Taspita kgawasa tiku xtsankganit

Jesús max anta wi kPerea, pakgan niku taxtu chichini kkalhtuchokgo Jordán chu aku lichuwinalh li’akxilhtit xla borrego chu dracma nema xtsankganit. Tuku katsiniyaw wa pi akxni chatum makglakgalhina makgxtakga xtalakgalhin chu lakgtaspita Dios, kilipaxuwatkan. Fariseos chu lakgtsokgkinanin nitlan lichuwinankgo Jesús xlakata kalilakgaputsa uma latamanin. Pero ¿wi tuku kamasiyaninit umakgolh pulaktiy liʼakxilhtit? ¿Akgatekgskgo tuku makgkatsi kinTlatkan xalak akgapun xpalakata makglakgalhinanin tiku makgxtakgkgo tuku nitlan xtlawamakgo? Jesús lakaskin pi liwana naʼakgatekgskgo uma chu wa xlakata lichuwinan atanu liʼakxilhtit nema tlawa pi wi tuku namakgkatsikgo.

Kalitachuwinan chatum tlat tiku kgalhi chatiy xkamanan. Tiku tlakg talichuwinan wa xlichatiy kgawasa. Fariseos, lakgtsokgkinanin chu tiku na kgaxmatmakgo, wi tuku xlikatsinitkan xlakata uma kgawasa. Pero na kililakapastakatkan tuku Jesús lichuwinan xpalakata xatlat chu xapuxku kgawasa, xlakata na lhuwa tuku tlan nakinkamasiyaniyan tayat nema limasiyakgo. Wa xlakata kakalilakpuwaw umakgolh kgalhtutu tiku kalichuwinan Jesús:

«Chatum chixku xkgalhi chatiy xlakgkgawasan. Chu tiku xaʼaktsujku wanilh xtlat: “Tlat, xliputum tuku kgalhiya kakimaxki tuku akit kilakgchan”. Wa xlakata xlichatiykan kamapapitsinilh tuku xkgalhi» (Lucas 15:11, 12). Chuna la akxilhaw, xlichatiy kgawasa skin tuku lakgchan ni xlakata xtlat nilha, wata makglhtinamputun tuku lakgchan kaj xlakata xʼakstu natapakgsi chu natlawa tuku xla lakaskin. ¿Chu tuku tlawa?

Jesús wan: «Titaxtulh kilhtamaku, tiku xaʼaktsujku kgawasa tiyalh tuku xkgalhi chu alh kʼatanu país chu anta laktlawamilh tuku makglhtinalh, akglakgwa lilh xlatamat» (Lucas 15:13). Ni tamakgxtakga kxchik, niku xtlat xkakuentajtlawama chu xkamaxki tuku xmaklakaskinkgo, wata an kʼatanu país. Anta laktlawami tuku xmaxkikanit chu ni lakatitum lin xlatamat chu tlawa talakgxtumit xalimaxana. Akxni makgasputa xtumin, lu nitlan tuku akgspula, chuna la wan Jesús:

«Akxni putum xlaktlawamikgonita, klakgatum ama país analh tatsinkstat, chu xla tsukulh tsinksni. Asta lakgalh chatum tiku xalak ama país, chu xla malakgachalh kxkapukuxtun xlakata nakakuentajtlawa paxni. Chu na lu xwaputun tuku xkamawikan paxni, pero nitu xtawakan» (Lucas 15:14-16).

Chuna la xwan xLimapakgsin Dios, paxni tantum xaxkajwani animal xlitaxtu; maski chuna, ni anan atanu taskujut nema tlan xtlawalh. Lu tsinksma pi asta waputun tuku wakgo paxni nema kakuentajtlawama. Akxni titaxtuma uma tuku lu tuwa, tsuku lakapastaknan. ¿Tuku tlawa? Xʼakstu wanikan: «¡Chalhuwa xlakskujnin kintlat kaʼakchani tuku nawakgo, chu akit unu ktsinksnima! Naktakaxa chu naklakgan kintlat, chu nakwani: “Tlat, klakgalhinalh kxlakatin Dios xalak akgapun chu kmilakatin. Nialh xlilat minkgawasa naklitaxtu. Miskujni kakilimaxtu”». Wa xlakata, lakpuwan nataspita kxchik xtlat (Lucas 15:17-20).

¿Tuku natlawa xtlat akxni naʼakxilha? ¿Nasitsini xkgawasa chu nalakakilhni xlakata makgxtakgli xchik? ¿Nitlan namakgamakglhtinan? ¿Tuku xtlawa wix komo minkgawasa o mintsumat xwa?

KGAWASA TIKU XTSANKGANIT TASPITA KXCHIK

Alistalh, Jesús lichuwinan tuku makgkatsi chu tuku tlawa xatlat: «Akxni [kgawasa] lakgamakgatku xminacha, xtlat akxilhli chu lakgalhamalh, tokgosun lakgalh chu akgpixtilh chu lakatsukli» (Lucas 15:20). Max xatlat katsi la nitlan lilh xlatamat xkgawasa. Maski chuna, xatapaxuwan makgamakglhtinan. Xpulalinanin judíos wankgo pi lakgapaskgo chu kakninanikgo Dios, wa xlakata, akxni kgaxmatkgo uma liʼakxilhtit, ¿akgatekgskgo tuku Dios makgkatsi xpalakata latamanin tiku makgxtakgkgo xtalakgalhinkan? ¿Naʼakgatekgskgo pi Jesús limasiyanit uma talakgalhaman?

