Génesis

37 Jacob chuntiya latamalh kxtiyat Canaán, niku xtlat latamalh chuna la tiku xalak atanu país.

2 Wa uma tuku lichuwinankan xpalakata Jacob.

Akxni José, xkgawasa, xkgalhi akgkutujun kata, xkatakuentajtlawa borregos chu cabras xkamanan Bilhá chu Zilpá, xlakpuskatin xtlat. Akgtum kilhtamaku José maxkilh xtlat akgtum nixatlan tamakatsinin xpalakata xnatalan. 3 Israel tlakg xpaxki José nixawa amakgapitsi xkamanan xlakata wa xkgawasa nema kgalhilh akxni xlina kata, chu xla matlawinanilh maktum lu xatlan lhakgat.* 4 Akxni xnatalan José akxilhkgolh pi xtlat tlakg xpaxki nixawa xlakan, tsukukgolh sitsinikgo. Chu asta ni lakatitum xtachuwinankgo.

5 Akgtum kilhtamaku, José kgalhilh akgtum tamanixnat, chu kalitachuwinalh xnatalan, chu uma tlawalh pi tlakg ksitsinikgolh. 6 Xla kawanilh: «Katlawatit litlan kakgaxpattit tuku klimanixnalh. 7 Xpachimaw trigo kxlakʼitat kapukuxtun, chu tuku xakpachinit takilh chu tayalh. Alistalh trigo nema xpachinitantit litastilikgolh tuku xakpachinit chu lakgtakilhputakgolh». 8 Xnatalan wanikgolh: «¿Wamputuna pi mapakgsina nalitaxtuya chu nakilamapakgsiyaw?». Uma xtamanixnat José chu tuku kawanilh tlawalh pi tlakg ksitsinikgolh.

9 Alistalh, José kgalhipa atanu tamanixnat chu kalitachuwinalh xnatalan. Kawanilh: «Kkgalhiparanit atanu tamanixnat. Anta xkilakgtakilhputamakgo chichini, papaʼ chu akgkawitu staku». 10 Xla litachuwinalh xtlat chu xnatalan. Wa xlakata xtlat kilhnilh chu wanilh: «¿Tuku kilhchanima uma mintamanixnat? ¿Wamputuna pi mintse, minatalan chu akit nakkalakgtalakgatsokgostayan?». 11 Chu xnatalan lakgsitsilakanikgolh José, pero xtlat chuntiya xlilakpuwama tuku xla xkawaninit.

12 Akgtum kilhtamaku, xnatalan ankgolh kamapuchwayanikgo xborregos chu xcabras xtlatkan lakatsu kSiquem. 13 Alistalh, Israel wanilh José: «Minatalan ankgonit kamapuchwayanikgo borregos chu cabras lakatsu kSiquem. Kapit kaʼakxilha». Chu José kgalhtinalh: «Tlan kintlat, nakan». 14 Chu xtlat wanipa: «Katlawa litlan, kapit akxilha komo tlan lamakgocha minatalan. Na naʼakxilha komo tlan wilakgocha borregos chu cabras chu natana kimakatsiniya». Wa xlakata, José alh lata kxakapuskan* Hebrón asta kSiquem. 15 Alistalh, akxni José xlapula kkapukuxtun tatanokglhli chatum chixku chu kgalhskilh: «¿Tuku putsapat?». 16 José wanilh: «Kkaputsama kinatalan. ¿Katsiya niku kamapuchwayanimakgolh borregos chu cabras? Katlawa litlan, kakiwani». 17 Chu chixku kgalhtilh: «Unu xlamakgolh, pero kkgaxmatli pi lawanikgolh: “Kaʼaw kDotán”». Wa xlakata José alh kaputsa xnatalan chu kakitekgsli kDotán.

18 Pero akxni nina xchan niku xlamakgolh xnatalan, xlakan akxilhkgolh pi lakgamakgat xminacha chu tsukukgolh lakkaxwilikgo chuna la namakgnikgo. 19 Chu tsukukgolh lawanikgo: «¡Kaʼakxilhtit! Aminacha manixna». 20 Katantit, kamakgniw chu kamujuw kʼakgtum pozo. Nawanaw pi tantum xaluku animal walh. Alistalh naʼakxilhaw komo nakgantaxtu xtamanixnat. 21 Pero akxni Rubén kgaxmatli uma, xlakgmaxtuputun. Xla kawanilh: «Ni kamakgniw». 22 Rubén wampa: «Ni kastajmakgantit kgalhni. Kamujutit kpozo nema wi kxakaskakni tiyat, pero nitu katlawanitit». Xla xlakgmaxtuputun xlakata tlan xmaspitnilh xtlat.

23 Wa xlakata, akxni José chalh, xnatalan makglhtikgolh xatlan lhakgat nema xlin. 24 Chipakgolh chu mujukgolh kpozo. Uma kilhtamaku ni xʼanan chuchut kʼuma pozo.

25 Alistalh tsukukgolh wayankgo, chu akxni talakayawakgolh, akxilhkgolh pi xmimakgo lhuwa stananin, ismaelitas xwankgonit. Minkgocha kʼGalaad chu xʼamakgo kʼEgipto. Xcamelloskan xlinkgo kstajat kiwi,* bálsamo* chu xchaxuwa kiwi.* 26 Wa xlakata Judá kawanilh xnatalan: «¿Chu tuku natlajayaw komo namakgniyaw kintalakan chu namakgtsekgwiliyaw pi makgniw?* 27 Kakastamaxkiw ismaelitas chu nitu katlawaniw. Xla na kintalakan chu na lin kinkgalhnikan».* Wa xlakata kgaxmatnikgolh xtalakan. 28 Chu akxni stananin madianitas titaxtukgolh anta, xnatalan José makutukgolh kpozo chu kalistamaxkikgolh ismaelitas akgpuxam tumin xaplata. Wa xlakata umakgolh lakchixkuwin linkgolh José kʼEgipto.

29 Akxni Rubén taspitli kpozo, chu akxilhli pi José nialh anta xwi, xtitli klhakgat. 30 Alistalh alh niku xwilakgo xnatalan chu pixlanka wa: «¡Kintalakan tsalalh! ¿Chu akit tuku naktlawa?».

31 Wa xlakata, makgnikgolh tantum xakgawasa cabra chu limastajakgolh kgalhni klhakgat José. 32 Alistalh linikgolh xtlatkan uma lu xatlan lhakgat chu wanikgolh: «Ktekgswi uma. Katlawa litlan, kaʼakxilhti komo uma lhakgat xla minkgawasa o ni». 33 Akxni akxilhli, pixlanka wa: «¡Wa uma klhakgat kinkgawasa! ¡Max tantum xaluku animal walh! ¡Max laktsu laktsu tlawaka José!». 34 Wa xlakata Jacob xtitli klhakgat, litatampulakgchilh lhakgat xla talipuwan* chu akglhuwa kilhtamaku lakglipuwa xkgawasa. 35 Putum xkamanan chu xlaktsuman xmakgoxamixiputunkgo, pero xla ni xmasta talakaskin namakgoxomixikan. Wata xwan: «¡Chuntiya naklakglipuwan kinkgawasa asta akxni nakan kPutaknun!».* Chu Jacob chuntiya xlakgtasama José.

36 Madianitas stakgolh José kʼEgipto. Stamaxkikgolh Potifar, xla lhuwa limapakgsin xkgalhi kxpumapakgsin faraón chu wa xpuxkukan xwanit soldados tiku xkuentajtlawakgo mapakgsina.