¿Liwana katsinikgo minkamanan?
1. ¿Tuku xlakata lu xlakaskinka nakatsikgo minkamanan tuku nawankgo?
1 Nialh makgas natanuparakgo kʼescuela minkamanan. Xlikana pi lakgkgawasan kstalaninanin Cristo katuwa tuku kalitsakgsakan chu kamatlawiputunkan tuku nitlan, pero na tlan “namastakgo ntalulokgtat [o xaxlikana] ntu ntlan” (Juan 18:37). Chu minkamanan, ¿katsikgo tuku nawankgo?
2. Xlakata minkamanan nakatsikgo la nakgalhtinankgo, ¿tuku xlikatsitkan?
2 ¿Liwana katsikgo minkamanan tuku talismanin nema tlawakan kʼescuela ni xlitlawat chatum xtatayana Jehová? ¿Liwana katsi tuku xlakata nitlan? ¿Natayanikgo taʼakglhuwit komo naʼankgo kʼuniversidad? ¿Katsikgo tuku natlawakgo akxni wi tiku nakawani pi katataxtuputun, nawa kuchu o nawakgo drogas? ¿Kaj wankgo pi ni tlawakgo xlakata xtakanajlakan, o katsikgo la nakgalhtinankgo? (1 Ped. 3:15.)
3. ¿La tlan xlimaklakaskinkgolh natlatni akxni kakninanikgo Dios kfamilia xlakata nakamasiyanikgo xkamanan tuku natlawakgo?
3 Kalimaklakaskintit akxni nakakninaniyatit Dios kfamilia. Max akxni tanukgonita kʼescuela nakamakgtayatilhayatit chuna la nakgalhikgo taʼakglhuwit. Pero komo nakamasiyaniyatit la nalakkaxtlawakgo xtaʼakglhuwitkan akxni nina tanukgo kʼescuela, minkamanan tlakg tlan nakatsikgo tuku natlawakgo. Tlan chuna natlawayatit akxni kakninaniyatit Dios kfamilia. Tlan xkakakgalhskinti minkamanan tuku tlakg kamakgapekuan akxni ankgo kʼescuela. Nachuna, tlan xkalitachuwinantit tuku kalitachuwinanitata kata nema titaxtukgonit max la uku liwana naʼakgatekgskgo (Sal. 119:95). Na tlan xmakgatawakgatit chu wixin xmakgalhtawakgenakan xlitaxtutit, tiku kawanikgo tuku tlan xkgalhtawakgakgolh o tiku kataʼankgo kʼescuela. Kamasiyani minkamanan la tlan nalimaklakaskinkgo Biblia akxni nakgalhtinankgo chu la xlimaklakaskinkgolh libro Razonamiento chu Los jóvenes preguntan volumen 1 chu 2. Chatum tala puskat xkatamakgatawakga xkamanan akxni xʼamakgo tanukgo kʼescuela, xkawani pi xkatachuwinankgolh xmakgalhtawakgenanin chu xwankgolh pi xtatayananin Jehová. (Kaʼakxilhti La Atalaya 15 xla diciembre kata 2010, páginas 3 asta 5.)
4. ¿Tuku xlitlawat chatum tlat xaskgalala?
4 Kʼuma xaʼawatiya kilhtamaku, taʼakglhuwit nema titaxtukgo kamanan tlakg «skalajwa», o katuwa (2 Tim. 3:1). Pero natlatni tiku lakgskgalalan kawanikgo xkamanan tuku taʼakglhuwit max nakgalhikgo (Pro. 22:3). Wa xlakata, komo nina tanukgo kʼescuela kakamakgtaya minkamanan liwana nakatsikgo la nakgalhtinankgo.