Max akxni xatlat akxilha pi xkgawasa lipuwan, katsi pi nitlan limakgkatsi tuku tlawanit. Pero xlakata xatlat wa tiku pulana an lakgapaxtokga, kgawasa ni tuwa makgkatsi nawani tuku tlawanit. Jesús lichuwinan tuku lay: «Wa xlakata xkgawasa wanilh: “Tlat, klakgalhinalh kxlakatin Dios xalak akgapun chu kmilakatin. Nialh xlilat minkgawasa naklitaxtu”» (Lucas 15:21).

Xatlat kawani kskujnin: «¡Lakapala!, kamaxtutit xalhman lhakgat nema tlakg xatlan chu kalimalhakgetit, chu kamakawilitit anillo kxmakan chu kamatunutit tatunu. Na kalitantit xaskgata toro nema makgonokanit, chu kamakgnitit, chu kawayaw chu katlawaw paskua, xlakata uma kinkgawasa xninit pero amakgtum lamapa; xtsankganit chu tekgskanit». Alistalh «tsukukgolh paxuwakgo» (Lucas 15:22-24).

Uma kilhtamaku xapuxku kgawasa xlamacha kkapukuxtun. Jesús wan xpalakata: «Akxni xtaspitma chu xtalakatsuwitilhama kchiki, kgaxmatli tatlakgni chu xtantlimaka. Wa xlakata tasanilh chatum skujni chu kgalhskilh tuku xlama. Chu xla wanilh: “Mintala taspitnit, chu nitu laninit chu wa xlakata mintlat makgnilh xaskgata toro nema makgonokanit”. Pero xla lu sitsilh chu ni tanuputulh. Wa xlakata xtlat taxtulh chu tsukulh tasaskini pi xtanulh. Xla kgalhtilh xtlat: “¡Kaʼakxilhti! Uma akglhuwata kata kskujnaninitan la miskujni, chu nipara makgtum klakatsalalh milimapakgsin, pero nipara makgtum kimaxki xaskgata cabra xlakata xakkatalipaxuwalh kiʼamigos. Pero akxni chilh minkgawasa tiku katalaktlawamilh tuku xkgalhiya lakpuskatin tiku stakgo xmaknikan, makgnini xaskgata toro nema makgonokanit”» (Lucas 15:25-30).

¿Tiku likatsikgo la xapuxku kgawasa chu nitlan lichuwinankgonit xtalakgalhaman Jesús chu la kalikatsininit latamanin chu tiku tlawakgonit talakgalhin? Lakgtsokgkinanin chu fariseos. Jesús lichuwinalh uma liʼakxilhtit xlakata fariseos nitlan akxilhkgo tuku xla tlawama. Chu putum tiku ni lakgatikgo talakgalhaman nema Dios kalimasiyani tiku makglakgalhinankgonit, kuenta xlitlawatkan tuku kinkamasiyaniyan uma liʼakxilhtit.

Tuku Jesús lichuwinama limasputu tuku xatlat wani xapuxku xkgawasa: «Kinkgawasa, wix putum kilhtamaku kintawila, chu putum tuku kkgalhi mila. Pero xlilat xwanit natlawayaw paskua chu napaxuwayaw, xlakata mintala xninit pero amakgtum lamapa; xtsankganit chu tekgskanit» (Lucas 15:31, 32).

Jesús ni lichuwinan tuku tlawalh xapuxku kgawasa. Maski chuna, katsiyaw pi akxni nilh chu lakastakwanalh Jesús, «lhuwa sacerdotes na tsukukgolh makgamakglhtinankgo takanajla» (Hechos 6:7). Max makgapitsin umakgolh sacerdotes xwilakgo akxni Jesús lichuwinalh liʼakxilhtit xla kgawasa nema xtsankganit. Xlakan na tlan xlakgpalikgolh xtapuwankan, nitlan xlimakgkatsikgolh xtalakgalhinkan chu xlakgtaspitkgolh Dios.

Lata uma kilhtamaku, xtamakgalhtawakgen Jesús tlan nakatsinikgo chu xlikatsinitkan tuku Jesús masiyalh kʼuma liʼakxilhtit. Tuku pulana kinkamasiyaniyan wa pi tlakg tlan natamakgxtakgaw kxkachikin Jehová, xlakata xla kinkakuentajtlawayan, kinkapaxkiyan chu kinkamaxkiyan tuku maklakaskinaw. Lu nitlan xkitaxtulh komo xtamakgatliniw chu xʼaw putsayaw tapaxuwan «kʼatanu país».

Xlipulaktiy tuku kinkamasiyaniyan, wa pi komo xmilh kilhtamaku xtamakgatliniw Dios, talakaskin nataktujuyaw chu nalakgtaspitaw kinTlatkan xlakata nakinkamakgamakglhtinamparayan.

Xlipulaktutu, kinkamasiyaniyan la xatlat chu xapuxku kgawasa ni lakxtum xtayatkan. Xatlat makgamakglhtinan xkgawasa chu tapati, pero xapuxku kgawasa sitsini xtala chu nitlan makgamakglhtinan. Xlikana pi kskujnin Dios tapatiputunaw chu tlan makgamakglhtinamputunaw tiku xlikana nitlan limakgkatsi tuku xtlawama chu lakgtaspita kinTlatkan. Kilipaxuwatkan pi kintalakan tiku «xninit [...] amakgtum lamapa» chu xtsankganit pero la uku tekgskanit.