BIBLIA KALAKGPALINILH XLATAMATKAN
¿TUKU tlawalh pi chatum chixku tiku nitlan xlikatsi nakapaxki chu nakalilakgaputsa amakgapitsin? ¿Tuku tlawalh chatum mexicano xlakata nialh natlawa talakgxtumit xalimaxana? ¿Tuku xlakata makgxtakgli ciclismo chatum japonés? Xlakan nakinkawanikgoyan.
«Lixkajni xchuwinan, tlankajwa chu xlukujnan» (DENNIS O’BEIRNE)
KATA AKXNI LAKACHILH: 1958
PAÍS: INGLATERRA
ATANU: PUNK (TIKU NI LA XTALALINKAN)
LA XAKLAMA: Kimakgastajka la católico irlandés, xlakata xfamilia kintlat irlandeses. Pero kifamilia makglhuwa ki’akstu xkimalakgacha kpusikulan, chu uma ni xaklakgati. Maski chuna klakapastaka pi xaklakgati tuku xla takanajla. Xlakata uma, xaktlawa oración xla padrenuestro akgatunu katsisni; akxni xaktamanita, xakmakgpitsi uma oración chu xakʼakgatekgsputun tuku xkilhchanima akgatunu tuku xwan.
Akxni kgawasaku xakwanit kkatsiputulh tuku xtlawakgo tiku xmakgtapakgsikgo movimiento rastafari chu na kmakgtanulh grupo tiku ni xʼakxilhputunkgo nazis. Pero tuku tlakg klakgatilh wa movimiento punk. Atsinu ni chali chali xakmaklakaskin drogas, liwaka marihuana. Lhuwa xakwa kuchu, katuwa xakwili kilatamat chu ni xakkalilakgaputsa amakgapitsin. Ni lhuwa tiku xakkatalalin, ni xaklakgati xkimaxtunika foto chu ni lu xakkatachuwinan amakgapitsin, kaj xakkatachuwinan komo lu xlakaskinka xakakxilha tuku xkiwanimaka. Akxni klakapastaka putum uma kkakxilha pi lixkajni xakchuwinan, tlankajwa xakwanit chu lu xaluku xaklitaxtu. Kajwatiya tlan xakkalikatsini kiʼamigos.
Akxni xakkgalhi 20 kata kkatsiputulh tuku masiya Biblia. Chatum amigo tiku ksta drogas xtsukunit kgalhtawakga Biblia kpulachin, chu akgtum kilhtamaku makgas klichuwinaw xlakata takanajla, pusikulan chu tuku tlawa Akgskgawini kkakilhtamaku. Ktamawualh makgtum Biblia chu ktsukulh kgalhtawakga. Kiʼamigo akstu xkgalhtawakga Biblia chu akit nachuna xaktlawa, alistalh xaktamakxtumiyaw xlakata xaklikgalhchuwinaw tuku xakkatsininitaw chu xakmamakxtumiyaw tuku xakkatsiniyaw. Chuna ktlawaw akglhuwa papa.
Makgapitsi tuku akxtum kʼakgatekgswi wa: pi lamaw kxaʼawatiya kilhtamaku xla uma kakilhtamaku; kstalaninanin Cristo xlichuwinatkan xlakata xTamapakgsin Dios; ni xlimaktanutkan tuku xalak kakilhtamaku chu kpolítica, chu Biblia masta tlan tastakyaw xlakata la nalinaw kilatamatkan. Liwana xakkatsiyaw pi Biblia wan tuku xaxlikana chu pi xliʼanat xwanit akgtum xaxlikana takanajla. Pero xkinkakgalhskinkanan, ¿nema xaxlikana takanajla? Kalakputsananiw takanajla nema tlakg xkalakgapaskan chu kakxilhwi pi xmakgtanukgo kpolítica chu putum tuku tlawakan anta, chu kakxilhwi pi ni xtlawakgo chuna la Jesús xmasiyanit. Liwana xtasiya pi Dios ni xlakgati tuku xtlawakgo, wa xlakata klakpuwaw nakalakputsananiyaw takanajla nema ni lu xkalakgapaskan xlakata xakakxilhwi tuku xmasiyakgo.
