Ni anan atanu taskujut tuku xtachuna
1. ¿Tuku natlawaputunaw komo xlakaskinka akxilhaw lichuwinankan Dios?
1 ¿Tuku xlakata putum kilhtamaku kinkawanikan pi kalimaxtuw kilhtamaku, kalimaklakaskiw kilitliwakgakan chu tuku kgalhiyaw xlakata nalichuwinanaw Dios? ¡Xlakata ni anan atanu taskujut tuku xtachuna! Akxni lakapastakaw la makgtayanan, tlawa pi tlakg namakgtlawaputunaw uma taskujut nema ni anan atanu tuku xtachuna chu nikxni katitatlawapa (Hech. 20:24).
2. ¿La makgtayanan akxni lichuwinanaw Dios xlakata natamalanki xalanka xtukuwani Jehová?
2 Namalanki xtukuwani Jehová. Lichuwinankan xtachuwin Dios limasiya pi xTamapakgsin Jehová nema pulalin Cristo Jesús wa natawila xlakgxokgo mapakgsinanin chu namasputu putum tuku kamakgapatinan o kamakgxtakgajnan latamanin (Mat. 6:9, 10). Uma limasiya pi kajwatiya Jehová tiku tlan kinkalakgmaxtuyan ktajatat chu klinin (Isa. 25:8; 33:24). Nachuna, xlakata akinin linaw xtukuwani Jehová, chuna la linaw kintayatkan chu akxni lipaxuw lichuwinanaw, uma natlawa pi amakgapitsin na namalankiputunkgo (1 Ped. 2:12). ¡Lu tlan makgkatsiyaw akxni lichuwinanaw xlikalanka Katiyatni xtukuwani kiMapakgsinakan Jehová! (Sal. 83:18.)
3. ¿Tuku tlan kakitaxtuni tiku kgaxmatkgo xalakwan xalaksasti?
3 Lakgmaxtunan. Jehová «ni chatum lakaskin natsankgay, chi wampi paks kalakgchankgolh nalakgaspittayanikgoy xtalakgalhinkan» (2 Ped. 3:9). Pero komo ni anan tiku nakamasiyani, ¿la tlan nakatsikgo latamanin tukuya tayat tlan akxilha chu tukuya tayat nitlan akxilha Dios? (Jon. 4:11; Rom. 10:13-15.) Akxni chatum lataman kgaxmata xalakwan xalaksasti chu makgxtakga nixatlan xtayat, ni kajwatiya tlan nalatama xliputum kilhtamaku wata na tlakg tlan lin xlatamat la uku (Miq. 4:1-4). Xlikana, akxni lhuwa lichuwinanaw xlimapakgsin Dios nakinkalakgmaxtuyan chu na nakalakgmaxtu tiku kinkakgaxmatnikgoyan (1 Tim. 4:16). ¡Lu lanka talakgalhaman xlakata makgtlawayaw uma lu xlakaskinka taskujut!
4. ¿Tuku xlakata lhuwa nalichuwinanaw xTamapakgsin chu namasiyayaw xlakata Dios?
4 Nialh makgas, lanka talakgaputsit kaj xalakapala nalaktlawa kakilhtamaku pero wantiku natatayakgo Jehová nakamakgtaya. Wa xlakata, lichuwinankan chu kamasiyanikan amakgapitsi xlakata Dios wa uma tuku tlakg lakapala xlitatlawat uku, nema xlakaskinka chu makgtayanan. Wa xlakata, ¡pulana kawiliw kkilatamatkan uma taskujut! (Mat. 6:33.)