Kalimasiyaw liskgalala akxni wi tuku lakkaxwiliyaw

Jesús aku lichuwinalh liʼakxilhtit xlakata kgawasa tiku xtsankganit. Xmatajinanin lilakgaxokgon, lakgtsokgkinanin chu fariseos tiku kgaxmatkgonit xliʼakgatekgsatkan pi Dios xatapaxuwan katapatiputun tiku nitlan limakgkatsikgo xtalakgalhinkan (Lucas 15:1-7, 11). La uku Jesús katachuwinan xtamakgalhtawakgen chu kalitachuwinan atanu liʼakxilhtit. Lichuwinan chatum chixku tiku kgalhi lhuwa tumin chu katsi pi kskujni o tiku pulalima xchik, tlawanit tuku nitlan.

Jesús wan pi skujni laktlawamima xtumin malana; wa xlakata malana wani kskujni pi namakglhti xtaskujut. Skujni xʼakstu kgalhskinkan: «¿Tuku naktlawa, xlakata kimalana kimakglhtima kintaskujut tuku xaklakgaya? Nialh kkgalhi litliwakga xlakata nakskuja kpukuxtu, chu kmaxanan nakskiwayan». Chu wan: «Aya kkatsi tuku naktlawa xlakata akxni nakimakglhtikan taskujut nema klakgaya, naʼanan tiku nakimakgamakglhtinankgo kxchikkan». Tunkun katasani tiku wi tuku xlaklinkgo chu kgalhskin xapulana: «¿La xlilhuwa laklipiniya kimalana?» (Lucas 16:3-5).

Xla wani: «Akgtiy mil akgtiy ciento litro aceite xla oliva». Max tiku laklin kgalhi lhuwa kiwi xla olivo o max sta aceite. Skujni wani: «Uwi minkapsnat niku kintalakkaxla, katawila chu tunkun katsokgti, akgtum mil akgtum ciento litro aceite» (Lucas 16:6).

Alistalh kgalhskimpara atanu: «Chu wix, ¿la xlilhuwa laklipina?». Xla wani: «Akgtum ciento kuxtalh xla trigo». Chu skujni wani: «Uwi minkapsnat niku kintalakkaxla, katsokgti tatipuxam». Lhuwa limaktini o lixlajani tuku xlaklin (Lucas 16:7).

Xlakata skujni lakgayajku xchik xmalana, kgalhi limapakgsin xlakata namaktsuwi tuku laklinikan malana. Akxni chuna tlawa, tlan katalalin tiku tlan namakgtayakgo akxni namakgatsankga xtaskujut.

Akxni xmalana katsi tuku tlawalh skujni, kaks lilakawan maski uma kitaxtu pi namakgatsankga xtumin. Malana malanki kskujni xlakata limaklakaskilh xliskgalala «maski ni xaʼakgstitum xwanit». Jesús wampara: «Xlakgkgawasan uma kakilhtamaku tlakg lakgskgalalan xlakata tuku tlawakgo, nixawa xlakgkgawasan xkgakganat» (Lucas 16:8).

Jesús ni wamputun pi tlan akxilha tuku tlawalh skujni o pi tlan akgskgawinankan. ¿Tuku xmasiyaputun? Kawani kstalaninanin: «Kalimaklakaskintit tuku xtapalh kgalhiyatit kkakilhtamaku xlakata nakgalhiyatit tiku nakatalalinan, xlakata akxni tuku kgalhiyatit nasputkgo, umakgolh tiku katalalinan nakamakgamakglhtinankgoyan anta niku putum kilhtamaku tlan tawilakan» (Lucas 16:9). Uma kinkamasiyaniyan pi nalimasiyayaw liskgalala chu alisokg tuku nalakkaxwiliyaw. Kskujnin Dios, «xlakgkgawasan xkgakganat», kilimasiyatkan liskgalala akxni namaklakaskinaw tuku kgalhiyaw, chu kililakapastakatkan takgalhkgalhin nema aku mima.

Kajwatiya Jehová chu Jesús wankgo tiku tlan natanu kTamapakgsin xalak kʼakgapun chu kParaíso. Wa xlakata, kiliskujatkan xlakata liwana namaklakaskinaw tuku kgalhiyaw xlakata namakgtayayaw xTamapakgsin Dios chu uma natlawa pi tlan nakatalalinaw Jehová chu Jesús. Chu kkilhtamaku nema aku mima tlan natawilayaw, maski nialhtu nalitaxtu oro, plata chu atanu tuku xtapalh.

Nachuna, Jesús wan pi tiku maklakaskinkgo chu kuentajtlawakgo tuku kgalhikgo nema xtapalh, na kuentajtlawakgo tuku tlakg xlakaskinka. Wa xlakata wan: «Komo wixin ni limasiyanitantit pi tlan maklakaskinatit tuku xtapalh kgalhiyatit nema nitlan, ¿tiku nakalakgayawayan tuku xlikana kgalhi xtapalh?» (Lucas 16:11).

Tuku Jesús kamasiyaniputun xtamakgalhtawakgen wa pi lhuwa tuku nakaskinikan xlakata tlan natanukgo «niku putum kilhtamaku tlan tawilakan». Nila skujniyaw Dios chu skujniyaw tuku lhuwa xtapalh. Wa xlakata, Jesús limasputu uma: «Ni anan chatum skujni tiku tlan naskujnani chatiy malana, xlakata nasitsini chatum chu napaxki achatum, o namaxki kakni chatum chu nalakgmakgan achatum. Nila nalitaxtuyatit xlakskujnin Dios chu xlakskujnin Tumin» (Lucas 16:9, 13).