Katachuwinaw makgapitsin tiku xmakgtapakgsikgo umakgolh takanajla chu katlawaniw lhuwa takgalhskinin xlakata Biblia. Komo akinin xakkatsiyawa xatakgalhtin tunkun xakkatsiyaw komo xtakgalhtin xtakilhti kxTachuwin Dios o ni. Akxni xakkatachuwinankgoyaw, xakskini Dios pi komo amakgolh latamanin xkgalhikgo xaxlikana takanajla xakakxilhputumpa alistalh. Maski lhuwa tiku xakkatachuwinanitaw, nina xaktekgsnitaw akgtum takanajla nema xlimaklakaskilh Biblia xlakata xkgalhtilh kintakgalhskininkan chu nani xakkakxilhputumpara.
Kiʼamigo chu akit katachuwinaw xtatayananin Jehová. Akxni kawaniw takgalhskinin nema xakkgalhiyaw, limaklakaskinkgolh Biblia xlakata xkgalhtikgolh takgalhskinin. Tuku kinkawanikgon na watiya xwanit tuku xakkatsiyaw. Wa xlakata katlawaniw takgalhskinin nema ni xakkatsiyaw xatakgalhtin, chuna la tuku lakpuwan Dios xlakata drogas chu axkut. Chu limaklakaskimparakgolh Biblia xlakata xkinkakgalhtikgon. Klawaniw pi xʼama anaw ktamakxtumit.
Ama tuwa kmakgkatsilh. Xlakata niti xaktachuwinan, ni klakgatilh pi minkgolh kintachuwinankgo latamanin tiku tlan xlikatsikgo chu tlan xtasiya klhakgatkan. Xaklakpuwan pi nitlan tuku xkimpuwanikgo chu nialh kalh ktamakxtumit. Pero komo ankgalhin, xakskini Dios pi xkimaxkilh litliwakga xlakata chuntiya xakkatachuwinalh umakgolh latamanin komo xkgalhikgo xaxlikana takanajla. Ktsukulh kmakgkatsi pi tlakg xakkatakgalhtawakgaputun Biblia xtatayananin Jehová.
BIBLIA LAKGPALILH KILATAMAT: Xakkatsi pi xtalakaskin xaklakgmakgalh Drogas, chu chuna ktlawalh. Tuku lu tuwa kmakgkatsilh wa nakmakxtakga axkut. Makglhuwa xakmakxtakgputun pero ni xakmakgantaxti. Akxni kilitachuwinanka pi amakgapitsin tlan makgxtakgolh akxni makgankgolh caja xla cigarro chu nialh xkulikgolh, kskinilh Jehová pi xkimakgtayalh. Lata ama kilhtamaku nialh kxkulilh. Kkatsilh pi tlawanikan oración Jehová chu nawaniya tuku makgkatsiya lu xlakaskinka.
Atanu tuku klakgpalilh wa la xaklhakganan. Akxni xlimakgtumku kkilalh ktamakxtumit kinchixit xyakgo chu xaspupuku xtasiya, chu alistalh kmanilh laxixwa. Xaklin pantalón vaquero chu chaqueta xla cuero nema xtatsokgtawilanit. Ni xaklakpuwan pi xtalakaskin xaktalakgpalilh, maski xtatayananin Jehová makglhuwa kimasiyanikgolh tastakyaw. Alistalh klilakpuwa tuku wan 1 Juan 2:15-17: «Ni kapaxkitit kakilhtamaku nipara tuku anan kkakilhtamaku. Komo wi tiku paxki kakilhtamaku, ni paxki xaTlat». Kakxilhli pi chuna la xaktasiya xlimasiya pi xakpaxki uma kakilhtamaku chu xlakata naklimasiyani kintapaxkit Dios xtalakaskin pi putum xaktalakgpalilh. Chu chuna ktlawalh.
