3 Makgtayanan natayaniyaw taʼakglhuwit

TAJATAT NEMA NI ANAN XLIKUCHUN

Rosa wan: «Kkgalhi akgtum tajatat nema kimatitaxtinikgolh kinatlatni chu uma tlawa pi ankgalhin lu nakkatsanajwa. Kilatamat ni xtachuna la xapulana». Pulaktum tuku tlakg xlilakgaputsa wa pi xtakatsanajwat ni xmaxki talakaskin kuenta natlawa akxni xlikgalhtawakga Biblia chu atanu tuku xtakilhtinit kBiblia. Pero lu tlan mamakgkatsinilh xtachuwin Jesús nema wi kMateo 19:26: «Xpalakata Dios, paks tlan ntu malakastuka». Rosa katsinilh pi pulaklhuwa anan la tlan kgalhtawakgakan. Xlakata xtakatsanajwat ni xmaki talakaskin nakgalhtawakga, tsukulh kgaxmata grabaciones xla Biblia chu atanu likgalhtawakga nema takilhtinit kBiblia.a Rosa wan: «Komo ni xʼanalh uma tamakgtay, ni kkatsi la xaktlawalh xlakata chuntiya xaktalalilh Dios».

Akxni Rosa lilipuwan xlakata nila tlawa tuku pulana xtlawa, tlan limakgkatsi tuku wan 2 Corintios 8:12: «Sampi [...] kgalhiyatit mintapaxuwankan nalimastayatit, natapaxkatsiniy wa lantlata xmakalanilh nchatum, nixawa namastayatit wa ntu mpi ni kgalhiyatit». Umakgolh tachuwin malakapastaka Rosa pi Dios makgapaxuwa tuku tlawa, xlakata tlawa putum tuku matlani maski tatatla.

AKXNI LAKGLIPUWANKAN TIKU NIY

Diana, nema lichuwinaw xapulana, lakapastaka: «Akxni xninita kintsumat tiku xkgalhi 18 kata, lu xaklilipuwan chu klakpuwa pi nialhla xakama latama. Nialh xtachuna xʼama wan la xapulana». Pero Diana lu tlan limakgkatsilh tuku wan Salmo 94:19, niku salmista kilhtlinilh Dios: «Akxni lu xakklilipuwama tuku nitlan xkiʼakgspulama, kimatliwakglhti chu skaya kimamakgkatsini». Xla wan: «Ktlawanilh oración Jehová xlakata xkimakgtayalh naktekgsa tuku naktlawa, nema ni lu xkimalakapastakalh kintalipuwan».

Diana xatapaxuwan tsukulh kamakgtaya amakgapitsin, chu uma tlan mamakgkatsinilh. Titaxtulh kilhtamaku, xʼakstu tamalakxtumika xcrayola chatum aktsu kgawasa, nema chuntiya tlan limaninankan maski tatukxnit. Maski Diana xmakgkatsi pi nialh xatakgatsin xwanit, chuntiya tlan xkamakgtaya amakgapitsin. Xla wan: «Kaj xalan kakxilhli pi akxni xakmaklakaskin tuku wan Biblia xlakata nakkamakgtaya kilimakgalhtawakget tlan namakgkatsikgo, Jehová na tlan xkimamakgkatsinima». Diana lhkawililh kʼakgtum lista xtukuwanikan tiku talichuwinan kBiblia nema titaxtukgolh lanka talipuwan. ¿Tuku tekgsli? Diana akxilhli pi putum umakgolh «latamanin xtlawakgo oración». Na katsinilh pi ni katitekgsti takgalhtin komo ni malakkiya miBiblia.

Pero wi atanu tuku Biblia masiyanilh Diana: nalilakpuwan tuku aku mima chu ni wa tuku titaxtulh. Takgalhkgalhin nema talichuwinan kHechos 24:15 tlan mamakgkatsini: «Nalakastakwanankgoy ninin wa nti xalakwan, chu nti ni xalakwan». ¿Xlikana kanajla pi Jehová namalakastakwani xtsumat? Diana kinkawaniyan: «Kkanajla pi nakakxilhpara kintsumat, kinTlat xalak akgapun lhkawilikanita kilhtamaku akxni lakxtum naktawilayaw. Kaʼakxilha pi akxtum kwilaw kjardín xtachuna la liwana klakapastaka tuku kmakgkatsilh kilhtamaku akxni lakachilh».