¿Tlan xatapaxuwan nalatamayaw maski kkakilhtamaku ni paxuwakan?
«Limaxkgen rico litaxtu akxni lipaxuwa tuku kgalhi, chu rico xalimaxkgen akxni ni lipaxuwa maski lhuwa tuku kgalhi.» (Benjamin Franklin, político chu científico xalak Estados Unidos)
LHUWA akxilhkgonit pi maski lhuwa tuku nakgalhiya ni wa makgapaxuwanan. Pero xlikalanka kkakilhtamaku kaʼakxilhaw lhuwa latamanin nema ni paxuwakgo: xlakata ni lhuwa tuku kgalhikgo, xlakata nila kgalhikgo tuku lakaskinkgo o xlakata ni kgalhikgo tuku kgalhi xtalakatsu. Max wix akxilhnita pi wa uma tuku tlawa pi latamanin ni napaxuwakgo:
• Anta ktelevisión, kradio o alakatanu putum kilhtamaku kinkawanikanan pi wi tuku kinkatsankganiyan xlakata napaxuwayaw.
• Akxni latlajaputunkan kputaskujut chu kʼescuela tlawa pi akinin nakatlajaputunaw amakgapitsin.
• Akxni makgapitsin ni paxtikatsininankgo.
• Akxni kintalakatsukan o asta kiʼamigoskan lu lhuwa masiyakgo tuku kgalhikgo.
• Akxni ni tekgsaw xtakgalhtin lu xlakaskinka takgalhskinin xlakata latamat.
Akxni akxilhaw uma tuku lichuwinaw, ¿xlikana tlan xatapaxuwan nalatamayaw? Apóstol Pablo wa pi “xkatsininit” la xatapaxuwan nalatama. Xmin kilhtamaku lhuwa tuku xkgalhi chu na xmin kilhtamaku nitu xkgalhi. Lhuwa tiku xpaxkikgo pero na lhuwa tiku ni xʼakxilhputunkgo. Maski chuna titaxtulh, wa: «Kkatsininit xatapaxuwan naktawila maski tuwa o ni tuwa tuku ktitaxtuma» (Filipenses 4:11, 12, NM).
Wa xlakata tlan xatapaxuwan nalatamayaw, chu tlan nakatsiniyaw tuku kilitlawatkan. Anta kBiblia lichuwinan pulakkitsis tuku nakinkamakgtayayan xatapaxuwan nalatamayaw maski kkakilhtamaku ni paxuwakan. ¿Katsiputuna xlakata uma?