Alistalh kkatsilh pi ni xtatayananin Jehová tiku xkiwanikgo pi xakkalh ktamakxtumit, wata wa Dios, chuna la wan Hebreos 10:24, 25. Akxni ktsukulh kkan putum ktamakxtumit chu tlakg kkalakgapasli natalan, kimakgpuwantinilh naktamakamastani Jehová.
TUKU TLAN KINKITAXTUNINIT: Tlan kimamakgkatsini akxni kakxilha pi Jehová kinkamaxkiyan talakaskin tlan natalalinaw. Xtalakgalhaman chu xtapaxkit kimakgpuwantini nachuna naklikatsi chu naklatama chuna la xkgawasa Jesucristo, xatlan li’akxilhtit (1 Pedro 2:21). Kkatsininit pi tlan naktlawa tuku klakgati pero kliskujma xlakata nakkgalhi tayat nema kgalhi chatum kstalanina Cristo. Kliskujnit nakkgalhi xatlan tayat chu xapaxkina naklitaxtu, chu kstalani xliʼakxilhtit Cristo chuna la kkalikatsini kimpuskat chu kinkgawasa. Na kkalilakgaputsa tiku kakninanikgo Dios la akit. Xlakata kstalaninit xliʼakxilhtit Cristo, tlawanit pi tlakg nakimpaxkikan, nakpaxuwa chu nakkapaxki amakgapitsin.
«Tlan kilikatsinikgolh» (GUADALUPE VILLARREAL)
KATA AKXNI LAKACHILH: 1964
PAÍS: MÉXICO
ATANU: XAKLIN XALIMAXANA LATAMAT
LA XAKLAMA: Kgalhchaxan kinatalan chu akit kstakwi kHermosillo (Sonora, México), anta niku ni lu x’anan tumin. Kintlat nilh akxni aktsujku xakwanit, wa xlakata kintse wa kuentajtlawalh familia. Ktsukulh kskuja lata aktsujku xakwanit xlakata naklimakgtayanan tuku xtalakaskin kchiki, pero ankgalhin ni xaktununan xlakata ni x’anan tumin xlakata xaktamawaw tatunu. Chuna la lhuwa familias, kilhuwakan xakwilaw.
Komo kintse tantaku x’an skuja, nila xkinkakuentajtlawayan. Akxni xakkgalhi akgchaxan kata chatum kgawasa tiku xkgalhi akgkukitsis kata kilikgamanalh chu chuna tlawalh akglhuwa kata. Tuku nitlan kitaxtulh wa pi nialh xakkatsi komo kgawasa o tsumat xaklitaxtu. Xaklakpuwan pi tlan xwanit pi xakkalakgatilh lakgkgawasan. Akxni kkatachuwinalh makuchinanin chu sacerdotes xlakata xkimaxkikgolh tastakyaw kiwanikgolh pi ni x’anan ta’akglhuwit chu pi tuku xakmakgkatsi lhuwa chuna xmakgkatsikgo.
Akxni xakkgalhi akgkutati kata putum kawanilh pi xakkalakgati lakchixkuwin. Chu chuna ktlawalh akgkawitu kata, asta xakkgalhi lhuwa lakchixkuwin. Kkatsinilh chuku chixit chu kwililh akgtum salón de belleza. Maski chuna, ni xakpaxuwa wata xakpatinama chu lhuwa xki’akgskgawikan. Xaklakpuwan pi tuku xaktlawama nitlan xwanit chu xkinkgalhskinkan komo x’anankgo latamanin tiku tlan xlikatsikgo kkakilhtamaku.
Klakapastakli kintala, tiku xtamununit la xtatayana Jehová. Xla xkilitachuwinan tuku xkatsinima pero akit ni kuenta xaktlawani. Maski chuna, xakmaxki kakni xlakata la xlin xlatamat chu xtamakgaxtokgat. Kinkukusta chu kintala lu tlan xlalikatsinikgo chu xlalimasiyanikgo tapaxkit. Titaxtulh kilhtamaku ktsukulh katakgalhtawakga Biblia xtatayananin Jehová. Xapulana ni xatapaxuwan xakkgalhtawakga pero alistalh uma talakgpalilh.
