Tuku xlitlawatkan tiku matitaxtikgo taʼakgchuwin kTamakxtumit xlakata xTaskujut Dios

Klikgalhtawakga La Natlawayaw xTaskujut Dios xla uma papaʼ nalakgpalikan makgapitsi tastakyaw xla Tamakxtumit xlakata xTaskujut Dios. Tastakyaw nema nalichuwinanaw tlakg kinkamakgatekgsnikanan tuku litachuwinalh kʼartículo «Tuku kilitlawatkan akxni nina aʼanaw kTamakxtumit xlakata xTaskujut Dios», nema xlimin likgalhtawakga La Natlawayaw xTaskujut Dios xla mayo kata 2009.

◼ Taʼakgchuwin. Wamputun akgtum taʼakgchuwin nema takilhtinit kʼakgtum likgalhtawakga. Tiku wilakgo ktamakxtumit ni mastakgo comentarios. Tiku mastama taʼakgchuwin nalichuwinan tuku tlakg namakgtaya congregación.

◼ Takgalhskinin chu takgalhtin. Ni lhuwa tuku nawankan akxni namatsukikan chu akxni namakgalhsputukan. Xtachuna la tlawakan akxni Likgalhtawakgakan revista Makatsinina, tlawakan takgalhskinin akgatunu párrafo. Ni lhuwa nachuwinan tiku lakgchanit. Tlan nalikgalhtawakgakan textos nema tlakg xlakaskinka chuna la nakgalhi kilhtamaku. Ni nakalikgalhtawakgakan párrafos, kajwatiya nalikgalhtawakgakan akxni chuna wan tastakyaw.

◼ Kakalitakgalhchuwinanti congregación. Kʼuma taʼakgchuwin na tlan namastakgo comentarios natalan. Tlan nawanaw pi uma akgtum taʼakgchuwin chu na tlawakan takgalhskinin chu kgalhtinankan.

◼ Liʼakxilhtit chu nakakgalhskinkan natalan. Akxni programa wan pi namatitaxti akgtum liʼakxilhtit, tala tiku namatitaxti wa lakgchan naʼakxilha pi natamatitaxti; pero ni talakaskin wa namatitaxti. Nakalaksaka tiku lichuwinankgo Dios nema wilimakgo akgtum tlan liʼakxilhtit kcongregación chu katsini la namatitaxti. Komo tlan, akxni tsankgajku kilhtamaku nalakkaxtlawakan liʼakxilhtit. Tlakg tlan nawan komo ni nawaniyaw pi kamatitaxtilh chatum tiku aku tsukulh lichuwinan Dios; chu komo lakaskinaw pi katitaxtulh kplataforma, tlan xmakgtayana nawan tiku matitaxtima. Tiku namatitaxtikgo liʼakxilhtit xlakaskinka anta nalakaʼankgo niku wilakgo natalan. Nachuna, tiku nakakgalhskinkan kplataforma natayakgo chu ni anta niku wilakgo. Xlakaskinka namakgatawakgakgo liʼakxilhtit chu tiku nakakgalhskinkan natalan. Komo chatum tiku kgalhi akgtum taʼakgchuwin nialh lhuwa kilhtamaku kgalhi chu talakaskin namaktsuwi xtaʼakgchuwin chuntiya namatitaxti liʼakxilhtit o takgalhskinin nema wi tiku xʼama tlawani. Siervos ministeriales nakgalhskinkgo kgolotsin tiku kamakgtaya nalakkaxwilikgo xtaskujutkan amakgapitsi lakgkgolotsin (o atanu kgolotsin) akxni aku nalaksaka tiku namakgtaya.

Komo wi akgtum tastakyaw tlakg xlakaskinka liwana natlawakan chuna la wan. Klakpuwanaw pi komo chuna natlawakan la wan uma artículo «lakatitum nalitlawayatit xlipaks, chu na wa ntu aktanks» kTamakxtumit xlakata xTaskujut Dios (1 Cor. 14:40).