Ni kamakgatlajan mintapekua
1. ¿Tuku xlakata makgapitsi ni malaknukgo takgalhtawakga xalak Biblia?
1 ¿Tuwa makgkatsiya namalaknuya takgalhtawakga xalak Biblia xlakata lakpuwana pi nila katimakgalhtawakgenanti? Makgapitsi xlakskujnin Dios xala makgasa Moisés chu Jeremías, nachuna xlakpuwankgo pi nila xmakgantaxtikgolh tuku xkalakgayawamaka (Éx. 3:10, 11; 4:10; Jer. 1:4-6). Wa xlakata min kilhtamaku nachuna makgkatsiyaw. ¿Tuku tlan natlawayaw?
2. ¿Tuku xlakata ni kajwatiya naʼanaw akgatunu akgatunu chiki chu atanu tiku namakgalhtawakganan?
2 Pulana kililakapastakatkan pi Jehová nikxni kinkaskiniyan tuku nila mastayaw (Sal. 103:14). Uma wamputun pi akxni kinkaskiniyan kamastaw takgalhtawakga chu kakamasiyaniw amakgapitsin, xla katsi pi tlan natlawayaw (Mat. 28:19, 20). Jehová ni kamaxkinit uma talakgalhaman kajwatiya tiku lu katsinikgo o lu tlan tlawakgo (1 Cor. 1:26, 27). Wa xlakata, ni kajwatiya naʼanaw akgatunu akgatunu chiki chu nalakpuwanaw pi atanu tiku namakgalhtawakganan.
3. ¿La kinkamasiyaniyan Jehová xlakata namakgalhtawakgenanaw?
3 Jehová kinkamasiyaniyan la natlawayaw. Jehová kinkamasiyaniyan la namakgalhtawakgananaw (2 Cor. 3:5). Anta kxkachikin, kinkawaninitan tuku xaxlikana nema lakgskgalalan xala kakilhtamaku ni katsikgo (1 Cor. 2:7, 8). Anta kBiblia akxilhaw pulaklhuwa tuku maklakaskilh Jesús akxni xmasiya, xaLanka Makgalhtawakgana. Chu kcongregación makglhuwa kinkawanikanan la natlawayaw. Nachuna, kgalhiyaw likgalhtawakga la ¿Tuku xlikana masiyay Biblia?, nema liwana chu ni tuwa la masiya tuku tlakg xlakaskinka xalak Biblia. ¡Lu ni tuwa limakgalhtawakgenankan Biblia!
4. ¿Tuku xlakata liwana katsiyaw pi Jehová nakinkamakgtayayan?
4 Xlakata Jehová kamakgtayalh Moisés chu Jeremías tlan makgantaxtikgolh tuku xkalakgayawakanit (Éx. 4:11, 12; Jer. 1:7, 8). Wa xlakata kaskiniw Jehová kakinkamakgtayan. Liwana katsiyaw pi nakinkamakgtayayan xlakata akxni makgalhtawakgananaw tlawamaw tuku makgapaxuwa: masiyamaw tuku xaxlikana xlakata Jehová (1 Juan 3:22). Wa xlakata kalakkaxwiliw namatsukiyaw akgtum takgalhtawakga xalak Biblia. Lu nalipaxuwayaw chu namakglhtinanaw lhuwa tasikulunalin.