2 Makgtayanan nalakkaxtlawayaw taʼakglhuwit

LU LAKGAPUTSAKAN O AKGATUYUNKAN

Rosi wan: «Lu xaklilakgaputsa makgapitsi taʼakglhuwit, kajwatiya xaklilakpuwan chu uma xtlawa naklakpuwan tuku tlakg nitlan nala nixawa tuku xlikana lama». ¿Tuku textos makgtayanit? Pulaktum wa Mateo 6:34, Traducción del Nuevo Mundo: «Nikxni kalilakgaputsatit tuku xala chali, xlakata lichali atanu tuku nalilakgaputsayatit. Akgatunu kilhtamaku kgalhi xtaʼakglhuwit». La uku Rosi wan pi uma xtachuwin Jesús makgtayalh ni lu nalilakgaputsa tuku max nala chali. Xla wan: «Lhuwata taʼakglhuwit xakkgalhi, chu ni xtalakaskin naklilakgaputsa tuku nina xlay chu max nikxni xʼama lay».

Yasmín na xmakgkatsi pi tuku xlilakgaputsa xmakgatlajama kxlatamat. Xla wan: «Xaktasa makgapitsi kilhtamaku akgatunu semana chu lakgachunin nila xaklhtata. Xakmakgkatsi pi nitlan tapuwan tsinu tsinu xkimakgnima». ¿Tuku texto makgtayalh? Xla lichuwinan 1 Pedro 5:7, niku wan: «Kxmakan Dios nkamakgaxtakgtit xlipaks mintaklitwankan [o mintaʼakglhuwitkan], sampi wa nkalakgkatsalakaminan». Yasmín wan: «Chuntiya xaktlawani oración Jehová, titaxtulh kilhtamaku, xla kinkgalhtilh. Kmakgkatsilh xtachuna la xkimapanunika lu tsinka takuka. Min kilhtamaku taspita tuku nitlan kmakgkatsi, pero la uku kkatsi tuku tlan naktlawa xlakata naktayani».

MAMAKGASLIKAN TUKU XLITATLAWAT

Chatum tsumat tiku wanikan Isabella wan: «Klakpuwan pi kmamakgasli tuku kilitlawat xlakata kaj kimatitaxtinikanit lata klakachilh, kintlat nachuna tlawa. Klimakgxtakga tuku kilitlawat nema lu xlakaskinka kaj xlakata nitu naktlawa chu nakakxilha tele o nakjaxa. Uma nitlan tayat, xlakata tlawa pi tlakg nalakgaputsaya chu alistalh nitlan taskujut katitlawa». Akgtum tastakyaw nema lu makgtayanit, wa 2 Timoteo 2:15, niku wan: «Kana wix, kaʼakgpuwanti lantla tlan nataxtuya kxlakatin Dios, xtachuna nchatum skujni nti ni kgalhiy ntu nalimaxanan». Isabella wan: «Ni xaklakaskin pi Jehová xlimaxanalh kintaskujut kaj xlakata kmamakgasli tuku kilitlawat».

Kelly nachuna wan: «Akxni kilimastat xwanit akgtum taskujut, xaktlawa asta akxni atsinu tsankga. Chu ama kilhtamaku xaktasa, ni xaklhtata chu lu xaklilakgaputsa. Uma ni xkimakgtayama». Kelly tekgsli xtamakgtay Dios kProverbios 13:16, niku wan: «Tiku skgalala katsi tuku natlawa, pero tiku xatonto limasiya xlitonto». Xla wan tuku masiyanilh uma texto akxni lilakpuwa: «Limasiyakan liskgalala akxni lakapastakkan tuku natlawakan. La uku kkgalhi maktum agenda k’escritorio xlakata naklakkaxwili taskujut nema aku kilitlawat, chu uma kimakgtaya nakmakgantaxti tuku kilitlawat, chu ni klimakgxtakga asta xaʼawatiya naktlawa».

MAKGKATSIKAN PI AKSTU WILAKA

Cristina wan: «Kinchixku kimakgxtakgli chu kinta’akgxtakgwililh kgalhtati laktsu kinkamanankan». ¿Tuku texto xalak Biblia makgtayanit? Proverbios 17:17, niku wan: «Xaxlikana amigo putum kilhtamaku paxkinan, chu litaxtu la chatum tala akxni anan talakgaputsit». Cristina putsalh xtamakgtay amakgapitsi kskujnin Dios. ¿Tuku tekgsli? Cristina kinkawaniyan: «Tiku xakkatalalin pulaklhuwa la kimakgtayakgolh. Wi tiku kinkalinikgon taway chu xanat. Akxni makgtutu ktalakgpaliw niku xakwilaw, kinkamakgtayakgon lhuwa kiʼamigoskan. Nachuna, wi tiku kimakgtayalh naktekgsa taskujut. Kiʼamigos putum kilhtamaku kimakgtayakgolh».

Diana, tiku lichuwinaw xapulana, na xmakgkatsi pi xʼakstu xwi. Akxni xtitaxtunita putum tuku nitlan x’akgspulanit, xla lakapastaka: «Xakakxilha pi amakgapitsin akxtum xlipaxuwamakgo xlatamatkan. Pero akit lu kiʼakstu xakwi chu ni xakpaxuwa». Pulaktum texto nema makgtayanit wa Salmo 68:6, SXP: «Wa [Dios] kamaxki chiki latani natatawila [...] ti ixʼakstukan talamanaj». Diana wan: «Kkatsinilh pi uma versículo ni kajwatiya xkilhchanima pi Dios kinkamaxkiyan akgtum chiki niku natawilayaw. Kʼakgatekgsli pi Dios malaknu akgtum chiki xaʼespiritual, anta niku nitu lipekuankan chu xlikana tlan nakatalalipina atanu tiku na paxkikgo Jehová. Pero kkatsinilh pi xlakata tlan xakkatalakatsuwinilh amakgapitsin, xtalakaskin pulana xaktalakatsuwinilh Dios. Salmo 37:4, SXP, kimakgtayalh nakakxilha uma. Anta wan: “Kamakgapaxuwa Dios y kapaxki, y naʼakxilha la xla namaxkiyan wakg tu lakaskin minaku”».

Xaʼawatiya, Diana wan: «Kkatsilh pi xtalakaskin tlakg tlan xaktalalilh Jehová. Ni anan atanu tiku xtachuna. Xlakata tlan xakkatalalilh tiku na paxkikgo Jehová, klhkawililh tuku tlan xakkatatlawalh xlakata xaklipaxuwaw. Kkatsinilh nakakxilha xatlan tayat nema kgalhikgo amakgapitsin chu ni lu kuenta naktlawa tuku nitlan tlawakgo».

Xlikana pi tiku skujnikgo Dios, chuntiya makglakgalhinanin. Xtatayananin Jehová na kkgalhiyaw taʼakglhuwit la amakgapitsi latamanin. Pero tiku stalanikgo xtamasiy Biblia, liskujkgo xlakata nakamakgtayakgo amakgapitsin akxni tlan chuna tlawakgo. Wa xlakata, komo nakatalalipina umakgolh latamanin, lu tlan kitaxtu. Pero ¿tlan nakinkamakgtayayan Biblia akxni kgalhiyaw taʼakglhuwit nema nila lakkaxtlawakan la uku, la akxni kgalhiyaw tajatat nema ni kgalhi xlikuchun o akxni wi tiku niy?