BIBLIA LAKGPALILH KILATAMAT: Kkilalh ktamakxtumit xla xtatayananin Jehová chu kakxilhli pi tanu la xlikatsikgo. Lhuwa latamanin xkililitsinkgo pero xlakan ni chuna tlawakgolh. Wata kimakgachipakgolh chu tlan kilikatsinikgolh. Lu tlan kmakgkatsilh.
Uma tuku pulana kakxilhli kakxilhpa k’akgtum asamblea chu kakxilhli pi maski lhuwa xtamakxtumikgonit umakgolh latamanin xlikatsikgo chuna la kintala: tlan xlikatsikgo chu ni x’akgskgawinankgo. Klakpuwa: «¿Wa umakgolh latamanin tiku tlan likatsikgo chu ni akgskgawinankgo tiku makgasa kkaputsama?». Xtapaxkitkan, la makxtum xwilakgo chu la xlimaklakaskinkgo Biblia xlakata xkgalhtinankgolh takgalhskinin kaks xkimalakawani. Kakxilhli pi xTachuwin Dios lu xkamakgtaya kxlatamatkan. Chu kakxilhli pi xtalakaskin lu xaklakgpalilh kilatamat komo xakkatatamakxtumiputun.
Xlikana pi lu ktalakgpalilh, xlakata xaklin kilatamat la chatum puskat. Xtalakaskin pi lu xaklakgpalilh la xakchuwinan, la xaktatsuwi, kilhakgat, kinchixit, ki’amigos chu putum. Tiku pulana xakkatalalin tsukukgolh kiwanikgo: «¿Tuku xlakata chuna tlawaya? Tlan la lipina milatamat. Ni talakaskin nalikgalhtawakgawaya Biblia. Putum kgalhiya». Nakmakgxtakga talakgxtumit xalimaxana wa tuku tlakg tuwa kmakgkatsilh.
Tuku tatsokgnit 1 Corintios 6:9-11 lakgchalh kinaku chu kkatsilh pi tlan xaktalakgpalilh. Anta wan: «¿O ni katsiyatit pi latamanin tiku ni xaʼakgstitum ni katimakglhtinankgolh xTamapakgsin Dios? Ni kataʼakgskgawitit. Tiku tlawakgo talakgxtumit nema ni xlitatlawat, tiku kakninanikgo tatlawamakgxtu, tiku akgskgawikgo tiku tamakgaxtokgkgo, lakchixkuwin tiku mastakgo talakaskin pi nakatatalakgxtumikgo xtachixkukan, lakchixkuwin tiku tatalakgxtumikgo xtachixkukan [...] ni katimakglhtinankgolh xTamapakgsin Dios. Pero makgapitsi wixin xapulana chuna xwanitantit. Pero wixin kachakgekanitantit». Jehová kamakgtayalh latamanin xalamakgasa natalakgpalikgo chu akit na tlan nakimakgtaya. Lhuwa kata kliskujli pero xtastakyaw chu xtapaxkit xtatayananin Jehová lu kimakgtayakgolh.
TUKU TLAN KINKITAXTUNINIT: La uku ktamakgaxtokgnit chu kimpuskat kimakgtaya nakmasiyaniyaw kinkgawasa nalilatama xtastakyaw Biblia. Chuna la pulana xaklama titaxtunita, chu la uku klipaxuwa lhuwa tasikulunalin. La uku kgolotsin klitaxtu k’akgtum congregación, chu kkamakgtayanit lhuwa latamanin nakatsinikgo xaxlikana xlakata xTachuwin Dios. Chuna la klakgpalilh kilatamat tlawalh pi kintse na xtsukulh likgalhtawakga Biblia chu alistalh na tamunulh. Chatum kintala tsumat tiku na xalimaxana xlin xlatamat na talakgpalilh chu xtatayana Jehová litaxtulh.
