¿Tuku kilhtamaku namin lisputni? Tuku wa Jesús
Chuna la akxilhnitaw, akxni Biblia lichuwinan xlisputni kakilhtamaku ni wamputun pi Katiyatni o latamanin nalakgsputkgo, wata kilhchanima xlisputni nixatlan kakilhtamaku niku lamaw chu putum tiku tatayakgo. Pero ¿wan Biblia akxni nalakgsputa uma xalixkajnit kakilhtamaku?
KALILAKPUWANTI UMAKGOLH PULAKTIY TACHUWIN NEMA JESÚS WA:
«Skgalalh katawilatit, xlakata ni katsiyatit tukuya kilhtamaku chu tukuya hora» (MATEO 25:13).
«Kuentajkatlawatit, skgalalh katawilatit, xlakata ni katsiyatit tukuya kilhtamaku laklhkawilikanit» (MARCOS 13:33).
Wa xlakata, kKatiyatni niti katsi akxni namin xlisputni kakilhtamaku. Pero Dios laklhkawilinita tukuya «kilhtamaku chu tukuya hora» namin lisputni (Mateo 24:36). ¿Kilhchanima uma pi nila tiku katsi pi lisputni talakatsuwima? Nichuna. Jesús kawanilh xtamakgalhtawakgen pi xkuentajtlawakgolh tuku xʼama la nema xʼama limasiya pi xtalakatsuwima xlisputni kakilhtamaku.
TUKU XʼAMA LITASIYA
Umakgolh tuku xʼama la, xʼama litasiya pi wilaw “kxlisputni kakilhtamaku”. Jesús wa: «Nalatalatlawa laklanka kachikinin chu nalatalatlawa tamapakgsin, chu naʼanan tatsinksni chu kaniwa natachiki tiyat» (Mateo 24:3, 7). Na lichuwinalh pi xʼama anan «laklixkajni tajatat» (Lucas 21:11). ¿Akxilha la kgantaxtuma tuku lichuwinalh Jesús?
La uku lhuwa latamanin patinamakgolh xlakata anan guerras, tatsinkstat, tachiki tiyat chu tajatat. Akgtum liʼakxilhtit, kkata 2004 akxni tachikilh tiyat anta kʼocéano Índico malakatsukilh akgtum tsunami nema kamakgnilh 225,000 latamanin. Kaj akgtutu kata, pandemia xla COVID-19 kamakgnilh liwaka 6.9 millones latamanin kxlikalanka Katiyatni. Jesús wa pi uma tuku xʼama la, xʼama litasiya pi xtalakatsuwima xlisputni uma kakilhtamaku.
“XAʼAWATIYA KILHTAMAKU”
Biblia lichuwinan pi pulana xʼamaw latamayaw «kxaʼawatiya kilhtamaku» chu alistalh xʼama min xlisputni kakilhtamaku (2 Pedro 3:3, 4). Chuna la wan 2 Timoteo 3:1-5, kxaʼawatiya kilhtamaku xtayatkan latamanin xʼama talakgpali (kaʼakxilhti recuadro «Akxni nina min xlisputni kakilhtamaku»). ¿Akxilha wix pi la uku latamanin xʼakstukan kapaxkikan, xalakluku, paxkikgo tumin chu nitlan kalikatsinikgo amakgapitsin? Umakgolh tuku akxilhaw na limasiya pi lakatsu wi xlisputni uma kakilhtamaku.
¿La xlilhuwa namakgapala xaʼawatiya kilhtamaku? Biblia wan pi ni makgas katimakgapalalh, uma wamputun pi Dios nakamalakgsputu «tiku malakgsputumakgolh katiyatni» (Apocalipsis 11:15-18; 12:12).
NIALH MAKGAS KATIYATNI AKGTUM PARAÍSO NAWAN
Dios laklhkawilinita kilhtamaku chu hora akxni namalakgsputu uma xalixkajnit kakilhtamaku (Mateo 24:36). Pero Dios «ni lakaskin pi wi tiku namalakgsputukan» (2 Pedro 3:9). Wa xlakata kinkamaxkiyan talakaskin nalakgapasaw chu nakgalhakgaxmataw. ¿Tuku xlakata? Xlakata xla lakaskin nalakgtaxtuniyaw uma kakilhtamaku chu nalatamayaw kxasasti kakilhtamaku nema akgtum paraíso nalitaxtu.
Dios lakkaxwilinit kxlikalanka kakilhtamaku akgtum tamasiy xalak Biblia, nema kinkamakgtayayan nakatsiniyaw tuku natlawayaw xlakata nalatamayaw kxasasti kakilhtamaku niku namapakgsinan xTamapakgsin. Jesús wa pi xalaktlan tamakatsinin xla xTamapakgsin Dios, xʼama talichuwinan «kxlilakgatum katiyatni» (Mateo 24:14). Xtatayananin Jehová kxlikalanka kakilhtamaku, akglhuwa mil millones horas lichuwinankgo chu masiyakgo xlakata takgalhkgalhin nema lichuwinan Biblia. Jesús wa pi pulana xʼama talichuwinan Dios kxlikalanka Katiyatni chu alistalh xʼama min lisputni.
Ama sputa la mapakgsinankgo latamanin. Pero lu tlan tamakatsin wa pi nalakgtaxtuniyaw xlisputni uma kakilhtamaku chu nalatamayaw kParaíso nema Dios malaknu. Artículo nema stala nalichuwinan tuku kilitlawatkan xlakata nalatamayaw kxasasti kakilhtamaku.
Tuku lichuwinalh Jesús xlakata “xaʼawatiya kilhtamaku” kinkamaxkiyan takgalhkgalhin.