Carta xla Lakgkgolotsin tiku Pulalinkgo xTatayananin Jehová
Kinatalankan tiku kkapaxkiyan:
¡Lu lanka talakgalhaman kgalhiyaw xlakata kinkamapakuwikanan, xtatayananin Jehová! Linaw xtukuwani xMapakgsina xlikalanka kakilhtamaku, akgtum tukuwani nema putum kilhtamaku natawila, ni anan atanu nema xtachuna. Chu wa Jehová tiku kinkawilinin uma tukuwani nema linaw, chu kata 1931 chuna kinkalilakgapaskan (Isa. 43:10). Wa xlakata lu paxuwayaw chu ni maxananaw xlakata kinkawanikanan xtatayananin Jehová.
Katsiyaw pi Akgskgawini lakputsama la namasputu xtukuwani Dios. Kachikinin nema kaʼakgchipanit ni akxilhputunkgo xtukuwani Jehová, chu Babilonia xaLanka, tamapakgsin xlikalanka kakilhtamaku xla nixaxlikana takanajla, mapanunikgonit klhuwa biblias ama tukuwani xlakata ni akxilhputunkgo. Pero Jesús ni chuna tlawalh. Xla malankilh ama tukuwani kʼoración nema kamasiyanilh kstalaninanin, anta wa pi pulana xmapakuwikgolh xtukuwani Dios: «Chuna nama wixin nawanatit akxni natlawayatit mioraciónkan: “KinTlatikan nti wilapi nkakgapun, katamasantujlilh mintukuwini”» (Mat. 6:9). Alistalh tlawanilh akgtum oración Jehová nema xlikana xtaxtuyacha kxnaku: «Kmasiyunikgonit mintukuwini nchixkuwin wa ntu xala katuxawat nkintimaxki» (Juan 17:6). Xlakata tlawayaw chuna la Jesús kinkawilinin liʼakxilhtit, la uku liwana lakpuwanitaw tlakg xatapaxuwan nalichuwinanaw xlikalanka Katiyatni xtukuwani kiDioskan.
Texto xla kata 2009, “Putum kalichuwinaw xalakwan xalaksasti tamakatsin”, kinkawanin pi liwana natlawayaw kintaskujutkan (Hech. 20:24, Traducción del Nuevo Mundo de las Santas Escrituras). Chu liwana tasiyalh pi Jehová lhuwa sikulunatlawalh taskujut nema tatlawalh katata, xlakata lhuwa lichuwinaw Dios xlikalanka katiyatni chuna limalankiw chu limasiyaw la xlilakaskinka xtukuwani Jehová. 7,313,173 katalichuwinankgolh Dios putum latamanin chu kamasiyanikgolh la nalakaxtlawakan xtaʼakglhuwitkan nema kgalhikgo chali chali tiku kgaxmatkgolh. 18,168,323 tiku ankgolh ktamakxtumit akxni talakapastakli akxni tinilh Cristo limasiya pi akxni nina min xlisputni uma xalixkajni kakilhtamaku naʼanan lhuwa millones latamanin tiku namalankikgo xtukuwani Jehová.
Asta akxni Jehová nakinkawaniyan pi nialh nalichuwinanaw xalakwan xalaksasti tamakatsin, chuntiya nalakputsayaw xlakata tlan nakatalichuwinanaw latamanin tiku wilakgo niku kinkalakgchanan nalichuwinanaw Dios (Mat. 24:14; Mar. 13:10). Max akgatunu chiki, ktiji, namalakgachayaw carta o niku nakatatanokglhaw, chuntiya kaliskujwi xlakata nakalitachuwinanaw lhuwa latamanin xtukuwani Jehová chu tuku lakapastaknit natlawa.
Lhuwa tuku likatsiyaw pi nialh makgas Jehová namasantujli xtukuwani (Eze. 36:23). Lu lakapala talakatsuwima kilhtamaku akxni tiku ni tlan lichuwinankgo xtukuwani Dios makamalakgsputukan. ¡Ama kilhtamaku lu nalipaxuwakgo xlaskujnin Jehová tiku ni makgxtakgkgolh, lichuwinankgolh xtukuwani chu tatayakgolh pi Jehová lakgchan namapakgsinan xlikalanka kakilhtamaku!
Jehová limasiya la kapaxki xkachikin xlakata kakuentajtlawa, chu litasiyalh kxalaklanka tamakxtumit xaʼakgtutu chu xaʼakgtati kakilhtamaku «Skgalalh katawilatit» nema klhuwa kachikinin katlawaka kata 2009. Tuku lalh kʼama laklanka tamakxtumit lu natalakapastaka kxkachikin Jehová, chu nakinkamakgtayayan naʼakgatekgsaw pi lu xlakaskinka skgalalh nakgalhkgalhitawilayaw xkilhtamaku Jehová (Mar. 13:37; 1 Tes. 5:1, 2, 4).
Tlan nawanaw pi Jehová tlan kinkalikatsiniyan: kinkamakgapaxuwayan, kinkamajaxayan latani kastlan, latani wi xtakni sakgat chu nakinkamajaxayan niku lhuwa wi chuchut (Sal. 23:1, 2; 100:2, 5).
Kinatalankan tiku lu kkapaxkiyan, liwana kakatsitit pi chuntiya nakasikulunatlawayan Jehová komo chuntiya nalichuwinanatit xTamapakgsin Dios papaʼ nema mimakgo.
Kakatsitit pi lu kkapaxkiyan.
Minatalankan,
Lakgkgolotsin tiku Pulalinankgo xTatayananin Jehová