Makgapitsi latamanin tiku xkiwanikgo pi ni xaklakgpalilh kilatamat akxilhkgo pi tlakg tlan klama. Chu akit kkatsi tuku kimakgtayanit. Pulana kputsalh xtamakgtaykan xalakgskgalalan lakchixkuwin pero kaj nitlan tastakyaw kimaxkika, pero Jehová xlikana kimakgtayalh. Maski xakmakgkatsi pi ni xkiminini, xla ki’akxilhli, ni kisitsinilh chu kilimasiyanilh tapaxkit. Uma tlawalh pi xaktalakgpalilh: xlakata chatum Dios tiku lu paxkinan chu lu skgalala ki’akxilhli chu kimalaknunilh akgtum lu xatlan latamat.
«Ni xaklipaxuwa tuku xakkgalhi chu kiʼakstu xkimakgkatsikan» (KAZUHIRO KUNIMOCHI)
KATA AKXNI LAKACHILH: 1951
PAÍS: JAPÓN
ATANU: CICLISTA TIKU LHUWA TUKU XKGALHIPUTUN
LA XAKLAMA: Klakachilh kʼakgtum kachikin portuaria kShizuoka (Japón), kgalhtsayan xakwilaw kʼakgtum aktsu chiki. Kintlat xkgalhi akgtum tienda niku ksta bibicletas chu akxni aktsujku xakwanit xkilin niku xkamakgosnikan bicicletas chu uma tlawalh pi lu xaklakgatilh ciclismo. Xla xlakaskin pi ciclista profesional xakwa, wa xlakata tsukulh kimamakgatawakga akxni xakkgalhi 14 kata. Akxni xakkgalhi 16 chu 18 kata ktlajalh akgtutu títulos kʼakgtum competicia nacional deportiva. Akgtum universidad xkimakgtayaputun xlakata tlakg xakkatsinilh, pero akit klaksakli nakkan kʼakgtum centro de alto rendimiento. Akxni xakkgalhi 19 kata xaklitaxtuya ciclista profesional.
Ama kilhtamaku, kaj xaklakpuwan naklitaxtu tlakg xatlan ciclista xla Japón. Xaktlajaputun lhuwa tumin chu xaklakaskin pi kifamilia xkgalhilh akgtum tlan latamat, wa xlakata tlakg ktsukulh makgatawakgenan. Akxni xaktaxlajwani xlakata niku xakmakgatawakgenan kalixkajni o xlakata lu xaktlakwan xlakata xaktlawa lhuwa ejercicio, akstu xkiwanikan wix lakachinita xlakata ciclista nawana chu nila taxlajwaniya. Ni xlimakgas tsukulh kakxilha pi lu tlan xkinkitaxtunima xlakata xakmakgatawakga. Kilaksakka la novato del año kxapulana temporada chu kxliʼakgtiy temporada kkgamanalh xlakata naktlaja carrera niku xaklitaxtulh campeón xla Japón. Makgchaxan ktamakgxtakgli ksegundo lugar.
Lu tliwakga xakwanit chu xaktlaja lhuwa carreras, wa xlakata tsukuka kiwanikan Locomotora xla Tokai, akgtum kachikin xla uma país. Lhuwa tuku xakkgalhiputun chu asta amakgapitsi ciclistas xkinpekuanikgo xlakata niti xakkalilakgaputsa kcarreras. Xlakata tlakg ktsukulh ktlaja tumin, tlan xaktamawa tuku akit xaklakaskin. Ktamawalh akgtum chiki nema xkgalhi akgtum gimnasio nema xkgalhi tlakg xatlan aparatos chu naktamawalh akgtum putlaw nema na lu tapalaxla xwanit la kinchiki. Xlakata ni xakmakgatsankgalh kintumin klimaklakaskilh kbienes raíces chu kbolsa de valores.
Maski xakkgalhi putum uma, ni xaklipaxuwa chu akstu xkimakgkatsikan. Ama kilhtamaku xaktamakgaxtokgnita chu xakkgalhi kgalhtutu kamanan. Makglhuwa xakkatasitsi kimpustat chu kinkamanan xlakata tuku ni lu xlakaskinka, wa xlakata xlakan xkatsikgo komo xaksitsima akxni xʼakxilhkgo kilakan.
