xlakata Saúl kamamakxtumilh soldados xalak Israel chu tamakgxtakgkgolh kʼGuilboa. 5 Akxni Saúl akxilhli niku xtamakgxtakgkgonit filisteos, lu lakapala tsukulh skuja xnaku chu lu pekualh. 6 Maski Saúl xkilhani Jehová, Jehová nikxni kgalhtilh, ni xlikgalhti xtamanixnat, ni xlikgalhti Urim, chu ni xlikgalhti palakachuwinanin. 7 Alistalh, Saúl kalimapakgsilh xlakskujnin: «Kakilaputsaniw chatum skgoyuna, xlakata wi tuku kamputun kgalhskin». Chu xlakskujnin wanikgolh: «Wi chatum skgoyuna anta kʼEn-Dor».
8 Wa xlakata Saúl lakgpalilh la klhakgananit xlakata ni xlakgapaska, chu kataʼalh chatiy ksoldados, xlakata katsisni xʼalh putsa uma skgoyuna. Wanilh: «Katlawa litlan, kakatasani tiku nikgonita xlakata nakkatsi tuku aku nala. Katasani tiku akit nakwaniyan». 9 Pero puskat wanilh: «Wix katsiya tuku tlawalh Saúl, pi kamapanulh kkachikin putum skgoyunanin chu tiku wankgo tuku aku nala. ¿Tuku xlakata kiskiniya uma? ¿Kiwiliniputuna akgtum liʼakgsiyat xlakata nakimakgnikan?». 10 Saúl malaknunilh kxtukuwani Jehová: «¡Kmalaknuniyan kxtukuwani Jehová, xastakna Dios, pi ni nawankan pi lipina kuenta xpalakata uma!». 11 Akxni kgaxmatli uma, puskat kgalhskilh: «¿Tiku lakaskina naktasani?». Xla kgalhtinalh: «Katasani Samuel». 12 Akxni uma puskat akxilhli «Samuel»,* pixlanka katasalh* chu wanilh Saúl: «¿Tuku xlakata kiʼakgskgawinita? ¡Wix Saúl!». 13 Mapakgsina Saúl wanilh: «Ni kapekuanti. Kakiwani, ¿tuku akxilhpat?». Puskat kgalhtilh: «Kakxilhma pi wi tiku talakakxtumachi kkatiyatni. Tasiya la chatum dios». 14 Alistalh tunkun kgalhskilh: «¿La tasiya?». Xla kgalhtinalh: «Tiku talakakxtumachi chatum kgolotsin chu lilhakgananit maktum xapakgaxtuluwa lhakgat». Akxni katsilh pi wa «Samuel» xwanit, Saúl lakgtalakgatsokgostalh.
15 Alistalh, «Samuel» kgalhskilh Saúl: «¿Tuku xlakata tlawanita pi naktakxtuparayachi?». Saúl kgalhtilh: «Lu tuwa tuku ktitaxtuma chu ni kkatsi tuku naktlawa. Filisteos kintalatlawamakgolh, chu Dios kintamakgatlininit chu nialh limaklakaskin tamanixnat nipara palakachuwinanin xlakata nakinkgalhti. Wa xlakata ktasaninitan, xlakata nakiwaniya tuku kilitlawat».
16 Pero «Samuel» wanilh: «¿Chu tuku xlakata akit kinkgalhskina komo Jehová aya tamakgatlininitan chu la uku mintalatlawana litaxtu? 17 Jehová namakgantaxti tuku kimalakpuwanilh nakwan: Jehová namakglhtiyan tamapakgsin chu namakamaxki David. 18 Wix ni kgalhakgaxpatti tuku wanin Jehová chu ni kamalakgsputu amalequitas, tiku xmakgasitsikgonit. Wa xlakata la uku Jehová chuna likatsiniman. 19 Nachuna, Jehová natlawa pi filisteos namakgatlajakgoyan wix chu Israel. Chali wix chu milakgkgawasan akxtum kintawilatit nawan. Chu Jehová na natlawa pi filisteos nakamakgatlajakgo putum soldados xalak Israel».
20 Akxni kgaxmatkgolh uma, Saúl lhkgen alh chu tamacha katutsu. Lu pekualh xlakata tuku wanilh «Samuel». Nachuna, nialh xkgalhi litliwakga xlakata nitu xwanit tantaku chu tantaskaka. 21 Akxni puskat lakgtalakatsuwilh Saúl chu akxilhli pi lu nitlan xmakgkatsima, wanilh: «Kimalana, kkgalhakgaxmatli tuku kilimapakgsi, kalipekua kwililh kilatamat xlakata naktlawa tuku kiwani. 22 Kimalana, la uku wix kakinkgaxpatni, katlawa litlan. Kakimaxki talakaskin nakmaxkiyan tsinu kaxtalanchu xlakata natatliwakglhparaya chu tlan napina anta niku pimpat». 23 Pero xla ni lakaskilh chu wa: «Nitu kaktiwalh». Pero xlakata xlakskujnin chu puskat makglhuwa wanikgolh pi xwayalh, kakgaxmatnilh. Takilh niku xma chu tawi anta kputama. 24 Uma puskat xkgalhi kxchik tantum xaskgata wakax nema xmakgonunit, wa xlakata tunkun makgnilh, nachuna tiyalh harina, lakgkgochimilh chu tlawalh kaxtalanchu nema ni xkgalhi limaxkutin. 25 Alistalh kamujunilh xliwatkan Saúl chu xlakskujnin, chu xlakan tsukukgolh wayankgo. Alistalh, tayakgolh chu ankgolh katsisni.