Akgtum kilhtamaku, kimpuskat tsukulh katakgalhtawakga Biblia xtatayananin Jehová, uma tlawalh pi lu xtalakgpalilh. Akxni xla wa pi xʼamputun ktamakxtumit, akit kwa pi xʼama an putum familia. Chuntiya klakapastaka kakgotanun akxni chatum kgolotsin chalh kkinchik chu tsukulh kintakgalhtawakga. Tuku kkatsinilh lakgchalh kkinaku.
BIBLIA LAKGPALILH KKILATAMAT: Ankgalhin naklakapastaka akxni klikgalhtawakgalh Efesios 5:5. Anta wan: «nipara chatum tiku tlawa talakgxtumit nema ni xlitatlawat, nipara tiku tlawa tuku lu xalixkajni, nipara tiku lhuwa tuku kgalhiputun nema xtachuna tiku kakninani tatlawamakgxtu ni katimakgtanulh kxTamapakgsin Cristo chu Dios». Kʼakgatekgsli pi carreras xla ciclistas lu xtatalakxtumi takgaman xlakata tumin chu xtlawakgo pi tlakg lhuwa tuku xakkgalhiputulh, chu kintalakapastakni nitlan tsukulh kimamakgkatsini. Kkatsilh pi komo xakmakgapaxuwaputun Jehová, kilimakgxtakgat xwanit ciclismo, uma lu tuwa xakmakgkatsi.
Aku xakmakgasputma tlakg xatlan takgaman kkilatamat chu amakgtum xaktsukuputun. Pero na xakkatsi pi akxni xakkgalhtawakga Biblia xakmakgkatsi takaksni chu tlan xkimamakgkatsini, chu uma ni xakmakgkatsi akxni xakkgamanan carreras. Kaj makgtutu kkgamanalh akxni xakkgalhtawakgama Biblia, pero kkintalakapastakni chuntiya xakkgamanamputun. Nachuna ni xakkatsi tuku tlan xaktlawalh xlakata kifamilia xkgalhilh tuku maklakaskin. Xakkgalhi akgtum taʼakglhuwit, chu kifamilia ni xlakgatikgo xasasti kintakanajla. Kintlat makgkatsilh pi xakmamaxaninit. Xlakata tuwa tuku xaktitaxtuma asta kintaxtunilh akgtum úlcera.
Tuku kimakgtayalh uma katuwa kilhtamaku wa pi chuntiya kkgalhtawakgalh Biblia chu xakkan ktamakxtumit xla xtatayananin Jehová. Tsini tsinu stakli kintakanajla. Kskinilh Jehová xkinkgaxmatnilh chu xkimakgtayalh nakakxilha pi xla kgaxmata oraciones. Kimpuskat na tlan kimamakgkatsinilh akxni kiwanilh pi ni xmaklakaskin akgtum lanka chiki xlakata xpaxuwalh. Chuntiya tsinu tsinu kstaktilhalh kintakanajla.
TUKU TLAN KINKITAXTUNINIT: Kkatsininit pi lu xlikana tuku lichuwinalh Jesús kʼMateo 6:33, niku wan: «Chuntiya pulana kaputsatit xTamapakgsin chu tuku xaʼakgstitum akxilha Dios, chu putum uma tuku maklakaskinatit na nakamaxkikanatit». Nikxni kinkatsankganinitan “tuku maklakaskinaw” kkilatamatkan. Maski nialh lhuwa ktlaja tumin chuna la xapulana xatlaja, uma akgpuxam kata nema ktitaxtunitawa nitu kinkatsankganinitan.
Akxni akxtum kkataskuja kinatalan xpalakata Dios lu tlan kimamakgkatsini chu kimakgapaxuwanit chu kmakgkatsi pi lakapala titaxtu kilhtamaku. Na tlakg tlan kkatalalin kifamilia. Nachuna kgalhtutu kinkamanan chu xlakpuskatin skujnanimakgo Jehová.